အ့းဖ့းစူး
၅ အဃိ ကဲထီၣ်ပှၤကွၢ်လိ ကစၢ်ယွၤ+ ဒ်ဖိသးဘိတဖၣ် အသိးတက့ၢ်. ၂ ဒီးဆဲးလဲၤတၢ်လၢ တၢ်အဲၣ်တၢ်ကွံအပူၤ+ ဒ်ခရံာ်အဲၣ်ပှၤ*+ ဒီးဟ့ၣ်လီၤအသးလၢပဂီၢ် ဒ်တၢ်လုၢ်တၢ်ပာ်လၢ အနၢမူနၢဆှီလၢ ကစၢ်ယွၤအမဲာ်ညါ အသိးတက့ၢ်.+
၃ တၢ်မၤကမၣ်မုၣ်ကမၣ်ခွါ* မ့ၢ်ဂ့ၤ, တၢ်တကဆှီဘၣ် ကိးမံၤဒဲးမ့ၢ်ဂ့ၤ, တၢ်သးကွံမ့ၢ်ဂ့ၤ သုတဘၣ်ယၢၤထီၣ်အီၤတဂ့ၤ.+ တကြၢးလၢ ပှၤစီဆှံတဖၣ် ယၢၤထီၣ်ဝဲ တၢ်ဂ့ၢ်တဖၣ်န့ၣ်ဘၣ်.+ ၄ ဒီးလုၢ်လၢ်သကဲာ်ပဝးလၢ အလီၤမဲာ်ဆှး, တၢ်တဲကြီတၢ်, တၢ်တဲလိၣ်ကွဲလၢ အဘၣ်အၢဘၣ်သီ+ ဒီးတၢ်လၢ အတကြၢးတဘၣ်တဖၣ်န့ၣ် သုတဘၣ် ယၢၤထီၣ်အီၤတဂ့ၤ. လၢတၢ်န့ၣ်အလီၢ် စံးဘျုးစံးဖှိၣ် ကစၢ်ယွၤတက့ၢ်.+ ၅ သုသ့ၣ်ညါဒီး သုနၢ်ပၢၢ်လီၤတံၢ်လီၤဆဲးလၢ ပှၤလၢ အမၤကမၣ်မုၣ်ကမၣ်ခွါ* မ့ၢ်ဂ့ၤ,+ ပှၤလၢ အမၤတၢ်လၢ အတကဆှီဘၣ်မ့ၢ်ဂ့ၤ, ပှၤလၢ အသးကွံတၢ်မ့ၢ်ဂ့ၤန့ၣ်+ (တၢ်သးကွံတၢ်န့ၣ် မ့ၢ်ဝဲတၢ်ဘါတၢ်ဂီၤတကလုာ်) တန့ၢ်သါဘၣ်တၢ်လၢ ခရံာ်ဒီးကစၢ်ယွၤ အဘီအမုၢ်အပူၤ နီတဂၤဘၣ်.+
၆ တဘၣ်ပျဲလၢ ပှၤကလံၣ်န့ၢ်လီန့ၢ်သုလၢ တၢ်ကတိၤလၢ အဘျုးတအိၣ်ဘၣ်တဖၣ်န့ၣ် နီတဂၤတဂ့ၤ. နီၢ်ကီၢ်န့ၣ် ခီဖျိလၢ လုၢ်လၢ်ဒ်သိးဒီး တၢ်ပာ်ဖျါအီၤလၢ ထးတဖၣ်အဃိ ကစၢ်ယွၤ အတၢ်သးဒိၣ်ထီၣ်န့ၣ် ကဟဲလီၤဘၣ်ဝဲ ပှၤလၢအတၢ်ဒိကနၣ် တအိၣ်ဘၣ်တဖၣ်လီၤ. ၇ အဃိ တဘၣ်မၤဘၣ်ထွဲလိာ်သုသးဒီး ပှၤတဖၣ်န့ၣ်တဂ့ၤ. ၈ လၢအပူၤကွံာ်န့ၣ် သုအိၣ်လၢ တၢ်ခံးကျါလီၤ. ဘၣ်ဆၣ် ခဲအံၤသုအိၣ်လၢ တၢ်ကပီၤအကျါ+ မ့ၢ်လၢ သုမ့ၢ်ကစၢ်အတၢ်အဃိလီၤ.+ အဃိ ဆဲးအိၣ်မူဒ် တၢ်ကပီၤအဖိတဖၣ် အသိးတက့ၢ်. ၉ တၢ်ကပီၤန့ၣ် ဒုးအိၣ်ထီၣ်ဝဲ တၢ်ဂ့ၤ, တၢ်တီတၢ်လိၤ ဒီးတၢ်မ့ၢ်တၢ်တီ အကလုာ်ကလုာ်လီၤ.+ ၁၀ ကစၢ်ဘၣ်အသးလၢ တၢ်မနုၤတဖၣ်လဲၣ်န့ၣ် ဆဲးပဲာ်ထံနီၤဖးအီၤ လီၤတံၢ်လီၤဆဲးတက့ၢ်.