ယိၤဟၣ်

၉ ဖဲယ့ၣ်ၡူး လဲၤတၢ်အခါ အထံၣ်ဝဲ ပှၤတဂၤလၢ အမဲာ်တထံၣ်တၢ်ဘၣ်​ လၢအအိၣ်ဖျဲၣ်ထီၣ်​ လံၤလံၤလံ. ၂ ဒီးအပျဲၢ်အဘီၣ်တဖၣ်​ သံကွၢ်အီၤလၢ “သရၣ်ဧၢ,+ ပှၤတဂၤအံၤ အမဲာ်တထံၣ်တၢ်ဘၣ်လၢ အအိၣ်ဖျဲၣ်ထီၣ်​ လံၤလံၤန့ၣ်​ မ့ၢ်လၢ မတဂၤ မၤတၢ်ဒဲးဘးအဃိလဲၣ်. မ့ၢ်အီၤဧါ မ့တမ့ၢ် အမိၢ်အပၢ်ဧါ.” ၃ ယ့ၣ်ၡူး တဲဆၢဝဲလၢ “တမ့ၢ်လၢ ပှၤတဂၤအံၤ မၤတၢ်ဒဲးဘးအဃိဘၣ်​ ဒီးတမ့ၢ်စ့ၢ်ကီး အမိၢ်အပၢ် မၤတၢ်ဒဲးဘး အဃိဘၣ်. မ့ၢ်ဒ်သိး ကစၢ်ယွၤ အတၢ်မၤတဖၣ်​ ကအိၣ်ဖျါထီၣ်​ ခီဖျိလၢအီၤလီၤ.+ ၄ ပှၤလၢအဆှၢလီၤယၤတဂၤ အတၢ်မၤတဖၣ်န့ၣ်​ ပကဘၣ်မၤအီၤဖဲ မုၢ်ဆါခီလီၤ.+ မုၢ်နၤကဟဲဝဲဒီး ဖဲန့ၣ်အခါ ပှၤမၤတၢ် တသ့နီတဂၤဘၣ်. ၅ ဖဲယအိၣ်ဒံးလၢ ဟီၣ်ခိၣ်အခါ ယမ့ၢ်ဟီၣ်ခိၣ်​ အတၢ်ကပီၤလီၤ.”+ ၆ အဝဲတဲ တၢ်ဂ့ၢ်တဖၣ်န့ၣ်​ ဝံၤအလီၢ်ခံ အထူးပှဲာ်လီၤတၢ်လၢ ဟီၣ်ခိၣ်လိၤ ဒီးမၤထီၣ်ဝဲ ကပံာ်ဒီးအထူးပှဲာ်ထံ ဒီးပဲထီၣ်ဝဲလၢ ပှၤတဂၤန့ၣ်​ အမဲာ်ချံလိၤလီၤ.+ ၇ ဒီးအတဲဘၣ်အီၤလၢ “လဲၤပျၢ်နမဲာ်လၢ ကမါၡံလိၣ်နီၤ.” (ၡံလိၣ်​ အခီပညီမ့ၢ်ဝဲ “တၢ်မၢလီၤ”) ဒီးအဝဲလဲၤ ပျၢ်အမဲာ်ဒီး ထံၣ်ထီၣ်တၢ် ဒီးဟဲက့ၤဝဲလီၤ.+

၈ ပှၤလၢအခိၣ်အဃၢၤ ဒီးပှၤလၢအထံၣ်ဘၣ်လၢ အဟးဃ့အီၣ်တၢ်လၢညါန့ၣ်​ တဲဝဲလၢ “လၢညါန့ၣ်​ ပှၤတဂၤအံၤ မ့ၢ်ပှၤလၢ အဆ့ၣ်နီၤဃ့အီၣ်တၢ် တမ့ၢ်ဧီၤ.” ၉ ပှၤတနီၤတဲဝဲလၢ “အဝဲန့ၣ်မ့ၢ်အီၤလီၤ.” ပှၤအဂၤတနီၤ တဲဝဲလၢ “တမ့ၢ်ဘၣ်, ဘၣ်ဆၣ်​ အလီၤဂာ်ဒီးအီၤလီၤ.” ဒီးအဝဲတဲဝဲလၢ “ယမ့ၢ်ပှၤတဂၤန့ၣ်လီၤ.” ၁၀ အဃိ အဝဲသ့ၣ်​ သံကွၢ်အီၤလၢ “မ့မ့ၢ်ဒ်န့ၣ်န့ၣ်​ နထံၣ်ထီၣ်က့ၤတၢ်ဒ်လဲၣ်.” ၁၁ အဝဲတဲဆၢဝဲလၢ “ပှၤတဂၤလၢ ပှၤကိးအီၤလၢ ယ့ၣ်ၡူးန့ၣ်​ မၤထီၣ်ဝဲကပံာ် ဒီးပဲထီၣ်လၢယမဲာ်ချံလိၤ ဒီးတဲယၤလၢ ‘လဲၤလၢၡံလိၣ်​ ဒီးပျၢ်ကွံာ်နမဲာ်နီၤ.’+ အဃိ ယလဲၤပျၢ်ယမဲာ်ဒီး ယထံၣ်ထီၣ်တၢ်လီၤ.” ၁၂ အဃိ အဝဲသ့ၣ်​ တဲအီၤလၢ “ပှၤတဂၤန့ၣ်​ အိၣ်ဖဲလဲၣ်.” အဝဲတဲဝဲလၢ “ယတသ့ၣ်ညါဘၣ်.”

၁၃ အဝဲသ့ၣ်လဲၤဆှၢဝဲ ပှၤလၢ အထံၣ်ထီၣ်တၢ်တဂၤအံၤလၢ ပှၤဖၤရံၤၡဲတဖၣ်​ အအိၣ်လီၤ. ၁၄ ဒီးမုၢ်နံၤလၢ ယ့ၣ်ၡူး မၤထီၣ်ကပံာ် ဒီးဒုးထံၣ်ထီၣ်အီၤတၢ်န့ၣ်+ မ့ၢ်ဝဲ မုၢ်အိၣ်ဘှံးနံၤလီၤ.+ ၁၅ ဒီးတဘျီအံၤစ့ၢ်ကီး ပှၤဖၤရံၤၡဲတဖၣ်​ သံကွၢ်ပှၤတဂၤအံၤလၢ အမဲာ်ထံၣ်ထီၣ်တၢ် ဒ်လဲၣ်လီၤ. အဝဲတဲအဝဲသ့ၣ်လၢ “အဝဲ ပဲထီၣ်ကပံာ်လၢ ယမဲာ်ချံလိၤ ဒီးယပျၢ်ကွံာ်အီၤ ဒီးယထံၣ်ထီၣ်တၢ်လီၤ.” ၁၆ ပှၤဖၤရံၤၡဲတနီၤ တဲဝဲလၢ “ပှၤတဂၤန့ၣ်​ တမၤထွဲ မုၢ်အိၣ်ဘှံးနံၤ အတၢ်သိၣ်တၢ်သီဘၣ်အဃိ အဝဲတမ့ၢ်ပှၤလၢ ကစၢ်ယွၤ ဆှၢလီၤဝဲဘၣ်.”+ ဒီးအဂၤတနီၤ တဲဝဲလၢ “ပှၤတၢ်ဒဲးဘးဖိတဂၤ မၤတၢ်လီၤလး ဒ်န့ၣ်တဖၣ်​ ကသ့ဒ်လဲၣ်.”+ အဃိ အဝဲသ့ၣ်​ အတၢ်ထံၣ်​ တလီၤပလိာ်လိာ်အသးလၢၤဘၣ်.+ ၁၇ ဒီးအဝဲသ့ၣ်​ တဲကဒီးပှၤလၢ အမဲာ်ထံၣ်ထီၣ်က့ၤတၢ်တဂၤလၢ “အဝဲ ဒုးထံၣ်ထီၣ်နမဲာ်အဃိ ဘၣ်ဃးဒီးအီၤန့ၣ်​ နကတဲဒ်လဲၣ်.” ဒီးပိာ်ခွါတဂၤန့ၣ်​ တဲဝဲလၢ “အဝဲ မ့ၢ်ဝံတဂၤလီၤ.”

