ရိမ့ၤ
၁၁ မ့မ့ၢ်ဒ်န့ၣ်န့ၣ် ယကသံကွၢ်လၢ မ့ၢ်ကစၢ်ယွၤ ပာ်တ့ၢ်ကွံာ် အပှၤဂီၢ်မုၢ်ဧါ. လ့ၤတက့ၤ တမ့ၢ်ဘၣ်.+ ယၤစ့ၢ်ကီး ယမ့ၢ်ပှၤအံၣ်စရ့လးဖိတဂၤ လၢအဟဲလီၤစၢၤလီၤသွဲၣ်လၢ စီၤအၤဘြၤဟၣ် ဒီးယပၣ်ဃုာ်လၢ ဘံၣ်ယၤမံၣ်အဒူၣ်ကျါလီၤ. ၂ ကစၢ်ယွၤ တပာ်တ့ၢ်ကွံာ် အပှၤဂီၢ်မုၢ်လၢ အဃုထၢ* ဝဲလၢ အခီၣ်ထံးန့ၣ်ဘၣ်.+ တၢ်ကွဲးအသးလၢ အဘၣ်ဃးဒီး ဝံအ့ၤလံယၤ တဲဝဲဒ်လဲၣ်န့ၣ် မ့ၢ်သုတသ့ၣ်ညါဘၣ်ဧါ. အဝဲဃ့ကညး ကစၢ်ယွၤ ဒီးပာ်ဒ့ၣ်ပာ်ကမၣ် ပှၤအံၣ်စရ့လးဖိလၢ ၃ “ယဟိဝၤယွၤဧၢ,* အဝဲသ့ၣ်မၤသံ နဝံတဖၣ်, မၤလီၤပှီၢ်ကွံာ် နတၢ်လုၢ်လီၢ်တဖၣ် ဒီးယအိၣ်တ့ၢ် ထဲတဂၤလီၤ. ဒီးခဲအံၤ အဝဲသ့ၣ် ဃုမၤသံယၤလီၤ.”+ ၄ ဘၣ်ဆၣ် ကစၢ်ယွၤ တဲက့ၤအီၤဒ်လဲၣ်. “ယပှၤဂီၢ်မုၢ်လၢ အတဘူၣ်ထီၣ်ဘါထီၣ် ဘဧၤလးဘၣ်န့ၣ် အိၣ်ဝဲအဂၤ ၇,၀၀၀ ဒံးလီၤ.”+ ၅ ဒ်န့ၣ်အသိး ဆၢကတီၢ်ခဲအံၤစ့ၢ်ကီး ပှၤအစှၤတဖုလၢ+ ကစၢ်ယွၤ ဃုထၢထီၣ်ဝဲ ခီဖျိလၢ အတၢ်သးကညီၤ ဒိၣ်ဒိၣ်မုၢ်မုၢ်အဃိန့ၣ် အိၣ်ဝဲလီၤ. ၆ ဒီးတၢ်ဃုထၢအံၤ မ့မ့ၢ်ခီဖျိလၢ တၢ်သးကညီၤ ဒိၣ်ဒိၣ်မုၢ်မုၢ်အဃိန့ၣ်+ အတမ့ၢ်လၢ ပတၢ်မၤအဃိလၢၤဘၣ်.+ မ့တမ့ၢ်ဒ်န့ၣ်ဘၣ်န့ၣ် တၢ်သးကညီၤ ဒိၣ်ဒိၣ်မုၢ်မုၢ်အံၤ တမ့ၢ်တၢ်သးကညီၤ ဒိၣ်ဒိၣ်မုၢ်မုၢ်လၢၤဘၣ်.
