၁ ၡမူၤအ့လး
၂၀ ဒီးစီၤဒၤဝံး ဃ့ၢ်ထီၣ်ကွံာ်လၢ နၤဝိး လၢအအိၣ်လၢ ဝ့ၢ်ရၤမါအပူၤလီၤ. ဘၣ်ဆၣ် အလဲၤတုၤလၢ စီၤယိနၤသၣ်အအိၣ် ဒီးတဲဝဲလၢ “ယမၤဘၣ်မနုၤလဲၣ်.+ ယတၢ်ကမၣ် အိၣ်ဒ်လဲၣ် ဒီးနပၢ်လူၤမၤသံယၤန့ၣ် မ့ၢ်ယမၤကမၣ်ဘၣ်အီၤဒ်လဲၣ်.” ၂ အဃိ စီၤယိနၤသၣ် တဲဘၣ်အီၤလၢ “လ့ၤတက့ၤ တမ့ၢ်ဘၣ်.+ နတသံဘၣ်. တၢ်လၢအဒိၣ်မ့ၢ်ဂ့ၤ, အဆံးမ့ၢ်ဂ့ၤ တချုးလၢ ယပၢ်မၤတၢ် တမံၤဂ့ၤတမံၤဂ့ၤ ဒံးဘၣ်န့ၣ် အဝဲဒုးသ့ၣ်ညါဆိယၤ ခဲလၢာ်လီၤ. မ့ၢ်ယပၢ်ကပာ်ခူသူၣ် တၢ်ဂ့ၢ်တခါအံၤ လၢယအိၣ်ဧါ. တမ့ၢ်ဘၣ်. တၢ်တခါအံၤဒု တကဲထီၣ်အသးဘၣ်.” ၃ ဘၣ်ဆၣ် စီၤဒၤဝံး တဲဝဲလၢ “နပၢ်သ့ၣ်ညါ သပှၢ်တၢၢ်လၢ နဘၣ်သူၣ်ဘၣ်သးယၤ+ အဃိ အဝဲကတဲဝဲလၢ ‘စီၤယိနၤသၣ် မ့ၢ်သ့ၣ်ညါန့ၣ် အသးကဘၣ်ဒိ အဃိ တဘၣ်ဒုးသ့ၣ်ညါအီၤတဂ့ၤ.’ သနာ်က့ ယအၢၣ်လီၤလၢ ယဟိဝၤယွၤလၢ အမူဝဲတဂၤ အမဲာ်ညါ ဒီးလၢနမဲာ်ညါလၢ ယကတုၤလၢ တၢ်သံန့ၣ် လိၣ်ထဲတစဲးဖိလီၤ.”+
၄ ဒီးစီၤယိနၤသၣ် တဲဘၣ် စီၤဒၤဝံးလၢ “တၢ်တမံၤဂ့ၤ တမံၤဂ့ၤ လၢနတဲယၤန့ၣ် ယကမၤလီၤ.” ၅ စီၤဒၤဝံး တဲဘၣ် စီၤယိနၤသၣ်လၢ “ခဲမုၢ်ဆ့ၣ်န့ၣ် မ့ၢ်ဝဲ လါထီၣ်သီအမူးလီၤ.+ ဒီးပှၤကမုၢ်လၢ်လၢ ယကဆ့ၣ်နီၤ အီၣ်တၢ်ဒီး စီၤပၤန့ၣ် လီၤတံၢ်လံ. ဘၣ်ဆၣ် နကဘၣ် ပျဲယလဲၤအိၣ်ခူသူၣ်လၢ ပျီပူၤ တုၤလၢ ခဲတဆ့ၣ် ဟါလီၤခီလီၤ. ၆ နပၢ်မ့ၢ်သ့ၣ်နီၣ်ယၤန့ၣ် တဲအီၤလၢ ‘မ့ၢ်လၢ တနံၣ်တဘျီ အတၢ်လုၢ်တၢ်ပာ် အိၣ်ဝဲလၢ ဒူၣ်ဖိထၢဖိအဂီၢ်အဃိ+ စီၤဒၤဝံး ဃ့ကညးပာ်စၢၤယၤ ဒ်သိး ယကပျဲအီၤလၢ အကက့ၤလၢအဟံၣ် လၢဝ့ၢ်ဘ့ၤသလ့ဃ့ၣ် ချ့ချ့လီၤ.’