၁၈ ဒီးတချုးလၢ အဝဲသ့ၣ်ကိးန့ၢ်ဝဲ ပှၤလၢ အထံၣ်ထီၣ်တၢ်တဂၤ အမိၢ်အပၢ်ဒံးဘၣ်န့ၣ်​ ပှၤယူဒၤဖိတဖၣ်​ တနာ်ဝဲလၢ ပှၤတဂၤအံၤ အမဲာ်တထံၣ်တၢ်ဒီး ထံၣ်ထီၣ်က့ၤတၢ်ဘၣ်. ၁၉ ပှၤယူဒၤဖိတဖၣ်​ သံကွၢ်အမိၢ်အပၢ်လၢ “ပှၤတဂၤအံၤ မ့ၢ်အကဲ သုဖိခွါဧါ. မ့ၢ်အမဲာ်တထံၣ်တၢ်ဘၣ်လၢ အအိၣ်ဖျဲၣ်ထီၣ်​ လံၤလံၤန့ၣ်ဧါ. မ့မ့ၢ်ဒ်န့ၣ်န့ၣ်​ ခဲအံၤ အဝဲထံၣ်ထီၣ်တၢ် ဒ်လဲၣ်.” ၂၀ အမိၢ်အပၢ် တဲဆၢဝဲလၢ “ပသ့ၣ်ညါလၢ အဝဲကဲပဖိခွါ ဒီးအမဲာ်တထံၣ်တၢ်ဘၣ်လၢ အအိၣ်ဖျဲၣ်ထီၣ်​ လံၤလံၤလံ. ၂၁ ဘၣ်ဆၣ်​ ခဲအံၤ အဝဲထံၣ်ထီၣ်တၢ်ဒ်လဲၣ်န့ၣ်​ ပတသ့ၣ်ညါဘၣ်. ဒီးမတဂၤ ဒုးထံၣ်ထီၣ်အမဲာ်လဲၣ်န့ၣ်​ ပတသ့ၣ်ညါဘၣ်. အသးနံၣ်ပှဲၤလံအဃိ သံကွၢ်အီၤသၢၤ. အနီၢ်ကစၢ် ကဘၣ်တဲဝဲလီၤ.” ၂၂ အမိၢ်အပၢ် တဲဝဲဒ်န့ၣ်န့ၣ်​ မ့ၢ်လၢ အဝဲသ့ၣ်ပျံၤ ပှၤယူဒၤဖိတဖၣ်* အဃိလီၤ.+ ပှၤယူဒၤဖိတဖၣ်​ ဆၢတဲာ်ဝဲလၢ ပှၤတဂၤဂ့ၤ တဂၤဂ့ၤ မ့ၢ်အၢၣ်လီၤတူၢ်လိာ်ဝဲလၢ ယ့ၣ်ၡူးမ့ၢ်ခရံာ်န့ၣ်​ အကဘၣ်​ တၢ်နီဟးထီၣ်ကွံာ်အီၤလၢ ဘူၣ်ဘျီၣ်အပူၤလီၤ.+ ၂၃ အဃိ အမိၢ်အပၢ် တဲဝဲလၢ “အသးနံၣ်ပှဲၤလံအဃိ သံကွၢ်အီၤသၢၤ.”

