စံၣ်ညီၣ်ကွီၢ်
၁၆ ဘၣ်တဘျီ စီၤၡံၡိၣ် လဲၤလၢ ဝ့ၢ်ဂါစၤ ဒီးဖဲန့ၣ် အထံၣ်ဝဲ ပိာ်မုၣ်ဆါလီၤအီၣ်သး တဂၤလီၤ. ဒီးစီၤၡံၡိၣ် လဲၤနုာ်လၢ ပိာ်မုၣ်တဂၤန့ၣ် အဟံၣ်ပူၤလီၤ. ၂ ဒီးပှၤတဲဘၣ် ပှၤဂါစၤဖိလၢ “စီၤၡံၡိၣ် အိၣ်ဖဲအံၤလီၤ.” အဃိ ပှၤဂါစၤဖိ ကဝီၤဃာ်တၢ် ဒီးအိၣ်ခိးခူသူၣ်အီၤ လၢဝ့ၢ်အတြဲၤ ဒီတနၤကျၢၤလီၤ. အဝဲသ့ၣ် အိၣ်ခိးတၢ် ဘှ့ၣ်ဘှ့ၣ်ဘှီၣ်ဘှီၣ် ဒီတနၤကျၢၤ ဒီးတဲလိာ်အသးလၢ “မုၢ်မ့ၢ်ဝါထီၣ်န့ၣ် ပကမၤသံအီၤလီၤ.”
၃ ဘၣ်ဆၣ် စီၤၡံၡိၣ် ဆဲးမံနီၤဖဲန့ၣ် တုၤလၢ ဖးဖီမုၢ်လီၤ. ဖဲဖးဖီမုၢ်န့ၣ် အဝဲ ဂဲၤဆၢထၢၣ် ဒီးဖီၣ်ဃာ် ဝ့ၢ်အတြဲၤတဖၣ် ဒီးဝ့ၢ်တြဲၤအထူၣ်ခံထူၣ် ဒီးထုးထီၣ်ကွံာ်အီၤဃုာ်ဒီး ဝ့ၢ်တြဲၤအနီၣ်ဘိလီၤ. ဒီးအဝဲပာ်ထီၣ် တၢ်တဖၣ်န့ၣ်လၢ အဖံဘၣ်ခိၣ် ဒီးယိးထီၣ်အီၤတုၤလၢ ကစၢၢ်ဒီခိၣ် လၢအအိၣ်လၢ ဝ့ၢ်ဃ့ဘြိၣ် အမဲာ်ညါလီၤ.
၄ ဒီးစီၤၡံၡိၣ် အဲၣ်ဘၣ်ဝဲ ပိာ်မုၣ်တဂၤ လၢအအိၣ်လၢ စိရ့း အတၢ်တြီၤပူၤလီၤ. ပိာ်မုၣ်တဂၤန့ၣ် အမံၤမ့ၢ်ဝဲ နီၢ်ဒလံလၤလီၤ.+ ၅ အဃိ ပှၤဖလ့ၡသးဖိ အခိၣ်အနၢ်တဖၣ် လဲၤဝဲလၢ ပိာ်မုၣ်တဂၤန့ၣ်အအိၣ် ဒီးတဲအီၤလၢ “ကွဲန့ၢ်လွဲန့ၢ် စီၤၡံၡိၣ်+ ဒ်သိးအက တဲဘၣ်နၤလၢ ဘၣ်မနုၤအဃိ အဂံၢ်အဘါဆူၣ်ဝဲ ထဲန့ၣ်ညါလဲၣ် ဒီးပမၤနၢၤအီၤ, စၢဃာ်အီၤ ဒီးဒိၣ်စိလၢ အဖီခိၣ်ကသ့ဒ်လဲၣ် တက့ၢ်. နမ့ၢ်မၤဒ်န့ၣ်န့ၣ် ပဝဲတဂၤစုာ်စုာ် ပကဟ့ၣ်နၤ စ့ညၣ်အဘ့ၣ် ၁,၁၀၀ လီၤ.”
