ယိၤၡူ
၇ စီၤဧၤကၣ်မ့ၢ်ဝဲ+ စီၤကၢ်မံၤအဖိခွါ, စီၤကၢ်မံၤမ့ၢ်ဝဲ စီၤစးဘဒံၤအဖိခွါ, စီၤစးဘဒံၤမ့ၢ်ဝဲ စီၤစ့ရၤအဖိခွါ လၢအဟဲလီၤစၢၤလၢ ယူဒၤအဒူၣ်အကျါန့ၣ်လီၤ. စီၤဧၤကၣ်ဟံးန့ၢ်ဝဲ တၢ်လၢပှၤကဘၣ် မၤဟးဂီၤအီၤအဃိ+ ဘၣ်ဃးဒီး တၢ်လၢ ပှၤကဘၣ်မၤဟးဂီၤအီၤန့ၣ် ပှၤအံၣ်စရ့လးဖိ တကနၣ် ကစၢ်ယွၤအကလုၢ်ဘၣ်. ဒီးယဟိဝၤယွၤ သးထီၣ် ပှၤအံၣ်စရ့လးဖိ ဒိၣ်မးလီၤ.+
၂ ဒီးစီၤယိၤၡူ ဆှၢလီၤပှၤပိာ်ခွါ လၢဝ့ၢ်ယရံၤဃိ ဆူဝ့ၢ်ဂဲ+ လၢအအိၣ်ဘူးဒီး ဝ့ၢ်ဘ့ၤသအၤဝ့ၣ် ဒီးလၢဝ့ၢ်ဘ့ၤသ့လး+ အမုၢ်ထီၣ်တခီ ဒီးတဲဘၣ်အဝဲသ့ၣ်လၢ “လဲၤထီၣ် ဒီးကွၢ်ဟုၣ်ဝ့ၢ်ဂဲ ဒီးအပျီတဖၣ်တက့ၢ်.” အဃိ ပှၤပိာ်ခွါတဖၣ်န့ၣ် လဲၤထီၣ် ဒီးကွၢ်ဟုၣ်ဝဲ ဝ့ၢ်ဂဲလီၤ. ၃ ဖဲအဝဲသ့ၣ် ဟဲက့ၤလၢ စီၤယိၤၡူအအိၣ်အခါ အဝဲသ့ၣ်တဲဘၣ်အီၤလၢ “ပှၤသုးဖိတလိၣ်လဲၤထီၣ် ကိးဂၤဒဲးဘၣ်. ထဲပှၤအဂၤ ခံကထိသၢကထိန့ၣ် ဒုးဝဲဝ့ၢ်ဂဲ ကနၢၤလီၤ. မ့ၢ်လၢ ပှၤဂဲဖိ အိၣ်ထဲစှၤဂၤအဃိ တလိၣ်ဆှၢလီၤ ပှၤသုးဖိခဲလၢာ် ဒီးမၤလီၤဘှံးအဝဲသ့ၣ်ဘၣ်.”
၄ အဃိ ပှၤသုးဖိလဲၤထီၣ်ဝဲ ကအိၣ်အဂၤ ၃,၀၀၀ လီၤ. ဘၣ်ဆၣ် ဖဲပှၤဂဲဖိတဖၣ် ဟဲထီၣ်ဝဲအခါ ပှၤအံၣ်စရ့လး သုးဖိတဖၣ် ဘၣ်ဃ့ၢ်ကွံာ်ဝဲလီၤ.+ ၅ ဒီးပှၤဂဲဖိ ကျီသံကွံာ် ပှၤအံၣ်စရ့လးဖိ ၃၆ ဂၤလီၤ. ပှၤဂဲဖိလူၤအဝဲသ့ၣ် စးထီၣ်လၢ ဝ့ၢ်အတြဲၤ အမဲာ်ညါ ဒီးဆဲးကျီသံကွံာ် အဝဲသ့ၣ် လၢတၢ်လီၤဘံအလီၢ် တုၤလီၤလၢ ၡဘၤရံၣ်လီၤ. အဃိ ပှၤဂီၢ်မုၢ် အတၢ်သးဒူန့ၣ် ပှံၢ်လီၤဝဲ ဒီးလီၤထွံလီၤယွၤကွံာ်ဝဲ ဒ်ထံအသိးလီၤ.
