မၤတၢ်
၁၄ ဒီးလၢဝ့ၢ်အံၤကနံၤအပူၤန့ၣ် စီၤပီလူး ဒီးစီၤဘၢ်နါဘၤ လဲၤနုာ်လီၤလၢ ပှၤယူဒၤဖိ အဘူၣ်ဘျီၣ်ပူၤဒီး အဝဲသ့ၣ် စံၣ်တဲၤတဲလီၤတၢ် သ့သ့ဘၣ်ဘၣ်အဃိ ပှၤယူဒၤဖိ ဒီးပှၤကြံးဖိတဖၣ် ကဲထီၣ် ပှၤစူၢ်က့ၤနာ်က့ၤတၢ် ဒီဒူၣ်လီၤ. ၂ ဘၣ်ဆၣ် ပှၤယူဒၤဖိလၢ အတစူၢ်က့ၤ နာ်က့ၤတၢ်ဘၣ်တဖၣ်န့ၣ် ထိၣ်ဟူးထိၣ်ဂဲၤထီၣ် ဒီးကွဲန့ၢ်လွဲန့ၢ်ဝဲ ပှၤကလုာ်အဂၤတဖၣ် ဒ်သိးကထီဒါ ဒီပုၢ်ဝဲၢ်တဖၣ်အဂီၢ်လီၤ.+ ၃ သနာ်က့ အဝဲသ့ၣ် ဆဲးအိၣ်ဖဲန့ၣ် ဖးယံာ်ညါ ဒီးယဟိဝၤယွၤ* ဟ့ၣ်စိဟ့ၣ်ကမီၤ အဝဲသ့ၣ်လၢ ကစံၣ်တဲၤတဲလီၤတၢ် ဒူဒူအဂီၢ်လီၤ. ဒီးဒ်သိး ကစၢ်ယွၤ ကပာ်ဂၢၢ်ပာ်ကျၢၤ တၢ်လၢအဝဲသ့ၣ် စံၣ်တဲၤတဲလီၤဝဲ ဘၣ်ဃးဒီး အတၢ်သးကညီၤ ဒိၣ်ဒိၣ်မုၢ်မုၢ်အဂီၢ် ကစၢ်ယွၤ ဟ့ၣ်စိဟ့ၣ်ကမီၤ အဝဲသ့ၣ်လၢ ကမၤဝဲ တၢ်ပနီၣ်လီၤလး ဒီးတၢ်လီၤလိၢ်လီၤလးတဖၣ်လီၤ.+ ၄ ဘၣ်ဆၣ် ပှၤဝ့ၢ်ဖိတဖၣ် အသးတလီၤပလိာ် လိာ်အသးဘၣ်. အဝဲသ့ၣ်တနီၤ အိၣ်ဃူဝဲ ပှၤယူဒၤဖိ ဒီးအဂၤတနီၤန့ၣ် အိၣ်ဃူဝဲ တၢ်မၢဖိတဖၣ်အံၤလီၤ. ၅ ပှၤကလုာ် အဂၤတဖၣ် ဒီးပှၤယူဒၤဖိ ဃုာ်ဒီးအဝဲသ့ၣ် အခိၣ်အနၢ်တဖၣ် ပာ်လီၤအသးလၢ ကမၤအၢမၤသီ စီၤပီလူးဒီးစီၤဘၢ်နါဘၤ ဒီးကကွံာ်အဝဲသ့ၣ် လၢလၢၢ်လီၤ.+ ၆ ဘၣ်ဆၣ် ပှၤဒုးသ့ၣ်ညါ အဝဲသ့ၣ်အဃိ အဝဲသ့ၣ် ဃ့ၢ်ကွံာ်ဝဲလီၤ. ဝံၤဒီးအဝဲသ့ၣ် လဲၤဝဲလၢ ဝ့ၢ်လူစတြၤ, ဝ့ၢ်ဒ့ၢ်ဘ့ၤ လၢအအိၣ်လၢ လူၤကီၤနံ အဟီၣ်ကဝီၤပူၤ ဒီးတၢ်လီၢ်လၢ အဘူးတဖၣ်လီၤ.+ ၇ ဒီးအဝဲသ့ၣ် ဆဲးစံၣ်တဲၤတဲလီၤ တၢ်သးခုကစီၣ် ဖဲန့ၣ်လီၤ.