၂၄ ဒီးအဝဲသ့ၣ်​ ကိးန့ၢ်ကဒီး ပှၤလၢ အထံၣ်ထီၣ်တၢ်တဂၤလၢ အသီတဘျီ ဒီးတဲအီၤလၢ “မၤလၤကပီၤ ကစၢ်ယွၤသၢၤ. ပသ့ၣ်ညါလၢ ပှၤတဂၤန့ၣ်​ မ့ၢ်ပှၤတၢ်ဒဲးဘးဖိလီၤ.” ၂၅ အဝဲတဲဆၢဝဲလၢ “အဝဲမ့ၢ် ပှၤတၢ်ဒဲးဘးဖိဧါ တမ့ၢ်ဧါန့ၣ်​ ယတသ့ၣ်ညါဘၣ်. ယသ့ၣ်ညါ ထဲတမံၤလၢ လၢညါန့ၣ်​ ယတထံၣ်တၢ်ဘၣ်​ ဘၣ်ဆၣ်​ ခဲအံၤ ယထံၣ်ထီၣ်တၢ်လံ.” ၂၆ အဝဲသ့ၣ်​ တဲဘၣ်အီၤလၢ “အဝဲမၤနၤဒ်လဲၣ်. ဒီးအဝဲဒုးထံၣ်ထီၣ်​ နမဲာ်ဒ်လဲၣ်.” ၂၇ အဝဲတဲဆၢ အဝဲသ့ၣ်လၢ “ယတဲသုဝံၤလံ ဘၣ်ဆၣ်​ သုတဒိကနၣ်ဘၣ်. ဘၣ်မနုၤအဃိ သုအဲၣ်ဒိး နၢ်ဟူကဒီး လၢအသီတဘျီလဲၣ်. သုစ့ၢ်ကီး မ့ၢ်သု အဲၣ်ဒိးကဲထီၣ်​ အပျဲၢ်အဘီၣ်ဟီဧါ.” ၂၈ အဃိ အဝဲသ့ၣ်​ ဒုၣ်ဒွဲၣ်အီၤလၢ “နၤန့ၣ်​ နမ့ၢ်ပှၤတဂၤန့ၣ်​ အပျဲၢ်အဘီၣ်လီၤ. မ့မ့ၢ်ပှၤန့ၣ်​ ပမ့ၢ်စီၤမိၤၡ့ အပျဲၢ်အဘီၣ်လီၤ. ၂၉ ပသ့ၣ်ညါလၢ ကစၢ်ယွၤ တဲတၢ်ဒီးစီၤမိၤၡ့, မ့မ့ၢ်ပှၤတဂၤအံၤန့ၣ်​ မတဂၤ ဆှၢလီၤအီၤလဲၣ်​ ပတသ့ၣ်ညါဘၣ်.” ၃၀ အဝဲတဲဆၢက့ၤ အဝဲသ့ၣ်လၢ “လီၤကမၢကမၣ်​ ဘၣ်ယၤဒိၣ်မး. ပှၤတဂၤအံၤ ဒုးထံၣ်ထီၣ်ယမဲာ် ဘၣ်ဆၣ်​ မတဂၤ ဆှၢလီၤအီၤလဲၣ်န့ၣ်​ သုတသ့ၣ်ညါဧီၤ. ၃၁ ပသ့ၣ်ညါလၢ ကစၢ်ယွၤ တကနၣ်​ ပှၤတၢ်ဒဲးဘးဖိတဖၣ်ဘၣ်.+ ဘၣ်ဆၣ်​ ပှၤတဂၤဂ့ၤ တဂၤဂ့ၤလၢ အပျံၤကစၢ်ယွၤ ဒီးမၤအတၢ်ဘၣ်သးန့ၣ်​ ကစၢ်ယွၤ ဒိကနၣ်အီၤလီၤ.