၆ စီၤယိၤၡူ ဖှီညာ်အဆ့ကၤ ဒီးထိၣ်လီၤပှီၤအသးလၢ ယဟိဝၤယွၤ အတလါစီဆှံအမဲာ်ညါ တုၤလီၤလၢ မုၢ်ဟါလီၤန့ၣ်လီၤ. အဝဲဒီး အံၣ်စရ့လး အပှၤသူၣ်က့သးပှၢ်တဖၣ် ဖှံထီၣ် ဟီၣ်ခိၣ်ကမူၣ်လၢ အဝဲသ့ၣ်အနီၢ်ကစၢ် အခိၣ်လိၤ တဘျီဝံၤတဘျီလီၤ. ၇ စီၤယိၤၡူ တဲဝဲလၢ “အၣ်လါ, တၢ်ပၢကစၢ် ယဟိဝၤယွၤဧၢ, မ့ၢ်နဒုးခီဂာ် ပှၤဂီၢ်မုၢ်အံၤ လၢထံကျိယၢ်ဒ့ၣ် ဒ်သိးနကဟ့ၣ်လီၤကွံာ်ပှၤလၢ ပှၤအမိၢ်ဖိအစုပူၤ လၢအဝဲသ့ၣ် ကမၤဟးဂီၤကွံာ်ပှၤန့ၣ် မ့ၢ်အဘၣ်မနုၤလဲၣ်. ပမ့ၢ်ဆဲးအိၣ်ဖဲ ထံကျိယၢ်ဒ့ၣ် အဝၢ်ခီန့ၣ် ဝံၤလီၤ. ၈ အိ ယဟိဝၤယွၤဧၢ, ယကဘၣ်တဲဒ်လဲၣ်. ပှၤအံၣ်စရ့လးဖိတဖၣ် ဃ့ၢ်ကွံာ်လၢ အဒုၣ်အဒါတဖၣ် အမဲာ်ညါလံ. ၉ ဖဲပှၤကနၤဧၣ်ဖိ ဒီးပှၤကီၢ်ဖိခဲလၢာ် နၢ်ဟူဘၣ်ဃး တၢ်ဂ့ၢ်အံၤန့ၣ် အဝဲသ့ၣ် ကကဝီၤဃာ်ပှၤဒီး ကမၤလီၤမၢ်ကွံာ်ပမံၤ လၢဟီၣ်ခိၣ်ချၢလီၤ. အဃိ နကဒီသဒၢ နမံၤလၢအပှဲၤဒီး အလၤကပီၤ ဒ်လဲၣ်.”+
၁၀ ယဟိဝၤယွၤ တဲဆၢက့ၤ စီၤယိၤၡူလၢ “ဂဲၤဆၢထၢၣ်. ဘၣ်မနုၤအဃိ နထိၣ်လီၤပှီၤနသးလဲၣ်. ၁၁ ပှၤအံၣ်စရ့လးဖိ မၤတၢ်ဒဲးဘးလံ. ယမၤလိာ် အဝဲသ့ၣ်လၢ အဝဲသ့ၣ်ကဘၣ် မၤထွဲဝဲဒ် ယတၢ်အၢၣ်လီၤအီလီၤ အိၣ်ဝဲအသိး+ ဘၣ်ဆၣ် အဝဲသ့ၣ် မၤဟးဂီၤ ယတၢ်အၢၣ်လီၤအီလီၤလံ. အဝဲသ့ၣ်ဟံးန့ၢ် တၢ်လၢပှၤကဘၣ် မၤဟးဂီၤအီၤတနီၤ+ ဒီးဟုၣ်န့ၢ်ဝဲ+ ဒီးပာ်ခူသူၣ်ဝဲလၢ အနီၢ်ကစၢ် အတၢ်ဖိတၢ်လံၤတဖၣ် အကျါန့ၣ်လီၤ.