မၤတၢ်

၁၉ ဖဲစီၤအပီးလိၤ+ အိၣ်လၢ ဝ့ၢ်ကရံၣ်သူး အခါန့ၣ်​ စီၤပီလူး လဲၤတၢ်လၢ ထံလီၢ်ကီၢ်ပူၤ တုၤလီၤလၢ ဝ့ၢ်အ့းဖ့းစူးလီၤ.+ ဖဲန့ၣ်​ အဝဲထံၣ်ဝဲ ပှၤတနီၤလၢ အဘါယွၤ* ၂ ဒီးသံကွၢ် အဝဲသ့ၣ်လၢ “ဖဲသုကဲထီၣ်​ ပှၤစူၢ်က့ၤနာ်က့ၤတၢ်အခါ သုဒိးန့ၢ်ဘၣ်​ သးစီဆှံဧါ.”+ အဝဲသ့ၣ်​ တဲဆၢအီၤလၢ “ဘၣ်ဃးဒီး သးစီဆှံန့ၣ်​ ပတနၢ်ဟူဘၣ်​ နီတဘျီဘၣ်.” ၃ အဃိ စီၤပီလူးတဲဝဲလၢ “သုဒိးဘျၢသုသးလၢ တၢ်ဒိးဘျၢ ဒ်လဲၣ်တကလုာ်လဲၣ်.” အဝဲသ့ၣ်​ တဲဝဲလၢ “လၢစီၤယိၤဟၣ်​ အတၢ်ဒိးဘျၢလီၤ.”+ ၄ စီၤပီလူး တဲဝဲလၢ “စီၤယိၤဟၣ်​ အတၢ်ဒိးဘျၢန့ၣ်​ မ့ၢ်ဝဲတၢ်ပနီၣ်လၢ တၢ်ပီၢ်ယၢ်လီၤက့ၤသး အဂီၢ်လီၤ.+ ဒီးစီၤယိၤဟၣ်တဲဘၣ်ဝဲ ပှၤဂီၢ်မုၢ်တဖၣ်​ ဒ်သိး ကစူၢ်က့ၤနာ်က့ၤ ပှၤလၢအဟဲလၢ အလီၢ်ခံတဂၤ+ လၢအမ့ၢ် ယ့ၣ်ၡူးလီၤ.” ၅ ဖဲအဝဲသ့ၣ်​ နၢ်ဟူဝဲဒ်န့ၣ်အခါ အဝဲသ့ၣ်​ ဒိးဘျၢထံလၢ ကစၢ်ယ့ၣ်ၡူး အမံၤအပူၤလီၤ. ၆ ဒီးဖဲစီၤပီလူး ပာ်အစုလၢ အဝဲသ့ၣ်​ အလိၤအခါ သးစီဆှံဟဲလီၤလၢ အဝဲသ့ၣ်အလိၤ+ ဒီးအဝဲသ့ၣ်​ စးထီၣ်တဲတၢ်လၢ ကျိာ်အဂၤတဖၣ်ဒီး တဲတၢ်ဒ်ဝံအသိးလီၤ.+ ၇ ဖဲန့ၣ်ပှၤပိာ်ခွါခဲလၢာ် အိၣ်ဝဲ ၁၂ ဂၤလီၤ.

