လူၤကၣ်

၁၂ ဖဲန့ၣ်အခါ ပှၤဂီၢ်မုၢ်လၢ အကထိတဖၣ်​ ပာ်ဖှိၣ်ထီၣ်အသး အါအါဂီၢ်ဂီၢ် တုၤဒၣ်လဲာ် အဝဲသ့ၣ်​ ယီၢ်တံၢ်ဘၣ်လိာ်သးအခီၣ်​ တဂၤဒီးတဂၤလီၤ. ဖဲန့ၣ်​ ယ့ၣ်ၡူးဃၣ်အသးလၢ အပျဲၢ်အဘီၣ်တဖၣ်အအိၣ်​ ဒီးတဲဝဲလၢ “ပလီၢ်သုသးလၢ ပှၤဖၤရံၤၡဲ အကိၣ်မံၣ်​ လၢအမ့ၢ် တၢ်ပာ်မၤသးတက့ၢ်.+ ၂ ဘၣ်ဆၣ်​ တၢ်လၢအဘၣ်​ တၢ်ပာ်ခူသူၣ်အီၤဘၢဘၢ လၢအတဖျါထီၣ်ဘၣ်န့ၣ်​ တအိၣ်ဘၣ်​ နီတမံၤဘၣ်​ ဒီးတၢ်ခူသူၣ်လၢ အတဘၣ်​ တၢ်သ့ၣ်ညါထီၣ်အီၤဘၣ်န့ၣ်​ တအိၣ်ဘၣ်​ နီတမံၤဘၣ်.+ ၃ အဃိ တၢ်လၢသုတဲအီၤလၢ တၢ်ခံးကျါန့ၣ်​ ကဘၣ်​ တၢ်နၢ်ဟူအီၤလၢ တၢ်ကပီၤအကျါလီၤ. ဒီးတၢ်လၢ သုတဲကသွံအီၤလၢ ဒၢးပူၤန့ၣ်​ ကဘၣ်​ တၢ်စံၣ်တဲၤတဲလီၤအီၤလၢ ဟံၣ်ခိၣ်ဒုးလီၤ. ၄ တကးဒံးဘၣ်​ ယသကိးသ့ၣ်ဧၢ,+ ယကတဲဘၣ်သုလၢ ပှၤလၢ အမၤသံသု* ဝံၤဒီး ဆဲးမၤဝဲအါန့ၢ်အန့ၣ်တသ့ နီတမံၤလၢၤဘၣ်န့ၣ်​ ပျံၤအီၤတဂ့ၤ.+ ၅ ဘၣ်ဆၣ်​ သုကဘၣ်ပျံၤ မတဂၤလဲၣ်န့ၣ်​ ယကတဲဘၣ်သုလီၤ. ပှၤလၢ သုကဘၣ်ပျံၤအီၤန့ၣ်​ မ့ၢ်ဝဲကစၢ်ယွၤ, မ့ၢ်လၢအဝဲ မၤသံသုဒီး တၢၤလီၤသုလၢ ကဟဲနၢ်အပူၤ*+ သ့အဃိလီၤ. အဃိ သုကဘၣ်ပျံၤ ကစၢ်ယွၤလီၤ.+ ၆ ထိၣ်ဖှံးဖိ ယဲၢ်ဘ့ၣ်န့ၣ်​ ပှၤဆါကွံာ်အီၤလၢ စ့လၢအလုၢ်အပှ့ၤ စှၤခံဘ့ၣ်* တမ့ၢ်ဧီၤ. ဘၣ်ဆၣ်​ ကစၢ်ယွၤ တသးပ့ၤနီၣ်* အဝဲသ့ၣ်​ နီတဘ့ၣ်ဘၣ်.+ ၇ ဒီးသုခိၣ်ဆူၣ်​ အဘိဒၣ်လဲာ် ကစၢ်ယွၤဂံၢ်ဝဲ ခဲလၢာ်လီၤ.+ ဘၣ်ယိၣ်တၢ်တဂ့ၤ, သုလုၢ်သုပှ့ၤ ဒိၣ်န့ၢ်ဒံး ထိၣ်ဖှံးဖိအါဘ့ၣ်လီၤ.+

၈ “ယကတဲဘၣ်သုလၢ ကယဲၢ်ပှၤလၢ အအၢၣ်လီၤ တူၢ်လိာ်ယၤလၢ ပှၤဟီၣ်ခိၣ်ဖိ အမဲာ်ညါန့ၣ်+ ပှၤကညီဖိခွါအံၤ ကအၢၣ်လီၤ တူၢ်လိာ်စ့ၢ်ကီးအီၤလၢ ယွၤအမူခိၣ်ကလူးတဖၣ်​ အမဲာ်ညါလီၤ.+ ၉ ဘၣ်ဆၣ်​ ပှၤလၢ အသမၢယၤလၢ ပှၤဟီၣ်ခိၣ်ဖိ အမဲာ်ညါန့ၣ်​ ယကသမၢအီၤလၢ ယွၤအမူခိၣ်ကလူးတဖၣ်​ အမဲာ်ညါလီၤ.+ ၁၀ ဒီးကယဲၢ်ပှၤလၢ အကတိၤထီဒါ ပှၤကညီဖိခွါန့ၣ်​ တၢ်ကပျၢ်ကွံာ် အတၢ်ကမၣ်လီၤ. ဘၣ်ဆၣ်​ ပှၤလၢ အကတိၤထီဒါ သးစီဆှံန့ၣ်​ တၢ်တပျၢ်ကွံာ် အတၢ်ကမၣ်ဘၣ်.+ ၁၁ ဖဲပှၤလဲၤကိးသုလၢ ကမျၢၢ်တၢ်အိၣ်ဖှိၣ်,* ပဒိၣ်ပပှၢ် ဒီးပှၤလၢအအိၣ်ဒီး တၢ်စိတၢ်ကမီၤတဖၣ်​ အမဲာ်ညါအခါ သုကဘၣ်​ တဲဆၢက့ၤဒ်လဲၣ်​ ဒီးကဘၣ်တဲ တၢ်မနုၤလဲၣ်န့ၣ်​ တဘၣ်သူၣ်ကိၢ်သးဂီၤ တၢ်တဂ့ၤ.+ ၁၂ ဖဲနၣ်ရံၣ်အဝဲန့ၣ်​ သးစီဆှံကသိၣ်လိသု တၢ်လၢသုကြၢးတဲတဖၣ်လီၤ.”+

၁၃ ဒီးပှၤလၢ ပှၤဂီၢ်မုၢ်တဖၣ်အကျါတဂၤ တဲအီၤလၢ “သရၣ်ဧၢ, မၢယဒီပုၢ်ဝဲၢ်ခွါ နီၤဖးလီၤန့ၢ်ယၤ တၢ်န့ၢ်သါတက့ၢ်.” ၁၄ ယ့ၣ်ၡူးတဲအီၤလၢ “ခွါဧၢ, မတဂၤ ဃုထၢထီၣ်ယၤလၢ စံၣ်ညီၣ်ကွီၢ် ဒီးပှၤလၢ ကနီၤဖးန့ၢ်တၢ်လၢ သုခံဂၤ အဘၢၣ်စၢၤလဲၣ်.” ၁၅ ဒီးယ့ၣ်ၡူးတဲဘၣ်​ အဝဲသ့ၣ်လၢ “ပှၤတဂၤ အတၢ်ထူးတၢ်တီၤ မ့ၢ်အိၣ်အါအါ သနာ်က့ တၢ်လၢ အအိၣ်ဒီးအီၤတဖၣ်န့ၣ်​ ဟ့ၣ်အီၤ တၢ်မူတသ့ဘၣ်.