+ ၇ ဒီးအဝဲမ့ၢ်တဲလၢ ‘ဂ့ၤလံ’ န့ၣ်အခီပညီမ့ၢ်ဝဲ ယကအိၣ်ဘၣ်မုာ်မုာ်လီၤ. ဘၣ်ဆၣ် အဝဲမ့ၢ်သးဒိၣ်ထီၣ်တၢ်န့ၣ် နနာ်သ့လၢ အဝဲပာ်လီၤအသးလၢ အကမၤဘၣ်ဒိယၤ သပှၢ်တၢၢ်လီၤ. ၈ နမၤတၢ်အၢၣ်လီၤအီလီၤဒီးယၤ လၢယဟိဝၤယွၤ အမဲာ်ညါ ဝံၤလံအဃိ+ ပာ်ဖျါထီၣ် တၢ်အဲၣ်လၢအတီ လၢနခ့နပှၤယၤအံၤ အဖီခိၣ်တက့ၢ်.+ ဘၣ်ဆၣ် ယတၢ်ကမၣ် မ့ၢ်အိၣ်န့ၣ်+ တဘၣ်ဟ့ၣ်လီၤယၤလၢ နပၢ်အစုပူၤတဂ့ၤ, မၤသံယၤလၢ နနီၢ်ကစၢ်တက့ၢ်.”
၉ ဒီးစီၤယိနၤသၣ်တဲဝဲလၢ “တဘၣ်ဆိကမိၣ် ဒ်န့ၣ်နီတစဲးတဂ့ၤ. ယမ့ၢ်သ့ၣ်ညါလၢ ယပၢ်ပာ်လီၤအသးလၢ အကမၤဘၣ်ဒိနၤ သပှၢ်တၢၢ်န့ၣ် ယကတဲဘၣ်နၤ တမ့ၢ်ဧီၤ.”+ ၁၀ ဒီးစီၤဒၤဝံး တဲစီၤယိနၤသၣ်လၢ “နပၢ်တဲဆၢက့ၤနၤ ဆူၣ်ဆူၣ်ကိၤကိၤဧါ တဆူၣ်ဆူၣ်ကိၤကိၤဘၣ်ဧါန့ၣ် မတဂၤ ကတဲကျၢယၤလဲၣ်.” ၁၁ စီၤယိနၤသၣ် တဲဘၣ် စီၤဒၤဝံးလၢ “ဟဲ, ပကလဲၤဟးလၢ ပျီပူၤ.” အဃိ အဝဲသ့ၣ် လဲၤဟးလၢ ပျီပူၤလီၤ. ၁၂ ဒီးစီၤယိနၤသၣ် တဲစီၤဒၤဝံးလၢ “မ်အံၣ်စရ့လးအကစၢ် ယဟိဝၤယွၤ ကဲပှၤအုၣ်အသးတက့ၢ်. ခဲမုၢ်ဆ့ၣ် မ့တမ့ၢ် ခဲတဆ့ၣ် အဆၢကတီၢ် ဒ်အံၤန့ၣ် ယကသမံသမိးယပၢ်လီၤ. အတၢ်ပာ်သူၣ်ပာ်သး မ့ၢ်ဂ့ၤလၢန* ဖီခိၣ်န့ၣ် ယကဆှၢလီၤန့ၢ်နၤ တၢ်ကစီၣ် ဒီးဒုးသ့ၣ်ညါနၤလီၤ. ၁၃ ဘၣ်ဆၣ် ယပၢ် မ့ၢ်အဲၣ်ဒိး မၤဘၣ်ဒိနၤ ဒီးယမ့ၢ်တဒုးသ့ၣ်ညါနၤဘၣ် ဒီးယမ့ၢ်တပျဲက့ၤနၤ ပူၤပူၤဖျဲးဖျဲးဘၣ်န့ၣ် မ်ယဟိဝၤယွၤ သိၣ်ဃီၣ်ယၤ* ဆူၣ်ဆူၣ်တက့ၢ်. မ်ယဟိဝၤယွၤ အိၣ်ဒီးနၤဒ်+ အအိၣ်ဒီး ယပၢ်လၢညါအသိးတက့ၢ်.