၆ လၢခံ နီၢ်ဒလံလၤ တဲဘၣ် စီၤၡံၡိၣ်လၢ “နဂံၢ်နဘါ လၢအဆူၣ်အံၤ နန့ၢ်ဘၣ်အီၤ ဖဲလဲၣ်. ပှၤစၢဃာ်နၤ ဒီးမၤနၢၤနၤ ကသ့ဒ်လဲၣ်. ဝံသးစူၤ တဲယၤမီၤ.” ၇ စီၤၡံၡိၣ် တဲအီၤလၢ “ပှၤမ့ၢ်စၢဃာ်ယၤဒီး ချံၣ်အပျံၤသီသီ နွံဘိလၢ အတဃ့ထီဒံးဘၣ်န့ၣ် ယဂံၢ်ယဘါကစၢ်လီၤ ဒီးယကကဲထီၣ် ဒ်ပှၤယိယိဖိ တဂၤအသိးလီၤ.” ၈ အဃိ ပှၤဖလ့ၡသးဖိ အခိၣ်အနၢ်တဖၣ် ဟဲစိာ်န့ၢ် နီၢ်ဒလံလၤ ချံၣ်အပျံၤသီသီ နွံဘိလၢ အတဃ့ထီဒံးဘၣ် ဒီးနီၢ်ဒလံလၤ စၢဃာ်ဝဲ စီၤၡံၡိၣ်လီၤ. ၉ ဒီးပှၤဖလ့ၡသးဖိ အိၣ်ခိးခူသူၣ်တၢ် လၢဒၢးဖိအဂၤတဖျၢၣ် အပူၤလီၤ. နီၢ်ဒလံလၤ ကိးပသူထီၣ်ဝဲလၢ “စီၤၡံၡိၣ်ဧၢ, ပှၤဖလ့ၡသးဖိ ဟဲတုၤလံ.” ဖဲန့ၣ်အခါ စီၤၡံၡိၣ် မၤထီၣ်တဲာ်ကွံာ် ချံၣ်အပျံၤတဖၣ် ညီညီဖိ ဒ်လုၣ်လၢ အဘၣ်ဒီးမ့ၣ်အူဒီး ထီၣ်တဲာ်ကွံာ်ဝဲ အသိးလီၤ.+ အဃိ အတၢ်ခူသူၣ် ဘၣ်ဃးဒီး အဂံၢ်အဘါန့ၣ် ပှၤတသ့ၣ်ညါဝဲဒံးဘၣ်.
၁၀ ဝံၤဒီး နီၢ်ဒလံလၤ တဲစီၤၡံၡိၣ်လၢ “နလံၣ်န့ၢ်လီန့ၢ်ယၤ ဒီးနတတဲယၤ တၢ်မ့ၢ်တၢ်တီဘၣ်. ခဲအံၤ ဝံသးစူၤ တဲယၤမီၤ. ပှၤစၢဃာ်နၤ ကန့ၢ်ဒ်လဲၣ်.” ၁၁ အဃိ စီၤၡံၡိၣ် တဲအီၤလၢ “ပှၤမ့ၢ်စၢဃာ်ယၤဒီး ပျံၤသီသီတဖၣ် လၢပှၤတသူဘၣ်အီၤ ဒံးဘၣ်န့ၣ် ယဂံၢ်ယဘါကစၢ်လီၤ ဒီးယကကဲထီၣ် ဒ်ပှၤယိယိဖိ တဂၤအသိးလီၤ.” ၁၂ အဃိ နီၢ်ဒလံလၤ ဟံးန့ၢ်ဝဲ ပျံၤသီသီတဖၣ် ဒီးစၢဃာ်ဝဲ စီၤၡံၡိၣ်လီၤ. ဒီးနီၢ်ဒလံလၤ ကိးပသူထီၣ်ဝဲလၢ “စီၤၡံၡိၣ်ဧၢ, ပှၤဖလ့ၡသးဖိ ဟဲတုၤလံ.” (ဖဲန့ၣ်အခါ ပှၤအိၣ်ခိးခူသူၣ်တၢ် လၢဒၢးဖိ အဂၤတဖျၢၣ်အပူၤ.) ဒီးစီၤၡံၡိၣ် မၤထီၣ်တဲာ်ကွံာ် ပျံၤတဖၣ်လၢ အစုဒုၣ်အလိၤ ဒ်လုၣ်တဖၣ်အသိးလီၤ.+
၁၃ ဒီးနီၢ်ဒလံလၤ တဲစီၤၡံၡိၣ်လၢ “တုၤခဲအံၤ နလံၣ်န့ၢ်လီန့ၢ်ယၤ ဒီးနတတဲယၤ တၢ်မ့ၢ်တၢ်တီဘၣ်.+ ပှၤစၢဃာ်နၤ ကန့ၢ်ဒ်လဲၣ်န့ၣ် တဲယၤမီၤ.” ဒီးအဝဲတဲအီၤလၢ “ယခိၣ်ဆူၣ် လၢအသံၣ်ဃာ်အသး နွံဘိန့ၣ် နဘၣ်သံၣ်အီၤ ဃုာ်ဒီးလုၣ်လၢ ပှၤသူအီၤလၢ ထၣ်အဂီၢ်လီၤ.” ၁၄ အဃိ နီၢ်ဒလံလၤ မၤဝဲဒ်န့ၣ်ဒီး မၤတံၢ်ဃာ်ဝဲဒီး နီၣ်ဆှီးတဘိ ဒီးကိးပသူထီၣ်ဝဲလၢ “စီၤၡံၡိၣ်ဧၢ, ပှၤဖလ့ၡသးဖိ ဟဲတုၤလံ.” အဃိ စီၤၡံၡိၣ် မံပၢၢ်ထီၣ် ဒီးထုးထီၣ်ကွံာ် ထၣ်အနီၣ်ဆှီးတဘိ ဒီးလုၣ်လၢ ပှၤသူအီၤလၢ ထၣ်အဂီၢ် လၢအခိၣ်ဆူၣ်ကျါလီၤ.