+ ၁၂ အဃိ ပှၤအံၣ်စရ့လးဖိတဖၣ် ဒုးဝဲ အဒုၣ်အဒါတနၢၤဘၣ်. အဝဲသ့ၣ် ကဃၣ်ကွံာ်အသးဒီး ကဃ့ၢ်ကွံာ်လၢ အဒုၣ်အဒါ မ့ၢ်လၢ အဝဲသ့ၣ်ကဲထီၣ် တၢ်လၢအကဘၣ် တၢ်မၤဟးဂီၤအီၤလံ. တၢ်လၢ ပှၤကဘၣ်မၤဟးဂီၤအီၤ လၢအအိၣ်ဒံးလၢသုကျါန့ၣ် သုမ့ၢ်တမၤဟးဂီၤကွံာ်အီၤဘၣ်ဒီး ယတအိၣ်ဒီးသုလၢၤဘၣ်.+ ၁၃ ဂဲၤဆၢထၢၣ် ဒီးမၤစီဆှံ ပှၤဂီၢ်မုၢ်တက့ၢ်.+ တဲဘၣ်အဝဲသ့ၣ်လၢ ‘မၤစီဆှံသုသးလၢ ခဲမုၢ်ဆ့ၣ်အဂီၢ်တက့ၢ်. အံၣ်စရ့လးအကစၢ် ယဟိဝၤယွၤ တဲဝဲလၢ “အိ အံၣ်စရ့လးဧၢ, တၢ်လၢ ပှၤကဘၣ်မၤဟးဂီၤအီၤန့ၣ် အိၣ်လၢသုကျါလီၤ. တၢ်လၢ ပှၤကဘၣ်မၤဟးဂီၤအီၤ လၢအအိၣ်ဒံးလၢသုကျါန့ၣ် သုမ့ၢ်တမၤဟးဂီၤကွံာ်အီၤဘၣ်န့ၣ် သုဒုးသုဒုၣ်သုဒါ တနၢၤဘၣ်. ၁၄ လၢဂီၤခီန့ၣ် သုကဘၣ် ဟဲပာ်ဖျါထီၣ်သုသးလၢ ကစၢ်ယွၤအမဲာ်ညါ တဒူၣ်ဝံၤတဒူၣ် ဒီးယဟိဝၤယွၤ ကဃုထၢထီၣ်ဝဲ တဒူၣ်လီၤ.+ ဒီးဒူၣ်ဖိထၢဖိတဖၣ်လၢ ပှၤတဒူၣ်အံၤအကျါန့ၣ် ကဘၣ်ဟဲသုးဘူးထီၣ်အသး တဒူၣ်ဝံၤတဒူၣ် ဒီးယဟိဝၤယွၤ ကဃုထၢထီၣ် ဒူၣ်ဖိထၢဖိတဒူၣ်လီၤ. ဒီးဟံၣ်ဖိဃီဖိတဖၣ်လၢ ဒူၣ်ဖိထၢဖိတဒူၣ်အံၤအကျါန့ၣ် ကဘၣ်ဟဲသုးဘူးထီၣ်အသး တဒူၣ်ဝံၤတဒူၣ်လီၤ. ဒီးယဟိဝၤယွၤ ကဃုထၢထီၣ် ဟံၣ်ဖိဃီဖိတဒူၣ်လီၤ. ဒီးပှၤလၢဟံၣ်ဖိဃီဖိအံၤအကျါ ကဘၣ်ဟဲသုးဘူးထီၣ်အသး တဂၤဝံၤတဂၤလီၤ. ၁၅ ဒီးပှၤတဂၤလၢ ဘၣ်တၢ်ထံၣ်န့ၢ်အီၤလၢ အအိၣ်ဒီး တၢ်လၢ ပှၤကဘၣ်မၤဟးဂီၤအီၤန့ၣ် အဝဲဒီး တၢ်လၢအအိၣ်ဒီးအီၤခဲလၢာ်န့ၣ် ကဘၣ်တၢ်ဒွဲၣ်အူအီၤလၢ မ့ၣ်အူ,+ မ့ၢ်လၢ အဝဲမၤဟးဂီၤ ယဟိဝၤယွၤ အတၢ်အၢၣ်လီၤအီလီၤ+ ဒီးမၤဘၣ်ဝဲ တၢ်ကမၣ်လၢ အလီၤမဲာ်ဆှးလၢ အံၣ်စရ့လး အကျါအဃိလီၤ.”’”