+ အဃိ ပလီၢ်သုသး ဒီးဟးဆှဲး တၢ်သးကွံ ကိးမံၤဒဲးတက့ၢ်.”+ ၁၆ ဒီးယ့ၣ်ၡူး တဲဘၣ်အဝဲသ့ၣ်​ တၢ်ကတိၤဒိလၢ “ပှၤထူးပှၤတီၤတဂၤ အဟီၣ်ခိၣ်လီၢ်န့ၣ်​ တၢ်လၢအမဲထီၣ်သၣ်ထီၣ်​ အိၣ်ဝဲအါမးလီၤ. ၁၇ အဃိ အဝဲ ဆိကမိၣ်ထီၣ်ဝဲလၢ ‘ယကပာ်ဖှိၣ်​ တၢ်လၢအမဲထီၣ်သၣ်ထီၣ်တဖၣ်အံၤအဂီၢ် တၢ်လီၢ် တအိၣ်လၢၤဘၣ်. အဃိ ခဲအံၤ ယကဘၣ်မၤ ဒ်လဲၣ်.’ ၁၈ ဒီးအဝဲတဲဝဲလၢ အသးပူၤလၢ ‘ယကမၤ ဒ်အံၤ,+ ယကမၤလီၤပှီၢ်ကွံာ် ယတၢ်ပာ်ဖှိၣ်​ အလီၢ်တဖၣ်​ ဒီးယကတ့ထီၣ်အီၤ ဒိၣ်န့ၢ်ဒံးအလီၢ် ဒီးယကပာ်ဖှိၣ်ဘု ဒီးယတၢ်ဖိတၢ်လံၤခဲလၢာ် လၢအပူၤလီၤ. ၁၉ ဒီးယကတဲလီၤယသးလၢ “ယအိၣ်ဒီး တၢ်ဖိတၢ်လံၤလၢ အဂ့ၤအါမးလၢ ယပာ်ဖှိၣ်အီၤလၢ အါနံၣ်အဂီၢ်လံ. အဃိ အိၣ်ဘှံးအိၣ်သါ, အီၣ်တၢ်အီတၢ် ဒီးအိၣ်မုာ်မုာ်ခုၣ်ခုၣ်ဟီ.”’ ၂၀ ဘၣ်ဆၣ်​ ကစၢ်ယွၤ တဲအီၤလၢ ‘ပှၤလၢအသးတဆးဘၣ်တဂၤဧၢ, ခဲမနၤကၢာ်န့ၣ်​ နကသံလီၤ. အဃိ တၢ်လၢ နပာ်ဖှိၣ်အီၤတဖၣ်န့ၣ်​ ကကဲထီၣ်က့ၤ မတဂၤ အတၢ်လဲၣ်.’+ ၂၁ ပှၤမ့ၢ်ပာ်ဖှိၣ်​ တၢ်လုၢ်ဒိၣ်ပှ့ၤဒိၣ်တဖၣ်လၢ အနီၢ်ကစၢ်အဂီၢ် ဘၣ်ဆၣ်​ ကစၢ်ယွၤမ့ၢ်တထံၣ်အီၤလၢ ပှၤထူးပှၤတီၤတဂၤဘၣ်န့ၣ်​ တၢ်ကကဲထီၣ်အသးဒီးအီၤ ဒ်န့ၣ်လီၤ.”+