၁၅ နီၢ်ဒလံလၤ တဲစီၤၡံၡိၣ်လၢ “နလံၣ်န့ၢ်လီန့ၢ်ယၤ သၢဘျီညါ ဒီးနဂံၢ်နဘါ လၢအဆူၣ်အံၤ နန့ၢ်ဘၣ်အီၤ ဖဲလဲၣ်န့ၣ် နတတဲယၤဘၣ်.+ နသးတအိၣ်ယၤဒၢး ဘၣ်မနုၤအဃိ နတဲလၢ နအဲၣ်ယၤလဲၣ်.”+ ၁၆ ခီဖျိလၢ အဝဲသံကွၢ်အီၤ တဘျီဝံၤတဘျီ ဒီးမၢဆူၣ်အီၤ တနံၤဘၣ်တနံၤအဃိ အသးလီၤဘှံး တုၤလၢအကသံလီၤ.+ ၁၇ အဃိ စီၤၡံၡိၣ် တဲဘၣ်အီၤ တၢ်ခဲလၢာ်လီၤ. အဝဲတဲဝဲလၢ “စးထီၣ်လၢ ယအိၣ်ဖျဲၣ်ထီၣ်လံၤလံၤန့ၣ် မ့ၢ်လၢ ယကဲ ကစၢ်ယွၤ အပှၤနစၤရံဖိ အဃိ ပှၤတတံာ် ယခိၣ်ဆူၣ် နီတဘျီဘၣ်.+ ပှၤမ့ၢ်တံာ် ယခိၣ်ဆူၣ်န့ၣ် ယဂံၢ်ယဘါ ကဟးထီၣ်ကွံာ်လၢယအိၣ် ဒီးယဂံၢ်ယဘါ ကလီၤစၢ်ကွံာ်ဝဲ ဒီးယကကဲထီၣ် ဒ်ပှၤပိာ်ခွါ အဂၤတဖၣ် အသိးလီၤ.”