၈ လၢသၢလါအတီၢ်ပူၤ စီၤပီလူး တဲတၢ်ဒူဒူ လၢဘူၣ်ဘျီၣ်အပူၤ+ ဒီးဖဲန့ၣ်​ အဝဲဟ့ၣ်​ တၢ်စံၣ်တဲၤတဲလီၤတၢ်တဖၣ်​ ဒီးဂုာ်ကျဲးစၢး ထုးန့ၢ်အဝဲသ့ၣ်အသး ဘၣ်ဃးဒီး ယွၤအဘီမုၢ်အဂ့ၢ်လီၤ.+ ၉ ဘၣ်ဆၣ်​ အဝဲသ့ၣ်တနီၤ အခိၣ်ကိၤဒီး တနာ်တၢ်ဘၣ်. ဒီးလၢကမျၢၢ်အမဲာ်ညါန့ၣ်​ အဝဲသ့ၣ်​ တဲအၢတဲသီ တၢ်မ့ၢ်တၢ်တီအကျဲအံၤလီၤ.*+ အဃိ စီၤပီလူး ဟးဖးဒီးအဝဲသ့ၣ်+ ဒီးကိးဃုာ်ဝဲ ပှၤလၢအစူၢ်က့ၤ နာ်က့ၤတၢ်တဖၣ်လၢ အဝဲသ့ၣ်အကျါ ဒီးကိးနံၤဒဲးန့ၣ်​ အဝဲဟ့ၣ်​ တၢ်စံၣ်တဲၤတဲလီၤတၢ်တဖၣ်​ လၢစီၤတူၤရၣ်နူး အတၢ်သိၣ်လိနဲၣ်လိ ဘျီၣ်ဒိၣ်အပူၤလီၤ. ၁၀ အမၤဝဲဒ်အံၤခံနံၣ်အဃိ ပှၤလၢအအိၣ်လၢ အၤစံကီၢ်ရ့ၣ်အပူၤ လၢအမ့ၢ် ပှၤယူဒၤဖိမ့ၢ်ဂ့ၤ, ပှၤကြံးဖိမ့ၢ်ဂ့ၤ, နၢ်ဟူဘၣ်ဝဲ ကစၢ်အကလုၢ်ကထါလီၤ.

၁၁ ဒီးကစၢ်ယွၤ ဆဲးမၤ တၢ်လီၤလးဖးဒိၣ်တဖၣ်​ ခီဖျိလၢ စီၤပီလူး+ ၁၂ တုၤဒၣ်လဲာ် တၢ်ကံးညာ် ဒီးတၢ်ကူတၢ်သိးလၢ စီၤပီလူး သူတ့ၢ်ဝဲတဖၣ်န့ၣ်​ ပှၤလဲၤစိာ်ဝဲလၢ ပှၤဆူးပှၤဆါတဖၣ်အအိၣ်​ ဒီးအဝဲသ့ၣ်​ အတၢ်ဆါ ဘျါက့ၤဝဲဒီး+ တၢ်ဝံတၢ်နါတဖၣ်​ ဟးထီၣ်ကွံာ်ဝဲလၢ အဝဲသ့ၣ်အလိၤလီၤ.+ ၁၃ ဘၣ်ဆၣ်​ ပှၤယူဒၤဖိတနီၤလၢ အဟးဝ့ၤဝီၤနီဟးထီၣ်​ တၢ်ဝံတၢ်နါတဖၣ်စ့ၢ်ကီး ဂုာ်ကျဲးစၢးဝဲဒ်သိး ကသူဝဲ ကစၢ်ယ့ၣ်ၡူးအမံၤ ဖဲအဝဲသ့ၣ်​ ကနီဟးထီၣ်ကွံာ် တၢ်ဝံတၢ်နါလၢ ပှၤလိၤအခါလီၤ. အဝဲသ့ၣ်​ တဲဝဲလၢ “ခီဖျိလၢ ယ့ၣ်ၡူးလၢစီၤပီလူး စံၣ်တဲၤတဲလီၤဝဲ တဂၤအမံၤအပူၤန့ၣ်​ ယမၤလိာ်သုလၢ ဟးထီၣ်ကွံာ်တက့ၢ်.”