၂၂ ဝံၤဒီးယ့ၣ်ၡူးတဲဘၣ်​ အပျဲၢ်အဘီၣ်တဖၣ်လၢ “အဃိ ယကတဲဘၣ်သုလၢ, သုကအီၣ်ဘၣ်ဒ်လဲၣ်န့ၣ်​ ဘၣ်ယိၣ်တၢ်လၢ သုသးသမူအဂီၢ် လၢၤတဂ့ၤ. ဒီးလၢသုနီၢ်ခိအဂီၢ် သုကကူကကၤဘၣ်​ ဒ်လဲၣ်န့ၣ်​ ဘၣ်ယိၣ်တၢ်လၢၤတဂ့ၤ.+ ၂၃ သးသမူန့ၣ်​ အလုၢ်အပှ့ၤဒိၣ်န့ၢ်ဒံး တၢ်အီၣ်တၢ်အီ ဒီးနီၢ်ခိန့ၣ်​ အလုၢ်အပှ့ၤဒိၣ်န့ၢ်ဒံး တၢ်ကူတၢ်ကၤလီၤ. ၂၄ ဆိကမိၣ်ကွၢ် ဘၣ်ဃးဒီး စိးဝၣ်ဃးတဖၣ်တက့ၢ်. အဝဲသ့ၣ်​ တဖှံတၢ်ချံ ဒီးတကူးတၢ်ဘၣ်. ဒီးအဝဲသ့ၣ်​ အဘုဖီမ့ၢ်ဂ့ၤ အဒၢးလၢ ကပာ်ဖှိၣ်တၢ်အဂီၢ်မ့ၢ်ဂ့ၤ တအိၣ်ဘၣ်. ဘၣ်ဆၣ်​ ကစၢ်ယွၤ ဒုးအီၣ်ဒုးအီ အဝဲသ့ၣ်လီၤ.+ မ့မ့ၢ် သုဝဲသ့ၣ်အံၤ သုလုၢ်ဒိၣ်ပှ့ၤဒိၣ်န့ၢ်ဒံး ထိၣ်တဖၣ်စၢၢ်တလၢၢ် တမ့ၢ်ဧီၤ.+ ၂၅ သုမၤထီထီၣ်​ သုသးသမူ ခီဖျိလၢ သုဘၣ်ယိၣ်တၢ်အဃိန့ၣ်​ ကသ့တစဲးစဲးဧါ. ၂၆ အဃိ သုမၤတၢ်ဆံးဆံးဖိ ဒ်အံၤမး မ့ၢ်တသ့ဘၣ်န့ၣ်​ သုဘၣ်ယိၣ်တၢ်လၢ တၢ်အဂၤတဖၣ်​ အဂီၢ်ဘၣ်လဲၣ်.+ ၂၇ ဖီဒ့ၣ်ညါ ဒိၣ်ထီၣ်ဝဲဒ်လဲၣ်န့ၣ်​ ဆိကမိၣ်ကွၢ်တက့ၢ်. ဖီဒ့ၣ်ညါတဖၣ်န့ၣ်​ တမၤတၢ်ဘၣ်​ ဒီးတထါတၢ် စ့ၢ်ကီးဘၣ်. ဘၣ်ဆၣ်​ ယကတဲဘၣ်သုလၢ စီၤၡလိၤမိၤန့ၣ်​ အိၣ်ဒီးအလၤအကပီၤ လီၤဘီလီၤမုၢ် သနာ်က့ အကူတၢ်ကၤတၢ်န့ၣ်​ တဖျါဂ့ၤထဲသိးဒီး ဖီဒ့ၣ်ညါတဖီးဘၣ်.