၁ ၡမူၤအ့လး
၂၃ လၢခံ ပှၤတဲဘၣ် စီၤဒၤဝံးလၢ “ပှၤဖလ့ၡသးဖိ ဟဲဒုးဝ့ၢ်ကံလၤ+ ဒီးအဝဲသ့ၣ် ဂုာ်န့ၢ်ဆူၣ် ဘုလၢကြဲၢ်တဖၣ်အပူၤလံ.” ၂ အဃိ စီၤဒၤဝံး သံကွၢ် ယဟိဝၤယွၤလၢ+ “မ့ၢ်ယကဘၣ်လဲၤဒုး ပှၤဖလ့ၡသးဖိ တဖၣ်န့ၣ်ဧါ.” ယဟိဝၤယွၤ တဲဘၣ် စီၤဒၤဝံးလၢ “လဲၤဒုး ပှၤဖလ့ၡသးဖိ ဒီးမၤပူၤဖျဲး ဝ့ၢ်ကံလၤတက့ၢ်.” ၃ ဘၣ်ဆၣ် စီၤဒၤဝံး အပှၤတဖၣ် တဲအီၤလၢ “ပအိၣ်လၢ ယူဒၤအဟီၣ်ကဝီၤအပူၤန့ၣ်+ ပပျံၤတၢ်လံ. ပမ့ၢ်လဲၤလၢ ဝ့ၢ်ကံလၤ ဒ်သိးပကဒုးတၢ်ဒီး ပှၤဖလ့ၡသးသုးဖိလၢ+ အဆီလီၤအသးဖဲန့ၣ်တဖၣ်န့ၣ် ပကပျံၤတၢ် အါန့ၢ်အလီၢ်တမ့ၢ်ဧီၤ.” ၄ အဃိ စီၤဒၤဝံး သံကွၢ်ကဒီး ယဟိဝၤယွၤ တဘျီလီၤ.+ ယဟိဝၤယွၤ တဲဆၢက့ၤအီၤလၢ “မ့ၢ်လၢ ယကဟ့ၣ်လီၤ ပှၤဖလ့ၡသးဖိ လၢနစုပူၤအဃိ+ ဂဲၤဆၢထၢၣ် ဒီးလဲၤလီၤလၢ ဝ့ၢ်ကံလၤတက့ၢ်.” ၅ အဃိ စီၤဒၤဝံး ဒီးအပှၤတဖၣ် လဲၤလၢ ဝ့ၢ်ကံလၤ ဒီးဒုးဝဲ ပှၤဖလ့ၡသးဖိလီၤ. အဝဲဟံးန့ၢ် အဝဲသ့ၣ် ဆၣ်ဖိကီၢ်ဖိ ဒီးမၤသံကွံာ် အဝဲသ့ၣ် အါအါဂီၢ်ဂီၢ်လီၤ. ဒီးစီၤဒၤဝံး မၤပူၤဖျဲးဝဲ ပှၤလၢအအိၣ်လၢ ဝ့ၢ်ကံလၤအပူၤလီၤ.+
၆ ဖဲစီၤအဃံၤမ့လ့းအဖိခွါ စီၤအ့ဘယၤသၢ်+ ဃ့ၢ်ပူၤဖျဲးအသး ဒီးလဲၤဃ့ၢ်လၢ စီၤဒၤဝံးအအိၣ် လၢဝ့ၢ်ကံလၤအခါ လၢအစုပူၤန့ၣ် အိၣ်ဒီး အ့ဖိးတဘ့ၣ်လီၤ. ၇ ဒီးပှၤတဲစီၤစီလူးလၢ “စီၤဒၤဝံးလဲၤလၢ ဝ့ၢ်ကံလၤတုၤလံ.” ဒီးစီၤစီလူး တဲဝဲလၢ “ကစၢ်ယွၤ ဟ့ၣ်လီၤကွံာ်အီၤလၢ ယစုပူၤလံ.