ယၡါယၤ
၁၄ ယဟိဝၤယွၤ ကပာ်ဖျါထီၣ် တၢ်သးကညီၤလၢ စီၤယၤကိာ် အစၢၤအသွဲၣ်တဖၣ်+ အဖီခိၣ် ဒီးအဝဲကဃုထၢကဒီး ပှၤအံၣ်စရ့လးဖိလီၤ.+ ကစၢ်ယွၤ ကဒုးအိၣ်* အဝဲသ့ၣ်လၢ အဝဲသ့ၣ် အတၢ်လီၢ်တၢ်ကျဲ+ ဒီးပှၤထံဂၤကီၢ်ဂၤဖိတဖၣ် ကဟဲပိာ်အဝဲသ့ၣ်အခံ ဒီးကအိၣ်တပူၤဃီဒီး စီၤယၤကိာ် အစၢၤအသွဲၣ်တဖၣ်လီၤ.+ ၂ ပှၤထံဂၤကီၢ်ဂၤဖိတဖၣ် ကက့ၤကိးက့ၤ ပှၤအံၣ်စရ့လးဖိတဖၣ်လၢ အနီၢ်ကစၢ် အတၢ်လီၢ်တၢ်ကျဲလီၤ. ဒီးပှၤတဖၣ်န့ၣ် ကမၤတၢ် ဒ်အံၣ်စရ့လး အပှၤဂီၢ်မုၢ် အခ့အပှၤ ပိာ်မုၣ် ဒီးပိာ်ခွါတဖၣ်+ အသိးလၢ ယဟိဝၤယွၤ အကီၢ်ပူၤလီၤ. လၢညါခါ ပှၤလၢအဒုးကဲကုၢ် ပှၤအံၣ်စရ့လးဖိန့ၣ် ပှၤအံၣ်စရ့လးဖိ ကဒုးကဲကုၢ် အဝဲသ့ၣ် ဒီးပှၤလၢ အမၢဆူၣ် ပှၤအံၣ်စရ့လးဖိလၢ ကမၤတၢ်အဂီၢ်န့ၣ် ပှၤအံၣ်စရ့လးဖိ ကပၢက့ၤအဝဲသ့ၣ်လီၤ.
၃ ဖဲယဟိဝၤယွၤ မၤထူၣ်ဖျဲးထီၣ်* သုလၢ တၢ်လၢအမၤဆါသု, တၢ်လၢအမၤတံာ်တာ်သု ဒီးကုၢ်အလီၢ်အခါ+ ၄ သုကတဲတၢ်ကတိၤဒိ ဒ်လၢလာ်အံၤအသိး ဒ်သိး သုကဒုၣ်ဒွဲၣ် ဘၤဘူၤလိၣ် အစီၤပၤအဂီၢ်လီၤ.
“ပှၤတဂၤလၢ အမၢဆူၣ်ပှၤဂၤလၢ ကမၤတၢ်အဂီၢ်န့ၣ် အကျဲကတၢၢ်လံ.
တၢ်ဆီၣ်တံၢ်မၤနၢၤ ကတၢၢ်ဝဲလံ.+
၅ ယဟိဝၤယွၤ မၤကၢ်ကွံာ်ဝဲ ပှၤအၢပှၤသီ အနီၣ်တီၢ်
ဒီးပှၤပၢတၢ်တဖၣ် အနီၣ်ထိးဘိလံ.+
၆ ပှၤလၢအတီၢ်ပှၤဂၤလၢ တၢ်သးထီၣ်အပူၤ ဒီးတပတုာ်ဝဲဘၣ်,+
ပှၤလၢအဆဲး မၤနးမၤဖှီၣ် ပှၤကလုာ်တဖၣ် ဒီးဆီၣ်တံၢ်မၤနၢၤဝဲလၢ တၢ်သူၣ်ဒိၣ်သးဖျိးအပူၤန့ၣ် ကစၢ်ယွၤ မၤကၢ်ကွံာ် အနီၣ်တီၢ်လံ.+
၇ ဟီၣ်ခိၣ်ဒီဘ့ၣ် ပှဲၤဒီးတၢ်ဃူတၢ်ဖိး ဒီးတၢ်သဘံၣ်သဘုၣ် တအိၣ်လၢၤဘၣ်.