+ ၂၈ ပှၤလၢ အတၢ်နာ်စှၤသ့ၣ်ဧၢ, တၢ်မုၢ်တၢ်ဘိန့ၣ်​ မဲထီၣ်လၢ တၢ်ပျီပူၤတနံၤအံၤ ဒီးခဲမုၢ်ဆ့ၣ်​ ကဘၣ်​ တၢ်တၢၤလီၤကွံာ်အီၤလၢ မ့ၣ်အူအပူၤလီၤ. ဘၣ်ဆၣ်​ ကစၢ်ယွၤ မ့ၢ်ဒုးကူဒုးကၤအီၤ ထဲထဲအံၤညါဒီး မ့မ့ၢ်သုဝဲသ့ၣ်န့ၣ်​ ဒ်သိး သုကကူကကၤဘၣ်အဂီၢ် ကစၢ်ယွၤ ကသးအိၣ်သု အါန့ၢ်အန့ၣ်​ တမ့ၢ်ဧီၤ. ၂၉ အဃိ သုကအီၣ်ဘၣ်အီဘၣ်​ ဒ်လဲၣ်န့ၣ်​ တဘၣ်သူၣ်ကိၢ်သးဂီၤတၢ်လၢၤတဂ့ၤ ဒီးတဘၣ်​ ဘၣ်ယိၣ်တၢ် တလၢကွံာ်အခၢး လၢၤတဂ့ၤ.+ ၃၀ တၢ်သ့ၣ်တဖၣ်န့ၣ်​ ခဲလၢာ်န့ၣ်​ ပှၤကလုာ်တဖၣ်လၢ ဟီၣ်ခိၣ်ချၢအံၤ ဂုာ်ကျဲးစၢးဝဲ ဆူၣ်ဆူၣ်​ ဒ်သိးကဒိးန့ၢ်ဘၣ်ဝဲ အဂီၢ်လီၤ. ဘၣ်ဆၣ်​ သုပၢ်သ့ၣ်ညါဝဲလၢ သုလိၣ်ဘၣ်​ တၢ်သ့ၣ်တဖၣ်န့ၣ်လီၤ.+ ၃၁ အဃိ ပာ်ဆိယွၤအဘီအမုၢ်လၢ သုတၢ်အိၣ်မူအပူၤတက့ၢ်. ဒီးကစၢ်ယွၤ ကဟ့ၣ်လီၤသု တၢ်လၢသုလိၣ်ဘၣ်တဖၣ်လီၤ.+

၃၂ “သိလၢအစှၤတဖုဧၢ,+ မ့ၢ်လၢ သုပၢ်ဘၣ်အသးလၢ ကဟ့ၣ်လီၤသုလၢ ဘီမုၢ်အဃိ+ ပျံၤတၢ်တဂ့ၤ. ၃၃ ဆါလီၤကွံာ် တၢ်လၢအအိၣ်ဒီးသု ဒီးဟ့ၣ်မၤစၢၤ ပှၤဖှီၣ်ဖိယာ်ဖိတဖၣ်​ တက့ၢ်.+ ဂုာ်ကျဲးစၢး ဒ်သိးသုမၤန့ၢ်စ့ထၢၣ်လၢ အတညာ်ဘၣ်တဖၣ်​ လၢအမ့ၢ် တၢ်လုၢ်ဒိၣ်ပှ့ၤဒိၣ်​ လၢမူခိၣ်​ လၢအလၢာ်တသ့ဘၣ်​ တက့ၢ်.+ ဖဲန့ၣ်န့ၣ်​ တၢ်ဘျၣ်တဟဲဘူးဝဲ နီတဂၤဘၣ်​ ဒီးတၢ်ဃၢ် တမၤဟးဂီၤဝဲဘၣ်. ၃၄ ပှၤတဂၤကသးစၢၢ်ဆၢ တၢ်လၢအပာ်လုၢ်ပာ်ပှ့ၤဝဲတဖၣ်.