+ အဝဲဒိးလီၤ ပျံၤသကွီၤလၢ အနီၢ်ကစၢ်အဂီၢ် ခီဖျိလၢ အလဲၤနုာ်လီၤလၢ ဝ့ၢ်တဖျၢၣ် လၢအအိၣ်ဒီးတြဲၤ ဒီးတြဲၤအဘိတဖၣ် အဃိလီၤ.” ၈ အဃိ စီၤစီလူး ကိးဖှိၣ်ဝဲ အသုးဖိခဲလၢာ် ဒ်သိးကလဲၤလီၤဒုးတၢ်လၢ ဝ့ၢ်ကံလၤ ဒီးကဝီၤဃာ် စီၤဒၤဝံး ဒီးအပှၤတဖၣ်အဂီၢ်လီၤ. ၉ ဖဲစီၤဒၤဝံး သ့ၣ်ညါဘၣ်လၢ စီၤစီလူး ကူၣ်ထီၣ်ထီဒါ အီၤအခါ အဝဲတဲဘၣ် ပှၤလုၢ်တၢ်ဒိၣ် စီၤအ့ဘယၤသၢ်လၢ “ဟဲစိာ်အ့ဖိးတဘ့ၣ်န့ၣ်လၢအံၤ.”+ ၁၀ ဒီးစီၤဒၤဝံး တဲဝဲလၢ “အိ အံၣ်စရ့လးအကစၢ် ယဟိဝၤယွၤဧၢ, ယနၢ်ဟူဘၣ် လီၤတံၢ်လၢ စီၤစီလူး ပာ်လီၤအသးလၢ အကဟဲ မၤဟးဂီၤဝ့ၢ်ကံလၤ ခီဖျိလၢယဃိလီၤ.+ ၁၁ မ့ၢ်ဝ့ၢ်ကံလၤ အခိၣ်အနၢ်တဖၣ် ကဟ့ၣ်လီၤကွံာ်ယၤလၢ အစုပူၤဧါ. မ့ၢ်စီၤစီလူး ကဟဲလီၤ ဒ်ယနၢ်ဟူပာ်စၢၤအသိးဧါ. အိ အံၣ်စရ့လးအကစၢ် ယဟိဝၤယွၤဧၢ, ဝံသးစူၤ တဲဘၣ်ယၤတက့ၢ်.” ဒီးယဟိဝၤယွၤ တဲဝဲလၢ “စီၤစီလူး ကဟဲလီၤလီၤ.” ၁၂ စီၤဒၤဝံး သံကွၢ်ဝဲလၢ “မ့ၢ်ဝ့ၢ်ကံလၤ အခိၣ်အနၢ်တဖၣ် ကဟ့ၣ်လီၤကွံာ် ယၤဒီးယပှၤတဖၣ် လၢစီၤစီလူး အစုပူၤဧါ.” ယဟိဝၤယွၤ တဲဆၢက့ၤလၢ “အဝဲသ့ၣ် ကဟ့ၣ်လီၤကွံာ်သုလီၤ.”
၁၃ တဘျီဃီန့ၣ် စီၤဒၤဝံး ဒီးအပှၤအဂၤ ၆၀၀ ဂဲၤဆၢထၢၣ်+ ဒီးအဝဲသ့ၣ် ဟးထီၣ်ကွံာ်လၢ ဝ့ၢ်ကံလၤအပူၤ ဒီးဖဲအဝဲသ့ၣ် လဲၤဝဲသ့တပူၤဂ့ၤ တပူၤဂ့ၤန့ၣ် အဝဲသ့ၣ် လဲၤဝဲလီၤ. ဖဲပှၤတဲဘၣ် စီၤစီလူးလၢ စီၤဒၤဝံး ဃ့ၢ်ထီၣ်ကွံာ်လၢ ဝ့ၢ်ကံလၤအပူၤလံအခါ စီၤစီလူး တလဲၤလူၤထွဲအခံဘၣ်. ၁၄ ဒီးစီၤဒၤဝံး အိၣ်ဝဲလၢ တၢ်လီၢ်လၢ ပှၤလဲၤဘၣ်ဝဲကီ လၢကစၢၢ်ကလိကျါ ဖဲဝ့ၢ်စံဖး+ အပှၢ်မုၢ်ကနၢလီၤ. စီၤစီလူး ဟးဃုအီၤထီဘိ+ ဘၣ်ဆၣ် ယဟိဝၤယွၤ တဟ့ၣ်လီၤ စီၤဒၤဝံးလၢ စီၤစီလူးအစုပူၤဘၣ်. ၁၅ ဖဲစီၤဒၤဝံး အိၣ်လၢ ဝ့ၢ်စံဖးအပှၢ်မုၢ်ကနၢ လၢဃိရဲးအခါ အသ့ၣ်ညါဝဲလၢ စီၤစီလူး ဃုမၤသံအီၤန့ၣ်လီၤ.
