မၢ်ကူး

၁၄ ဖဲဘူၣ်လဲၤကပာ်+ ဒီးဘူၣ်ကိၣ်လၢ အတပၣ်ဒီးကိၣ်မံၣ်ဘၣ်+ တချုးဘၣ်ဒံးဘၣ်ခံသီန့ၣ်+ ပှၤလုၢ်တၢ်ဒိၣ်အခိၣ်တဖၣ်​ ဒီးပှၤကွဲးလံာ်ဖိတဖၣ်​ ဃုကျဲလၢ ကသူတၢ်လီတၢ်ဝ့ၤ ဒ်သိးကဖီၣ်ယ့ၣ်ၡူး ဒီးမၤသံအီၤအဂီၢ်လီၤ.+ ၂ ဘၣ်ဆၣ်​ အဝဲသ့ၣ်​ တဲဝဲလၢ “တဘၣ်မၤဖဲ ဘူၣ်ဘၣ်အဆၢကတီၢ်တဂ့ၤ, ပှၤဂီၢ်မုၢ်တဖၣ်​ ကမၤတၢထီၣ်တၢလီၤဘၣ်ဖုးတၢ်လီၤ.”

၃ ဖဲယ့ၣ်ၡူးအီၣ်တၢ်လၢ ဘ့ၤသနံသဝီလၢ ပှၤဘၣ်တၢ်ဆါအၢ စီၤၡံမိၣ်အဟံၣ်အခါ ပိာ်မုၣ်တဂၤ ဟဲစိာ်ဝဲ ပလီလၢၢ်ဝါတဖျၢၣ်​ လၢအအိၣ်ဒီးသိနၢမူ နၢ်ဒူၤအနီၢ်ကီၢ် လၢအပှ့ၤဒိၣ်မးလီၤ. အဝဲအိးထီၣ်​ ပလီလၢၢ်ဝါတဖျၢၣ်အံၤ ဒီးလူလီၤဝဲ သိနၢမူလၢ ယ့ၣ်ၡူးအခိၣ်လိၤလီၤ.+ ၄ လၢတၢ်သးထီၣ်အပူၤ ယ့ၣ်ၡူးအပျဲၢ်အဘီၣ်တနီၤ တဲလိာ်အသး တဂၤဒီးတဂၤလၢ “အမၤလၢာ်ဂီၤ သိနၢမူအံၤဘၣ်လဲၣ်. ၅ အဝဲမ့ၢ်ဆါကွံာ် သိနၢမူန့ၣ်​ ကန့ၢ်စ့ဒန့ၤရံၤ* ၃၀၀ ဘျဲၣ်ညါ. ဒီးစ့တဖၣ်န့ၣ်​ မ့ၢ်ဟ့ၣ်လီၤ ပှၤဖှီၣ်ဖိယာ်ဖိသ့လီၤ.” ဒီးအဝဲသ့ၣ်​ သးအ့န့ထီၣ်အီၤ* ဒိၣ်မးလီၤ. ၆ ဘၣ်ဆၣ်​ ယ့ၣ်ၡူးတဲဝဲလၢ “တြီအီၤတဂ့ၤ, သုမၤကီမၤခဲအီၤ ဘၣ်လဲၣ်. အဝဲမၤဂ့ၤတၢ်လၢယဂီၢ်လီၤ.+ ၇ ပှၤဖှီၣ်ဖိယာ်ဖိတဖၣ်​ ကအိၣ်ဒီးသုထီဘိလီၤ.+ အဃိ သုမၤဂ့ၤတၢ်လၢ အဝဲသ့ၣ်အဂီၢ်သ့ ကိးဆၢကိးကတီၢ်ဒဲးလီၤ. မ့မ့ၢ်ယၤန့ၣ်​ တမ့ၢ်လၢ ယကအိၣ်ဒီးသုထီဘိဘၣ်.+ ၈ ပိာ်မုၣ်တဂၤအံၤ ဖဲအမၤဝဲသ့န့ၣ်​ အမၤဝဲလံ. အဝဲလူလီၤဆိ သိနၢမူလၢ ယလိၤန့ၣ်​ မ့ၢ်ဒ်သိး တၢ်ကတဲာ်ကတီၤတၢ်လၢ တၢ်ကခူၣ်လီၤယၤအဂီၢ်လီၤ.+ ၉ ယကတဲဘၣ်သုတီတီလၢ ဖဲပှၤစံၣ်တဲၤတဲလီၤ တၢ်သးခုကစီၣ်လၢ တၢ်လီၢ်တပူၤဂ့ၤတပူၤဂ့ၤ လၢဟီၣ်ခိၣ်ဒီဘ့ၣ်အခါ+ တၢ်လၢပိာ်မုၣ်တဂၤအံၤ မၤဝဲအဂ့ၢ်န့ၣ်​ ပှၤကတဲဖျါထီၣ်ဝဲလၢ တၢ်သ့ၣ်နီၣ်ထီၣ်က့ၤအီၤ အဂီၢ်လီၤ.”+

