စံးထီၣ်ပတြၢၤ
လၢတၢ်သူၣ်ဝံၣ်သးဆၢအခိၣ်အဂီၢ်, ဒ့အီၤဃုာ်ဒီးသီတူၢ်တဖၣ်. စီၤဒၤဝံးအထါ.
၄ တၢ်တီတၢ်လိၤကစၢ်ဧၢ,+ ဖဲယကိးထီၣ်နၤအခါ စံးဆၢယၤတက့ၢ်.
ဖဲယဘၣ်ကီဘၣ်ခဲအခါ မၤဟိထီၣ်န့ၢ်ယၤ ကျဲလၢ ယကပူၤဖျဲး အဂီၢ်တက့ၢ်.*
သးကညီၤယၤဒီး ဒိကနၣ် ယတၢ်ထုကဖၣ်တက့ၢ်.
၂ သုဝဲ ပှၤဟီၣ်ခိၣ်ဖိတဖၣ်န့ၣ် သုကမၤဟးဂီၤ ယလၤကပီၤ ယံာ်ဒံးထဲလဲၣ်.
သုကအဲၣ်တၢ်လၢ အဘျုးတအိၣ်ဘၣ် ဒီးလူၤဃုတၢ်လံၣ်တၢ်လီ ယံာ်ဒံးထဲလဲၣ်. (စ့လၤ)
၃ သ့ၣ်ညါလၢ ယဟိဝၤယွၤ ပာ်လီၤဆီဝဲ ပှၤလၢအတီဒီးအီၤတက့ၢ်.*
ဖဲယကိးထီၣ် ယဟိဝၤယွၤအခါ အဝဲကနၢ်ဟူဝဲလီၤ.
၄ သုမ့ၢ်သးဒိၣ်ထီၣ်တၢ် သနာ်က့ တဘၣ်မၤတၢ်ဒဲးဘးတဂ့ၤ.+
ဖဲသုအိၣ်လၢ သုလီၢ်မံခိၣ်အခါ ဆိကမိၣ်ထံလၢသုသးပူၤ ဒီးအိၣ်ဘှ့ၣ်တက့ၢ်. (စ့လၤ)
၅ လုၢ်ထီၣ် တၢ်လုၢ်အတီအလိၤတဖၣ်
ဒီးနာ်န့ၢ် ယဟိဝၤယွၤတက့ၢ်.+
၆ ပှၤအါဂၤ တဲဝဲလၢ “မတဂၤ ကဒုးနဲၣ်ပှၤ တၢ်အဂ့ၤတမံၤမံၤလဲၣ်.”
အိ ယဟိဝၤယွၤဧၢ, မ်နပာ်ဖျါထီၣ် တၢ်သးကညီၤလၢ ပဖီခိၣ်တက့ၢ်.+
၇ နမၤသးခုယသး ဒိၣ်န့ၢ်ဒံး
ပှၤလၢအကူးဘုန့ၢ် အါအါဂီၢ်ဂီၢ် ဒီးအစပံးထံသီ အိၣ်ဝဲအါအါဂီၢ်ဂီၢ်လီၤ.
၈ ယကမံနီၤဒီး မံယဲ မုာ်မုာ် ခုၣ်ခုၣ်လီၤ.+
အိ ယဟိဝၤယွၤဧၢ, နမ့ၢ်ပှၤထဲတဂၤလၢ အဒုးအိၣ်ယၤ ဘံၣ်ဘံၣ် ဘၢဘၢလီၤ.+