လီၣ်ဖျါ
၅ ဒီးယထံၣ်လၢ ပှၤလၢအဆ့ၣ်နီၤလၢ လီၢ်ပစိာ်အလိၤတဂၤ+ အစုထွဲအပူၤန့ၣ် အိၣ်ဒီးလံာ်ထူတဘ့ၣ်လၢ အဘၣ်တၢ်ကွဲးအီၤ ခံကပၤလၢာ်လီၤ. ဒီးလံာ်ထူအံၤ ဘၣ်တၢ်စဲပနီၣ်ဃာ်အီၤလၢ တၢ်စဲပနီၣ်နွံခါ ကျၢၤကျၢၤလီၤ. ၂ ဒီးယထံၣ်ဘၣ် မူခိၣ်ကလူးလၢ အဂံၢ်ဆူၣ်ဘါဆူၣ်တဂၤ တဲဝဲလၢ အကလုၢ်ဖးဒိၣ်လၢ “မ့ၢ်မတဂၤ ကြၢးဝဲဘၣ်ဝဲလၢ အကမၤသ့ၣ်ဖး တၢ်စဲပနီၣ်တဖၣ် ဒီးအိးထီၣ် လံာ်ထူန့ၣ်လဲၣ်.” ၃ ဘၣ်ဆၣ် လၢမူခိၣ်မ့ၢ်ဂ့ၤ, လၢဟီၣ်ခိၣ်မ့ၢ်ဂ့ၤ, လၢဟီၣ်ခိၣ်လာ်မ့ၢ်ဂ့ၤ ပှၤလၢ အအိးထီၣ်လံာ်ထူ ဒီးကွၢ်နုာ်တၢ်လၢ အပူၤသ့ဝဲန့ၣ် တအိၣ်နီတဂၤဘၣ်. ၄ ဒီးမ့ၢ်လၢ ပှၤလၢ အကြၢးဝဲဘၣ်ဝဲလၢ အကအိးထီၣ်လံာ်ထူ ဒီးကွၢ်နုာ်တၢ်လၢအပူၤန့ၣ် တအိၣ်နီတဂၤဘၣ်အဃိ ယဟီၣ်ဖးဒိၣ်လီၤ. ၅ ဘၣ်ဆၣ် ပှၤလၢ ပှၤသူၣ်က့သးပှၢ်တဖၣ် အကျါတဂၤ တဲယၤလၢ “ဟီၣ်လၢၤတဂ့ၤ. ကွၢ်မီၤ, ခ့ယုၢ်လၢအဘၣ်ဃးဒီး ယူဒၤအဒူၣ်+ လၢအမ့ၢ် စီၤဒၤဝံး+ အဂံၢ်န့ၣ်+ မၤနၢၤတၢ်လံ.+ အဃိ အဝဲအိးထီၣ် လံာ်ထူဒီး အတၢ်စဲပနီၣ် နွံခါန့ၣ် သ့ဝဲလီၤ.”
၆ ဒီးယထံၣ်ဘၣ် သိဖိတဒုလၢ+ အလီၤဂာ်ဒ် အဘၣ်တၢ်မၤသံတ့ၢ်အီၤန့ၣ်+ ဆၢထၢၣ်ဘူးဒီး လီၢ်ပစိာ် ဒီးအိၣ်ဝဲလၢ ခ့ရူာ်လွံၢ်ဂၤ ဒီးပှၤသူၣ်က့သးပှၢ်တဖၣ် အခၢၣ်သးလီၤ.+ ဒီးသိဖိတဒုအံၤ အနၢၤအိၣ်နွံဘိ ဒီးအမဲာ်ချံအိၣ်နွံတိၣ်လီၤ. မဲာ်ချံတဖၣ်အံၤ အခီပညီမ့ၢ်ဝဲ ကစၢ်ယွၤ အသးနွံဖျၢၣ်+ လၢအဘၣ်တၢ်ဆှၢလီၤအီၤလၢ ဟီၣ်ခိၣ်ဒီဘ့ၣ်ညါလီၤ. ၇ ဒီးတဘျီဃီန့ၣ် သိဖိလဲၤထီၣ်ဟံးန့ၢ်ဝဲ လံာ်ထူလၢအအိၣ်လၢ ပှၤလၢအဆ့ၣ်နီၤလၢ လီၢ်ပစိာ်အလိၤတဂၤန့ၣ်+ အစုထွဲလီၤ. ၈ ဖဲအဝဲဟံးန့ၢ် လံာ်ထူအခါ ခ့ရူာ်လွံၢ်ဂၤ ဒီးပှၤသူၣ်က့သးပှၢ် ၂၄ ဂၤ+ ထိၣ်လီၤပှီၤအသးလၢ သိဖိအမဲာ်ညါ ဒီးအဝဲသ့ၣ်တဂၤစုာ်စုာ် အိၣ်ဒီးတနၢ်ဒီး လီခီဖျၢၣ်ထူလၢအပှဲၤဒီး တၢ်နၢမူလီၤ. (တၢ်နၢမူန့ၣ် အခီပညီမ့ၢ်ဝဲ ပှၤစီဆှံတဖၣ် အတၢ်ဃ့ထုကဖၣ်.)