၁၀ စီၤယူဒၤအံၣ်စကၤရံၤအိာ် လၢအပၣ်ဃုာ်လၢ ပှၤတဆံခံဂၤအကျါန့ၣ်​ လဲၤဝဲလၢ ပှၤလုၢ်တၢ်ဒိၣ်အခိၣ်တဖၣ်အအိၣ်​ ဒ်သိးကဟ့ၣ်လီၤကွံာ် ယ့ၣ်ၡူးလၢ အဝဲသ့ၣ်အစုပူၤလီၤ.+ ၁၁ ဖဲအဝဲသ့ၣ်​ နၢ်ဟူဝဲအခါ အဝဲသ့ၣ်သးခုဝဲဒိၣ်မး ဒီးအၢၣ်လီၤဝဲလၢ ကဟ့ၣ်အီၤစ့လီၤ.+ အဃိ စးထီၣ်ဖဲန့ၣ်​ အဃုဝဲတၢ်ခွဲးတၢ်ယာ်လၢ ကဟ့ၣ်လီၤကွံာ်ယ့ၣ်ၡူး အဂီၢ်လီၤ.

၁၂ ဖဲဘူၣ်ကိၣ်​ လၢအတပၣ်ဒီးကိၣ်မံၣ်ဘၣ်+ အဆိကတၢၢ်တသီန့ၣ်​ အဝဲသ့ၣ်​ အလုၢ်အလၢ်အိၣ်ဝဲလၢ ကမၤသံဆၣ်ဖိကီၢ်ဖိလၢ ဘူၣ်လဲၤကပာ်အဂီၢ်လီၤ.+ ဖဲန့ၣ်အခါ ယ့ၣ်ၡူးအပျဲၢ်အဘီၣ်တဖၣ်​ တဲအီၤလၢ “ဒ်သိးနကအီၣ်​ ဘူၣ်လဲၤကပာ်အဂီၢ် နအဲၣ်ဒိးလၢ ပလဲၤကတဲာ်ကတီၤန့ၢ်နၤတၢ် လၢတၢ်လီၢ်ဖဲလဲၣ်.”+ ၁၃ ဒီးယ့ၣ်ၡူးဆှၢလီၤဝဲ အပျဲၢ်အဘီၣ်ခံဂၤ ဒီးတဲအဝဲသ့ၣ်လၢ “လဲၤနုာ်လီၤလၢဝ့ၢ်ပူၤ ဒီးသုကထံၣ်လိာ်သးဒီး ပိာ်ခွါတဂၤလၢ အစိာ်ဝဲ ထံဒၢတဖျၢၣ်လီၤ. လဲၤပိာ်အခံတက့ၢ်.+ ၁၄ ဖဲအဝဲလဲၤနုာ်လီၤလၢ ဟံၣ်တဖျၢၣ်ဖျၢၣ်အပူၤအခါ တဲဘၣ်ဟံၣ်ကစၢ်လၢ ‘သရၣ်တဲဝဲလၢ “ပှၤတမှံၤအဒၢးလၢ ယကအီၣ်ဘူၣ်လဲၤကပာ် ဒီးယပျဲၢ်ယဘီၣ်တဖၣ်န့ၣ်​ အိၣ်ဖဲလဲၣ်.”’ ၁၅ ဒီးအဝဲကဒုးနဲၣ်သု ဒၢးဖးဒိၣ်တဖျၢၣ်လၢ ဟံၣ်ဖီခိၣ်တတီၤ လၢအဘၣ်တၢ်ကတဲာ်ကတီၤပာ်စၢၤအီၤလီၤ. ကတဲာ်ကတီၤ ဘူၣ်လဲၤကပာ် လၢပဂီၢ်ဖဲန့ၣ်နီၤ.” ၁၆ အဃိ အပျဲၢ်အဘီၣ်တဖၣ်​ လဲၤဝဲဒီးနုာ်လီၤလၢဝ့ၢ်ပူၤ ဒီးထံၣ်ဝဲဒ် ယ့ၣ်ၡူးတဲအဝဲသ့ၣ်​ အသိးလီၤ. ဒီးအဝဲသ့ၣ်​ ကတဲာ်ကတီၤတၢ်လၢ ဘူၣ်လဲၤကပာ်အဂီၢ်လီၤ.