၃၅ “ကူထီၣ်ကၤထီၣ်ပာ်စၢၤ ဒီးအိၣ်ကတဲာ်ကတီၤ ပာ်စၢၤသုသး*+ ဒီးဒွဲၣ်ထီၣ်ဃာ် သုမ့ၣ်အူဒၢတက့ၢ်.+ ၃၆ သုကြၢးလီၤဂာ်ဒီး ပှၤလၢအအိၣ်ခိးဝဲလၢ အကစၢ်ကဟဲက့ၤလၢ+ တၢ်ဖျီအမူးလီၤ.+ အဃိ ဖဲအဟဲက့ၤ ဒိတကျိာ်တြဲၤအခါ အဝဲသ့ၣ်​ ကအိးထီၣ်န့ၢ်အီၤ တဘျီဃီလီၤ. ၃၇ ကုၢ်တဖၣ်လၢ အကစၢ်ဟဲက့ၤထံၣ်ဝဲလၢ အအိၣ်ခိးကွၢ်တၢ်န့ၣ်​ ကသးခုဝဲလီၤ. ယကတဲဘၣ်သု တီတီလၢ ကုၢ်အကစၢ် ကကူထီၣ်ကၤထီၣ်ဝဲလၢ ကမၤတၢ်အဂီၢ် ဒီးကမၢ အဝဲသ့ၣ်ဆ့ၣ်နီၤလၢ စီၢ်နီၤခိၣ်ကပၤ ဒီးကမၤန့ၢ်တၢ်လၢ အဝဲသ့ၣ်အဂီၢ်လီၤ. ၃၈ ဒီးအကစၢ် မ့ၢ်ဟဲက့ၤတုၤလၢ တၢ်ခိးကွၢ်တၢ် ခံတီၤတတီၤ* မ့တမ့ၢ် တၢ်ခိးကွၢ်တၢ် သၢတီၤတတီၤဒၣ်လဲာ်* ဒီးမ့ၢ်ထံၣ်ဝဲလၢ အဝဲသ့ၣ်​ အိၣ်ကတဲာ်ကတီၤပာ်စၢၤ အသးန့ၣ်​ အဝဲသ့ၣ်​ ကသးခုဝဲလီၤ. ၃၉ ဘၣ်ဆၣ်​ သုကဘၣ်တိၢ်နီၣ်​ တၢ်ဂ့ၢ်တခါအံၤလီၤ. ဟံၣ်ကစၢ် မ့ၢ်သ့ၣ်ညါပာ်စၢၤလၢ တၢ်ဟုၣ်တၢ်ဘျၣ်​ ကဟဲလၢ အနၣ်ရံၣ်​ ဖဲလဲၣ်န့ၣ်​ အတပျဲလၢ တၢ်ဟုၣ်တၢ်ဘျၣ်​ ကဟဲနုာ်လီၤလၢ အဟံၣ်ပူၤဘၣ်.+ ၄၀ မ့ၢ်လၢ နၣ်ရံၣ်လၢ သုတဆိကမိၣ်ဘၣ်န့ၣ်​ ပှၤကညီဖိခွါအံၤ ကဟဲတုၤဝဲအဃိ+ သုဝဲစ့ၢ်ကီး အိၣ်ကတဲာ်ကတီၤပာ်စၢၤ သုသးတက့ၢ်.”

၄၁ ဝံၤဒီး စီၤပ့းတရူး တဲဝဲလၢ “ကစၢ်ဧၢ, နတဲ တၢ်ကတိၤဒိတခါအံၤ ထဲလၢ ပဂီၢ်လီၤဧါ မ့တမ့ၢ် လၢပှၤခဲလၢာ် အဂီၢ်ဧါ.” ၄၂ ကစၢ်တဲဝဲလၢ “တၢ်အခ့အပှၤ လၢအတီ ဒီးအကူၣ်တၢ်သ့ လၢအကစၢ် ကပာ်ထီၣ်အီၤလၢ အခ့အပှၤအဂၤတဖၣ်​ အဖီခိၣ်​ ဒ်သိး ကဆဲးဒုးအီၣ်​ အဝဲသ့ၣ်​ တၢ်အီၣ်တၢ်အီ လၢလၢပှဲၤပှဲၤ ဖဲတၢ်ဆၢကတီၢ်လၢ အကြၢးဝဲဘၣ်ဝဲန့ၣ်​ မ့ၢ်မတဂၤလဲၣ်.