+ ၁၄ ဖဲယအိၣ်မူဒံးအခါ ဒီးယမ့ၢ်သံဒၣ်လဲာ်န့ၣ် မ်နပာ်ဖျါထီၣ် ယဟိဝၤယွၤ အတၢ်အဲၣ်လၢအတီ လၢယဖီခိၣ်တက့ၢ်.+ ၁၅ ဒီးဖဲယဟိဝၤယွၤ မၤလီၤမၢ်ကွံာ် န* ဒုၣ်နဒါခဲလၢာ်လၢ ဟီၣ်ခိၣ်ချၢအခါဒၣ်လဲာ် တဘၣ်ထုးကွံာ် နတၢ်အဲၣ်လၢအတီ လၢယစၢၤယသွဲၣ်တဖၣ်* အဖီခိၣ် နီတဘျီတဂ့ၤ.”+ ၁၆ အဃိ စီၤယိနၤသၣ် မၤတၢ်အၢၣ်လီၤအီလီၤဒီး စီၤဒၤဝံးအစၢၤအသွဲၣ်တဖၣ်* ဒီးတဲဝဲလၢ “ယဟိဝၤယွၤ ကဟံးန့ၢ် စီၤဒၤဝံး အဒုၣ်အဒါတဖၣ် အရ့လီၤ.” ၁၇ မ့ၢ်လၢ စီၤယိနၤသၣ် အဲၣ်စီၤဒၤဝံး ဒ်အအဲၣ်လီၤအနီၢ်ကစၢ်အသး အဃိ အမၢစီၤဒၤဝံး အၢၣ်လီၤကဒီးအီၤ တဘျီလၢ စီၤဒၤဝံးအတၢ်အဲၣ်အီၤအဃိလီၤ.+
၁၈ ဒီးစီၤယိနၤသၣ် တဲအီၤလၢ “ခဲမုၢ်ဆ့ၣ်န့ၣ် မ့ၢ်ဝဲ လါထီၣ်သီအမူး+ ဒီးနလီၢ်ဆ့ၣ်နီၤ ကလီၤဟိဝဲအဃိ ပှၤကသ့ၣ်နီၣ်ဘၣ်နၤလီၤ. ၁၉ ခဲတဆ့ၣ်န့ၣ် ပှၤကသ့ၣ်နီၣ်ဘၣ်နၤဒိၣ်န့ၢ်အလီၢ် ဒီးနကဘၣ်လဲၤလၢ တၢ်လီၢ်အံၤလၢ နလဲၤအိၣ်ခူသူၣ် ပာ်စၢၤလၢ အဝဲတနံၤ ဒီးအိၣ်လၢ လၢၢ်ဖဲအံၤတဖျၢၣ် အဃၢၤတက့ၢ်. ၂၀ ဝံၤဒီး ယကခးပျၢ်သၢဘ့ၣ် လၢလၢၢ်တဖျၢၣ်န့ၣ်အဃၢၤ တကပၤဃီ ဒီးကလီၤဂာ်ဒ် ယပညိၣ် ခးတၢ်တမံၤမံၤအသိးလီၤ. ၂၁ ဖဲယမၢလီၤ ပှၤမၤစၢၤတၢ်တဂၤအခါ ယကတဲအီၤလၢ ‘လဲၤဃုန့ၢ်ပျၢ်တဖၣ်န့ၣ်.’ ယမ့ၢ်တဲအီၤလၢ ‘ပျၢ်တဖၣ်န့ၣ် အိၣ်လၢ နကပၤလၢအံၤတခီ, လဲၤဟံးန့ၢ်အီၤ’ န့ၣ်နဟဲက့ၤသ့ဝဲလီၤ. ယအၢၣ်လီၤလၢ ယဟိဝၤယွၤလၢအမူဝဲတဂၤ အမဲာ်ညါလၢ တၢ်မ့ၢ်ကဲထီၣ်အသး ဒ်န့ၣ်န့ၣ် အခီပညီမ့ၢ်ဝဲ နကအိၣ်ဘၣ်မုာ်မုာ် ဒီးတၢ်ဘၣ်ယိၣ်အလီၢ် တအိၣ်နီတမံၤဘၣ်. ၂၂ ဘၣ်ဆၣ် ယမ့ၢ်တဲအီၤလၢ ‘ကွၢ်လၢန့ၣ်, ပျၢ်တဖၣ်န့ၣ် အိၣ်လၢ နမဲာ်ညါဒံး’ န့ၣ်ဟးထီၣ်ကွံာ်ဟီ, မ့ၢ်လၢယဟိဝၤယွၤ အဲၣ်ဒိးလၢ နကဟးထီၣ်ကွံာ်အဃိလီၤ. ၂၃ မ့မ့ၢ်လၢ တၢ်အၢၣ်လီၤလၢ ပမၤပာ်စၢၤန့ၣ်+ မ်ယဟိဝၤယွၤ ကဲပှၤအုၣ်အသးလၢ နၤဒီးယၤ အဘၢၣ်စၢၤ လီၤထူလီၤယိာ်တက့ၢ်.”+
၂၄ အဃိ စီၤဒၤဝံး အိၣ်ခူသူၣ်လၢ ပျီပူၤလီၤ. ဖဲလါထီၣ်သီအမူး ဘၣ်ဝဲအခါ စီၤပၤလဲၤဆ့ၣ်နီၤလၢ အလီၢ်ဆ့ၣ်နီၤ ဒ်သိးကအီၣ်တၢ် အဂီၢ်လီၤ.+ ၂၅ စီၤပၤန့ၣ် ဆ့ၣ်နီၤဝဲလၢ အလီၢ်ဆ့ၣ်နီၤ လၢအညီနုၢ်ဆ့ၣ်နီၤဝဲ ဘူးဒီး တၢ်ဒူၣ်ကပၤလီၤ. စီၤယိနၤသၣ် ဆ့ၣ်နီၤ ကွၢ်ဆၢမဲာ်လိာ်သးဒီး စီၤစီလူး ဒီးစီၤအဘံန့ၢ်န့ၣ်+ ဆ့ၣ်နီၤလၢ စီၤစီလူးအကပၤလီၤ. မ့မ့ၢ် စီၤဒၤဝံး အလီၢ်ဆ့ၣ်နီၤန့ၣ် လီၤဟိဝဲလီၤ. ၂၆ စီၤစီလူး တဲလီၤအသးလၢ ‘မ့ၢ်လၢ တၢ်ကကဲထီၣ်အသး တမံၤမံၤလံအဃိ အဝဲတကဆှီလၢၤဘၣ်. အတကဆှီဘၣ်န့ၣ် လီၤတံၢ်လံ.’+ အဃိ တၢ်တနံၤန့ၣ် စီၤစီလူး တတဲတၢ်နီတမံၤဘၣ်. ၂၇ ဒီးလၢ လါထီၣ်သီအမူး ခံသီတသီန့ၣ် စီၤဒၤဝံး အလီၢ်ဆ့ၣ်နီၤ လီၤဟိဒံးလီၤ. အဃိ စီၤစီလူး တဲဘၣ် အဖိခွါ စီၤယိနၤသၣ်လၢ “တနံၤအံၤမ့ၢ်ဂ့ၤ မဟါတနံၤမ့ၢ်ဂ့ၤ ဘၣ်မနုၤအဃိ စီၤယံးၡဲအဖိခွါ+ တဟဲအီၣ်တၢ်ဘၣ်လဲၣ်.” ၂၈ စီၤယိနၤသၣ် တဲဆၢက့ၤ စီၤစီလူးလၢ “စီၤဒၤဝံး ဃ့ကညးယၤ ဒ်သိးယကပျဲက့ၤအီၤလၢ ဝ့ၢ်ဘ့ၤသလ့ဃ့ၣ်လီၤ.