၁၇ ဖဲဟါလီၤခီ အဆၢကတီၢ်န့ၣ်​ ယ့ၣ်ၡူးဟဲဒီး အတၢ်မၢဖိ တဆံခံဂၤလီၤ.+ ၁၈ ဖဲအဝဲသ့ၣ်​ ဆ့ၣ်နီၤသန့ၤအသးလၢ စီၢ်နီၤခိၣ်​ ဒီးအီၣ်တၢ်အခါ ယ့ၣ်ၡူးတဲဝဲလၢ “ယကတဲဘၣ်သုတီတီလၢ သုဝဲလၢ အအီၣ်သကိးတၢ်ဒီးယၤအကျါ တဂၤန့ၣ်​ ကဟ့ၣ်လီၤကွံာ်ယၤလီၤ.”+ ၁၉ ဒီးအဝဲသ့ၣ်​ သးအုးဒိၣ်မး ဒီးအဝဲသ့ၣ်​ သံကွၢ်အီၤ တဂၤဝံၤတဂၤလၢ “အကဲယၤဧါ.” ၂၀ ဒီးယ့ၣ်ၡူးတဲ အဝဲသ့ၣ်လၢ “မ့ၢ်ဝဲ ပှၤတဆံခံဂၤအကျါတဂၤ လၢအဘုးလီၤအစု တဘျီဃီဒီးယၤ လၢလီခီအပူၤလီၤ.+ ၂၁ ဒ်တၢ်ကွဲးအသးအသိး ပှၤကညီဖိခွါအံၤ ကသံဝဲလီၤ. ဘၣ်ဆၣ်​ ပှၤလၢအဟ့ၣ်လီၤကွံာ် ပှၤကညီဖိခွါတဂၤအံၤန့ၣ်​ ကဘၣ်ကီဘၣ်ခဲလီၤ.+ ဒီးပှၤတဂၤအံၤ မ့ၢ်တအိၣ်ဖျဲၣ်ထီၣ်ဘၣ်န့ၣ်​ ကဂ့ၤဒိၣ်ဝဲလၢအဂီၢ်လီၤ.”+

၂၂ ဖဲအဝဲသ့ၣ်​ ဆဲးအီၣ်တၢ်အခါ ယ့ၣ်ၡူးဟံးန့ၢ်ကိၣ်, ဃ့တၢ်ဆိၣ်ဂ့ၤ ဒီးဘိးကၢ်ဝဲ ဝံၤဒီးဟ့ၣ်လီၤ အဝဲသ့ၣ်​ ဒီးတဲဝဲလၢ “ဟံးန့ၢ်အီၤတက့ၢ်. ကိၣ်အံၤ ဒိလီၤဝဲ ယနီၢ်ခိလီၤ.”+ ၂၃ ဒီးအဝဲဟံးန့ၢ်စပံးထံတခွး, စံးဘျုးယွၤ, ဟ့ၣ်လီၤအဝဲသ့ၣ်​ ဒီးအဝဲသ့ၣ်ခဲလၢာ် အီဝဲလီၤ.+ ၂၄ ဒီးယ့ၣ်ၡူးတဲဘၣ်​ အဝဲသ့ၣ်လၢ “စပံးထံတခွးအံၤ ဒိလီၤဝဲ ‘ယသွံၣ်လၢ+ အဘၣ်ဃးဒီး တၢ်အၢၣ်လီၤအီလီၤ’+ လၢအကဘၣ်တၢ်လူလီၤအီၤလၢ ပှၤအါဂၤအဂီၢ်လီၤ.+ ၂၅ ယကတဲဘၣ်သုတီတီလၢ ဆူညါန့ၣ်​ လ့ၤတက့ၤ ယတအီ စပံးထံလၢၤဘၣ်တုၤလၢ မုၢ်တနံၤဖဲ ယအီစပံးထံအသီလၢ ယွၤအဘီမုၢ်အပူၤလီၤ.” ၂၆ လၢခံကတၢၢ်န့ၣ်​ အဝဲသ့ၣ်​ သးဝံၣ်စံးထီၣ်ပတြၢၤ ကစၢ်ယွၤဝံၤဒီး အဝဲသ့ၣ်​ လဲၤဝဲလၢ ကစၢၢ်သ့ၣ်စၤယံးလီၤ.+