+ ၉ ဒီးအဝဲသ့ၣ် သးဝံၣ်ဝဲ တၢ်သးဝံၣ်အသီ+ လၢအတဲဝဲ “နကြၢးဝဲဘၣ်ဝဲလၢ နကဟံးန့ၢ်လံာ်ထူဒီး အိးထီၣ်တၢ်စဲပနီၣ်တဖၣ် မ့ၢ်လၢ နဘၣ်တၢ်မၤသံနၤ ဒီးလၢကလုာ်ဒူၣ်ကိးဒူၣ်ဒဲး, ပှၤတဲတၢ်အကျိာ် ကိးကျိာ်ဒဲး, ပှၤကိးဒူၣ်ဒဲး ဒီးပှၤကိးကလုာ်ဒဲးအကျါန့ၣ်+ နပှ့ၤပှၤတဖၣ် လၢနသွံၣ်လၢ ကစၢ်ယွၤအဂီၢ်လီၤ.+ ၁၀ ဒီးနဒုးကဲထီၣ် အဝဲသ့ၣ်လၢ စီၤပၤတဖၣ်*+ ဒီးကစၢ်ယွၤ အပှၤလုၢ်တၢ်ဒိၣ်တဖၣ်+ ဒီးအဝဲသ့ၣ်ကပၢဝဲ ဟီၣ်ခိၣ်ဒီဘ့ၣ် ဒ်စီၤပၤတဖၣ် အသိးလီၤ.”+
၁၁ ဒီးယထံၣ်ဘၣ် မူခိၣ်ကလူးအါဂၤ အိၣ်ဝးတရံး ပှၤသူၣ်က့သးပှၢ်တဖၣ်, ခ့ရူာ်တဖၣ် ဒီးလီၢ်ပစိာ်ဒီး ယနၢ်ဟူအဝဲသ့ၣ် အကလုၢ်လီၤ. အဝဲသ့ၣ် အနီၣ်ဂံၢ်အိၣ်ဝဲလၢ အကလးတဖၣ် အကလး* ဒီးအကထိတဖၣ် အကထိလီၤ.+ ၁၂ ဒီးအဝဲသ့ၣ် တဲဝဲလၢ အကလုၢ်ဖးဒိၣ်လၢ “သိဖိလၢ အဘၣ်တၢ်မၤသံအီၤန့ၣ်+ ကြၢးဝဲဘၣ်ဝဲလၢ ကဒိးန့ၢ်ဘၣ် တၢ်စိတၢ်ကမီၤ, တၢ်ထူးတၢ်တီၤ, တၢ်ကူၣ်သ့, တၢ်ဂံၢ်တၢ်ဘါ, တၢ်ယူးယီၣ်, တၢ်လၤကပီၤ ဒီးတၢ်ဆိၣ်ဂ့ၤလီၤ.”+
၁၃ ဒီးယနၢ်ဟူ ကယဲၢ်တၢ်ဘၣ်တ့လၢ မူခိၣ်, လၢဟီၣ်ခိၣ်, လၢဟီၣ်ခိၣ်လာ်+ ဒီးလၢပီၣ်လဲၣ်အလိၤ ဒီးတၢ်အိၣ်လၢ တၢ်သ့ၣ်တဖၣ်အံၤအပူၤ ခဲလၢာ်န့ၣ် တဲဝဲလၢ “တၢ်ဆိၣ်ဂ့ၤ, တၢ်ယူးယီၣ်, တၢ်လၤကပီၤ+ ဒီးတၢ်ဂံၢ်တၢ်ဘါန့ၣ် မ်အအိၣ်ဒီး ပှၤလၢအဆ့ၣ်နီၤလၢ လီၢ်ပစိာ်အလိၤ+ ဒီးသိဖိ+ လီၤထူလီၤယိာ်တက့ၢ်.”+ ၁၄ ဒီးခ့ရူာ်လွံၢ်ဂၤန့ၣ် ဆဲးတဲဝဲလၢ “အၤမ့ၣ်” ဒီးပှၤသူၣ်က့သးပှၢ်တဖၣ် ထိၣ်လီၤပှီၤအသး ဒီးဘူၣ်ထီၣ်ဘါထီၣ် ကစၢ်ယွၤလီၤ.