၁ စီၤပၤ
၄ စီၤပၤၡလိၤမိၤ ပၢဝဲ ပှၤအံၣ်စရ့လးဖိ ခဲလၢာ်လီၤ.+ ၂ စီၤပၤၡလိၤမိၤ အပဒိၣ်လၢ အပတီၢ်ထီတဖၣ်န့ၣ် မ့ၢ်ဝဲပှၤတဖၣ်အံၤလီၤ. စီၤစၤဒိး+ အဖိခွါ စီၤဧစၤရယၤ ကဲဝဲ ပှၤလုၢ်တၢ်ဒိၣ်, ၃ စီၤၡံၡၤ အဖိခွါတဖၣ် လၢအမ့ၢ် စီၤအလံၤဃိရ့ာ် ဒီးစီၤအဃံယၤန့ၣ် ကဲဝဲ နဲၣ်ရွဲၣ်,+ စီၤအဃံလူး အဖိခွါ စီၤယဟိၤၡၤဖးန့ၣ်+ ကဲဝဲ ပှၤကွဲးနီၣ်တၢ်ဖိ, ၄ စီၤယဟိၤယဒါ အဖိခွါ စီၤဘနါယၤ+ ကဲဝဲ သုးခိၣ်ကျၢၢ်, စီၤစၤဒိး ဒီးစီၤအ့ဘယၤသၢ်+ ကဲဝဲ ပှၤလုၢ်တၢ်ဒိၣ်တဖၣ်, ၅ စီၤနၤသၣ်+ အဖိခွါ စီၤဧစၤရယၤ ကဲဝဲ ပဒိၣ်ဖးဒိၣ်တဖၣ်အခိၣ်, စီၤနၤသၣ် အဖိခွါ စီၤစၤဘူး ကဲဝဲ ပှၤလုၢ်တၢ်ဒိၣ် ဒီးစီၤပၤအသကိး,+ ၆ စီၤအဃံၡၢ်န့ၣ် ကဲဝဲ ပှၤလၢအတီခိၣ်ရိၤမဲတၢ်လၢ စီၤပၤအနီပူၤ ဒီးစီၤဧၤဘဒါ အဖိခွါ စီၤအဒိၤနံရၣ်န့ၣ်+ အိၣ်ဝဲလၢ ပှၤလၢအဘၣ် တၢ်မၢဆူၣ်အီၤလၢ ကမၤတၢ်တဖၣ် အဖီခိၣ်လီၤ.+
၇ စီၤၡလိၤမိၤ ပာ်ထီၣ် ပဒိၣ်ဖးဒိၣ် ၁၂ ဂၤလီၤ. အဝဲသ့ၣ် တီခိၣ်ရိၤမဲဝဲ ပှၤအံၣ်စရ့လးဖိ ခဲလၢာ်လၢ အဟ့ၣ်လီၤဝဲ တၢ်အီၣ်တၢ်အီလၢ စီၤပၤဒီး ပှၤအိၣ်လၢ အဟံၣ်ပူၤတဖၣ် အဂီၢ်န့ၣ်လီၤ. အဃိ လၢတနံၣ်အတီၢ်ပူၤန့ၣ် အဝဲသ့ၣ် အိၣ်ဒီးမူဒါလၢ ကဘၣ်ရဲၣ်လီၤကျဲၤလီၤဝဲ တၢ်အီၣ်တၢ်အီ တဂၤတလါ တဂၤတလါလီၤ.+ ၈ ပှၤသ့ၣ်တဖၣ်န့ၣ် မ့ၢ်ဝဲ စီၤဃူၢ် အဖိခွါ လၢအတီခိၣ်ရိၤမဲတၢ်လၢ အ့ဖရဲၣ် အကစၢၢ်ကလိကျါ, ၉ စီၤဒ့က့ၢ် အဖိခွါ လၢအတီခိၣ်ရိၤမဲတၢ်လၢ မၤကး, ဝ့ၢ်ၡးလဘံၣ်,+ ဝ့ၢ်ဘ့ၤသၡ့မ့ၣ် ဒီးဝ့ၢ်အ့လိၣ်ဘ့ၤသဃၤနၣ် အပူၤလီၤ. ၁၀ စီၤဃ့စ့း အဖိခွါ လၢအတီခိၣ်ရိၤမဲတၢ်လၢ ဝ့ၢ်အရူဘိး (အဝဲပၢဘၣ် စိကိၤ ဒီးဃ့ဖ့ၢ် အတၢ်လီၢ်တၢ်ကျဲခဲလၢာ်), ၁၁ စီၤအဘံနဒာ် အဖိခွါ လၢအတီခိၣ်ရိၤမဲတၢ်လၢ ဝ့ၢ်ဒိၢ် အတၢ်လီၤဘံခဲလၢာ် (အမါန့ၣ် မ့ၢ်ဝဲ စီၤၡလိၤမိၤ အဖိမုၣ် နီၢ်တၤဖး), ၁၂ စီၤအဃံလူး အဖိခွါ စီၤဘၤနါ လၢအတီခိၣ်ရိၤမဲတၢ်လၢ ဝ့ၢ်တၤနး, ဝ့ၢ်မကံးဒိၤ+ ဒီးဝ့ၢ်ဘ့ၤသၡၣ်+ အတၢ်လီၢ်တၢ်ကျဲခဲလၢာ် လၢအအိၣ်ဘူးဒီး စၤရတၣ် လၢအအိၣ်လၢ ယံးစရ့လး အဆၢလာ်တခီ စးထီၣ်လၢ ဝ့ၢ်ဘ့ၤသၡၣ် ပၢၢ်တုၤလၢ အၤဘ့လးမဃိလး ဒီးတုၤလၢ ယၤကမၣ် အဟီၣ်ကဝီၤန့ၣ်လီၤ.+ ၁၃ စီၤက့ဘ့ၢ် အဖိခွါ လၢအတီခိၣ်ရိၤမဲတၢ်လၢ ဝ့ၢ်ရၤမိးကံးလဧးအပူၤ+ (အဝဲပၢဘၣ် စီၤမနၤၡ့ၤ အဖိခွါ စီၤယၤအံၢ်+ အဒူသဝီတဖၣ် လၢအအိၣ်ဝဲလၢ ကံးလဧးအဟီၣ်ကဝီၤပူၤ+ ဒီးအဝဲပၢဘၣ်စ့ၢ်ကီး အၢ်ကိးအဟီၣ်ကဝီၤ+ လၢအပၣ်ဃုာ်ဒီး ဝ့ၢ်ဖးဒိၣ်အဖျၢၣ် ၆၀ လၢအအိၣ်ဒီး အဒူၣ် ဒီးတြဲၤအနီၣ်ဘိတိၢ်ဘီတဖၣ် လၢအအိၣ်ဝဲလၢ ကီၢ်ဘၤၡၣ်အပူၤ),+ ၁၄ စီၤဧံးဒိၤ အဖိခွါ စီၤအဃံနဒာ် လၢအတီခိၣ်ရိၤမဲတၢ်လၢ ဝ့ၢ်မၤဃန့ၤအပူၤ,+ ၁၅ စီၤအဃံမဧး လၢအတီခိၣ်ရိၤမဲတၢ်လၢ နးသၤလံအဒူၣ် အတၢ်လီၢ်တၢ်ကျဲ (အဝဲ ဟံးန့ၢ် စီၤၡလိၤမိၤ အဖိမုၣ် နီၢ်ဘၤစမး လၢအမါ), ၁၆ စီၤဃူၡဲၤ အဖိခွါ စီၤဘၤနါ လၢအတီခိၣ်ရိၤမဲတၢ်လၢ အၤၡ့ၢ်အဒူၣ် အတၢ်လီၢ်တၢ်ကျဲ ဒီးဘဧၤလိး အတၢ်လီၢ်တၢ်ကျဲ, ၁၇ စီၤပၤရူၤ အဖိခွါ စီၤယဟိၤၡၤဖး လၢအတီခိၣ်ရိၤမဲတၢ်လၢ ယံးစၣ်ကၢ်အဒူၣ် အတၢ်လီၢ်တၢ်ကျဲ, ၁၈ စီၤအ့လၤ အဖိခွါ စီၤၡံမံၤ+ လၢအတီခိၣ်ရိၤမဲတၢ်လၢ ဘံၣ်ယၤမံၣ်အဒူၣ်+ အတၢ်လီၢ်တၢ်ကျဲ, ၁၉ စီၤအူရံၤ အဖိခွါ စီၤက့ဘ့ၢ် လၢကံးလဧးအဟီၣ်ကဝီၤ+ (လၢညါန့ၣ် ဟီၣ်ကဝီၤအံၤ အိၣ်ဝဲလၢ ပှၤအမိၣ်ဖိ အစီၤပၤစံဃိၣ်+ ဒီးဘၤၡၣ် အစီၤပၤဧိာ်+ အတၢ်ပၢဖီလာ်လီၤ.) ဒီးပဒိၣ်ဖးဒိၣ် အိၣ်ဒံးဝဲတဂၤလၢ အတီခိၣ်ရိၤမဲဝဲ ပဒိၣ်ဖးဒိၣ်အဂၤ ခဲလၢာ်လီၤ.