+ ၂၉ အဝဲတဲယၤလၢ ‘ဝံသးစူၤ ပျဲက့ၤယၤမီၤ, မ့ၢ်လၢ ပဒူၣ်ဖိထၢဖိ ကမၤ တၢ်လုၢ်တၢ်ပာ် လၢဝ့ၢ်ပူၤအဃိ ယဒီပုၢ်ဝဲၢ်ခွါတဂၤ ကိးယၤလီၤ. နမ့ၢ်ဘၣ်သူၣ် ဘၣ်သးယၤန့ၣ် ဝံသးစူၤ ပျဲက့ၤယၤလၢ ယဒီပုၢ်ဝဲၢ်တဖၣ် အအိၣ် ကစုဒုမီၤ.’ အဃိန့ၣ် စီၤဒၤဝံး တဟဲအီၣ်တၢ်ဒီးနၤ* ဘၣ်.” ၃၀ စီၤစီလူး သးပှံၢ်ထီၣ် စီၤယိနၤသၣ် ဒီးတဲအီၤလၢ “ပိာ်မုၣ်နၢ်က့ၣ် အဖိခွါဧၢ, နအိၣ်ဃူ စီၤယံးၡဲအဖိခွါန့ၣ် နဆိကမိၣ်လၢ ယတသ့ၣ်ညါဧီၤ. နမၤမဲာ်ဆှးလီၤနသး ဒီးနမၤမဲာ်ဆှးနမိၢ်လီၤ. ၃၁ ဖဲစီၤယံးၡဲအဖိခွါ အိၣ်မူဒံးဝဲလၢ ဟီၣ်ခိၣ်အခါန့ၣ် နၤဒီးနတၢ်ပၢအလီၢ် တအိၣ်ဂၢၢ်အိၣ်ကျၢၤဘၣ်.+ အကဘၣ်သံလီၤ, အဃိ ခဲအံၤ ဆှၢလီၤပှၤတဂၤ ဒ်သိး အကဟဲကိးအီၤ လၢယအိၣ်တက့ၢ်.”+
၃၂ ဘၣ်ဆၣ် စီၤယိနၤသၣ် တဲအပၢ် စီၤစီလူးလၢ “ဘၣ်မနုၤအဃိ အကြၢးသံလဲၣ်.+ အမၤဘၣ်မနုၤလဲၣ်.” ၃၃ ဖဲန့ၣ်ဒီး စီၤစီလူး ကွံာ်ဆဲးဝဲ စီၤယိနၤသၣ်လၢဘီ ဒ်သိးကမၤသံအီၤ+ အဃိ စီၤယိနၤသၣ် သ့ၣ်ညါဘၣ်ဝဲလၢ အပၢ် ပာ်လီၤအသး လၢအကမၤသံ စီၤဒၤဝံးလီၤ.+ ၃၄ လၢတၢ်သးထီၣ်အပူၤ စီၤယိနၤသၣ် ဂဲၤဆၢထၢၣ်လၢ စီၢ်နီၤခိၣ်အမဲာ်ညါ သတူၢ်ကလာ်လီၤ. ဒီးမ့ၢ်လၢ အသးတမုာ်လၢ စီၤဒၤဝံးအဂီၢ်ဘၣ်+ ဒီးခီဖျိလၢ အပၢ်မၤမဲာ်ဆှးအီၤအဃိ ဖဲလါထီၣ်သီအမူး ခံသီတသီန့ၣ် အဝဲတအီၣ်တၢ်နီတမံၤဘၣ်.