+ ၄၃ ဖဲအကစၢ် ဟဲတုၤဒီး ထံၣ်ဝဲလၢ ကုၢ်အံၤမၤဝဲ ဒ်န့ၣ်အခါ ကုၢ်အံၤကသးခုဝဲလီၤ. ၄၄ ယကတဲဘၣ်သု တီတီလၢ အကစၢ် ကပာ်ထီၣ်အီၤလၢ အတၢ်စုလီၢ်ခီၣ်ခိၣ်ခဲလၢာ် အဖီခိၣ်လီၤ. ၄၅ ဘၣ်ဆၣ်​ ကုၢ်အဝဲန့ၣ်​ မ့ၢ်ဆိကမိၣ်ဘၣ်ဖုးလၢ အကစၢ် မၤယံာ်မၤနီၢ်အသးလၢ အကဟဲတုၤအဂီၢ် ဒီးအဝဲမ့ၢ်တီၢ်ဝဲ ပျဲၢ်မုၣ်ပျဲၢ်ခွါတဖၣ်​ ဒီးမ့ၢ်အီၣ်တၢ်အီတၢ် ဒီးအီမူၤအသး+ ၄၆ ဒီးကုၢ်အံၤအကစၢ် ကဟဲတုၤဖဲ မုၢ်နံၤလၢ ကုၢ်အံၤတမုၢ်လၢ်ဝဲဘၣ်​ ဒီးနၣ်ရံၣ်လၢ အတသ့ၣ်ညါဝဲဘၣ်လီၤ. ဒီးကုၢ်အံၤအကစၢ် ကစံၣ်ညီၣ်အီၤ အနးကတၢၢ် ဒီးကပာ်အီၤလၢ တၢ်လီၢ်တပူၤဃီဒီး ပှၤလၢအတၢ်သးတီ တအိၣ်ဘၣ်တဖၣ်လီၤ. ၄၇ ဒီးကုၢ်အံၤလၢ အသ့ၣ်ညါ အကစၢ် အတၢ်ဘၣ်သး ဘၣ်ဆၣ်​ တအိၣ်ကတဲာ်ကတီၤ အသးဘၣ်​ ဒီးတမၤတၢ်လၢ အကစၢ် မၢအီၤဘၣ်န့ၣ်* ကဘၣ်​ တၢ်တီၢ်အီၤအါထံၣ်လီၤ.+ ၄၈ ဘၣ်ဆၣ်​ ပှၤလၢ အတနၢ်ပၢၢ်တၢ် ဒီးမၤတၢ်လၢ အကြၢးဘၣ်​ တၢ်တီၢ်အီၤန့ၣ်​ ကဘၣ်တၢ်တီၢ်အီၤ စှၤကိာ်ထံၣ်လီၤ. မ့မ့ၢ် ပှၤလၢတၢ်ဟ့ၣ်အီၤ အါအါန့ၣ်​ တၢ်ကက့ၤဃ့က့ၤတၢ် လၢအအိၣ်အါအါ ဒီးပှၤလၢတၢ်ဟ့ၣ်အီၤ မူဒါအါအါန့ၣ်​ ပှၤကမုၢ်လၢ်တၢ် လၢအအိၣ်​ အါအါလီၤ.+

၄၉ “ယဟဲဒ်သိး ကမၤကဲၤထီၣ်​ မ့ၣ်အူလၢ ဟီၣ်ခိၣ်ချၢလီၤ. ဒီးမ့ၣ်အူ မ့ၢ်ကဲၤထီၣ်လံန့ၣ်​ ယဘၣ်မုၢ်လၢ်တၢ် လၢအဂၤအိၣ်ဒံးဧါ. ၅၀ တၢ်ဒိးဘျၢလၢ ယကဘၣ်ဒိးဘျၢ ယသးန့ၣ်​ အိၣ်ဝဲတခါလီၤ. ဒီးတချုးလၢ ယဒိးဘျၢဒံးဘၣ်န့ၣ်​ ယကဆဲး သူၣ်ကိၢ်သးဂီၤတၢ်လီၤ.+ ၅၁ မ့ၢ်သုဆိကမိၣ်လၢ ယဟဲဒ်သိး ကဒုးအိၣ်ထီၣ်​ တၢ်ဃူတၢ်ဖိးလၢ ဟီၣ်ခိၣ်ချၢဧါ. တမ့ၢ်ဘၣ်, ယကတဲဘၣ်သု ယဟဲဒ်သိး ကဒုးအိၣ်ထီၣ်​ တၢ်လီၤမုၢ်လီၤဖးလီၤ.