၇ အဃိ ပကတဲဒ်လဲၣ်. တၢ်လၢပှၤအံၣ်စရ့လးဖိ ဃုဝဲသပှၢ်တၢၢ်န့ၣ် အဝဲသ့ၣ် တဒိးန့ၢ်ဝဲဘၣ်. ဘၣ်ဆၣ် ပှၤလၢ အဘၣ်တၢ်ဃုထၢထီၣ်အီၤတဖၣ် ဒိးန့ၢ်ဘၣ်ဝဲလီၤ.+ မ့မ့ၢ် ပှၤအဂၤတဖၣ်န့ၣ် တဒိကနၣ်တၢ်ဘၣ်.+ ၈ ဒ်တၢ်ကွဲးအသး အိၣ်ဝဲအသိး “ကစၢ်ယွၤ ဒုးမံအဝဲသ့ၣ်ယိာ်ယိာ်+ ဒ်သိး အဝဲသ့ၣ်အမဲာ် သုတထံၣ်တၢ်တဂ့ၤ ဒီးအနၢ်သု တနၢ်ဟူတၢ်တဂ့ၤ တုၤလီၤလၢ မုၢ်မဆါတနံၤအံၤလီၤ.”+ ၉ စီၤဒၤဝံး တဲစ့ၢ်ကီးဝဲလၢ “မ်အဝဲသ့ၣ် အစီၢ်နီၤခိၣ် ကဲထီၣ် ပျံၤသကွီၤ, ထု, တၢ်လီၤဃံၢ်အလီၢ် ဒီးတၢ်စံၣ်ညီၣ်လၢ အဝဲသ့ၣ်အဂီၢ်တက့ၢ်. ၁၀ မ်အဝဲသ့ၣ် အမဲာ်ခံးလီၤ ဒ်သိး အသုတထံၣ်တၢ်တဂ့ၤ ဒီးဒုးသကူးလီၤ အဝဲသ့ၣ် အပျိၢ်ထီဘိတက့ၢ်.”+
၁၁ အဃိ ယကသံကွၢ်လၢ မ့ၢ်ပှၤယူဒၤဖိ အခီၣ်ဘၣ်တိၢ် ဒီးလီၤဃံၢ် တုၤလၢတၢ်ဟးဂီၤဧါ. လ့ၤတက့ၤ တမ့ၢ်ဘၣ်. ဘၣ်ဆၣ် ခီဖျိလၢ အဝဲသ့ၣ် အခီၣ်ခါကမၣ်အဃိ ပှၤကလုာ်တဖၣ် ဒိးန့ၢ်ဘၣ် တၢ်အုၣ်က့ၤခီၣ်က့ၤ ဒ်သိး ကထိၣ်ဟူးထိၣ်ဂဲၤထီၣ် ပှၤယူဒၤဖိ အတၢ်သးက့ၣ်အဂီၢ်လီၤ.+ ၁၂ အဝဲသ့ၣ် အခီၣ်ခါကမၣ်န့ၣ် မ့ၢ်ကဲထီၣ် တၢ်ဆိၣ်ဂ့ၤ အထူးအတီၤလၢ ဟီၣ်ခိၣ်အဂီၢ် ဒီးအဝဲသ့ၣ် အတၢ်စှၤလီၤ မ့ၢ်ကဲထီၣ် တၢ်ဆိၣ်ဂ့ၤအထူးအတီၤလၢ ပှၤကလုာ်တဖၣ်အဂီၢ်န့ၣ်+ ဖဲအဝဲသ့ၣ်အနီၣ်ဂံၢ် မ့ၢ်ပှဲၤထီၣ်အခါ အကကဲထီၣ် တၢ်ဆိၣ်ဂ့ၤအထူးအတီၤ အါန့ၢ်အန့ၣ် စၢၢ်တလၢၢ်လီၤ.