၃၅ လၢဂီၤခီန့ၣ် စီၤယိနၤသၣ် လဲၤဝဲလၢပျီပူၤ ဖဲတၢ်လီၢ်လၢ အီၤဒီး စီၤဒၤဝံး ပာ်ပနီၣ်ဃာ်ဝဲန့ၣ်လီၤ. ဒီးပှၤမၤစၢၤတၢ်လၢ အသးစၢ်တဂၤ လဲၤပိာ်အခံလီၤ.+ ၃၆ ဒီးအတဲဘၣ် အပှၤမၤစၢၤတၢ်တဂၤန့ၣ်လၢ “ဝံသးစူၤ လဲၤလူၤဃု ပျၢ်လၢ ယကခးအီၤတဖၣ် န့ၣ်တက့ၢ်.” ပှၤမၤစၢၤတၢ်တဂၤန့ၣ် လဲၤဃ့ၢ်ဝဲ ဒီးစီၤယိနၤသၣ် ခးတလၢဝဲပျၢ်လၢ အမဲာ်ညါလီၤ. ၃၇ ဖဲပှၤမၤစၢၤတၢ်တဂၤန့ၣ် လဲၤတုၤလၢ တၢ်လီၢ်လၢ စီၤယိနၤသၣ် ခးဝဲပျၢ်လီၤတဲာ်အလီၢ်အခါ စီၤယိနၤသၣ် ကိးပသူထီၣ် ဒီးတဲဘၣ် အပှၤမၤစၢၤတၢ်တဂၤန့ၣ်လၢ “ပျၢ်အိၣ်လၢ နမဲာ်ညါဒံး တမ့ၢ်ဧီၤ.” ၃၈ စီၤယိနၤသၣ် တဲကဒီးအပှၤမၤစၢၤတၢ်လၢ “မၤမ့ၢ်ချ့သၢၤ. လဲၤမ့ၢ်ချ့. တဘၣ်မၤယံာ်မၤနီၢ် နသးတဂ့ၤ.” ဒီးစီၤယိနၤသၣ် အပှၤမၤစၢၤတၢ်တဂၤန့ၣ် ထၢထီၣ်ပျၢ်တဖၣ်န့ၣ် ဒီးဟဲက့ၤကဒါက့ၤလၢ အကစၢ်အအိၣ်လီၤ. ၃၉ ဘၣ်ဆၣ် ပှၤမၤစၢၤတၢ်တဂၤန့ၣ် တနၢ်ပၢၢ်ဝဲ ဘၣ်ဃး တၢ်ဂ့ၢ်တခါအံၤ နီတမံၤဘၣ်. ထဲဒၣ် စီၤယိနၤသၣ် ဒီးစီၤဒၤဝံးန့ၣ် နၢ်ပၢၢ်ဝဲ တၢ်ဂ့ၢ်တခါအံၤ အခီပညီလီၤ. ၄၀ ဒီးစီၤယိနၤသၣ် ဟ့ၣ်လီၤ အတၢ်စုကဝဲၤလၢ အပှၤမၤစၢၤတၢ်တဂၤန့ၣ် ဒီးတဲအီၤလၢ “က့ၤ, က့ၤစိာ်တၢ်တဖၣ်အံၤ လၢဝ့ၢ်ပူၤတက့ၢ်.”
၄၁ ဖဲပှၤမၤစၢၤတၢ်တဂၤန့ၣ် က့ၤဝဲအခါ စီၤဒၤဝံး ဟးထီၣ်လၢ တၢ်လီၢ်လၢ အအိၣ်ခူသူၣ်ဝဲ ဘူးဒီး ကလံၤထံးတခီ တစဲးဖိလီၤ. ဒီးစီၤဒၤဝံး ထိၣ်လီၤပှီၤအသး ဒီးဆုးလီၤအခိၣ် လၢဟီၣ်ခိၣ်လိၤ သၢဘျီ ဒီးအဝဲသ့ၣ် နၢမူလိာ်အသး ဒီးဟီၣ်ဝဲလီၤ. ဘၣ်ဆၣ် စီၤဒၤဝံး ဟီၣ်အါကတၢၢ်လီၤ. ၄၂ စီၤယိနၤသၣ် တဲဘၣ် စီၤဒၤဝံးလၢ “ပဝဲခံဂၤလၢာ် ပအၢၣ်လီၤ ပာ်စၢၤပသးလၢ+ ယဟိဝၤယွၤအမံၤ ဒီးပတဲလၢ ‘မ်ယဟိဝၤယွၤ ကဲပှၤအုၣ်အသးလၢ နၤဒီးယၤ အဘၢၣ်စၢၤ ဒီးလၢနချံနသၣ် ဒီးယချံယသၣ် အဘၢၣ်စၢၤ လီၤထူလီၤယိာ်တက့ၢ်.’+ အဃိ လဲၤမုာ်မုာ်တက့ၢ်.’”
အဃိ စီၤဒၤဝံး ဂဲၤဆၢထၢၣ် ဒီးဟးထီၣ်ကွံာ်ဝဲလီၤ. မ့မ့ၢ် စီၤယိနၤသၣ်န့ၣ် က့ၤကဒါက့ၤလၢ ဝ့ၢ်ပူၤလီၤ.