၂၀ ယူဒၤအဒူၣ် ဒီးပှၤအံၣ်စရ့လးဖိ အဂၤတဖၣ်န့ၣ် အနီၣ်ဂံၢ်အိၣ်ဝဲ အါအါဂီၢ်ဂီၢ် ဒ်မဲးလၢပီၣ်လဲၣ်နံၤ အသိးလီၤ.+ အဝဲသ့ၣ် အီၣ်ဘၣ်အီဘၣ် ဒီးအိၣ်မူဘၣ်ဝဲပှဲၤဒီး တၢ်သူၣ်ဖှံသးညီလီၤ.+
၂၁ စီၤၡလိၤမိၤ ပၢဘၣ်ဝဲ ဘီမုၢ်ခဲလၢာ် စးထီၣ်လၢ ထံကျိ*+ တုၤလီၤလၢ ပှၤဖလ့ၡသးဖိ အကီၢ် ဒီးတုၤလၢ အဲၤကူပတူး အကီၢ်ဆၢလီၤ. အဝဲသ့ၣ် ဟဲစိာ်ဝဲ တၢ်ခိတၢ်သွဲတဖၣ်* ဒီးမၤန့ၢ်တၢ်လၢ စီၤၡလိၤမိၤအဂီၢ် လၢအတၢ်အိၣ်မူဒီတစိၤလီၤ.+
၂၂ တၢ်အီၣ်တၢ်အီလၢ စီၤၡလိၤမိၤ ဒိးန့ၢ်ဘၣ်ဝဲ တနံၤဘၣ်တနံၤန့ၣ် မ့ၢ်ဝဲကိၣ်ကမူၣ် လၢအဂ့ၤ အကိၢ် ၃၀* ဒီးကိၣ်ကမူၣ် ယိယိ အကိၢ် ၆၀, ၂၃ ကျီၢ်လၢအဘီၣ်အဒု ၁၀, ကျီၢ်လၢတၢ်အီၣ်ဆၣ်အလီၢ်အဒု ၂၀ ဒီးသိအဒု ၁၀၀ တကးဒံးဘၣ် တၤဃီၤဖါ, တၤဟိစဘံ ဒီးတၤယုၢ်ယးဃမိၢ် ဒီးထိၣ်မိၢ်ဧူ လၢအဘီၣ်တဖၣ်လီၤ. ၂၄ စီၤၡလိၤမိၤ ပၢဘၣ် တၢ်လီၢ်ခဲလၢာ်လၢ ထံကျိလၢအံၤတခီ*+ စးထီၣ်လၢ ဂါစၤ+ တုၤလီၤလၢ ဝ့ၢ်တံပစၤ ဃုာ်ဒီး စီၤပၤခဲလၢာ် လၢထံကျိ လၢအံၤတခီလီၤ. ဒီးတၢ်လီၢ်လၢ အအိၣ်လၢ အခိၣ်အဃၢၤ ကိးတီၤဒဲးန့ၣ် ပှဲၤဝဲဒီး တၢ်မုာ်တၢ်ခုၣ်လီၤ.+ ၂၅ ဖဲစီၤၡလိၤမိၤ ပၢတၢ် အဆၢကတီၢ် စးထီၣ်လၢ ဝ့ၢ်ဒၣ် တုၤလီၤလၢ ဘ့ၢ်ၡဘၤန့ၣ် ယူဒၤအဒူၣ် ဒီးပှၤအံၣ်စရ့လးဖိအဂၤတဖၣ် အိၣ်ဘၣ်ဝဲ ဘံၣ်ဘံၣ်ဘၢဘၢ လၢအနီၢ်ကစၢ် အစပံးမုၢ် ဒီးအချၢၣ်ဒၢထူၣ် အဖီလာ်လီၤ.