၁၃ ဒီးခဲအံၤ ယကတဲတၢ်ဒီး သုဝဲလၢအမ့ၢ် ပှၤကလုာ်တဖၣ်လီၤ. ဒ်ယမ့ၢ် တၢ်မၢဖိလၢ ပှၤကလုာ်တဖၣ်အဂီၢ်အသိး+ ယပာ်လုၢ်ပာ်ပှ့ၤ ယတၢ်စံၣ်တဲၤတဲလီၤတၢ်မၤ ဒိၣ်မးလီၤ.+ ၁၄ ယမုၢ်လၢ်စ့ၢ်ကီးလၢ မ့ၢ်သ့န့ၣ် ယကထိၣ်ဟူးထိၣ်ဂဲၤထီၣ် ယပှၤကလုာ် အတၢ်သးက့ၣ် လၢကျဲတဘိဘိ ဒီးအုၣ်က့ၤခီၣ်က့ၤ အဝဲသ့ၣ် တနီၤလီၤ. ၁၅ ကစၢ်ယွၤ ပာ်တ့ၢ်ကွံာ် ပှၤယူဒၤဖိအဃိ+ ဒုးအိၣ်ထီၣ် တၢ်ခွဲးတၢ်ယာ်လၢ ပှၤဟီၣ်ခိၣ်ဖိအဂၤတဖၣ် ကအိၣ်ဒီးတၢ်ရ့လိာ်သးဒီး* ကစၢ်ယွၤ အဂီၢ်လီၤ. ဒီးကစၢ်ယွၤ မ့ၢ်တူၢ်လိာ်က့ၤ ပှၤယူဒၤဖိတနီၤန့ၣ် ကလီၤဂာ်ဒ် အဝဲသ့ၣ် မူထီၣ်ကဒါက့ၤလၢ တၢ်သံလီၤ. ၁၆ ကိၣ်အဆိကတၢၢ်တလိၣ်လၢ အဘၣ်တၢ်လုၢ်ထီၣ်အီၤ ဒ်တၤသၣ်ဆိအသိး မ့ၢ်စီဆှံဝဲန့ၣ် ကိၣ်ဒီဖျၢၣ် စီဆှံဝဲစ့ၢ်ကီးလီၤ. ဒီးသ့ၣ်အဂံၢ်မ့ၢ်စီဆှံန့ၣ် သ့ၣ်အဒ့တဖၣ် စီဆှံဝဲစ့ၢ်ကီးလီၤ.
၁၇ ဘၣ်ဆၣ် သ့ၣ်စၤယံးအဒ့တနီၤ မ့ၢ်ဘၣ် တၢ်မၤကၢ်ကွံာ်အီၤ ဒီးသုလၢအမ့ၢ် သ့ၣ်စၤယံးအမံၤအဒ့ မ့ၢ်ဘၣ်တၢ်ထီထီၣ်သုလၢ သ့ၣ်အဒ့လၢ အအိၣ်တ့ၢ်တဖၣ်အကျါန့ၣ် သုန့ၢ်ဃုာ်အဂံၢ်ဒီး အထုးလီၤ. ၁၈ ဘၣ်ဆၣ် တဘၣ်ပာ်ကဖၢလၢ သုသးလၢ သ့ၣ်ဒ့အဂၤတဖၣ် အဖီခိၣ်တဂ့ၤ. သုမ့ၢ်ပာ်ကဖၢလၢသုသးလၢ အဝဲသ့ၣ်အဖီခိၣ်န့ၣ်+ သ့ၣ်နီၣ်ထီၣ်လၢ သုတဟ့ၣ်သ့ၣ်ဂံၢ် အဂံၢ်အဘါဘၣ်. လၢတၢ်န့ၣ်အလီၢ် သ့ၣ်အဂံၢ်န့ၣ် ဟ့ၣ်သု တၢ်ဂံၢ်တၢ်ဘါလီၤ. ၁၉ မ့မ့ၢ်ဒ်န့ၣ်န့ၣ် သုကတဲလၢ “သ့ၣ်အဒ့တဖၣ် ဘၣ်တၢ်မၤကၢ်ကွံာ်အီၤ ဒ်သိး တၢ်ကထီထီၣ်ပှၤအဂီၢ်လီၤ.”+ ၂၀ မ့ၢ်ဝဲသပှၢ်တၢၢ်လီၤ. မ့ၢ်လၢအဝဲသ့ၣ်အတၢ်နာ် တအိၣ်ဘၣ်အဃိ ဘၣ်တၢ်မၤကၢ်ကွံာ်အီၤလီၤ.+ ဘၣ်ဆၣ် သုန့ၣ် သုအိၣ်ဂၢၢ်ကျၢၤလၢ သုတၢ်နာ်အဃိလီၤ.