+ ၅၂ စးထီၣ်ခဲအံၤ လၢဟံၣ်တဖျၢၣ်အပူၤ ပှၤယဲၢ်ဂၤန့ၣ်​ ကထီဒါလိာ်သးလီၤ. ပှၤသၢဂၤကထီဒါ ပှၤခံဂၤ ဒီးပှၤခံဂၤကထီဒါ ပှၤသၢဂၤလီၤ. ၅၃ အဝဲသ့ၣ်​ ကထီဒါလိာ်သးလီၤ. ပၢ်ကထီဒါ အဖိခွါ ဒီးဖိခွါကထီဒါအပၢ်, မိၢ်ကထီဒါ အဖိမုၣ်​ ဒီးအဖိမုၣ်ကထီဒါအမိၢ်, မံၤပှၢ်ပိာ်မုၣ်ကထီဒါ အဒဲၣ်မုၣ်​ ဒီးဒဲၣ်မုၣ်​ ကထီဒါ အမံၤပှၢ်ပိာ်မုၣ်လီၤ.”+

၅၄ ဝံၤဒီး ယ့ၣ်ၡူးတဲဘၣ်​ ပှၤဂီၢ်မုၢ်တဖၣ်လၢ “ဖဲသုထံၣ်လၢ တၢ်အၢၣ်ဟဲထီၣ်လၢ မုၢ်နုာ်အခါ တဘျီဃီန့ၣ်​ သုတဲလၢ ‘တၢ်ကဟဲစူၤဖးဒိၣ်’ ဒီးတၢ်မၤအသးဒ်န့ၣ်လီၤ. ၅၅ ဒီးဖဲသုထံၣ်လၢ ကလံၤဟဲအူလၢ ကလံၤထံးတကပၤအခါ သုတဲလၢ ‘တၢ်ကကိၢ်ဒိၣ်မး’ ဒီးတၢ်မၤအသး ဒ်န့ၣ်လီၤ. ၅၆ ပှၤပာ်မၤအသးသ့ၣ်ဧၢ, သုကွၢ်မူခိၣ်​ ဒီးဟီၣ်ခိၣ်​ ဒီးသုနၢ်ပၢၢ်တၢ်လၢ အကမၤအသးတဖၣ်​ ဘၣ်ဆၣ်​ ဘၣ်မနုၤအဃိ သုတနၢ်ပၢၢ် တၢ်မၤအသးလၢ ဆၢကတီၢ် ခဲအံၤဘၣ်လဲၣ်.+ ၅၇ ဘၣ်မနုၤအဃိ သုတဆၢတဲာ်လီၤသုသးလၢ သုကမၤတၢ်လၢအဘၣ်လဲၣ်. ၅၈ အဒိ ဖဲနၤဒီးပှၤလၢ အကကိးထီၣ်နၤလၢ ရူတဂၤလဲၤလၢ ပှၤပၢတၢ်အအိၣ်အခါ လၢကျဲန့ၣ်​ ဂုာ်ကျဲးစၢး မၤဘၣ်လိာ်ဖိးဒ့က့ၤ နသးဒီးအီၤတက့ၢ်. နမ့ၢ်တမၤ ဒ်န့ၣ်ဘၣ်န့ၣ်​ အဝဲ ကလဲၤကိးနၤလၢ စံၣ်ညီၣ်ကွီၢ်အမဲာ်ညါ ဒီးစံၣ်ညီၣ်ကွီၢ် ကဟ့ၣ်လီၤဘၣ်ဖုးနၤလၢ ပှၤခိးတၢ်ဖိအစုပူၤ ဒီးပှၤခိးတၢ်ဖိ ကထၢနုာ်နၤလၢ ဃိာ်ပူၤလီၤ.+ ၅၉ ယကတဲဘၣ်နၤလၢ နလိးက့ၤစ့ မ့ၢ်တတူာ် ကိးဘ့ၣ်ဒဲးဘၣ်န့ၣ်* လ့ၤတက့ၤ နဟးထီၣ်ဖဲန့ၣ်​ တန့ၢ်ဘၣ်.”