+ ၁၄ ပှၤယူဒၤဖိ အပှၤလုၢ်တၢ်ဒိၣ်အခိၣ်​ လၢအမ့ၢ် စီၤစက့းဝၤ အဖိခွါနွံဂၤန့ၣ်​ မၤဝဲဒ်န့ၣ်လီၤ. ၁၅ ဘၣ်ဆၣ်​ တၢ်ဝံတၢ်နါ တဲဆၢက့ၤ အဝဲသ့ၣ်လၢ “ယသ့ၣ်ညါယ့ၣ်ၡူး+ ဒီးယသ့ၣ်ညါ စီၤပီလူးလီၤ.+ ဘၣ်ဆၣ်​ သုမ့ၢ်မတၤတဖၣ်လဲၣ်.” ၁၆ ဖဲန့ၣ်န့ၣ်​ ပိာ်ခွါလၢ တၢ်ဝံတၢ်နါ အိၣ်လၢအလိၤတဂၤ ဖုထီၣ်* လၢအဝဲသ့ၣ်အလိၤ ဒီးမၤနၢၤကွံာ်အဝဲသ့ၣ်​ တဂၤဝံၤတဂၤအဃိ အဝဲသ့ၣ်ဘၣ်ဒိဘၣ်ထံး ဒီးဃ့ၢ်ထီၣ်လၢဟံၣ်ချၢ လၢဘ့ၣ်ဆ့လီၤ. ၁၇ ပှၤယူဒၤဖိဒီး ပှၤကြံးဖိလၢ အအိၣ်လၢ ဝ့ၢ်အ့းဖ့းစူးအပူၤ ခဲလၢာ်န့ၣ်​ သ့ၣ်ညါဘၣ်​ တၢ်မၤအသးတခါအံၤ အဂ့ၢ်အဃိ အဝဲသ့ၣ်​ ခဲလၢာ်ပျံၤတၢ်ဖုးတၢ်လီၤ. ဒီးကစၢ်ယ့ၣ်ၡူးအမံၤ ဘၣ်တၢ် ဆဲးမၤလၤကပီၤအီၤလီၤ. ၁၈ ဒီးပှၤစူၢ်တၢ်နာ်တၢ် အါဂၤဟဲဝဲ ဒီးအၢၣ်လီၤဝဲ တၢ်လၢအဝဲသ့ၣ်​ မၤဝဲတဖၣ်​ လၢပှၤမဲာ်ညါ ပျီပျီလီၤ. ၁၉ ပှၤအါဂၤလၢ အမၤတ့ၢ် တၢ်မၤကဒါပှၤမဲာ် အတၢ်ဖံးတၢ်မၤတဖၣ်န့ၣ်​ အဝဲသ့ၣ်​ ဟဲပာ်ဖှိၣ်ထီၣ်​ အလံာ်တဖၣ်​ ဒီးဒွဲၣ်အူထီၣ်ကွံာ်ဝဲလၢ ပှၤခဲလၢာ် အမဲာ်ညါလီၤ.+ ဒီးအဝဲသ့ၣ်ဒွးဝဲ လံာ်တဖၣ်အံၤ အပှ့ၤန့ၣ်အိၣ်ဝဲ စ့ညၣ်အဘ့ၣ်​ ၅၀,၀၀၀ ညါ. ၂၀ အဃိ ယဟိဝၤယွၤ* အကလုၢ်ကထါန့ၣ်​ ဆဲးရၤလီၤအသး ဒီးမၤနၢၤတၢ်လီၤ.+

၂၁ တၢ်မၤအသးတဖၣ်အံၤ ဝံၤဒီး စီၤပီလူးပာ်လီၤအသးလၢ အဝဲလဲၤခီဂာ် ကီၢ်မၤက့းဒနံဒီး+ အဃါယၤကီၢ်ရ့ၣ်​ မ့ၢ်ဝံၤန့ၣ်​ အကလဲၤဝဲလၢ ဝ့ၢ်ယရူၤၡလ့ၣ်လီၤ.+ အဝဲတဲဝဲလၢ “ယလဲၤဖဲန့ၣ်​ မ့ၢ်ဝံၤန့ၣ်​ ယကဘၣ်လဲၤလၢ ဝ့ၢ်ရိမ့ၤ စ့ၢ်ကီးလီၤ.”+ ၂၂ အဃိ အဝဲဆှၢလီၤ အပှၤမၤစၢၤတၢ်ခံဂၤ လၢအမ့ၢ် စီၤတံၤမသ့း+ ဒီးစီၤအ့ရၤစတူး+ လၢကီၢ်မၤက့းဒနံလီၤ. ဘၣ်ဆၣ်​ အနီၢ်ကစၢ် အိၣ်တ့ၢ်ဝဲလၢ အၤစံကီၢ်ရ့ၣ်အပူၤ တတီၤဖိလီၤ.

