၂ ကွဲးနီၣ်တၢ်
၂၀ လၢခံ ပှၤမိၤအးဖိ+ ဒီးပှၤဧၣ်မိၣ်ဖိ+ ဃုာ်ဒီး ပှၤအဂၤတနီၤလၢ အဟဲလၢ ဧၣ်မိၣ်* လဲၤထီၣ်ဝဲဒ်သိး ကဒုးစီၤယဟိၤၡၤဖးလီၤ. ၂ ပှၤတဲဘၣ် စီၤပၤယဟိၤၡၤဖးလၢ “သုးမုၢ်ဖးဒိၣ်တဒူၣ်လၢ အဟဲလၢကီၢ်အဒိၣ်န့ၣ်+ ဟဲထီၣ်ဒ်သိး ကဒုးနၤအဂီၢ်လီၤ. အဝဲသ့ၣ်ဟဲထီၣ်ဝဲလၢ ပီၣ်လဲၣ်* တခီ ဒီးခဲအံၤန့ၣ် အဝဲသ့ၣ်အိၣ်ဝဲလၢ ဝ့ၢ်ဃၤစစိၣ်တါမၢ် လၢအမ့ၢ် ဧ့ၣ်က့ဒံၤလီၤ.”+ ၃ အဃိ စီၤယဟိၤၡၤဖး ပျံၤထီၣ်တၢ် ဒီးအဝဲပာ်လီၤအသးလၢ ကဃုယဟိဝၤယွၤလီၤ.+ ဒီးအဝဲမၢပှၤလၢ ယူဒၤဘီမုၢ်အပူၤခဲလၢာ် ဒုၣ်တၢ်အီၣ်လီၤ. ၄ ဝံၤဒီး ပှၤလၢအအိၣ်လၢ ယူဒၤဘီမုၢ်အပူၤန့ၣ် ပာ်ဖှိၣ်ထီၣ်အသး ဒ်သိးကသံကွၢ်တၢ်လၢ ယဟိဝၤယွၤလီၤ.+ အဃိ အဝဲသ့ၣ်အိၣ်ဟဲလၢ ဝ့ၢ်ကိးဖျၢၣ်ဒဲးလၢ ယူဒၤဘီမုၢ်အပူၤ ဒ်သိးကသံကွၢ် ယဟိဝၤယွၤ အတၢ်ဟံးစုနဲၣ်ကျဲအဂီၢ်လီၤ.
၅ ယူဒၤဒီးယရူၤၡလ့ၣ် အတၢ်အိၣ်ဖှိၣ် ပာ်ဖှိၣ်ထီၣ်အသးလၢ ယဟိဝၤယွၤအဟံၣ် အတၢ်ပျီလၢ အသီတဘ့ၣ်အပူၤလီၤ. ဒီးစီၤယဟိၤၡၤဖး လဲၤဆၢထၢၣ်လၢ အဝဲသ့ၣ်အကျါလီၤ. ၆ ဒီးအဝဲဃ့ထုကဖၣ်လၢ
“အိ ပမိၢ်ပၢ်ဖံဖု လၢပျၢၤတဖၣ် အကစၢ် ယဟိဝၤယွၤဧၢ, ယွၤလၢမူခိၣ်န့ၣ် အိၣ်ထဲနၤတဂၤ+ ဒီးနပၢတၢ်လၢ ပှၤကလုာ်တဖၣ် အဘီမုၢ်ခဲလၢာ် အဖီခိၣ်လီၤ.+ နအိၣ်ဒီးတၢ်စိတၢ်ကမီၤ ဒီးနဂံၢ်ဆူၣ်ဘါဆူၣ် ဒီးပှၤတြီဆၢနၤ တန့ၢ်နီတဂၤဘၣ်.+ ၇ အိ ပကစၢ်ယွၤဧၢ, ပှၤလၢအအိၣ်ပာ်စၢၤလၢ ကီၢ်တဘ့ၣ်အံၤအပူၤန့ၣ် နနီဟးထီၣ်ကွံာ် အဝဲသ့ၣ်လၢ နပှၤဂီၢ်မုၢ် အံၣ်စရ့လး အမဲာ်ညါ ဝံၤဒီး နဟ့ၣ်လီၤ ကီၢ်တဘ့ၣ်အံၤလၢ နသကိး စီၤအၤဘြၤဟၣ် အစၢၤအသွဲၣ်တဖၣ်အအိၣ် ဒ်သိးကကဲထီၣ် အဝဲသ့ၣ်အတၢ် အစိၤစိၤအဃၣ်ဃၣ်လီၤ.+ ၈ ဒီးအဝဲသ့ၣ် အိၣ်ဝဲဆိးဝဲဖဲန့ၣ် ဒီးအဝဲသ့ၣ်တ့ထီၣ်န့ၢ်နၤ တၢ်စီဆှံအလီၢ်လၢ နမံၤအဂီၢ်+ ဒီးတဲဝဲလၢ ၉ ‘တၢ်ကီတၢ်ခဲဖးဒိၣ် မ့ၢ်ဟဲဘၣ်ပှၤ ဒ်သိးဒီး တၢ်ဒုးတၢ်ယၤ, တၢ်စံၣ်ညီၣ်, တၢ်ဆါသံသတြိာ် မ့တမ့ၢ် တၢ်သၣ်ဝံၤလီၤဒိန့ၣ် ပကဘၣ် ဆၢထၢၣ်လၢ နမဲာ်ညါ ဒီးလၢဟံၣ်တဖျၢၣ်အံၤ အမဲာ်ညါ မ့ၢ်လၢ နမံၤန့ၣ် အိၣ်ဝဲလၢ ဟံၣ်တဖျၢၣ်အံၤ အပူၤအဃိလီၤ.+ ဒီးလၢပတၢ်ကိၢ်တၢ်ဂီၤ အပူၤန့ၣ် ပကဘၣ်ဃ့ တၢ်မၤစၢၤလၢ နအိၣ် ဒီးနကဒိကနၣ် ဒီးမၤပူၤဖျဲးပှၤလီၤ.’+ ၁၀ ခဲအံၤ ပှၤဧၣ်မိၣ်ဖိ, ပှၤမိၤအးဖိ ဒီးပှၤလၢ အအိၣ်လၢ စ့ဧၢ်ကစၢၢ်ကလိကျါတဖၣ်+ ဟဲတုၤဖဲအံၤလံ. ဖဲပှၤအံၣ်စရ့လးဖိ ဟးထီၣ်လၢ ကီၢ်အဲၤကူပတူးပူၤအခါ နတဟ့ၣ်အခွဲးလၢ ပှၤအံၣ်စရ့လးဖိ ကနုာ်လီၤဒုး ပှၤသ့ၣ်တဖၣ်န့ၣ်ဘၣ်. အဃိ ပှၤအံၣ်စရ့လးဖိ ဃၣ်ကွံာ်အသး ဒီးတမၤဟးဂီၤ အဝဲသ့ၣ်ဘၣ်.+ ၁၁ ဘၣ်ဆၣ် ခဲအံၤ အဝဲသ့ၣ် မၤပှၤဒ်အံၤ ဒီးအဲၣ်ဒိး နီဟးထီၣ်ကွံာ်ပှၤလၢ နတၢ်လီၢ်လၢ နဟ့ၣ်ပှၤဒ် တၢ်န့ၢ်သါအသိးအံၤ အပူၤလီၤ.+ ၁၂ အိ ပကစၢ်ယွၤဧၢ, နကစံၣ်ညီၣ် အဝဲသ့ၣ်တမ့ၢ်ဧီၤ.+ သုးမုၢ်ဖးဒိၣ်တဒူၣ်အံၤ ဟဲထီၣ်ဒ်သိး ကဒုးပှၤလံ. ပဂံၢ်ပဘါလၢ ပကတြီဆၢအဝဲသ့ၣ် တအိၣ်နီတစဲးဘၣ် ဒီးပကဘၣ်မၤဒ်လဲၣ်န့ၣ် ပတသ့ၣ်ညါဘၣ်.+ ဘၣ်ဆၣ် ပကွၢ်တၢ်လၢ နအိၣ်လၢ တၢ်မၤစၢၤအဂီၢ်လီၤ.”+
၁၃ ဖဲန့ၣ်အခါ ပှၤလၢအအိၣ်လၢ ယူဒၤဘီမုၢ်အပူၤခဲလၢာ် ဆၢထၢၣ်ဝဲလၢ ယဟိဝၤယွၤ အမဲာ်ညါ ဃုာ်ဒီး အဖိအမါတဖၣ် ဒီးအဖိဆံးတဖၣ်လီၤ.