ပှၤဂီၢ်မုၢ် ကိးပသူထီၣ်လၢ တၢ်သးခုအပူၤလီၤ.+
၈ သ့ၣ်ကၠူနံးဖၢၤတဖၣ် ဒီးလဘၤနိၣ် အသ့ၣ်ဆှိအ့ရ့းတဖၣ်
သးခု ခီဖျိ တၢ်မၤအသးဒီးနၤအဃိ
ဒီးတဲဝဲလၢ ‘စးထီၣ်လၢ နလီၤပှီၢ် ဝံၤအလီၢ်ခံ
ပှၤကူာ်သ့ၣ်ဖိ တဟဲကူာ်ပှၤ နီတဂၤလၢၤဘၣ်.’
၉ ဖဲနလဲၤလီၤလၢ တၢ်သွၣ်ခိၣ်* အခါ တၢ်သွၣ်ခိၣ် ဘၣ်တၢ်ထိၣ်ဟူးထိၣ်ဂဲၤထီၣ်အီၤလီၤ.
လၢနဃိန့ၣ် တၢ်သွၣ်ခိၣ် ကိးပၢၢ်ထီၣ် ပှၤသံတဖၣ်
လၢအမ့ၢ် ကယဲၢ်ပှၤခိၣ်ပှၤနၢ်လၢ အဆီၣ်တံၢ်မၤနၢၤတ့ၢ်တၢ်လၢ ဟီၣ်ခိၣ်ချၢလီၤ.
ဒီးလၢညါ ပှၤကလုာ် အစီၤပၤတဖၣ် လၢအအိၣ်လၢ လီၢ်ပစိာ်အလိၤန့ၣ်
တၢ်သွၣ်ခိၣ် ဒုးဆၢထၢၣ် အဝဲသ့ၣ် ခဲလၢာ်လီၤ.
၁၀ အဝဲသ့ၣ်ခဲလၢာ် တဲနၤလၢ
‘ခဲအံၤ နကဲထီၣ် ပှၤလၢအဂံၢ်စၢ် ဒ်သိးဒီးပှၤလံ.
နကဲထီၣ် ဒ်သိးဒီးပှၤလံ.
၁၁ နတၢ်ပာ်ထီၣ်ထီသး ဒီးနသီတူၢ် အသီၣ်တဖၣ်န့ၣ်+
ဘၣ်တၢ်ဆီၣ်လီၤအီၤလၢ တၢ်သွၣ်ခိၣ်လံ.
လၢၣ်တဖၣ်န့ၣ် ဒါလီၤအသး လၢ နဖီလာ် ဒ်လီၢ်မံအသိး
ဒီးထိးကလဲာ်တဖၣ်န့ၣ် ကဲဝဲဒ်သိးဒီး နယၣ်လုးလီၤ.’
၁၂ ဆၣ်တူၢ်ဂီၤ ကပြုၢ်ကပြီၤဧၢ,
နလီၤတဲာ်လၢမူခိၣ် သပှၢ်တၢၢ်လံ.
နၤလၢအမ့ၢ် ပှၤလၢအမၤနၢၤ ပှၤကလုာ်တဖၣ်န့ၣ်+
ဘၣ်တၢ်ကျီလီၤနၤဆူ ဟီၣ်ခိၣ်လိၤလံ.