+ အဃိ တဘၣ်ပာ်ထီၣ်ထီသုသးတဂ့ၤ. လၢတၢ်န့ၣ်အလီၢ် ပျံၤတၢ်တက့ၢ်. ၂၁ သ့ၣ်ဒၢအဒ့နီၢ်ကီၢ်တဖၣ် ဒၣ်လဲာ် ကစၢ်ယွၤ မ့ၢ်မၤကၢ်ကွံာ်အီၤန့ၣ် အဝဲကမၤကၢ်ကွံာ်သုစ့ၢ်ကီးလီၤ. ၂၂ အဃိ သုထံၣ်ဘၣ်လၢ ကစၢ်ယွၤ အိၣ်ဒီးတၢ်သးကညီၤ+ ဘၣ်ဆၣ် အဝဲစံၣ်ညီၣ်တၢ်စ့ၢ်ကီးလီၤ. အဝဲစံၣ်ညီၣ်ပှၤလၢ အလီၤဃံၢ်တဖၣ်လီၤ.+ ဘၣ်ဆၣ် သုမ့ၢ်ဆဲးအိၣ်လၢ အတၢ်သးကညီၤ အဖီလာ်န့ၣ် အဝဲကသးကညီၤသုလီၤ. သုမ့ၢ်တဆဲးအိၣ်ဘၣ်န့ၣ် အဝဲကကျီကွံာ်သုစ့ၢ်ကီးလီၤ. ၂၃ ဒီးပှၤယူဒၤဖိတဖၣ် မ့ၢ်ပာ်ဖျါထီၣ်ကဒီး တၢ်နာ်န့ၣ် အဝဲသ့ၣ် ကဘၣ်တၢ်ထီထီၣ်က့ၤအီၤ+ မ့ၢ်လၢ ကစၢ်ယွၤက့ၤထီထီၣ်က့ၤ အဝဲသ့ၣ် သ့ဝဲအဃိလီၤ. ၂၄ သုဘၣ်တၢ်ကျီတဲာ်ကွံာ်သုလၢ သ့ၣ်စၤယံးအမံၤအလိၤ ဒီးသုဘၣ်တၢ်ထီထီၣ်က့ၤသုလၢ သ့ၣ်စၤယံးအဒၢအလိၤန့ၣ် တဘၣ်လိာ်အသးဒီးန့ဆၢၣ်ဘၣ်. သနာ်က့ ကစၢ်ယွၤ မၤဝဲဒ်န့ၣ်မ့ၢ်သ့န့ၣ် တၢ်ထီထီၣ်က့ၤ သ့ၣ်စၤယံးအဒၢ အဒ့နီၢ်ကီၢ်တဖၣ်လၢ သ့ၣ်စၤယံးအဒၢအလိၤ ကသ့ညီန့ၢ်အန့ၣ် စၢၢ်တလၢၢ်လီၤ.
၂၅ ဒီပုၢ်ဝဲၢ်သ့ၣ်ဧၢ, ဒ်သိးသုသု တဆိကမိၣ်လီၤသုသးလၢ သုမ့ၢ်ပှၤကူၣ်တၢ်သ့ တဂ့ၤအဂီၢ် ယအဲၣ်ဒိးလၢ သုကနၢ်ပၢၢ် တၢ်ခူသူၣ်စီဆှံတခါလီၤ.+ ပှၤအံၣ်စရ့လးဖိတနီၤ အခိၣ်ကကိၤဝဲတုၤလၢ ပှၤကလုာ်လၢ အကဟဲနုာ်ဝဲတဖၣ် အနီၣ်ဂံၢ်ပှဲၤထီၣ်ဝဲတစုလီၤ. ၂၆ ဒီးလၢကျဲဒ်အံၤအဃိ အံၣ်စရ့လးခဲလၢာ်+ ကတုၤလၢ တၢ်အုၣ်က့ၤခီၣ်က့ၤလီၤ. ဒ်တၢ်ကွဲးအသး အိၣ်ဝဲအသိး “ပှၤလၢ အအုၣ်က့ၤခီၣ်က့ၤတၢ်တဂၤ* ကဟဲထီၣ်ဝဲလၢ စံယိၣ်+ ဒီးကမၤလီၤမၢ်ကွံာ် တၢ်အၢတၢ်သီလၢ စီၤယၤကိာ်* အစၢၤအသွဲၣ်တဖၣ်အကျါလီၤ. ၂၇ ဒီးဖဲယထုးထီၣ်ကွံာ် အဝဲသ့ၣ် အတၢ်ဒဲးဘးအခါ+ ယကမၤ တၢ်အၢၣ်လီၤအီလီၤအံၤဒီး အဝဲသ့ၣ်လီၤ.”