၈ ဖဲဝ့ၢ်လူစတြၤ အပူၤန့ၣ် ပှၤလၢအခီၣ် တဂ့ၤဘၣ်တဂၤ ဆ့ၣ်နီၤဝဲဖဲန့ၣ်လီၤ. မ့ၢ်လၢအခီၣ် တဂ့ၤဘၣ်လၢ အအိၣ်ဖျဲၣ်ထီၣ် လံၤလံၤလံအဃိ အဟးတသ့ နီတဘျီဘၣ်. ၉ ဖဲစီၤပီလူး တဲတၢ်အခါ ပှၤတဂၤအံၤ ဒိကနၣ်အီၤလီၤ. စီၤပီလူး ကွၢ်အီၤထံထံ ဒီးထံၣ်ဝဲလၢ အဝဲအိၣ်ဒီးတၢ်နာ် ဒ်သိး အကဘျါက့ၤ အဂီၢ်အဃိ+ ၁၀ စီၤပီလူး တဲအီၤလၢ အကလုၢ်ဖးဒိၣ်လၢ “ဂဲၤဆၢထၢၣ်.” ဒီးပိာ်ခွါတဂၤန့ၣ် စံၣ်ဖုထီၣ်ဒီး စးထီၣ်ဟးဝဲလီၤ.+ ၁၁ ဖဲပှၤဂီၢ်မုၢ်တဖၣ် ထံၣ်ဘၣ်တၢ်လၢ စီၤပီလူး မၤတ့ၢ်ဝဲအခါ အဝဲသ့ၣ် ကိးပသူထီၣ်ဝဲလၢ ပှၤလူၤကီၤနံဖိ အကျိာ်လၢ “ယွၤတဖၣ် မၤကဲထီၣ်အသးဒ် ပှၤဟီၣ်ခိၣ်ဖိအသိး ဒီးဟဲလီၤလၢ ပအိၣ်လံ.”+ ၁၂ ဒီးအဝဲသ့ၣ်ကိးဝဲ စီၤဘၢ်နါဘၤလၢ ကစၢ်စူ* ဒီးမ့မ့ၢ် စီၤပီလူးန့ၣ် အဝဲသ့ၣ်ကိးဝဲလၢ ကစၢ်ဟ့ၢ်မ့ၤ* ခီဖျိလၢ အဝဲမ့ၢ်ပှၤလၢ အတဲတၢ်အါကတၢၢ် အဃိလီၤ. ၁၃ ဒီးကစၢ်စူ အတၢ်လုၢ်ဟံၣ်န့ၣ် အိၣ်ဝဲလၢ ဝ့ၢ်အကျဲနုာ်လီၤန့ၣ်လီၤ. မ့ၢ်လၢ ပှၤလုၢ်တၢ်ဒိၣ်ဒီး ပှၤဂီၢ်မုၢ်တဖၣ်အဲၣ်ဒိး လုၢ်ထီၣ်တၢ်လၢ စီၤပီလူးဒီး စီၤဘၢ်နါဘၤ အအိၣ်အဃိ ကစၢ်စူ အပှၤလုၢ်တၢ်ဒိၣ်တဂၤ ဟဲစိာ်ဝဲ ကျီၢ်ဖါတဖၣ် ဒီးဖီကွီၤတဖၣ်လၢ ဝ့ၢ်အတြဲၤအခီၣ်ထံးလီၤ.