၁၄ ယဟိဝၤယွၤ အသးစီဆှံ ဟဲလီၤလၢ စီၤယၤဃစအ့လး အလိၤလၢ တၢ်အိၣ်ဖှိၣ်အခၢၣ်သးလီၤ. စီၤယၤဃစအ့လး မ့ၢ်ဝဲ စီၤစကၤရယၤ အဖိခွါ, စီၤစကၤရယၤ မ့ၢ်ဝဲ စီၤဘနါယၤ အဖိခွါ, စီၤဘနါယၤ မ့ၢ်ဝဲ စီၤယံၤအ့လး အဖိခွါ, စီၤယံၤအ့လး မ့ၢ်ဝဲ ပှၤလ့ၤဝံဖိ စီၤမးတၤနယၤ အဖိခွါ ဒီးစီၤမးတၤနယၤ ပၣ်ဃုာ်လၢ စီၤအၤစာ် အဖိအလံၤတဖၣ် အကျါလီၤ. ၁၅ စီၤယၤဃစအ့လး တဲဝဲလၢ “ယူဒၤဒီး ယရူၤၡလ့ၣ်အပှၤဂီၢ်မုၢ်ခဲလၢာ် ဒီးစီၤပၤယဟိၤၡၤဖးဧၢ, ကနၣ်လၢအံၤ, ယဟိဝၤယွၤ တဲဘၣ်သုလၢ ‘တၢ်ဒုးအံၤ တမ့ၢ်သုတၢ်ဒုးဘၣ်, မ့ၢ်ဝဲကစၢ်ယွၤ အတၢ်ဒုးအဃိ တဘၣ်ပျံၤ ပှၤဂီၢ်မုၢ်ဖးဒိၣ်တဒူၣ်အံၤတဂ့ၤ.+ ၁၆ ခဲမုၢ်ဆ့ၣ်န့ၣ် လဲၤသဂၢၢ်အဝဲသ့ၣ်ဟီ. ဖဲန့ၣ်အခါ အဝဲသ့ၣ် ကဟဲထီၣ်လၢ စံၤအကျဲ ဒီးသုကထံၣ် အဝဲသ့ၣ် ဖဲတၢ်တြီၤအကတၢၢ်လၢ အဘူးဒီး ယရူၤအ့လး အပှၢ်မုၢ်ကနၢလီၤ. ၁၇ သုတလိၣ်ဒုးတၢ်လၢ တၢ်ဒုးအံၤအပူၤဘၣ်. ဟံးန့ၢ်သုလီၢ်, ဆၢထၢၣ်အိၣ်ဂၢၢ်ကျၢၤ+ ဒီးသုကထံၣ်ဘၣ် ယဟိဝၤယွၤ အတၢ်အုၣ်က့ၤခီၣ်က့ၤသုလီၤ.*+ ပှၤဂီၢ်မုၢ်လၢ ယူဒၤဒီးဝ့ၢ်ယရူၤၡလ့ၣ် အပူၤသ့ၣ်ဧၢ, တဘၣ်ပျံၤတၢ်တဂ့ၤ.+ ခဲမုၢ်ဆ့ၣ်န့ၣ် လဲၤထီၣ်သဂၢၢ် အဝဲသ့ၣ် ဒီးယဟိဝၤယွၤ ကအိၣ်ဒီးသုလီၤ.’”+
၁၈ တဘျီဃီန့ၣ် စီၤယဟိၤၡၤဖး ထိၣ်လီၤပှီၤအသး လၢဟီၣ်ခိၣ်လိၤလီၤ. ဒီးယူဒၤ ဒီးဝ့ၢ်ယရူၤၡလ့ၣ်အပှၤဂီၢ်မုၢ် ခဲလၢာ် ထိၣ်လီၤပှီၤအသးလၢ ယဟိဝၤယွၤအမဲာ်ညါ ဒီးဘူၣ်ထီၣ်ဘါထီၣ် ယဟိဝၤယွၤလီၤ. ၁၉ ဝံၤဒီး ပှၤလ့ၤဝံဖိ လၢအမ့ၢ် ပှၤကဃးဖိ အစၢၤအသွဲၣ်တဖၣ် ဒီးပှၤကိၤရးဖိတဖၣ်န့ၣ်+ ဆၢထၢၣ်ဒီး စံးထီၣ်ပတြၢၤ အံၣ်စရ့လး အကစၢ် ယဟိဝၤယွၤ လၢအကလုၢ်ဒိၣ်ဒိၣ်လီၤ.+