၂၃ ဖဲန့ၣ်အဆၢကတီၢ် ဘၣ်ဃးဒီး တၢ်မ့ၢ်တၢ်တီအကျဲန့ၣ်+ တၢ်သဘံၣ်သဘုၣ်+ ဟဲအိၣ်ထီၣ်ဝဲလီၤ. ၂၄ စီၤဒ့ၤမ့ၤတြံ လၢအမ့ၢ် ပှၤပိာ်စ့တဂၤန့ၣ်​ တ့ဝဲ ကစၢ်မုၣ်​ နီၢ်အၢ်တ့းမံၤ အတၢ်လုၢ်ဟံၣ်​ ဆံးဆံးဖိတဖၣ်လၢ စ့ညၣ်အဃိ ပှၤလၢ အမၤသကိးတၢ်ဒီးအီၤတဖၣ်န့ၣ်​ န့ၢ်ဘၣ်​ ကျိၣ်စ့ဒီဒူၣ်လီၤ.+ ၂၅ အဝဲကိးဖှိၣ်​ အဝဲသ့ၣ်ဃုာ်ဒီး ပှၤပိာ်စ့အဂၤတဖၣ်​ ဒီးတဲဝဲလၢ “သကိးသ့ၣ်ဧၢ, ဒ်သုသ့ၣ်ညါအသိး ပကဲဒိၣ်ထီၣ်လၢ တၢ်မၤအံၤအဃိလီၤ. ၂၆ ခဲအံၤ သုထံၣ်ဒီး သုနၢ်ဟူဘၣ်​ တၢ်လၢစီၤပီလူးတဂၤအံၤ မၤဝဲလၢ အ့းဖ့းစူးအပူၤ+ တကးဒံးဘၣ်​ ဘူးကဝး အၤစံအကီၢ်ရ့ၣ်​ ဒီဘ့ၣ်ညါစ့ၢ်ကီးလီၤ. အဝဲကွဲန့ၢ်လွဲန့ၢ် ပှၤဂီၢ်မုၢ် ဒီးဆီတလဲ အဝဲသ့ၣ်အတၢ်နာ် ဒီးတဲဝဲလၢ ယွၤတဖၣ်လၢ ပှၤတ့အီၤလၢပှၤစုန့ၣ်​ တမ့ၢ်ယွၤ အနီၢ်ကီၢ်ဘၣ်.+ ၂၇ အဃိ တၢ်ဘၣ်ယိၣ်​ အလီၢ်အိၣ်လၢ ပှၤကတဲအၢတဲသီ ပတၢ်ဖံးတၢ်မၤ တဖၣ်အံၤလီၤ. တၢ်ဘၣ်ယိၣ်​ အလီၢ်အိၣ်စ့ၢ်ကီးလၢ ပှၤကထံၣ်​ ပကစၢ်မုၣ်ဖးဒိၣ်​ နီၢ်အၢ်တ့းမံၤ အတၢ်လုၢ်ဟံၣ်အံၤ ဒ်သိးဒီး တၢ်ကလီကလီလီၤ. ဒီးနီၢ်အၢ်တ့းမံၤလၢ ပှၤအိၣ်လၢ အၤစံကီၢ်ရ့ၣ်အပူၤ ဒီးပှၤလၢ ဟီၣ်ခိၣ်ဒီဘ့ၣ်​ ဘူၣ်ထီၣ်ဘါထီၣ်အီၤတဂၤအံၤ အလၤအကပီၤ ကဟါမၢ်ကွံာ်ဝဲလီၤ.” ၂၈ ဖဲပိာ်ခွါတဖၣ်​ နၢ်ဟူဝဲဒ်န့ၣ်အခါ အဝဲသ့ၣ်​ သးဒိၣ်ထီၣ်တၢ်ဒိၣ်မး ဒီးကိးပသူထီၣ်ဝဲလၢ “ပှၤအ့းဖ့းစူးဖိ အကစၢ်မုၣ်​ နီၢ်အၢ်တ့းမံၤန့ၣ်​ အစိကမီၤဒိၣ်ဝဲဒိၣ်မးလီၤ.”