+ ၂၈ မ့ၢ်လီၤ, ပှၤယူဒၤဖိတနီၤ မ့ၢ်တၢ်သးခုကစီၣ် အဒုၣ်အဒါတဖၣ် ဘၣ်ဆၣ် အကဲဘျုးလၢ သုဂီၢ်လီၤ. လၢညါ ကစၢ်ယွၤဃုထၢထီၣ်အဝဲသ့ၣ် ဒီးခီဖျိလၢ အဝဲသ့ၣ် အမိၢ်ပၢ်ဖံဖု လၢပျၢၤတဖၣ်အဃိ ကစၢ်ယွၤ အဲၣ်အဝဲသ့ၣ်လီၤ.+ ၂၉ ဘၣ်ဃးဒီး ကစၢ်ယွၤ အတၢ်ဟ့ၣ်လၢ အဟ့ၣ်လီၤဝဲတဖၣ် ဒီးအတၢ်ကိးန့ၢ်ပှၤတဖၣ်န့ၣ် အသးတဆီတလဲဘၣ်. ၃၀ လၢအပူၤကွံာ်န့ၣ် သုတဒိကနၣ် ကစၢ်ယွၤ အကလုၢ်ဘၣ်.+ ဘၣ်ဆၣ်ခဲအံၤ သုဒိးန့ၢ်ဘၣ် ကစၢ်ယွၤ အတၢ်သးကညီၤ+ မ့ၢ်လၢ ပှၤယူဒၤဖိ တဒိကနၣ် ကစၢ်ယွၤအကလုၢ်ဘၣ် အဃိလီၤ.+ ၃၁ ခဲအံၤ ခီဖျိလၢအဝဲသ့ၣ် တဒိကနၣ်တၢ်ဘၣ်အဃိ ကစၢ်ယွၤ ပာ်ဖျါထီၣ် တၢ်သးကညီၤလၢ သုဖီခိၣ်လီၤ. ဒ်န့ၣ်အသိး ကစၢ်ယွၤ ပာ်ဖျါထီၣ် တၢ်သးကညီၤလၢ အဝဲသ့ၣ်အဖီခိၣ် ဒ်န့ၣ်သ့ဝဲစ့ၢ်ကီးလီၤ. ၃၂ ဒ်သိး ကစၢ်ယွၤ ကပာ်ဖျါထီၣ် တၢ်သးကညီၤ လၢပှၤခဲလၢာ် အဖီခိၣ်အဂီၢ်+ ကစၢ်ယွၤ ဟ့ၣ်အခွဲးလၢ ပှၤခဲလၢာ် ကကဲထီၣ် တၢ်တဒိကနၣ်တၢ်ဘၣ် အကုၢ်လီၤ.+
၃၃ ကစၢ်ယွၤ အတၢ်ဆိၣ်ဂ့ၤ ထူးထူးတီၤတီၤ, အတၢ်ကူၣ်သ့ ဒီးအတၢ်သ့ၣ်ညါနၢ်ပၢၢ်န့ၣ် ယိာ်ဝဲဒိၣ်မးလီၤ. အဃိ အတၢ်စံၣ်ညီၣ်တဖၣ် ဒီးတၢ်လၢအမၤဝဲတဖၣ်န့ၣ် ပနၢ်ပၢၢ်အီၤတလၢာ်ဘၣ်. ၃၄ တၢ်ကွဲးအသးအိၣ်ဝဲလၢ “မတဂၤ သ့ၣ်ညါထီၣ်ဝဲ ယဟိဝၤယွၤ အတၢ်ဆိကမိၣ်လဲၣ်. ဒီးမတဂၤ ကဲထီၣ်ပှၤလၢ အဟ့ၣ်ကူၣ်ဟ့ၣ်ဖးအီၤ ကသ့လဲၣ်.”+ ၃၅ ဒီး “မတဂၤ ဟ့ၣ်ဆိ ကစၢ်ယွၤတၢ်တမံၤမံၤ ဒ်သိးကစၢ်ယွၤ ကဘၣ်ဟ့ၣ်ဆၢကဒါက့ၤအီၤလဲၣ်.”+ ၃၆ တၢ်ခဲလၢာ်ဟဲလၢ ကစၢ်ယွၤအအိၣ် ဒီးဟဲအိၣ်ထီၣ် ခီဖျိလၢအီၤ ဒီးအိၣ်ဝဲလၢအဂီၢ်လီၤ. ကစၢ်ယွၤ ကြၢးဒိးန့ၢ် တၢ်လၤကပီၤ အစိၤစိၤဃၣ်ဃၣ်လီၤ. အၤမ့ၣ်.