၂၇ ယ့ၣ်ၡူးတဲ အဝဲသ့ၣ်လၢ “သုဝဲခဲလၢာ် သုကလီၤဃံၢ်လီၤ. တၢ်ကွဲးအသးအိၣ်လၢ ‘ယကကျီကွံာ် ပှၤကွၢ်သိ+ ဒီးသိတဖၣ်န့ၣ်​ ကလီၤပြံလီၤပြါလီၤ.’+ ၂၈ ဘၣ်ဆၣ်​ ဖဲတၢ်မၤဂဲၤဆၢထၢၣ်က့ၤယၤ ဝံၤအလီၢ်ခံ ယကလဲၤဆိလၢ သုမဲာ်ညါဆူ ကၤလံၤလါလီၤ.”+ ၂၉ ဘၣ်ဆၣ်​ စီၤပ့းတရူး တဲဘၣ်အီၤလၢ “ပှၤအဂၤခဲလၢာ် မ့ၢ်လီၤဃံၢ်ဘၣ်ဆၣ်​ မ့မ့ၢ်ယၤန့ၣ်​ ယတလီၤဃံၢ်ဘၣ်.”+ ၃၀ ယ့ၣ်ၡူး တဲဘၣ်အီၤလၢ “ယကတဲဘၣ်နၤတီတီလၢ တနၤညါအံၤ တချုးလၢ ဆီဖါအိၣ်အိထီၣ်​ ခံဘျီဒံးဘၣ်န့ၣ်​ နကသမၢယၤ သၢဘျီလီၤ.”+ ၃၁ ဘၣ်ဆၣ်​ လၢတၢ်သးဆူၣ်အပူၤ စီၤပ့းတရူး တဲဆၢအီၤလၢ “ယမ့ၢ်ဘၣ်သံဃုာ်ဒီးနၤ သနာ်က့ လ့ၤတက့ၤ ယတသမၢနၤဘၣ်.” ဒီးအပျဲၢ်အဘီၣ်အဂၤခဲလၢာ် တဲဝဲဒ်န့ၣ်စ့ၢ်ကီးလီၤ.+

၃၂ ဒီးအဝဲသ့ၣ်လဲၤတုၤလၢ တၢ်လီၢ်တတီၤလၢအမ့ၢ် က့ၤသစ့းမနၤ ဒီးယ့ၣ်ၡူးတဲဘၣ်​ အပျဲၢ်အဘီၣ်တဖၣ်လၢ “ဖဲယဃ့ထုကဖၣ်တၢ်အခါ ဆ့ၣ်နီၤဖဲအံၤနီၤ.”+ ၃၃ အဝဲလဲၤကိးဃုာ်ဝဲ စီၤပ့းတရူး, စီၤယၤကိာ် ဒီးစီၤယိၤဟၣ်လီၤ.+ ဒီးယ့ၣ်ၡူး သူၣ်ကိၢ်သးဂီၤတၢ်ဒိၣ်မး ဒီးသးအုးဒိၣ်မးလီၤ. ၃၄ ဒီးယ့ၣ်ၡူးတဲဘၣ်​ အဝဲသ့ၣ်လၢ “ယသးအုးဒိၣ်မး+ တုၤလၢယကသံလီၤ. အိၣ်ဖဲအံၤဒီး ဆိးသီနီၤ.”