၁၄ ဖဲတၢ်မၢဖိ ဘၢ်နါဘၤ ဒီးပီလူးနၢ်ဟူဝဲ တၢ်ဂ့ၢ်အံၤအခါ အဝဲသ့ၣ်ဖှီညာ်လီၤဝဲ အနီၢ်ကစၢ် ဆ့ကၤ ဒီးကရီဃ့ၢ်နုာ်ဝဲလၢ ပှၤဂီၢ်မုၢ်တဖၣ်အကျါ ဒီးတဲဝဲလၢ အကလုၢ်ဒိၣ်ဒိၣ်လၢ ၁၅ “သုမၤဒ်အံၤ ဘၣ်လဲၣ်. ပဝဲစ့ၢ်ကီးပမ့ၢ် ပှၤဟီၣ်ခိၣ်ဖိလၢအိၣ်ဒီး တၢ်ဂံၢ်စၢ်ဘါစၢ်တဖၣ် ဒ်သိးဒီးသုလီၤ.+ ဒီးပစံၣ်တဲၤတဲလီၤ တၢ်သးခုကစီၣ်လၢသုအိၣ် ဒ်သိး သုကပာ်တ့ၢ်ကွံာ် တၢ်ကလီကလီတဖၣ်အံၤ ဒီးဘူၣ်ထီၣ်ဘါထီၣ်က့ၤ ကစၢ်ယွၤလၢအမူဝဲ လၢအတ့လီၤ မူခိၣ်, ဟီၣ်ခိၣ်, ပီၣ်လဲၣ်ဒီး တၢ်အိၣ်လၢအပူၤခဲလၢာ် တဂၤန့ၣ်အဂီၢ်လီၤ.+ ၁၆ လၢအပူၤကွံာ်န့ၣ် အဝဲဟ့ၣ်အခွဲးလၢ ပှၤကလုာ်အဂၤတဖၣ် ကမၤတၢ်ဖဲအသးလီၤ.+ ၁၇ ဘၣ်ဆၣ် အဝဲဟ့ၣ် တၢ်အုၣ်အသး ဘၣ်ဃးဒီး အနီၢ်ကစၢ်အဂ့ၢ်+ ခီဖျိလၢ အဝဲမၤဂ့ၤတၢ်အဃိလီၤ. အဝဲဒုးစူၤလီၤတၢ်လၢ မူခိၣ်လၢသုဂီၢ် ဒီးဒုးသၣ်ထီၣ် တၤသူတၤသၣ် ဘၣ်ဆၢဘၣ်ကတီၢ်,+ အဝဲဟ့ၣ်သု တၢ်အီၣ်တၢ်အီ အါအါဂီၢ်ဂီၢ် ဒီးမၤပှဲၤသုသးလၢ တၢ်သူၣ်ဖှံသးညီလီၤ.”+ ၁၈ အဝဲသ့ၣ် တဲဝဲဒ်န့ၣ်သနာ်က့ ဒ်သိး ပှၤဂီၢ်မုၢ်သ့ၣ်တဖၣ် သုတလုၢ်ထီၣ်တၢ်လၢ အဝဲသ့ၣ် အအိၣ်တဂ့ၤအဂီၢ် တြီဝဲတန့ၢ် ညီညီဘၣ်.
၁၉ ဒီးပှၤယူဒၤဖိ လၢအအိၣ်လၢ ဝ့ၢ်အၣ်တံၤအီာ် ဒီးဝ့ၢ်အံၤကနံၤန့ၣ် ဟဲတုၤဝဲ ဒီးကွဲန့ၢ်လွဲန့ၢ် ပှၤဂီၢ်မုၢ်တဖၣ်လီၤ.+ အဃိ ပှၤဂီၢ်မုၢ်တဖၣ် ကွံာ်စီၤပီလူးလၢလၢၢ် ဒီးဆိကမိၣ်ဝဲလၢ အသံလံအဃိ တွံၢ်ထီၣ်ကွံာ်အီၤလၢ ဝ့ၢ်ချၢလီၤ.+ ၂၀ ဘၣ်ဆၣ် ဖဲယ့ၣ်ၡူး အပျဲၢ်အဘီၣ်တဖၣ် ဟဲအိၣ်ဝးတရံးအီၤအခါ အဝဲဂဲၤဆၢထၢၣ် ဒီးက့ၤနုာ်လီၤလၢ ဝ့ၢ်ပူၤလီၤ. လၢခံတသီန့ၣ် အဝဲဒီးစီၤဘၢ်နါဘၤ လဲၤဝဲလၢ ဝ့ၢ်ဒ့ၢ်ဘ့ၤလီၤ.