၁၈ ဒီးဖဲနီၢ်ဒလံလၤ သ့ၣ်ညါဘၣ်ဝဲလၢ စီၤၡံၡိၣ် တတဲလံၣ်အီၤ လၢၤဘၣ်အခါ အဝဲကရီကိးဖှိၣ်ဝဲ ပှၤဖလ့ၡသးဖိ အခိၣ်အနၢ်တဖၣ်လီၤ.+ ဒီးအတဲဝဲလၢ “တဘျီအံၤ ဟဲဟီ. စီၤၡံၡိၣ် တဲဘၣ်ယၤ တၢ်ခဲလၢာ် ပျီပျီလံ.” အဃိ ပှၤဖလ့ၡသးဖိ အခိၣ်အနၢ်တဖၣ် ဟဲလၢ နီၢ်ဒလံလၤအအိၣ် ဒီးဟဲစိာ်ဃုာ်ဒီး စ့လီၤ. ၁၉ နီၢ်ဒလံလၤ မၤမံဝဲ စီၤၡံၡိၣ်လၢ အခီၣ်ကံၣ်ဒုၣ် အလိၤလီၤ. လၢခံ အဝဲကိးန့ၢ် ပှၤပိာ်ခွါတဂၤ ဒီးမၢအမၤတဲာ်ကွံာ်ဝဲ စီၤၡံၡိၣ် အခိၣ်ဆူၣ် လၢအသံၣ်ဃာ်အသး နွံဘိန့ၣ်လီၤ. ဒီးမ့ၢ်လၢ စီၤၡံၡိၣ် အဂံၢ်အဘါ ဟးထီၣ်ကွံာ် လၢအအိၣ် အဃိ နီၢ်ဒလံလၤ ဒိၣ်စိလၢအဖီခိၣ်လီၤ. ၂၀ ဒီးအဝဲ ကိးပသူထီၣ်ဝဲလၢ “စီၤၡံၡိၣ်ဧၢ, ပှၤဖလ့ၡသးဖိ ဟဲတုၤလံ.” အဃိ စီၤၡံၡိၣ် မံပၢၢ်ထီၣ် ဒီးတဲဝဲလၢ “ယကမၤဒ် လၢညါအသိး+ ဒီးယကထူၣ်ဖျဲးထီၣ်လီၤ.” ဘၣ်ဆၣ် ယဟိဝၤယွၤ တအိၣ်ဒီးအီၤလၢၤဘၣ်န့ၣ် အဝဲတသ့ၣ်ညါဝဲဘၣ်. ၂၁ အဃိ ပှၤဖလ့ၡသးဖိ ဖီၣ်န့ၢ်အီၤ ဒီးတူခွဲးထီၣ်ကွံာ် အမဲာ်ချံလီၤ. ဒီးအဝဲသ့ၣ် လဲၤဆှၢအီၤလၢ ဝ့ၢ်ဂါစၤ ဒီးစၢဃာ်အီၤလၢ ထးသွဲတိၢ်ဘီတဖၣ် ဒီးအဝဲဘၣ် ဂူာ်ဘုလၢ ဆၢၣ်ဂူာ် လၢဃိာ်ပူၤလီၤ. ၂၂ ဘၣ်ဆၣ် ပှၤတံာ်အခိၣ်ဆူၣ် ဝံၤအလီၢ်ခံ အခိၣ်ဆူၣ် ဟဲထီထီၣ် ကဒါက့ၤလီၤ.+
၂၃ လၢခံ ပှၤဖလ့ၡသးဖိ အခိၣ်အနၢ်တဖၣ် ပာ်ဖှိၣ်ထီၣ်အသး ဒီးဟ့ၣ်လုၢ်ထီၣ် တၢ်လုၢ်အါမး လၢအဝဲသ့ၣ် အယွၤ ဒၤကိၣ်အအိၣ်+ ဒီးမၤဝဲ တၢ်သူၣ်ဖှံသးညီလီၤ. ဒီးအဝဲသ့ၣ် တဲဝဲလၢ “ပယွၤ ဟ့ၣ်လီၤ ပဒုၣ်ပဒါ စီၤၡံၡိၣ် လၢပစုပူၤလံ.” ၂၄ ဖဲပှၤဂီၢ်မုၢ် ထံၣ်အီၤအခါ* အဝဲသ့ၣ် စံးထီၣ်ပတြၢၤ အယွၤ ဒီးတဲဝဲလၢ “ပဒုၣ်ပဒါ လၢအမၤဟးဂီၤ ပတၢ်လီၢ်တၢ်ကျဲ+ ဒီးမၤသံပဝဲအါဂၤန့ၣ်+ ပယွၤ ဟ့ၣ်လီၤအီၤလၢ ပစုပူၤလံ.”