၂၉ ဒီးဝ့ၢ်န့ၣ်​ ပှဲၤဒီး တၢ်သဘံၣ်သဘုၣ်တဖၣ်လီၤ. အဝဲသ့ၣ်ခဲလၢာ် လဲၤဃ့ၢ်နုာ်သဖှိဝဲလၢ ဘျီၣ်ကွၢ်ကီတၢ်အလီၢ် ဒီးတွံၢ်ဃုာ်ဝဲဒီး ပှၤမၤက့းဒနံဖိ စီၤကါယူး ဒီးစီၤအရံစတၢ်ဃူး+ လၢအမ့ၢ် ပှၤလၢ အလဲၤသကိးတၢ်ဒီး စီၤပီလူးလီၤ. ၃၀ မ့မ့ၢ် စီၤပီလူးန့ၣ်​ အဝဲအဲၣ်ဒိး လဲၤနုာ်လီၤဝဲလၢ ပှၤဂီၢ်မုၢ်အံၤအအိၣ်​ သနာ်က့ ပှၤလၢ အစူၢ်က့ၤနာ်က့ၤတၢ်တဖၣ်​ တဟ့ၣ်အီၤအခွဲးဘၣ်. ၃၁ ပှၤတနီၤလၢ အတီခိၣ်ရိၤမဲတၢ်လၢ မူးပွဲဒီး တၢ်လိာ်ကွဲတဖၣ်​ လၢအမုာ်လိာ်သးဒီး စီၤပီလူးန့ၣ်​ ဆှၢလီၤတၢ်ကစီၣ်လၢ စီၤပီလူးအအိၣ်​ ဒီးဃ့ကညးအီၤ ဒ်သိး အသုတလဲၤနုာ်လၢ ဘျီၣ်ကွၢ်ကီတၢ်အလီၢ် ဒီးဒုးအိၣ်ထီၣ်​ တၢ်ဘၣ်ယိၣ်လၢ အသးသမူအဂီၢ် တဂ့ၤလီၤ. ၃၂ ဒီးတၢ်သဘံၣ်သဘုၣ်​ အိၣ်ထီၣ်ဝဲလၢ ပှၤဂီၢ်မုၢ်လၢ အအိၣ်ဖှိၣ်ဝဲ တဒူၣ်အံၤ အကျါလီၤ. ဒီးဘၣ်မနုၤအဃိ အဝဲသ့ၣ်​ ဟဲအိၣ်ဖှိၣ်ဝဲ ဒ်အံၤလဲၣ်န့ၣ်​ အဝဲသ့ၣ်အါတက့ၢ် တသ့ၣ်ညါဝဲဘၣ်. အဃိ အဝဲသ့ၣ်​ တနီၤနီၤန့ၣ်​ ကိးပသူထီၣ်ဝဲတမံၤ ဒီးအဂၤတနီၤန့ၣ်​ ကိးပသူထီၣ်ဝဲလၢ အဂၤတမံၤလီၤ. ၃၃ အဃိ အဝဲသ့ၣ်​ ထုးထီၣ်​ စီၤအလ့းစၣ်ဒြူးလၢ ပှၤဂီၢ်မုၢ်အကျါ ဒီးပှၤယူဒၤဖိတဖၣ်န့ၣ်​ ဆီၣ်ဖျိးအီၤလၢ တၢ်မဲာ်ညါလီၤ. ဒီးမ့ၢ်လၢ စီၤအလ့းစၣ်ဒြူး အဲၣ်ဒိးတဲနၢ်ပၢၢ်က့ၤ ပှၤဂီၢ်မုၢ်အဃိ အဝဲနဲၣ်ထီၣ်အစုလီၤ. ၃၄ ဘၣ်ဆၣ်​ ဖဲအဝဲသ့ၣ်​ သ့ၣ်ညါဝဲလၢ အဝဲမ့ၢ် ပှၤယူဒၤဖိတဂၤအခါ အဝဲသ့ၣ်ခဲလၢာ် ကိးပသူထီၣ်ဝဲ ဃူဃူလၢ “ပှၤအ့းဖ့းစူးဖိ အကစၢ်မုၣ်​ နီၢ်အၢ်တ့းမံၤန့ၣ်​ အစိကမီၤဒိၣ်ဝဲဒိၣ်မးလီၤ.” အဝဲသ့ၣ်​ ကိးပသူထီၣ်ဝဲ ဒ်န့ၣ်​ ခံနၣ်ရံၣ်ညါ.