၂၀ လၢခံတဂီၤန့ၣ် အဝဲသ့ၣ် ဂဲၤဆၢထၢၣ် ဂီၤဂီၤဒီး လဲၤဝဲလၢ တကိၤ အပှၢ်မုၢ်ကနၢလီၤ.+ ဖဲအဝဲသ့ၣ် ဟးထီၣ်အခါ စီၤယဟိၤၡၤဖး ဆၢထၢၣ်ဒီးတဲဝဲလၢ “ပှၤဂီၢ်မုၢ်လၢ ယူဒၤဒီးဝ့ၢ်ယရူၤၡလ့ၣ်အပူၤ ခဲလၢာ်သ့ၣ်ဧၢ, ကနၣ်လၢအံၤ, ဒ်သိးသုကအိၣ်ဒီး တၢ်တူၢ်န့ၢ်ခီၣ်ကဲအဂီၢ် နာ်န့ၢ် သုကစၢ် ယဟိဝၤယွၤတက့ၢ်. ဒီးဒ်သိး တၢ်ခဲလၢာ် ကလဲၤအသး ဘျ့ဘျ့ဆှီဆှီလၢသုဂီၢ်န့ၣ် နာ်န့ၢ်အဝံတဖၣ်တက့ၢ်.”+
၂၁ အဝဲတၢၣ်ပီၣ်တၢၣ်ပီသကိးဒီး ပှၤဂီၢ်မုၢ်ဝံၤအလီၢ်ခံ အဝဲဃုထၢထီၣ် ပှၤလၢအကသးဝံၣ်+ စံးထီၣ်ပတြၢၤ ယဟိဝၤယွၤ ဒီးကကူထီၣ်သိးထီၣ် တၢ်ကူတၢ်ကၤ စီဆှံ ဒီးကလဲၤဝဲလၢ သုးဖိတဖၣ်အမဲာ်ညါ ဒီးကသးဝံၣ်ထီၣ်ဝဲလၢ “ယဟိဝၤယွၤ အတၢ်အဲၣ်လၢအတီန့ၣ် အိၣ်ဂၢၢ်ဆိးကျၢၤ လီၤထူလီၤယိာ်အဃိ စံးဘျုးအီၤတက့ၢ်.”+
၂၂ ဖဲအဝဲသ့ၣ် စးထီၣ် သးဝံၣ်စံးထီၣ်ပတြၢၤတၢ်အခါ ယဟိဝၤယွၤ ရဲၣ်ကျဲၤဝဲ ပှၤခိးခူသူၣ်တၢ်တဖၣ် ဒ်သိး ကထီဒါ ကီၢ်ဧၣ်မိၣ်, ကီၢ်မိၤအး ဒီးပှၤသုးဖိလၢ စ့ဧၢ်ကစၢၢ်ကလိကျါ လၢအဟဲထီၣ်ဒုး ယူဒၤဘီမုၢ်လီၤ. ဒီးအဝဲသ့ၣ် က့ၤမၤသံလိာ်သး ကဒဲကဒဲလီၤ.+ ၂၃ အဆိကတၢၢ် ပှၤဧၣ်မိၣ်ဖိ ဒီးပှၤမိၤအးဖိ က့ၤထီဒါက့ၤ ပှၤသုးဖိလၢ စ့ဧၢ်ကစၢၢ်ကလိကျါ+ ဒ်သိး ကမၤဟးဂီၤကွံာ် အဝဲသ့ၣ် ခဲလၢာ်ခဲဆ့လီၤ. ဖဲအဝဲသ့ၣ် မၤဟးဂီၤကွံာ် ပှၤသုးဖိလၢ စ့ဧၢ်ကစၢၢ်ကလိကျါတဖၣ် ဝံၤအလီၢ်ခံ အဝဲသ့ၣ် က့ၤမၤသံလိာ်သး ကဒဲကဒဲလီၤ.+
