ယိၤနါ
၄ လၢတၢ်ဂ့ၢ်အံၤအဃိ စီၤယိၤနါ အသးတမုာ်နီတစဲးဘၣ် ဒီးအသးပှံၢ်ထီၣ်တၢ် ဒိၣ်မးလီၤ. ၂ အဃိ စီၤယိၤနါ ဃ့ထုကဖၣ်တၢ်လၢ ယဟိဝၤယွၤအအိၣ် ဒီးတဲဝဲလၢ “ယဟိဝၤယွၤဧၢ, ဖဲယအိၣ်လၢ ယအိၣ်တၢ်လီၢ်လံၤလံၤန့ၣ် ယသ့ၣ်ညါပာ်စၢၤလံဧဲၤ. နမ့ၢ်ကစၢ်ယွၤလၢ အသးဂ့ၤ, အသးကညီၤတၢ်, တသးဒိၣ်ထီၣ်တၢ်ချ့ချ့ဘၣ်, အိၣ်ဒီးတၢ်အဲၣ်လၢ အတီဒိၣ်မး+ ဒီးနတအဲၣ်ဒိး မၤကီမၤခဲပှၤဂၤဘၣ်. အဃိ ယလဲၤစံၣ်* လၢဝ့ၢ်တၢ်ၡံၣ်ဝဲန့ၣ်.+ ၃ အိ ယဟိဝၤယွၤဧၢ, ဝံသးစူၤ မၤသံကွံာ်ယၤဟီ, ယမ့ၢ်သံန့ၣ် ဂ့ၤန့ၢ်ဒံးယမူဒံး.”+
၄ ဒီးယဟိဝၤယွၤ သံကွၢ်အီၤလၢ “နသးထီၣ်တၢ်န့ၣ် မ့ၢ်အဘၣ်ဧါ.”
၅ စီၤယိၤနါ ဟးထီၣ်လၢ ဝ့ၢ်ချၢဒီး ဆ့ၣ်နီၤလၢ ဝ့ၢ်အမုၢ်ထီၣ်တခီလီၤ. အဝဲတ့ထီၣ်ဝဲ တၢ်အိၣ်ကဒုအလီၢ် ဒီးဆ့ၣ်နီၤလၢ တၢ်ကဒုဖီလာ် ဒ်သိး ကခိးကွၢ်ဝဲ တၢ်ကမၤအသးဒီး ဝ့ၢ်ဒ်လဲၣ်န့ၣ်လီၤ.+ ၆ ဒီးယဟိဝၤယွၤ ဒုးဒိၣ်ထီၣ် မာ်တိ* တမုၢ် ဒ်သိး အလၣ်ကကဒုလီၤဘၣ် စီၤယိၤနါအခိၣ် ဒီးအသးကမုာ်ထီၣ်အဂီၢ်လီၤ. ဒီးစီၤယိၤနါ သးခုဒိၣ်မးလၢ မာ်တိတမုၢ်န့ၣ်အဃိလီၤ.
၇ ဘၣ်ဆၣ် လၢခံတဂီၤန့ၣ် ယွၤလၢအမ့ၢ်အတီတဂၤ ပျၢ်လီၤဝဲ တၢ်ဃၢ်တဘိ ဒီးတၢ်ဃၢ်တဘိန့ၣ် အ့ၣ်ဝဲ မာ်တိတမုၢ်န့ၣ် ဒီးမာ်တိာ်တမုၢ်န့ၣ် လီၤညွံးလီၤဘဲဝဲလီၤ. ၈ ဖဲမုၢ်ဟဲထီၣ်အခါ ကစၢ်ယွၤ ဒုးဟဲ ကလံၤကိၢ်လၢ မုၢ်ထီၣ် ဒီးမုၢ်ဆဲးလီၤဘၣ် စီၤယိၤနါအခိၣ်အဃိ စီၤယိၤနါ ဘူးကသးပ့ၤနီၣ်အသးလီၤ. ဒီးစီၤယိၤနါ ဃ့ကဒီးဝဲလၢ အကသံ ဒီးအဝဲတဲကဒီးဝဲလၢ “ယမ့ၢ်သံန့ၣ် ဂ့ၤန့ၢ်ဒံးယမူဒံး.”+
၉ ကစၢ်ယွၤ သံကွၢ်စီၤယိၤနါလၢ “လၢမာ်တိတမုၢ်အဃိ နသးဒိၣ်ထီၣ်တၢ်ဖးဒိၣ်န့ၣ် အဘၣ်ဧါ.”+
စီၤယိၤနါတဲဆၢအီၤလၢ “ယသးဒိၣ်ထီၣ်တၢ်န့ၣ် အဘၣ်လီၤ. ယသးဒိၣ်ထီၣ်တၢ်ဒိၣ်မး တုၤလၢ ယအဲၣ်ဒိးသံလီၤ.” ၁၀ ဘၣ်ဆၣ် ယဟိဝၤယွၤ တဲဆၢအီၤလၢ “မာ်တိတမုၢ်အံၤ နတသူၣ်လီၤအီၤဘၣ်, နတမၤဒိၣ်ထီၣ်အီၤဘၣ်, အမဲထီၣ်လၢ တနၤဃီအတီၢ်ပူၤ ဒီးလၢခံတနၤန့ၣ် ဟးဂီၤကွံာ်ဝဲလီၤ. အန့ၣ်မး နသးကညီၤအီၤဒံး. ၁၁ မ့မ့ၢ်ယၤမီၤ, နံၤနဝ့ လၢအမ့ၢ် ဝ့ၢ်ဖးဒိၣ်တဖျၢၣ်န့ၣ်+ ယတကြၢး သးကညီၤအီၤဧီၤ. ပှၤလၢအအိၣ်ဖဲန့ၣ်တဖၣ် အိၣ်အါန့ၢ် အဂၤ ၁၂၀,၀၀၀ ဒီးအဝဲသ့ၣ်နီၤဖး တၢ်ဂ့ၤဒီးတၢ်အၢ တဘၣ်ဘၣ် ဒီးအဝဲသ့ၣ်အိၣ်ဝဲဒီး အဆၣ်ဖိကီၢ်ဖိ အါမးစ့ၢ်ကီးလီၤ.”+