+ ၁၁ ဒီးတဘၣ် မၤဘၣ်ထွဲလိာ်သုသးဒီး တၢ်ဖံးတၢ်မၤတဖၣ်လၢ အဘျုးတအိၣ်ဘၣ် လၢအဘၣ်ဃးဒီး တၢ်ခံးန့ၣ်တဂ့ၤ.+ လၢတၢ်န့ၣ်အလီၢ် မၤဖျါထီၣ် တၢ်မၤတဖၣ်အံၤ ဒ်အမ့ၢ်တၢ်အၢ ၁၂ မ့ၢ်လၢ တၢ်လၢအဝဲသ့ၣ် မၤခူသူၣ်ဝဲတဖၣ်န့ၣ် ထဲပယၢၤထီၣ်အီၤဒၣ်လဲာ် မ့ၢ်တၢ်လၢအလီၤမဲာ်ဆှးလီၤ. ၁၃ တၢ်ခဲလၢာ် လၢအဘၣ် တၢ်မၤဖျါထီၣ်အီၤန့ၣ် တၢ်မၤဖျါထီၣ်အီၤ ခီဖျိလၢ တၢ်ကပီၤလီၤ. အဃိ တၢ်ခဲလၢာ် လၢအဘၣ် တၢ်လီၣ်ဖျါထီၣ်အီၤန့ၣ် ကဲထီၣ်တၢ်ကပီၤလီၤ. ၁၄ အဃိ တၢ်ကွဲးအသးတဲဝဲလၢ “ပှၤလၢ အမံသ့ၣ်ဧၢ, ပၢၢ်ထီၣ်တက့ၢ်. ဂဲၤဆၢထၢၣ်က့ၤလၢတၢ်သံ+ ဒီးခရံာ်ကဆဲးကပီၤလီၤ ဘၣ်သုလီၤ.”+
၁၅ အဃိ ပလီၢ်သုသးဂ့ၤဂ့ၤ ဒ်သိးသုကအိၣ်မူ ဒ်ပှၤကူၣ်တၢ်သ့အသိး ဒီးတမ့ၢ်ဒ်သိးဒီး ပှၤလၢ အတအိၣ်ဒီး တၢ်ကူၣ်သ့ဘၣ်န့ၣ်တက့ၢ်. ၁၆ ဒီးမ့ၢ်လၢ မုၢ်နံၤတဖၣ်အံၤ အၢဝဲသီဝဲအဃိ တၢ်ဆၢကတီၢ်လၢ အအိၣ်ဒီးသုန့ၣ် သူအီၤလၢ အဂ့ၤကတၢၢ်တက့ၢ်.+ ၁၇ ဒီးလၢတၢ်ဂ့ၢ်အဝဲန့ၣ်အဃိ တဘၣ်ကဲထီၣ် ပှၤလၢ အသးတဆးဘၣ် လၢၤတဂ့ၤ. ဘၣ်ဆၣ် တၢ်ဘၣ်ယဟိဝၤယွၤ* အသး အိၣ်ဒ်လဲၣ်ဒ်လဲၣ်န့ၣ် ဆဲးဃုသ့ၣ်ညါနၢ်ပၢၢ်အီၤတက့ၢ်.+ ၁၈ ဒီးအီမူၤသုသးလၢ စပံးထံတဂ့ၤ.+ အကဒုးအိၣ်ထီၣ် တၢ်အိၣ်မူလုၢ်လၢ်သကဲာ်ပဝးလၢ အလီၤရၢၢ်လီၤစၢၢ်လီၤ. လၢတၢ်န့ၣ်အလီၢ် ဆဲးမၤပှဲၤထီၣ်သုသးလၢ သးစီဆှံတက့ၢ်. ၁၉ တဲလိာ်သုသး တဂၤဒီးတဂၤလၢ ထါစံးထီၣ်ပတြၢၤ, တၢ်စံးထီၣ်ပတြၢၤကစၢ်ယွၤ ဒီးတၢ်ဘူၣ်ထီၣ်ဘါထီၣ် အတၢ်သးဝံၣ်တက့ၢ်.*+ ဒီးသးဝံၣ်စံးထီၣ်ပတြၢၤ+ ယဟိဝၤယွၤ လၢသူၣ်ဒီဖျၢၣ်သးဒီးဖျၢၣ်တက့ၢ်.*+ ၂၀ ထီဘိန့ၣ် စံးဘျုး+ ပပၢ်ကစၢ်ယွၤလၢ တၢ်ခဲလၢာ်အဃိ ခီဖျိပကစၢ် ယ့ၣ်ၡူးခရံာ် အမံၤတက့ၢ်.+