+ ၃၂ စးထီၣ်လၢပျၢၤတုၤခဲအံၤန့ၣ်​ ပှၤတနၢ်ဟူဘၣ်လၢ ပှၤဒုးထံၣ်ထီၣ်​ ပှၤလၢ အမဲာ်တထံၣ်တၢ်လၢ အအိၣ်ဖျဲၣ်ထီၣ်လံၤလံၤ အမဲာ်နီတဂၤဘၣ်. ၃၃ ပှၤတဂၤအံၤ ကစၢ်ယွၤ မ့ၢ်တဆှၢလီၤအီၤဘၣ်န့ၣ်​ အမၤတၢ် တသ့နီတမံၤဘၣ်.”+ ၃၄ အဝဲသ့ၣ်​ တဲဆၢက့ၤအီၤလၢ “နအိၣ်ဖျဲၣ်ထီၣ်​ ပှဲၤဒီးတၢ်ဒဲးဘး ဒီးနကသိၣ်လိပှၤဒံးဧါ.” ဒီးအဝဲသ့ၣ်​ နီဟးထီၣ်ကွံာ်အီၤလီၤ.+

၃၅ ဒီးယ့ၣ်ၡူး နၢ်ဟူဝဲလၢ အဝဲသ့ၣ်​ နီဟးထီၣ်ကွံာ်အီၤလီၤ. ဖဲယ့ၣ်ၡူး ထံၣ်အီၤအခါ ယ့ၣ်ၡူးတဲအီၤလၢ “နနာ် ပှၤကညီဖိခွါစ့ၢ်ကီးဧါ.” ၃၆ ပိာ်ခွါတဂၤန့ၣ်​ တဲဆၢဝဲလၢ “ကစၢ်ဧၢ, ဒ်သိးယက စူၢ်က့ၤနာ်က့ၤအီၤအဂီၢ် အဝဲမ့ၢ် မတဂၤလဲၣ်န့ၣ်​ တဲဘၣ်ယၤမီၤ.” ၃၇ ယ့ၣ်ၡူးတဲအီၤလၢ “နထံၣ်ဘၣ်အီၤလံ, ပှၤလၢ အတဲတၢ်ဒီးနၤ ခဲအံၤန့ၣ်​ မ့ၢ်အီၤလီၤ.” ၃၈ အဝဲတဲဝဲလၢ “ကစၢ်ဧၢ, ယနာ်နၤလီၤ.” ဒီးအဝဲ ထိၣ်လီၤပှီၤအသးလၢ အမဲာ်ညါလီၤ. ၃၉ ဒီးယ့ၣ်ၡူး တဲဝဲလၢ “ယဟဲလၢ ဟီၣ်ခိၣ်ချၢဒ်သိး ပှၤကဘၣ်​ တၢ်စံၣ်ညီၣ်အဂီၢ်လီၤ. ယဟဲ ဒ်သိးပှၤလၢ အမဲာ်တထံၣ်တၢ်တဖၣ်​ ကထံၣ်ထီၣ်က့ၤတၢ်+ ဒီးပှၤလၢ အမဲာ်ထံၣ်တၢ်တဖၣ်​ သုတထံၣ်တၢ်လၢၤတဂ့ၤ အဂီၢ်လီၤ.”+ ၄၀ ဖဲပှၤဖၤရံၤၡဲလၢ အအိၣ်ဒီးအီၤ ဖဲန့ၣ်တဖၣ်​ နၢ်ဟူဝဲဒ်န့ၣ်အခါ အဝဲသ့ၣ်​ တဲအီၤလၢ “ပဝဲစ့ၢ်ကီး မ့ၢ်ပမဲာ်တထံၣ်တၢ် ဘၣ်ဟီဧါ.” ၄၁ ယ့ၣ်ၡူး တဲအဝဲသ့ၣ်လၢ “သုမဲာ် မ့ၢ်တထံၣ်တၢ်ဘၣ်န့ၣ်​ သုတၢ်ဒဲးဘး တအိၣ်ဘၣ်. ဘၣ်ဆၣ်​ ခဲအံၤ သုတဲလၢ ‘ပထံၣ်တၢ်လီၤ.’ အဃိ သုတၢ်ဒဲးဘး အိၣ်ဒံးလီၤ.”+