၁၆ အဃိ လၢခံတဂီၤန့ၣ် စီၤယိၤၡူ ဂဲၤထၢၣ်ဂီၤဂီၤ ဒီးမၢဝဲ ပှၤအံၣ်စရ့လးဖိ ဟဲသုးဘူးအသး တဒူၣ်ဝံၤတဒူၣ် ဒီးပှၤယူဒၤဖိအဒူၣ်န့ၣ် ဘၣ်တၢ်ဃုထၢထီၣ်အီၤလီၤ. ၁၇ ဒီးစီၤယိၤၡူမၢ ဒူၣ်ဖိထၢဖိတဖၣ်လၢ ယူဒၤအဒူၣ်အကျါ ဟဲသုးဘူးထီၣ်အသး ဒီးပှၤစ့ရၤဖိ အဒူၣ်ဖိထၢဖိ+ ဘၣ်တၢ်ဃုထၢထီၣ်အီၤလီၤ. ဒီးအဝဲမၢ ဟံၣ်ခိၣ်လၢ ပှၤစ့ရၤဖိ အဒူၣ်ဖိထၢဖိအကျါ ဟဲသုးဘူးထီၣ်အသး တဂၤဝံၤတဂၤ ဒီးစီၤစးဘဒံၤ ဘၣ်တၢ်ဃုထၢထီၣ်အီၤလီၤ. ၁၈ လၢခံကတၢၢ်န့ၣ် စီၤယိၤၡူမၢဝဲ စီၤစးဘဒံၤ အဟံၣ်ဖိဃီဖိ ဟဲသုးဘူးထီၣ်အသး တဂၤဝံၤတဂၤ ဒီးစီၤဧၤကၣ် လၢအပၣ်ဃုာ်လၢ ပှၤယူဒၤဖိ အဒူၣ်န့ၣ် ဘၣ်တၢ်ဃုထၢထီၣ်အီၤလီၤ. စီၤဧၤကၣ်မ့ၢ်ဝဲ စီၤကၢ်မံၤ အဖိခွါ, စီၤကၢ်မံၤမ့ၢ်ဝဲ စီၤစးဘဒံၤ အဖိခွါ, စီၤစးဘဒံၤမ့ၢ်ဝဲ စီၤစ့ရၤအဖိခွါလီၤ.+ ၁၉ ဒီးစီၤယိၤၡူတဲဘၣ် စီၤဧၤကၣ်လၢ “ယဖိခွါဧၢ, ဝံသးစူၤ မၤလၤကပီၤ အံၣ်စရ့လးအကစၢ် ယဟိဝၤယွၤ ဒီးအၢၣ်လီၤနတၢ်ကမၣ်တက့ၢ်. ဝံသးစူၤ တဲဘၣ်ယၤ တၢ်လၢနမၤတ့ၢ်တက့ၢ်. တဘၣ်ပာ်ခူသူၣ်အီၤလၢ ယအိၣ်တဂ့ၤ.”
၂၀ စီၤဧၤကၣ် တဲဆၢက့ၤ စီၤယိၤၡူလၢ “မ့ၢ်, ယမ့ၢ်ပှၤတဂၤလၢ အမၤကမၣ်ဘၣ် အံၣ်စရ့လး အကစၢ် ယဟိဝၤယွၤန့ၣ်လီၤ. ဒီးယမၤကမၣ်ဘၣ်တၢ် ဒ်အံၤလီၤ. ၂၁ ဖဲယထံၣ်ဘၣ် ဆ့ကၤလၢ အဂ့ၤလီၤဆီတဘ့ၣ် လၢအဟဲလၢကီၢ်ၡံနၢ်,+ စ့ၡက့လး ၂၀၀* ဒီးထူတကျီၣ် လၢအတယၢၢ်အိၣ်ဝဲ ၡက့လး ၅၀ အခါ ယသးကွံအီၤအဃိ ယဟံးန့ၢ်အီၤလီၤ. ခဲအံၤန့ၣ် ယပာ်ခူသူၣ်အီၤလၢ ဟီၣ်ခိၣ်လာ် လၢယဒဲအပူၤ ဒီးစ့တဖၣ်အိၣ်လၢ အဖီလာ်လီၤ.”