၂၄ ဖဲယူဒၤ အပှၤဂီၢ်မုၢ် လဲၤတုၤလၢ တၢးထီခိးတၢ်တဖျၢၣ်လၢ ပှၢ်မုၢ်ကနၢအပူၤအခါ+ အဝဲသ့ၣ် ကွၢ်ဃီၤတၢ်လၢ သုးမုၢ်တဒူၣ်န့ၣ်အအိၣ် ဒီးဖဲန့ၣ် အဝဲသ့ၣ်ထံၣ်ဝဲ ပှၤသံစိၣ်တဖၣ်လၢ ဟီၣ်ခိၣ်လိၤလီၤ.+ ပှၤတမူနီတဂၤလၢၤဘၣ်. ၂၅ အဃိ စီၤယဟိၤၡၤဖး ဒီးအပှၤတဖၣ် လဲၤဟံးန့ၢ် အဝဲသ့ၣ် အတၢ်ဖိတၢ်လံၤလီၤ. ဒီးအဝဲသ့ၣ် ထံၣ်န့ၢ်ဝဲ တၢ်ပီးတၢ်လီတဖၣ်, တၢ်ကူတၢ်သိး, တၢ်ဖိတၢ်လံၤလၢ အလုၢ်ဒိၣ်ပှ့ၤဒိၣ် ဒီးအဝဲသ့ၣ်ဟံးန့ၢ်ဝဲလၢ အနီၢ်ကစၢ်အဂီၢ် တုၤလၢ အစိာ်ဝဲ တလၢာ်လၢၤဘၣ်န့ၣ်လီၤ.+ မ့ၢ်လၢ တၢ်ဖိတၢ်လံၤတဖၣ် အိၣ်ဝဲအါမးအဃိ အဝဲသ့ၣ် ဘၣ်လဲၤဟံးန့ၢ်ဝဲ သၢသီညါလီၤ. ၂၆ လၢလွံၢ်သီတသီန့ၣ် အဝဲသ့ၣ် ပာ်ဖှိၣ်ထီၣ်အသးလၢ ဘရၤကၤ အတၢ်တြီၤ ဒီးအဝဲသ့ၣ် စံးထီၣ်ပတြၢၤ ယဟိဝၤယွၤ ဖဲန့ၣ်လီၤ. အဃိအဝဲသ့ၣ် ကိးန့ၢ်ဝဲ တၢ်လီၢ်တတီၤန့ၣ် အမံၤလၢ ဘရၤကၤ*+ အတၢ်တြီၤ တုၤလၢ မုၢ်မဆါတနံၤအံၤလီၤ.
၂၇ ဝံၤဒီး ယူဒၤဒီးယရူၤၡလ့ၣ် အပှၤဂီၢ်မုၢ် ဃုာ်ဒီး အဝဲသ့ၣ်အခိၣ် စီၤယဟိၤၡၤဖးန့ၣ် က့ၤဝဲလၢ ဝ့ၢ်ယရူၤၡလ့ၣ်လီၤ. ဒီးအဝဲသ့ၣ် က့ၤလၢ တၢ်သူၣ်ဖှံသးညီအပူၤ မ့ၢ်လၢ ယဟိဝၤယွၤ ဟ့ၣ်အဝဲသ့ၣ် တၢ်မၤနၢၤလၢ အဝဲသ့ၣ် အဒုၣ်အဒါတဖၣ် အဖီခိၣ်အဃိလီၤ.+ ၂၈ အဝဲသ့ၣ် က့ၤနုာ်လၢ ဝ့ၢ်ယရူၤၡလ့ၣ်အပူၤ ဒီးက့ၤစိာ်ဃုာ်ဒီး သီတူၢ်တဖၣ်, တနၢ်တဖၣ်+ ဒီးကွဲၤတဖၣ်+ ဒီးလဲၤဝဲလၢ ယဟိဝၤယွၤ အဟံၣ်လီၤ.+ ၂၉ ဖဲဘီမုၢ်အဂၤခဲလၢာ် နၢ်ဟူဝဲလၢ ယဟိဝၤယွၤ ဒုးဝဲအံၣ်စရ့လး အဒုၣ်အဒါတဖၣ်အခါ အဝဲသ့ၣ် ပျံၤကစၢ်ယွၤဒိၣ်မးလီၤ.+ ၃၀ အဃိ စီၤယဟိၤၡၤဖး အဘီမုၢ်န့ၣ် အိၣ်ဘၣ်ဝဲ မုာ်မုာ်ခုၣ်ခုၣ် ဒီးကစၢ်ယွၤ ဆဲးဟ့ၣ်အီၤ တၢ်မုာ်တၢ်ခုၣ် လၢတၢ်လီၢ်လၢ အကပိာ်ကပၤဝးဝးလီၤ.+