၂၁ ဒိးပၢသုသးလၢ တဂၤဒီးတဂၤအဖီလာ်+ ခီဖျိသုယူးယီၣ်ပာ်ကဲ ခရံာ်အဃိန့ၣ်တက့ၢ်. ၂၂ မါသ့ၣ်တဖၣ်န့ၣ် မ်အဒိးပၢအသးလၢ အဝၤအဖီလာ်+ ဒ်အဒိးပၢအသးလၢ ကစၢ်အဖီလာ်အသိး တက့ၢ်. ၂၃ ဝၤန့ၣ် မ့ၢ်ဝဲမါအခိၣ်+ ဒ်ခရံာ်မ့ၢ်တၢ်အိၣ်ဖှိၣ်အခိၣ်အသိးလီၤ.+ ခရံာ်န့ၣ် အုၣ်က့ၤခီၣ်က့ၤ အနီၢ်ခိလီၤ.* ၂၄ ဒ်တၢ်အိၣ်ဖှိၣ် ဒိးပၢအသးလၢ ခရံာ်အဖီလာ်အသိး မါသ့ၣ်တဖၣ်န့ၣ် ကြၢးဒိးပၢစ့ၢ်ကီးအသးလၢ အဝၤအဖီလာ်လၢ တၢ်ကိးမံၤဒဲးအပူၤလီၤ. ၂၅ ဝၤသ့ၣ်ဧၢ, ဆဲးအဲၣ်သုမါ+ ဒ်ခရံာ်အဲၣ်တၢ်အိၣ်ဖှိၣ် ဒီးဟ့ၣ်လီၤကွံာ်အသးလၢ အဂီၢ်တက့ၢ်.+ ၂၆ ခရံာ်မၤဝဲဒ်န့ၣ် ဒ်သိးအကပာ်စီဆှံအီၤ ဒီးသ့စီအီၤလၢထံ ခီဖျိ ယွၤအကလုၢ်ကထါလီၤ.+ ၂၇ အဝဲမၤဝဲဒ်န့ၣ်န့ၣ် မ့ၢ်ဒ်သိး တၢ်အိၣ်ဖှိၣ် ကဃံလၤဝဲလၢ အမဲာ်ညါ ဒီးဒ်သိး တၢ်လၢအမဲၣ်သူမဲၣ်ဂီၤမ့ၢ်ဂ့ၤ, အဖံးသွံးမ့ၢ်ဂ့ၤ, တၢ်လၢအလီၤဂာ်ဒီး တၢ်သ့ၣ်တဖၣ်န့ၣ်မ့ၢ်ဂ့ၤ သုတအိၣ်တဂ့ၤအဂီၢ်+ ဒီးဒ်သိး တၢ်အိၣ်ဖှိၣ်ကစီဆှံ ဒီးအသုတအိၣ်ဒီး တၢ်လီၤတူာ်လီၤကာ် တဂ့ၤအဂီၢ်လီၤ.+
၂၈ ဒ်န့ၣ်အသိး ဝၤတဖၣ် ကြၢးအဲၣ်အမါ ဒ်အအဲၣ်အနီၢ်ခိအသိးလီၤ. ပိာ်ခွါလၢ အအဲၣ်အမါန့ၣ် မ့ၢ်အအဲၣ်လီၤ အနီၢ်ကစၢ်အသးလီၤ. ၂၉ ပှၤလၢအသးဟ့လီၤ အနီၢ်ခိဒၣ်ဝဲန့ၣ် တအိၣ်နီတဂၤဘၣ်. လၢတၢ်န့ၣ်အလီၢ် အဒုးအီၣ်ဒုးအီ ဒီးပာ်လုၢ်ပာ်ပှ့ၤအီၤ ဒ်ခရံာ်ဒုးအီၣ်ဒုးအီ ဒီးပာ်လုၢ်ပာ်ပှ့ၤဝဲ တၢ်အိၣ်ဖှိၣ်အသိး, ၃၀ မ့ၢ်လၢ ပဝဲသ့ၣ်တဖၣ်အံၤ ပမ့ၢ်ခရံာ် အနီၢ်ခိက့ၢ်ဂီၤတဖၣ်+ အဃိလီၤ. ၃၁ ဒ်တၢ်ကွဲးအသး အိၣ်ဝဲအသိး “လၢတၢ်ဂ့ၢ်အံၤအဃိ ပိာ်ခွါကပာ်တ့ၢ် အမိၢ်အပၢ် ဒီးကလဲၤအိၣ်ဒီးအမါ* ဒီးအဝဲသ့ၣ်ခံဂၤန့ၣ် ကကဲထီၣ် တၢ်တမံၤဃီလီၤ.”+ ၃၂ တၢ်ခူသူၣ်စီဆှံ+ ဖးဒိၣ်တခါလၢ ယတဲခဲအံၤန့ၣ် အဘၣ်ဃးဒီးခရံာ် ဒီးတၢ်အိၣ်ဖှိၣ်အဂ့ၢ်လီၤ.+ ၃၃ ဒ်လဲၣ်ဂ့ၤ ဒ်လဲၣ်ဂ့ၤ သုဝဲတဂၤစုာ်စုာ် သုကဘၣ်အဲၣ် သုမါ+ ဒ်သုအဲၣ်လီၤ သုနီၢ်ကစၢ် အသးအသိးလီၤ. ဒ်န့ၣ်အသိး မါစ့ၢ်ကီး ကဘၣ်ပာ်ကဲအဝၤ+ ဒိၣ်မးလီၤ.