၁၆ စီၤစီလူးအဖိခွါ စီၤယိနၤသၣ်န့ၣ် လဲၤလၢ စီၤဒၤဝံးအအိၣ် လၢဃိရဲး ဒီးအဝဲမၤစၢၤ စီၤဒၤဝံး ဒ်သိးအကပာ်ဂံၢ်ပာ်ဘါ ယဟိဝၤယွၤအဂီၢ်လီၤ.+ ၁၇ စီၤယိနၤသၣ် တဲဘၣ်အီၤလၢ “ယပၢ်စီၤစီလူး ဃုနၤတဘၣ်ဘၣ် အဃိ ပျံၤတၢ်တဂ့ၤ. နကကဲထီၣ် စီၤပၤလၢ အံၣ်စရ့လးအပူၤ+ ဒီးယကကဲထီၣ် ပှၤအဒိၣ်ကတၢၢ် ခံဂၤတဂၤလၢ နဖီလာ်လီၤ. ဒီးယပၢ်စီၤစီလူး သ့ၣ်ညါဝဲ စ့ၢ်ကီးလီၤ.”+ ၁၈ ဒီးအဝဲသ့ၣ်ခံဂၤ မၤတၢ်အၢၣ်လီၤအီၤလီၤ+ လၢယဟိဝၤယွၤ အမဲာ်ညါလီၤ. စီၤဒၤဝံး အိၣ်တ့ၢ်လၢဃိရဲး ဒီးမ့မ့ၢ် စီၤယိနၤသၣ်န့ၣ် က့ၤကဒါက့ၤလၢ အဟံၣ်လီၤ.
၁၉ လၢခံ ပှၤပိာ်ခွါတဖၣ်လၢ အအိၣ်လၢ ဝ့ၢ်စံဖးန့ၣ် လဲၤလၢ စီၤစီလူးအအိၣ် လၢဝ့ၢ်ကံဘဧၤ+ ဒီးတဲအီၤလၢ “စီၤဒၤဝံး အိၣ်ခူသူၣ် ဘူးဒီးပှၤ+ ဖဲတၢ်လီၢ်တဖၣ်လၢ ပှၤလဲၤဘၣ်ဝဲကီ လၢဃိရဲးအပူၤ+ ဖဲဃကံလၤအတၢ်လူၢ်ခိၣ်+ လၢအအိၣ်လၢ ယံးၡံမိၣ် အကလံၤထံးတခီလီၤ.+ ၂၀ အိ စီၤပၤဧၢ, နမ့ၢ်အဲၣ်ဒိးဟဲလီၤ တဘျီဂ့ၤ တဘျီဂ့ၤန့ၣ် ဟဲဟီ. ပကဟ့ၣ်လီၤအီၤလၢ နစုပူၤလီၤ.”+ ၂၁ ဒီးစီၤစီလူး တဲဝဲလၢ “မ့ၢ်လၢ သုပာ်ဖျါထီၣ် တၢ်သးကညီၤလၢ ယဖီခိၣ်အဃိ မ်ယဟိဝၤယွၤ ဆိၣ်ဂ့ၤသုတက့ၢ်. ၂၂ ပှၤတဲယၤလၢ စီၤဒၤဝံးန့ၣ် လံၣ်မၣ် အဃိ အဝဲအိၣ်ဖဲလဲၣ် ဒီးမတဂၤထံၣ်အီၤ ဖဲန့ၣ်လဲၣ်န့ၣ် ဝံသးစူၤ လဲၤဃုသ့ၣ်ညါ လီၤတံၢ်လီၤဆဲးနီၤ. ၂၃ တၢ်လီၢ်လၢ စီၤဒၤဝံး အိၣ်ခူသူၣ်ဝဲ ခဲလၢာ်န့ၣ် ဃုသ့ၣ်ညါ လီၤတံၢ်လီၤဆဲး ဝံၤဒီး ဟဲက့ၤစိာ်န့ၢ်ယၤ တၢ်အုၣ်အသးတဖၣ်တက့ၢ်. သုမၤဒ်န့ၣ်မ့ၢ်ဝံၤ ယကလဲၤပိာ်သုခံ ဒီးအဝဲမ့ၢ်အိၣ်လၢ ကီၢ်ပူၤန့ၣ် ယကဃုအီၤလၢ ယူဒၤအပှၤလၢ အကထိတဖၣ်အကျါ တုၤလၢ ယထံၣ်အီၤလီၤ.”