၁၃ နတဲလီၤနသးလၢ ‘ယကလဲၤထီၣ်လၢ မူခိၣ်လီၤ.+
ယကပာ်ထီၣ်ထီ ယလီၢ်ပစိာ် လၢကစၢ်ယွၤ အဆၣ်တဖၣ် အဖီခိၣ်+
ဒီးယကဆ့ၣ်နီၤလၢ ကစၢၢ်လၢ ပှၤအိၣ်ဖှိၣ်အလိၤ
လၢကလံၤစိး လၢအယံၤကတၢၢ် တတီၤလီၤ.+
၁၄ ယကလဲၤထီၣ် ထီန့ၢ်ဒံး တၢ်အၢၣ်တဖၣ်
ဒီးယကကဲထီၣ် ဒ်သိးဒီး တၢ်ထီကတၢၢ်တဂၤလီၤ.’
၁၅ ဘၣ်ဆၣ် နကဘၣ် တၢ်ဆီၣ်လီၤနၤ လၢတၢ်သွၣ်ခိၣ်
လၢအမ့ၢ် တၢ်ပူၤလၢအယိာ်ကတၢၢ် အခံဒးလီၤ.
၁၆ ပှၤလၢအထံၣ်နၤန့ၣ် ကကွၢ်ထံ နၤလီၤ.
အဝဲသ့ၣ် ကကွၢ်ထံကွၢ်ဆးနၤ ဒီးတဲလၢ
‘ပှၤတဂၤအံၤ အကဲ ပှၤလၢအမၤ ဟူးဝး ဟီၣ်ခိၣ်
ဒီးမၤကနိး ဘီမုၢ်တဖၣ် တမ့ၢ်ဧီၤ.+
၁၇ အကဲ ပှၤတဂၤလၢ အဒုးကဲထီၣ် ဟီၣ်ခိၣ် ဒ်သိးဒီး ပှၢ်မုၢ်ကနၢ,
အမၤန့ၢ်ဝဲ ဝ့ၢ်တဖၣ်+
ဒီးအကဲ ပှၤတဂၤလၢ တအဲၣ်ဒိးပျဲက့ၤ အပှၤဃိာ်ဖိတဖၣ် လၢဟံၣ်ဘၣ် တမ့ၢ်ဧီၤ.’+
၁၈ ပှၤကလုာ်တဖၣ် အစီၤပၤခဲလၢာ်န့ၣ်
ပှၤခူၣ်လီၤ အဝဲသ့ၣ် တဂၤစုာ်စုာ် လၢအနီၢ်ကစၢ် အတၢ်သွၣ်ခိၣ်
ပှဲၤဒီး တၢ်လၤကပီၤလီၤ.
၁၉ ဘၣ်ဆၣ် ဒ်တၢ်အဒ့ဘီၣ်လၢ အလီၤသးဘၣ်အၢအသိး
နဘၣ်တၢ်တၢၤကွံာ်နၤ ဒီးနသွၣ်ခိၣ် တအိၣ်ဘၣ်.
ဒီးဒ်တၢ်အစိၣ်လၢ ပှၤယီၢ်တံၢ်အီၤအသိး
နစိၣ်ကအိၣ်လၢ တၢ်ပူၤလၢ အပှဲၤဒီးလၢၢ်
ဒီးပှၤလၢအဘၣ် တၢ်ဆဲးသံအီၤလၢနးတဖၣ်န့ၣ် အစိၣ် ကအိၣ်ဘၢ နၤလီၤ.
၂၀ မ့ၢ်လၢ နမၤဟးဂီၤနကီၢ်
ဒီးနမၤသံ နပှၤကလုာ်အဃိ
နတဘၣ်တၢ်ခူၣ်လီၤနၤ တပူၤဃီဒီး စီၤပၤအဂၤတဖၣ်ဘၣ်.
နမ့ၢ်ပှၤအၢပှၤသီ အစၢၤအသွဲၣ်လၢ ပှၤတယၢၤထီၣ်အမံၤ နီတဘျီလၢၤဘၣ်.
၂၁ ကတဲာ်ကတီၤသုသးလၢ သုကမၤသံ အဖိခွါတဖၣ်
ခီဖျိလၢ အဝဲသ့ၣ် အမိၢ်ပၢ်ဖံဖု လၢပျၢၤတဖၣ် အတၢ်ကမၣ်အဃိန့ၣ်တက့ၢ်.