၂၆ စီၤၡလိၤမိၤ အိၣ်ဒီး ကသ့ၣ်အဒၢးအဖျၢၣ် ၄,၀၀၀ လၢအကသ့ၣ်လၢ အတွံၢ်လ့ၣ်ကဟၣ်အဂီၢ် ဒီးအအိၣ်ဒီး ကသ့ၣ်အဒု* ၁၂,၀၀၀ လီၤ.+
၂၇ ဒီးပဒိၣ်ဖးဒိၣ်တဖၣ်န့ၣ် ဟံးန့ၢ်မူဒါ တဂၤတလါ တဂၤတလါ ဒီးဟ့ၣ်လီၤ တၢ်အီၣ်တၢ်အီလၢ စီၤၡလိၤမိၤ ဒီးပှၤလၢ အအီၣ်တၢ်လၢ စီၤၡလိၤမိၤ အစီၢ်နီၤခိၣ် ကိးဂၤဒဲးအဂီၢ်လီၤ. ဒီးအဝဲသ့ၣ် ရဲၣ်ကျဲၤဝဲ ဂ့ၤဂ့ၤအဃိ တၢ်လၢ အတယၢဘၣ်န့ၣ် တအိၣ်နီတမံၤဘၣ်.+ ၂၈ ဒီးအဝဲသ့ၣ် တဂၤစုာ်စုာ် ဒ်အမူဒါအိၣ်ဝဲအသိး လဲၤစိာ်ဝဲ ဘုမုယီၤ ဒီးလီၢ်ဘိ ဖဲတၢ်လိၣ်ဘၣ်အီၤအလီၢ် လၢကသ့ၣ်တဖၣ် ဒီးကသ့ၣ်လၢ အတွံၢ်လ့ၣ်ကဟၣ်တဖၣ် အဂီၢ်လီၤ.
၂၉ ဒီးကစၢ်ယွၤ ဟ့ၣ်လီၤ စီၤၡလိၤမိၤလၢ တၢ်ကူၣ်သ့, တၢ်သ့ပဲာ်ထံနီၤဖးတၢ် ဒီးတၢ်သူၣ်ဆးသးဆး* အါအါဂီၢ်ဂီၢ် ဒ်မဲးလၢ ပီၣ်လဲၣ်နံၤအသိးလီၤ.+ ၃၀ စီၤၡလိၤမိၤ အိၣ်ဒီး တၢ်ကူၣ်သ့ဒိၣ်န့ၢ်ဒံး ပှၤမုၢ်ထီၣ်ဖိ ဒီးပှၤအဲၤကူပတူးဖိ ခဲလၢာ်လီၤ.+ ၃၁ စီၤၡလိၤမိၤ ကူၣ်တၢ်သ့ ဒိၣ်န့ၢ်ဒံး ပှၤအဂၤခဲလၢာ် ဃုာ်ဒီး ပှၤအ့စရၤဃးဖိ စီၤအ့ၤသၣ်,+ စီၤမၤဃိလး အဖိခွါတဖၣ် လၢအမ့ၢ် စီၤကးလကိးလး,+ စီၤဟ့မၣ်+ ဒီးစီၤဒၢ်ဒၤလီၤ. စီၤၡလိၤမိၤ အမံၤဟူသၣ်ဖျါလၢ ထံကီၢ်လၢ အအိၣ်လၢ အခိၣ်အဃၢၤတဖၣ် အပူၤဝးဝးလီၤ.+ ၃၂ အဝဲ ထုးထီၣ်ဝဲ တၢ်ကတိၤဒိ+ အခါ ၃,၀၀၀ ဒီးတၢ်သးဝံၣ်+ အယုၢ် ၁,၀၀၅ ယုၢ်လီၤ. ၃၃ အဝဲတဲဘၣ်ဃးဒီး သ့ၣ်ထူၣ်တဖၣ်အဂ့ၢ် စးထီၣ်လၢ သ့ၣ်ဆှိအ့ရ့း လၢအအိၣ်လၢ လဘၤနိၣ် ကစၢၢ်ကလိကျါ တုၤလီၤလၢ သ့ၣ်ကဖျီၣ်အ့စိး+ လၢအမဲထီၣ်လၢ တၢ်ဒူၣ်ကပၤန့ၣ်လီၤ. ဒီးအဝဲတဲဘၣ်ဃးဒီး ဆၣ်ဖိကီၢ်ဖိ,+ ထိၣ်ဖိလံၣ်ဖိ,*+ တၢ်လၢအဟူးအဂဲၤ*+ ဒီးညၣ်တဖၣ် အဂ့ၢ်စ့ၢ်ကီးလီၤ. ၃၄ ပှၤကလုာ်ခဲလၢာ် ဃုာ်ဒီးစီၤပၤတဖၣ် လၢဟီၣ်ခိၣ်ဒီဘ့ၣ် လၢအနၢ်ဟူဘၣ်ဝဲ စီၤၡလိၤမိၤ အတၢ်ကူၣ်သ့ အဂ့ၢ်န့ၣ် ဟဲဝဲလၢ စီၤၡလိၤမိၤအအိၣ် ဒ်သိးကနၢ်ဟူဘၣ် စီၤၡလိၤမိၤ အတၢ်ကူၣ်သ့ အဂီၢ်လီၤ.+