၂၅ ခီဖျိလၢ အဝဲသ့ၣ် သူၣ်ဖှံသးညီအဃိ အဝဲသ့ၣ် တဲဝဲလၢ “ကိးန့ၢ် စီၤၡံၡိၣ် ဒ်သိး ပကနံၤဘၣ်အီၤ အဂီၢ်မီၤ.” အဃိ အဝဲသ့ၣ် ကိးထီၣ် စီၤၡံၡိၣ် လၢဃိာ်ပူၤ ဒ်သိး ကနံၤဘၣ်အီၤအဂီၢ် ဒီးမၢအဆၢထၢၣ်လၢ ဟံၣ်ထူၣ်တဖၣ် အကဆူးလီၤ. ၂၆ ဒီးစီၤၡံၡိၣ် တဲဖိသၣ်ပိာ်ခွါလၢ အဖီၣ်ဃာ်အစုလၢ “ပျဲယပလၢၢ် ဟံၣ်ထူၣ်တဖၣ် ဒ်သိး ယကသန့ၤ ယသးလၢအီၤ အဂီၢ်မီၤ.” ၂၇ (ဒီးပှၤပိာ်မုၣ် ဒီးပှၤပိာ်ခွါ အိၣ်ဝဲလၢ ဟံၣ်အပူၤ ပှဲၤပှဲၤလီၤ. ပှၤဖလ့ၡသးဖိ အခိၣ်အနၢ်ခဲလၢာ် အိၣ်ဝဲဖဲန့ၣ် ဒီးလၢဟံၣ်ခိၣ်န့ၣ် ပှၤပိာ်မုၣ်ဒီး ပှၤပိာ်ခွါလၢ အကွၢ်ဝဲ စီၤၡံၡိၣ် ဒီးနံၤဘၣ်အီၤန့ၣ် ခဲလၢာ်ခဲဆ့ အိၣ်ဝဲအဂၤ ၃,၀၀၀ လီၤ.)
၂၈ ဒီးစီၤၡံၡိၣ်+ ကိးထီၣ် ယဟိဝၤယွၤလၢ “တၢ်ပၢကစၢ် ယဟိဝၤယွၤဧၢ, ဝံသးစူၤ သ့ၣ်နီၣ်ထီၣ်ယၤ ဒီးမၤဆူၣ်ထီၣ်က့ၤ ယဂံၢ်ယဘါမီၤ.+ အိ ကစၢ်ယွၤဧၢ, ဝံသးစူၤ ဟ့ၣ်ကဒါက့ၤယၤ တၢ်ဂံၢ်တၢ်ဘါ ထဲတဘျီအံၤ ဒ်သိး ယကမၤကၣ်က့ၤ ပှၤဖလ့ၡသးဖိ လၢယမဲာ်ချံ ထဲတဖျၢၣ်အဂီၢ် တက့ၢ်.”+
၂၉ ဒီးစီၤၡံၡိၣ် ဆၢထၢၣ်ဂၢၢ်ဂၢၢ်လၢ ဟံၣ်ထူၣ်လၢ အအိၣ်လၢ တၢ်ခၢၣ်သးခံထူၣ် အကဆူး ဒီးဆီၣ်ဝဲ လၢအစုစ့ၣ်တထူၣ် ဒီးလၢအစုထွဲ တထူၣ်လီၤ. ၃၀ ဝံၤဒီး စီၤၡံၡိၣ် ကိးပသူထီၣ်ဝဲလၢ “မ်ယသံဃုာ်ဒီး ပှၤဖလ့ၡသးဖိ တက့ၢ်.” ဒီးအဝဲ ဆီၣ်ဝဲ ဟံၣ်ထူၣ် လၢာ်ဂံၢ်လၢာ်ဘါ ဒီးဟံၣ်လီၤပှီၢ်ဝဲလၢ ပှၤဖလ့ၡသးဖိ အခိၣ်အနၢ် ဒီးပှၤလၢအအိၣ်လၢ ဟံၣ်ပူၤ ခဲလၢာ် အလိၤလီၤ.+ အဃိ ဖဲအသံအခါန့ၣ် အမၤသံ ပှၤဂၤအါန့ၢ်ဒံး အမၤသံဝဲဖဲ အအိၣ်မူဒံး အဆၢကတီၢ်လီၤ.+
၃၁ လၢခံ အဒီပုၢ်ဝဲၢ်ခွါ ဒီးအပၢ်အဒူၣ်ဖိထၢဖိ ခဲလၢာ် ဟဲလၢ ဝ့ၢ်ဂါစၤ ဒ်သိးကဟံးန့ၢ်အစိၣ် အဂီၢ်လီၤ. အဝဲသ့ၣ် ဟဲက့ၤစိာ်အစိၣ် ဒီးခူၣ်လီၤအီၤလၢ အပၢ်စီၤမၤနိ+ အတၢ်သွၣ်ခိၣ် လၢအအိၣ်လၢ ဝ့ၢ်စိးရၤဒီး+ ဝ့ၢ်အ့ၤၡတိလး အဘၢၣ်စၢၤလီၤ. စီၤၡံၡိၣ် မၤတၢ်ဒ် စံၣ်ညီၣ်ကွီၢ်တဂၤအသိး လၢပှၤအံၣ်စရ့လးဖိ အဂီၢ် အနံၣ် ၂၀ လီၤ.+