*+ ၃၅ ဒီးအဝဲလဲၤလၢ အမဲာ်ညါတစဲး, ထိၣ်လီၤပှီၤအသး ဒီးဃ့ထုကဖၣ်ဝဲဒ်သိး မ့ၢ်သ့န့ၣ်​ တၢ်အိၣ်သးအံၤ ကလဲၤပူၤကွံာ်အီၤ အဂီၢ်လီၤ. ၃၆ ဒီးအတဲဝဲလၢ “အးဘၤ* ပၢ်ဧၢ,+ နမၤတၢ်သ့ခဲလၢာ်လီၤ. ထုးကွံာ်ခွးအံၤလၢ ယအိၣ်တက့ၢ်. ဘၣ်ဆၣ်​ တမ့ၢ်ဒ်ယတၢ်ဘၣ်သး အသိးဘၣ်. မ်အမ့ၢ်ဒ် နတၢ်ဘၣ်သး အသိးတက့ၢ်.”+ ၃၇ ယ့ၣ်ၡူးဟဲက့ၤထံၣ်ဝဲလၢ အဝဲသ့ၣ်​ မံဘၣ်အသးလီၤ. အဃိ ယ့ၣ်ၡူးတဲဘၣ်​ စီၤပ့းတရူးလၢ “စီၤၡံမိၣ်ဧၢ, နမံဧါ. နဆိးသီထဲတနၣ်ရံၣ်မး တကဲဧီၤ.+ ၃၈ ဒ်သိးသုသုတလီၤလၢ တၢ်လ့ပစီအပူၤ တဂ့ၤအဂီၢ်+ ဆိးသီ ဒီးဃ့ထုကဖၣ်တၢ် ထီဘိတက့ၢ်. သးန့ၣ်ဆူၣ်ဝဲ* ဘၣ်ဆၣ်​ မ့မ့ၢ်နီၢ်ခိန့ၣ်* အဂံၢ်အဘါစၢ်ဝဲလီၤ.”+ ၃၉ ဒီးအလဲၤကဒီးဝဲ ဒီးဃ့ထုကဖၣ်တၢ်ဒီး တဲတၢ်ဒ်အလီၢ်လီၢ် အသိးလီၤ.+ ၄၀ အဟဲက့ၤကဒီး အသီတဘျီ ဒီးထံၣ်ဝဲလၢ အဝဲသ့ၣ်​ မံဘၣ်အသး, မ့ၢ်လၢအဝဲသ့ၣ်​ အမဲာ်ဖံးဃၢဝဲအဃိလီၤ. ဒီးအဝဲသ့ၣ်​ ကဘၣ်တဲဆၢ ယ့ၣ်ၡူးဒ်လဲၣ်န့ၣ်​ တသ့ၣ်ညါဝဲဘၣ်. ၄၁ ဒီးအဟဲက့ၤကဒါက့ၤ သၢဘျီတဘျီဒီး တဲအဝဲသ့ၣ်လၢ “တၢ်ဆၢကတီၢ်ဒ်အံၤဒၣ်လဲာ် သုမံဒီးအိၣ်ဘှံးအိၣ်သါဒံးဧါ. ပှဲၤန့ၣ်ဘၣ်လံ. နၣ်ရံၣ်ဘၣ်လၢ+ တၢ်ကဟ့ၣ်လီၤကွံာ် ပှၤကညီဖိခွါအံၤလၢ ပှၤတၢ်ဒဲးဘးဖိ အစုပူၤလံ. ၄၂ ဂဲၤဆၢထၢၣ်, ပကလဲၤလီၤ. လၢန့ၣ်, ပှၤလၢအကဟ့ၣ်လီၤကွံာ် ယၤတဂၤန့ၣ်​ ဟဲဘူးထီၣ်လံ.”+