၃၁ ဒီးစီၤယဟိၤၡၤဖး ဆဲးပၢတၢ်လၢ ယူဒၤဘီမုၢ်အဖီခိၣ်လီၤ. ဖဲစီၤယဟိၤၡၤဖး ကဲထီၣ်စီၤပၤအခါ အသးနံၣ်အိၣ်ဝဲ ၃၅ နံၣ် ဒီးအဝဲပၢဘၣ်တၢ်လၢ ဝ့ၢ်ယရူၤၡလ့ၣ်အပူၤ ၂၅ နံၣ်လီၤ. စီၤယဟိၤၡၤဖး အမိၢ်အမံၤမ့ၢ်ဝဲ နီၢ်ဧစူဘၤ လၢအမ့ၢ် စီၤၡံးလဃံ အဖိမုၣ်န့ၣ်လီၤ.+ ၃၂ စီၤယဟိၤၡၤဖး အိၣ်မူမၤထွဲဝဲဒ် အပၢ်စီၤအၤစါ အသိးထီဘိလီၤ.+ ဒီးအဝဲတဃၣ်ကွံာ်အသးလၢ အပၢ်အကျဲဘၣ် ဒီးအဝဲမၤတၢ်လၢ ယဟိဝၤယွၤ ထံၣ်ဝဲလၢအဂ့ၤန့ၣ်လီၤ.+ ၃၃ ဘၣ်ဆၣ် တၢ်လီၢ်ထီၣ်ထီတဖၣ် အိၣ်ဒံးဝဲလီၤ.+ ဒီးပှၤဂီၢ်မုၢ်တဖၣ် တပာ်လီၤအသးလၢ အကဘူၣ်ထီၣ်ဘါထီၣ် အမိၢ်ပၢ်ဖံဖု လၢပျၢၤတဖၣ် အကစၢ်ယွၤဒံးဘၣ်.+
၃၄ မ့မ့ၢ် စီၤယဟိၤၡၤဖး အဂ့ၢ်လၢအဂၤတဖၣ် စးထီၣ်လၢ အခီၣ်ထံးတုၤလၢ အကတၢၢ်န့ၣ် ဘၣ်တၢ်ကွဲးလီၤအီၤလၢ စီၤဃနၤနံ+ အဖိခွါ စီၤယ့ၤဟူ+ အတၢ်ကွဲးနီၣ်ကွဲးဃါတဖၣ်အပူၤ လၢအပၣ်ဃုာ်လၢ အံၣ်စရ့လး အစီၤပၤတဖၣ် အလံာ်ပူၤလီၤ. ၃၅ လၢခံ ယူဒၤအစီၤပၤယဟိၤၡၤဖး ဖီၣ်လိာ်သးစုဒီး အံၣ်စရ့လး အစီၤပၤအဃၤစယၤ လၢအမ့ၢ်ပှၤလၢ အမၤတၢ်အၢအၢသီသီ တဂၤလီၤ.+ ၃၆ အဝဲဒီတံၤဒီသကိးဒီးအီၤ ဒ်သိးကတ့ထီၣ် ကဘီတဖၣ်လၢ အကလဲၤဆူ တၢ်ၡံၣ်လီၤ.+ ဒီးအဝဲသ့ၣ် တ့ထီၣ် ကဘီတဖၣ်အံၤလၢ ဧ့စယိၣ်က့းဘ့ၢ်လီၤ.+ ၃၇ ဘၣ်ဆၣ် စီၤဒိဒၤဝၤ အဖိခွါ စီၤအလံၤဧ့စ့ၢ် လၢအိၣ်ဟဲလၢ မရ့ၡးန့ၣ် တဲတၢ်ဒ်ဝံအသိး လၢအထီဒါ စီၤယဟိၤၡၤဖးလီၤ. ဒီးအတဲဝဲလၢ “မ့ၢ်လၢနဖီၣ်လိာ်သးစုဒီး စီၤအဃၤစယၤအဃိ ယဟိဝၤယွၤ ကမၤဟးဂီၤကွံာ် နတၢ်မၤတဖၣ်လီၤ.”+ အဃိကဘီတဖၣ်န့ၣ် ဟးဂီၤကွံာ်ဝဲ+ ဒီးကဘီတဖၣ်န့ၣ် လဲၤလၢ တၢ်ၡံၣ် တသ့လၢၤဘၣ်.