၃၅ လၢခံ ဖဲဝ့ၢ်အပှၤဘၣ်မူဘၣ်ဒါတဂၤ မၤဘှ့ၣ်ပှၤဂီၢ်မုၢ် န့ၢ်ဝဲအခါ အဝဲတဲဝဲလၢ “ပှၤအ့းဖ့းစူးဖိသ့ၣ်ဧၢ, ပှၤခဲလၢာ်သ့ၣ်ညါလၢ ပမ့ၢ်ပှၤကွၢ်ထွဲ ကစၢ်မုၣ်ဖးဒိၣ်​ နီၢ်အၢ်တ့းမံၤ အတၢ်လုၢ်ဟံၣ်​ ဒီးတၢ်ဂီၤတၢ်ဖှီၣ်တခါလၢ အဟဲလီၤလၢ မူခိၣ်န့ၣ်တမ့ၢ်ဧီၤ. ၃၆ တၢ်ဂ့ၢ်တဖၣ်အံၤ ပှၤဂ့ၢ်လိာ်အီၤ တသ့ဘၣ်အဃိ သုကြၢးအိၣ်ဃိဒိ ဒီးတဘၣ်မၤကြီတၢ်တဂ့ၤ. ၃၇ ပှၤလၢသုဟဲကိးအီၤ ဖဲအံၤတဖၣ်န့ၣ်​ တမ့ၢ်ပှၤလၢ အတမျာ် တၢ်လၢ တၢ်လုၢ်ဟံၣ်တဖၣ်ဘၣ်​ ဒီးအဝဲသ့ၣ်​ တတဲတၢ်လၢ အထီဒါ ပကစၢ်မုၣ်​ စ့ၢ်ကီးဘၣ်. ၃၈ အဃိ စီၤဒ့ၤမ့ၤတြံ+ ဒီးပှၤလၢ အမၤသကိးတၢ်ဒီးအီၤတဖၣ်​ မ့ၢ်အဲၣ်ဒိးပာ် တၢ်ကမၣ်လၢ ပှၤတဂၤဂၤအလိၤန့ၣ်​ ပှၤထီၣ်ရူ အမုၢ်နံၤတဖၣ်အိၣ်ဝဲ ဒီးပဒိၣ်ဖးဒိၣ်တဖၣ်လၢ ကစံၣ်ညီၣ်တၢ်န့ၣ်​ အိၣ်ဝဲဖဲန့ၣ်လီၤ. ဖဲန့ၣ်န့ၣ်​ ပှၤပာ်ဒ့ၣ်ပာ်ကမၣ်လိာ်သး တဂၤဒီးတဂၤသ့ဝဲလီၤ. ၃၉ ဘၣ်ဆၣ်​ သုမ့ၢ်အဲၣ်ဒိးမၤ အါန့ၢ်အန့ၣ်န့ၣ်​ တၢ်ကဘၣ်​ ဆၢတဲာ်အီၤဖဲ ပှၤအိၣ်ဖှိၣ်ဒ် တၢ်သိၣ်တၢ်သီအိၣ်ဝဲ အသိးအခါလီၤ. ၄၀ ဘၣ်ဆၣ်​ တၢ်ဂ့ၢ်လၢ ပှၤကဒုးအိၣ်ထီၣ်​ ပှၤဂီၢ်မုၢ်တဒူၣ်လၢ ကမၤတၢထီၣ်တၢလီၤတၢ် ဒ်အံၤလၢ တနံၤညါအံၤန့ၣ်​ တအိၣ်ဘၣ်. အဃိ တၢ်ဘၣ်ယိၣ်အလီၢ် အိၣ်ဝဲ သပှၢ်တၢၢ်လၢ ပှၤကပာ်ဒ့ၣ်​ ပာ်ကမၣ်ပှၤလၢ ပထီဒါပဒိၣ်လီၤ.” ၄၁ အဝဲတဲဝဲ ဒ်န့ၣ်ဝံၤဒီး ပျၢ်ကွံာ်ဝဲ ပှၤဂီၢ်မုၢ်လီၤ.