၄၃ ဖဲယ့ၣ်ၡူး တဲတၢ်ဒံးအခါ စီၤယူဒၤလၢ အပၣ်ဃုာ်လၢ တၢ်မၢဖိတဆံခံဂၤအကျါန့ၣ်​ ဟဲတုၤဝဲလီၤ. ဒီးပှၤဂီၢ်မုၢ်လၢအအိၣ်ဒီး နးဒီးနီၣ်တီၢ်တဖၣ်န့ၣ်​ ဟဲဃုာ်ဒီးအီၤလီၤ. အဝဲသ့ၣ်မ့ၢ်ဝဲ ပှၤလၢ ပှၤလုၢ်တၢ်ဒိၣ်အခိၣ်တဖၣ်​ ဒီးပှၤကွဲးလံာ်ဖိ ဒီးပှၤသူၣ်က့သးပှၢ်တဖၣ်​ ဆှၢလီၤဝဲလီၤ.+ ၄၄ ဒီးပှၤလၢ အကဟ့ၣ်လီၤကွံာ်အီၤတဂၤန့ၣ်​ ဟ့ၣ်ပာ်စၢၤ ပှၤတဖၣ်န့ၣ်​ တၢ်ပနီၣ်ခီဖျိ တဲပာ်စၢၤအဝဲသ့ၣ်လၢ “ပှၤလၢ ယနၢမူအီၤတဂၤန့ၣ်​ မ့ၢ်ပှၤအဝဲန့ၣ်လီၤ. ဖီၣ်န့ၢ်အီၤ, က့ၤကိးအီၤ ဒီးပျဲထူၣ်ဖျဲးအီၤ တဂ့ၤနီၤ.” ၄၅ ဒီးအဝဲဟဲတုၤ ဒီးလဲၤလၢ ယ့ၣ်ၡူးအအိၣ်​ တဘျီဃီ ဒီးတဲဝဲလၢ “သရၣ်ဧၢ,”* ဒီးနၢမူအီၤ ကဖီလီဖိလီၤ. ၄၆ အဃိ အဝဲသ့ၣ်ဖီၣ်န့ၢ် ယ့ၣ်ၡူးလီၤ. ၄၇ ဘၣ်ဆၣ်​ ပှၤလၢအဆၢထၢၣ်ဖဲန့ၣ်တဖၣ်​ အကျါတဂၤ ထုးထီၣ်အနး ဒီးကျီဝဲ ပှၤလုၢ်တၢ်ခိၣ်​ အဒိၣ်ကတၢၢ် အကုၢ်တဂၤ ဒီးအနၢ်ကု ထီၣ်တဲာ်ဝဲတခီလီၤ.+ ၄၈ ဒီးယ့ၣ်ၡူးတဲအဝဲသ့ၣ်လၢ “သုဟဲဖီၣ်ယၤဒီးနးဒီးနီၣ်တီၢ် ဒ်သုဟဲဖီၣ်​ တၢ်ဟုၣ်တၢ်ဘျၣ်အသိးဧါ.+ ၄၉ တနံၤဘၣ်တနံၤန့ၣ်​ ယအိၣ်ဒီးသုလၢ တၢ်လုၢ်ဟံၣ်ပူၤ ဒီးသိၣ်လိတၢ်+ သနာ်က့ သုတဖီၣ်ယၤဘၣ်. ဒ်လဲၣ်ဂ့ၤဒ်လဲၣ်ဂ့ၤ တၢ်မၤအသးဒ်အံၤန့ၣ်​ မၤလၢထီၣ်ပှဲၤထီၣ်ဝဲ တၢ်ကွဲးအသးတဖၣ်လီၤ.”+

၅၀ ဒီးအပျဲၢ်အဘီၣ်ခဲလၢာ် ပာ်တ့ၢ်အီၤဒီး ဃ့ၢ်ကွံာ်ဝဲလီၤ.+ ၅၁ ဘၣ်ဆၣ်​ ပိာ်ခွါသးစၢ်တဂၤလၢ အကၤဝဲထဲ ဆ့ဖးထီလၢ အညၣ်ဂ့ၤတဘ့ၣ်န့ၣ်​ လူၤပိာ်ဝဲ ယ့ၣ်ၡူးအခံ လၢအဘူးလီၤ. ဒီးပှၤဂုာ်ကျဲးစၢး ဖီၣ်အီၤစ့ၢ်ကီးလီၤ. ၅၂ ဘၣ်ဆၣ်​ အဝဲပာ်တ့ၢ်ကွံာ် အဆ့ဖးထီ ဒီးဃ့ၢ်ပူၤဖျဲးအသးလၢ ဘ့ၣ်ဆ့လီၤ.*