သုမ့ၢ်မၤဒ်န့ၣ်န့ၣ် ခါဆူညါ အဝဲသ့ၣ် ဟံးန့ၢ်တၢ်စိတၢ်ကမီၤ, ဒိၣ်စိလၢ ဟီၣ်ခိၣ်ချၢ
ဒီးဒုးအိၣ်ထီၣ်အဝ့ၢ်တဖၣ်လၢ ဟီၣ်ခိၣ်ဒီဘ့ၣ်န့ၣ် တန့ၢ်လၢၤဘၣ်.”
၂၂ တၢ်သုးမုၢ်ဂီၢ်မုၢ် အကစၢ် ယဟိဝၤယွၤ တဲဝဲလၢ “ယကဂဲၤဆၢထၢၣ် ထီဒါ အဝဲသ့ၣ်လီၤ.”+
ယဟိဝၤယွၤ တဲဝဲလၢ “ဘၤဘူၤလိၣ်အမံၤ, အပှၤလၢအအိၣ်တ့ၢ်စှၤဂၤ, အစၢၤအသွဲၣ်တဖၣ် ဒီးအဖိအလံၤ လၢကဟဲဆူညါန့ၣ် ယကမၤလီၤမၢ်ကွံာ်လီၤ.”+
၂၃ တၢ်သုးမုၢ်ဂီၢ်မုၢ် အကစၢ် ယဟိဝၤယွၤ တဲဝဲလၢ “ယကဒုးကဲထီၣ် ဘၤဘူၤလိၣ်လၢ ထံချၢးတဖၣ်အလီၢ်* ဒီးသူၣ်တဖၣ် ကအိၣ်ဖဲန့ၣ်လီၤ. ဒီးယကခွဲပျီ ဘၤဘူၤလိၣ်လၢ တၢ်မၤဟးဂီၤတၢ် အနီၣ်ခွဲသိၣ်တဘိလီၤ.”+
၂၄ တၢ်သုးမုၢ်ဂီၢ်မုၢ် အကစၢ် ယဟိဝၤယွၤ အၢၣ်လီၤပာ်စၢၤဝဲလၢ
“ဒ်ယပာ်လီၤပာ်စၢၤ ယသးအသိး အကကဲထီၣ်ဝဲ
ဒီးဒ်ယဆၢတဲာ် ပာ်စၢၤအသိး အကဟဲကဲထီၣ်အသး သပှၢ်တၢၢ်လီၤ.
၂၅ ယကမၤသဘှံး ပှၤအၤၡူၢ်ဖိ လၢယကီၢ်ပူၤ
ဒီးယကယီၢ်တံၢ်အီၤလၢ ယကစၢၢ်တဖၣ် အလိၤလီၤ.+
နီၣ်ယိးဘိလၢ အပာ်ထီၣ်ဝဲလၢ ယပှၤဂီၢ်မုၢ် အလိၤန့ၣ် ကဘၣ်တၢ်ထုးထီၣ်ကွံာ်အီၤ
ဒီးတၢ်ဝံတၢ်ယိးဃၢ လၢအပာ်ထီၣ်ဝဲလၢ ယပှၤဂီၢ်မုၢ် အဖံဘၣ်ခိၣ်န့ၣ် ကဘၣ် တၢ်ထုးထီၣ်ကွံာ်အီၤလီၤ.”+
၂၆ အဝဲန့ၣ် မ့ၢ်ဝဲတၢ်လၢ ကစၢ်ယွၤ ဆၢတဲာ်ပာ်စၢၤဝဲလၢ အကထီဒါ ဟီၣ်ခိၣ်ဒီဘ့ၣ်
ဒီးမ့ၢ်ဝဲစုလၢ အကသူဝဲလၢ အကစံၣ်ညီၣ် ပှၤကလုာ်ခဲလၢာ် အဂီၢ်လီၤ.