၂၂ ဒီးတဘျီဃီန့ၣ် စီၤယိၤၡူ ဆှၢလီၤဝဲ ပှၤစိာ်တၢ်ကစီၣ်တဖၣ် ဒီးအဝဲသ့ၣ် လဲၤဃ့ၢ်လၢဒဲ ဒီးဖဲန့ၣ် အဝဲသ့ၣ်ထံၣ်ဝဲလၢ ဆ့ကၤတဘ့ၣ်န့ၣ် ဘၣ်တၢ်ပာ်ခူသူၣ်အီၤလၢဒဲပူၤ ဒီးစ့တဖၣ် အိၣ်လၢအဖီလာ်လီၤ. ၂၃ ဒီးအဝဲသ့ၣ် ထုးထီၣ်ဝဲ တၢ်ဖိတၢ်လံၤတဖၣ်အံၤ လၢဒဲပူၤ ဒီးအဝဲသ့ၣ် ဟဲစိာ်ဝဲလၢ စီၤယိၤၡူ ဒီးပှၤအံၣ်စရ့လးဖိခဲလၢာ်အအိၣ် ဒီးပာ်လီၤဝဲလၢ ယဟိဝၤယွၤ အမဲာ်ညါလီၤ. ၂၄ ဒီးစီၤယိၤၡူ ဒီးပှၤအံၣ်စရ့လးဖိ ခဲလၢာ် ဟံးန့ၢ်စီၤဧၤကၣ်+ လၢအမ့ၢ် စီၤစ့ရၤအဖိခွါ ဒီးစ့, ဆ့ကၤလၢ အဂ့ၤလီၤဆီတဘ့ၣ်, ထူတကျီၣ်+ ဃုာ်ဒီး အဖိမုၣ်, အဖိခွါ, အကျီၢ်ဖါ, အကသ့ၣ်ယီၤ, အသိ, အမဲာ်တဲးလဲး, အဒဲ ဒီးတၢ်လၢအအိၣ်ဒီးအီၤခဲလၢာ် ဒီးလဲၤကိးအဝဲသ့ၣ် လၢဧၤကိၢ် အတၢ်တြီၤပူၤလီၤ.+ ၂၅ ဒီးစီၤယိၤၡူတဲဝဲလၢ “ဘၣ်မနုၤအဃိ နဒုးအိၣ်ထီၣ် တၢ်ကီတၢ်ခဲလၢပဂီၢ်လဲၣ်.+ တနံၤအံၤ ယဟိဝၤယွၤ ကဒုးအိၣ်ထီၣ် တၢ်ကီတၢ်ခဲလၢနဂီၢ်လီၤ.” ဒီးပှၤအံၣ်စရ့လးဖိခဲလၢာ် ကွံာ်သံအဝဲသ့ၣ်လၢလၢၢ်+ ဒီးဒွဲၣ်အူထီၣ်ကွံာ်အဝဲသ့ၣ်လၢ မ့ၣ်အူလီၤ.+ ပှၤအံၣ်စရ့လးဖိ ကွံာ်သံအဝဲသ့ၣ် ခဲလၢာ်လၢလၢၢ် ဒ်န့ၣ်လီၤ. ၂၆ ဒီးအဝဲသ့ၣ် ပာ်ပူၣ်ထီၣ်လၢၢ် လၢအဖီခိၣ် လၢအအိၣ်ဝဲတုၤလၢ မုၢ်မဆါတနံၤအံၤလီၤ. ဝံၤဒီးယဟိဝၤယွၤ အသးခုၣ်လီၤက့ၤဝဲလီၤ.+ လၢတၢ်န့ၣ်အဃိ တၢ်လီၢ်အဝဲန့ၣ် ဘၣ်တၢ်ကိးအမံၤလၢ ဧၤကိၢ်အတၢ်တြီၤ တုၤလၢမုၢ်မဆါတနံၤအံၤလီၤ.