၅၃ အဝဲသ့ၣ်ဆှၢထီၣ်​ ယ့ၣ်ၡူးလၢ ပှၤလုၢ်တၢ်ခိၣ်​ အဒိၣ်ကတၢၢ်အအိၣ်လီၤ.+ ဒီးကယဲၢ်ပှၤလုၢ်တၢ်ဒိၣ်အခိၣ်, ပှၤသူၣ်က့သးပှၢ်တဖၣ်​ ဒီးပှၤကွဲးလံာ်ဖိတဖၣ်​ အိၣ်ဖှိၣ်ဝဲလီၤ.+ ၅၄ ဘၣ်ဆၣ်​ စီၤပ့းတရူးလဲၤပိာ် ယ့ၣ်ၡူးအခံ တယံၤတဘူးဒီးအီၤ တုၤလီၤလၢ ပှၤလုၢ်တၢ်ခိၣ်​ အဒိၣ်ကတၢၢ်အကရၢၢ်ပူၤ ဒီးအဝဲဆ့ၣ်နီၤဒီး တၢ်အကုၢ်အပှၤတဖၣ်​ ဒီးဆူးမ့ၣ်အူလီၤ.+ ၅၅ ဒီးပှၤလုၢ်တၢ်ဒိၣ်အခိၣ်တဖၣ်​ ဒီးပှၤယူဒၤဖိ အကွီၢ်ဘျီၣ်​ လၢအဒိၣ်ကတၢၢ်ဒီတဖု ဃုဝဲတၢ်အုၣ်အသးလၢ ကထီဒါယ့ၣ်ၡူး ဒ်သိးကမၤသံအီၤ အဂီၢ်လီၤ. ဘၣ်ဆၣ်​ အဝဲသ့ၣ်​ တထံၣ်န့ၢ်ဝဲနီတမံၤဘၣ်.+ ၅၆ ပှၤအါဂၤ အုၣ်အသးကဘျံးကဘျၣ်​ ဒ်သိး ကထီဒါအီၤလီၤ.+ ဘၣ်ဆၣ်​ အဝဲသ့ၣ်တဂၤဒီးတဂၤ အတၢ်အုၣ်အသးန့ၣ်​ တလီၤပလိာ်လိာ်အသးဘၣ်. ၅၇ တကးဒံးဘၣ်​ ပှၤတနီၤနီၤဂဲၤဆၢထၢၣ်​ ဒီးအုၣ်အသး ကဘျံးကဘျၣ်​ ဒ်သိးကထီဒါအီၤလီၤ. ဒီးအဝဲသ့ၣ်တဲဝဲလၢ ၅၈ “ပနၢ်ဟူ အတဲဝဲလၢ ‘တၢ်လုၢ်ဟံၣ်လၢ ပှၤတ့ထီၣ်အီၤ လၢပှၤစုန့ၣ်​ ယကမၤလီၤပှီၢ်ကွံာ်အီၤ ဒီးလၢသၢသီအတီၢ်ပူၤန့ၣ်​ ယကတ့ထီၣ်​ အဂၤတဖျၢၣ်လၢ အတဘၣ်တၢ် တ့ထီၣ်အီၤလၢ ပှၤစုဘၣ်.’”+ ၅၉ ဘၣ်ဆၣ်​ အဝဲသ့ၣ်​ အုၣ်အသးလၢ တၢ်ဂ့ၢ်တခါအံၤ အဖီခိၣ်ဒၣ်လဲာ် တလီၤပလိာ်လိာ်အသးဘၣ်.