၂၇ တၢ်သုးမုၢ်ဂီၢ်မုၢ် အကစၢ် ယဟိဝၤယွၤ ဆၢတဲာ်ပာ်စၢၤဝဲအဃိ
မတဂၤ တြီဝဲ ကသ့လဲၣ်.+
ကစၢ်ယွၤ အစုယၤထီၣ်အသး လံအဃိ
မတဂၤ ထုးက့ၤဝဲ ကသ့လဲၣ်.+
၂၈ ဖဲစီၤပၤအၤဃး သံအနံၣ်န့ၣ်+ တၢ်စံၣ်ညီၣ် အကစီၣ် အိၣ်ဝဲဒ် လၢလာ်အံၤ အသိးလီၤ.
၂၉ “ပှၤဖလ့ၡသးဖိသ့ၣ်ဧၢ, ပှၤတဂၤလၢ အတီၢ်သုန့ၣ် အနီၣ်တီၢ်ကၢ်လံ
ဘၣ်ဆၣ် တဘၣ်သးခု နီတဂၤတဂ့ၤ.
လၢဂုၢ်တဘိန့ၣ် အဖိအလံၤ* အကျါန့ၣ်+ ဂုၢ်အၢကဟဲအိၣ်ထီၣ်+
ဒီးဂုၢ်တဘိန့ၣ် အစၢၤအသွဲၣ်န့ၣ် ကမ့ၢ်ဂုၢ်တဘိလၢ အဖျးတၢ်ဒ် လီဝၢ်ဒံး အသိးလီၤ.
၃၀ ပှၤလၢအပတီၢ်ဖုၣ် အဖိတဖၣ် ကအီၣ်ဘၣ်တၢ်ဘျဲဘျဲ
ဒီးပှၤဖှီၣ်ဖိယာ်ဖိ ကမံဘၣ် မုာ်မုာ်ခုၣ်ခုၣ်လီၤ.
ဘၣ်ဆၣ် ယကမၤသံ သုပှၤဂီၢ်မုၢ် လၢတၢ်သၣ်ဝံၤလီၤဒိ
ဒီးပှၤလၢအအိၣ်တ့ၢ်ဒံးလၢ သုကျါန့ၣ် ကဘၣ်တၢ်မၤသံအီၤလီၤ.+
၃၁ ဟီၣ်လၢ ဝ့ၢ်အတြဲၤခီၣ်ထံး ဒီးကိးပသူထီၣ်လၢ ဝ့ၢ်ပူၤတက့ၢ်.
ပှၤဖလ့ၡသးဖိဧၢ, သုသးဂံၢ်ဘါ ကလီၤစၢ် ကိးဂၤဒဲး,
မ့ၢ်လၢ သုးမုၢ်သံၣ်ဘိ တဒူၣ်ကဟဲလၢ ကလံၤစိးတခီ ဒ်မ့ၣ်အူခုၣ်အသိး
ဒီးပှၤသုးဖိတဖၣ်အံၤ တလီၤမုၢ်ပြံပြါ နီတဂၤဘၣ်.”
၃၂ ပှၤကလုာ် အပှၤစိာ်တၢ်ကစီၣ်ဖိတဖၣ်န့ၣ် မ့ၢ်ပှၤဘၣ် စံးဆၢက့ၤ အဝဲသ့ၣ်ဒ်လဲၣ်.
ပှၤဘၣ်စံးဆၢက့ၤလၢ ယဟိဝၤယွၤ ဆီလီၤ ဝ့ၢ်စံယိၣ် အခီၣ်ထံး ကျၢၤကျၢၤလံ+
ဒီးအပှၤဂီၢ်မုၢ်လၢ အပတီၢ်ဖုၣ်တဖၣ်န့ၣ် ကဃုတၢ်ပူၤဖျဲးလၢ ဝ့ၢ်စံယိၣ် အပူၤလီၤ.