+ ၂၁ ဒီးအဝဲသ့ၣ် စံၣ်တဲၤတဲလီၤ တၢ်သးခုကစီၣ်လၢ ဝ့ၢ်တဖျၢၣ်န့ၣ်အပူၤ ဒီးဒုးကဲထီၣ် ပှၤတနီၤလၢ ယ့ၣ်ၡူး အပျဲၢ်အဘီၣ်ဝံၤ အဝဲသ့ၣ် ဟဲက့ၤလၢ ဝ့ၢ်လူစတြၤ, ဝ့ၢ်အံၤကနံၤ ဒီးဝ့ၢ်အၣ်တံၤအီာ်လီၤ. ၂၂ ဖဲန့ၣ် အဝဲသ့ၣ် ဒုးဆူၣ်ထီၣ် ယ့ၣ်ၡူး အပျဲၢ်အဘီၣ်တဖၣ်အသး+ ဒီးဟ့ၣ်ဂံၢ်ဟ့ၣ်ဘါ အဝဲသ့ၣ်လၢ ကဆဲးအိၣ်ဒီး တၢ်နာ်လၢအဂၢၢ်အကျၢၤ ဒီးတဲဝဲလၢ “ဒ်သိး ပကလဲၤနုာ်လၢ ကစၢ်ယွၤ အဘီမုၢ်အပူၤအဂီၢ် ပဘၣ်လဲၤခီဖျိ တၢ်နးတၢ်ဖှီၣ် အါမံၤလီၤ.”+ ၂၃ တကးဒံးဘၣ် စီၤပီလူးဒီး စီၤဘၢ်နါဘၤ ပာ်ထီၣ် တၢ်အိၣ်ဖှိၣ်သးပှၢ်တဖၣ် လၢတၢ်အိၣ်ဖှိၣ် ကိးဖျၢၣ်ဒဲးအပူၤ+ ဒီးဃ့ထုကဖၣ်တၢ် ဒီးဒုၣ်တၢ်အီၣ်လီၤ.+ ဒီးစီၤပီလူးဒီး စီၤဘၢ်နါဘၤ အးလီၤ တၢ်အိၣ်ဖှိၣ်သးပှၢ်တဖၣ်အံၤလၢ ယဟိဝၤယွၤ လၢအဝဲသ့ၣ် စူၢ်က့ၤနာ်က့ၤဝဲ တဂၤန့ၣ် အစုပူၤလီၤ.
၂၄ အဝဲသ့ၣ်န့ၣ် လဲၤခီဂာ်ဝဲ ပံၤစံၤဒံ ဒီးလဲၤနုာ်လီၤဝဲလၢ ပၣ်ဖူၤလံလီၤ.+ ၂၅ အဝဲသ့ၣ် စံၣ်တဲၤတဲလီၤ ယွၤအကလုၢ်ကထါလၢ ဝ့ၢ်ပ့ၢ်က့ၤအပူၤ ဝံၤဒီးလဲၤလီၤဝဲလၢ အးတါလံၤလီၤ. ၂၆ ဖဲန့ၣ် အဝဲသ့ၣ် ဒိးထီၣ်ကဘီ ဒီးက့ၤကဒီးဝဲလၢ ဝ့ၢ်အၣ်တံၤအီာ်လီၤ. လၢညါဖဲ ဝ့ၢ်အၣ်တံၤအီာ် အပူၤန့ၣ် ကစၢ်ယွၤ ပာ်ဖျါထီၣ်န့ၢ် အဝဲသ့ၣ် တၢ်သးကညီၤ ဒိၣ်ဒိၣ်မုၢ်မုၢ်လၢ အဝဲသ့ၣ် ကမၤတၢ်မၤတခါလၢ ခဲအံၤ အဝဲသ့ၣ်မၤဝဲ ဝံၤတ့ၢ်လံလီၤ.+
၂၇ ဖဲအဝဲသ့ၣ် လဲၤတုၤဝဲအခါ အဝဲသ့ၣ်ကိးဖှိၣ်ဝဲတၢ်အိၣ်ဖှိၣ် ဒီးတဲဖျါထီၣ်ဝဲ တၢ်အါမံၤလၢ ကစၢ်ယွၤမၤဝဲ ခီဖျိအဝဲသ့ၣ် ဒီးတဲဖျါထီၣ်စ့ၢ်ကီးလၢ ကစၢ်ယွၤ အိးဟိထီၣ်ကျဲ ဒ်သိး ပှၤကလုာ်တဖၣ် ကစူၢ်က့ၤနာ်က့ၤတၢ် အဂီၢ်လီၤ.+ ၂၈ အဃိ အဝဲသ့ၣ်အိၣ်ဒီး ယ့ၣ်ၡူးအပျဲၢ်အဘီၣ်တဖၣ် ဖဲန့ၣ် ဖးယံာ်ညါလီၤ.