၂၄ အဃိ အဝဲသ့ၣ်ဟးထီၣ် ဒီးက့ၤဆိလၢ ဝ့ၢ်စံဖးလၢ+ စီၤစီလူး အမဲာ်ညါလီၤ. မ့မ့ၢ် စီၤဒၤဝံး ဒီးအပှၤတဖၣ်န့ၣ် အိၣ်လၢ မၤဧိၣ်အပှၢ်မုၢ်ကနၢ+ ဖဲဧၤရဘၤ+ လၢယံးၡံမိၣ် အကလံၤထံးတခီလီၤ. ၂၅ လၢခံ စီၤစီလူး ဒီးအပှၤတဖၣ် လဲၤဃုဝဲ စီၤဒၤဝံးလီၤ.+ ဖဲပှၤတဲဘၣ် စီၤဒၤဝံးအခါ တဘျီဃီန့ၣ် အဝဲလဲၤလီၤ လၢလ့ကိပူၤ+ လၢအအိၣ်ဝဲလၢ မၤဧိၣ်အပှၢ်မုၢ်ကနၢလီၤ. ဖဲစီၤစီလူး နၢ်ဟူဝဲ တၢ်ဂ့ၢ်အံၤအခါ အဝဲလဲၤလူၤဝဲ စီၤဒၤဝံးလၢ မၤဧိၣ်အပှၢ်မုၢ်ကနၢလီၤ. ၂၆ ဖဲစီၤစီလူး လဲၤတုၤဝဲလၢ ကစၢၢ်အခါ စီၤဒၤဝံးဒီးအပှၤတဖၣ်န့ၣ် အိၣ်ဝဲလၢ ကစၢၢ်တဖျၢၣ်အံၤ အဝၢ်ခီလီၤ. အဃိ စီၤဒၤဝံး ကရီလဲၤဝဲချ့ချ့ ဒ်သိးအကပူၤဖျဲးဒီး+ စီၤစီလူးအဂီၢ်လီၤ. ဘၣ်ဆၣ် စီၤစီလူး ဒီးအပှၤတဖၣ် လူၤဝဲ စီၤဒၤဝံးဒီးအပှၤတဖၣ် ဒံးယံာ်ဒံးဘူးထီၣ် တုၤလၢ အဘူးကဖီၣ်န့ၢ် အဝဲသ့ၣ်ညါလီၤ.+ ၂၇ ဘၣ်ဆၣ် ပှၤစိာ်တၢ်ကစီၣ်ဖိတဂၤ ဟဲတဲစီၤစီလူးလၢ “ပှၤဖလ့ၡသးဖိ ဟဲနုာ်လီၤဒုးပကီၢ်လံ အဃိ ဟဲက့ၤမ့ၢ်ချ့သၢၤ.” ၂၈ ဖဲန့ၣ်ဒီး စီၤစီလူး က့ၤဝဲဒ်သိးကလဲၤသဂၢၢ် ပှၤဖလ့ၡသးဖိ ဒီးအဝဲတလူၤ စီၤဒၤဝံးလၢၤဘၣ်.+ အဃိ တၢ်လီၢ်တတီၤန့ၣ် ဘၣ်တၢ်ကိးအမံၤလၢ စ့လၤဟးမၤဃလကိးလီၤ.*
၂၉ လၢခံ စီၤဒၤဝံး ဟးထီၣ်ဖဲန့ၣ် ဒီးလဲၤအိၣ်လၢ တၢ်လီၢ်တဖၣ်လၢ ပှၤလဲၤဘၣ်ဝဲကီ လၢဧ့ၣ်က့ဒံၤလီၤ.+