၆၀ ပှၤလုၢ်တၢ်ခိၣ်​ အဒိၣ်ကတၢၢ် ဂဲၤဆၢထၢၣ်လၢ အဝဲသ့ၣ်အခၢၣ်သး ဒီးသံကွၢ်ယ့ၣ်ၡူးလၢ “ပှၤသ့ၣ်တဖၣ်အံၤ ပာ်ဒ့ၣ်ပာ်ကမၣ်နၤန့ၣ်​ နတတဲဆၢက့ၤတၢ် နီတမံၤဧီၤ.”+ ၆၁ ဘၣ်ဆၣ်​ ယ့ၣ်ၡူးအိၣ်ဘှ့ၣ်​ ဒီးတတဲဆၢက့ၤ တၢ်နီတမံၤဘၣ်.+ ပှၤလုၢ်တၢ်ခိၣ်​ အဒိၣ်ကတၢၢ် သံကွၢ်ကဒီးအီၤ ဒီးတဲအီၤလၢ “မ့ၢ်နကဲ ကစၢ်ယွၤလၢ အဘၣ်တၢ်စံးထီၣ်ပတြၢၤအီၤတဂၤ အဖိခွါ ခရံာ်ဧါ.” ၆၂ ယ့ၣ်ၡူးတဲဝဲလၢ “မ့ၢ်, ယၤလီၤ. ဒီးသုကထံၣ်ဘၣ်​ ပှၤကညီဖိခွါအံၤ+ ဆ့ၣ်နီၤလၢ ပှၤလၢအစိဒိၣ်ကမီၤဒိၣ်တဂၤ အစုထွဲတခီ+ ဒီးဟဲဝဲဒီး မူခိၣ်အတၢ်အၢၣ်တဖၣ်လီၤ.”+ ၆၃ ဖဲန့ၣ်​ ပှၤလုၢ်တၢ်ခိၣ်​ အဒိၣ်ကတၢၢ် ဖှီညာ်အနီၢ်ကစၢ် အကူအသိး ဒီးတဲဝဲလၢ “မ့ၢ်ပလိၣ်ဘၣ်​ ပှၤအုၣ်အသး အဂၤတဖၣ်ဒံးဧါ.+ ၆၄ အတၢ်ကတိၤထီဒါယွၤန့ၣ်​ သုနၢ်ဟူအီၤလံ. သုကဆၢတဲာ်ဒ်လဲၣ်.” ဒီးအဝဲသ့ၣ်ခဲလၢာ် ဆၢတဲာ်ဝဲလၢ အကြၢးသံလီၤ.+ ၆၅ ပှၤတနီၤထူးပှဲာ်ဒိး ယ့ၣ်ၡူး,+ ကးဘၢအမဲာ်, ထိအီၤလၢ အစုခိၣ်သၣ်​ ဒီးတဲအီၤလၢ “နမ့မ့ၢ်ဝံတဂၤဒီး မတဂၤ ဒဲနမဲာ်လဲၣ်န့ၣ်​ တဲဘၣ်ပှၤတထံၣ်သၢၤ.” ဒီးအဝဲသ့ၣ်​ ဒဲအမဲာ်ဝံၤဒီး ပှၤခိးရူဖိတဖၣ်​ လဲၤကိးအီၤလီၤ.+

၆၆ ဖဲစီၤပ့းတရူးအိၣ်လၢ ကရၢၢ်ပူၤအခါ ပှၤလုၢ်တၢ်ခိၣ်​ အဒိၣ်ကတၢၢ် အကုၢ်မုၣ်တဂၤ ဟဲဝဲလီၤ.+ ၆၇ ဒီးဖဲအထံၣ်​ စီၤပ့းတရူး ဆူးမ့ၣ်အူအခါ ပိာ်မုၣ်တဂၤအံၤ ကွၢ်အီၤလိၤလိၤ ဒီးတဲဝဲလၢ “နၤစ့ၢ်ကီး လၢညါနဟးဒီး ပှၤနစၤရ့းဖိ ယ့ၣ်ၡူးတဂၤအံၤမၢၤ.” ၆၈ ဘၣ်ဆၣ်​ အဝဲဂ့ၢ်လိာ်ဝဲ ဒီးတဲဝဲလၢ “ယတသ့ၣ်ညါအီၤဘၣ်​ ဒီးနတဲတၢ်ဂ့ၢ်မနုၤလဲၣ်န့ၣ်​ ယတနၢ်ပၢၢ်စ့ၢ်ကီးဘၣ်.” ဒီးအဝဲ ဟးထီၣ်လၢတၢ်ချၢ ဒီးလဲၤဝဲလၢ ကျဲဟဲနုာ်လီၤ တခီလီၤ. ၆၉ ဖဲန့ၣ်ကုၢ်မုၣ်တဂၤန့ၣ်​ ထံၣ်အီၤဒီးတဲကဒီး ပှၤဆၢထၢၣ်ဖဲန့ၣ်တဖၣ်လၢ “ပှၤတဂၤအံၤ မ့ၢ်ပှၤလၢ အဝဲသ့ၣ်အကျါတဂၤလီၤ.” ၇၀ ဒီးအဝဲဂ့ၢ်လိာ်ကဒီးဝဲလီၤ. လၢခံတစိၢ်ဖိဒီး ပှၤလၢ အဆၢထၢၣ်ဖဲန့ၣ်တဖၣ်​ တဲကဒီး စီၤပ့းတရူးလၢ “နမ့ၢ်ပှၤကၤလံၤလါဖိအဃိ နမ့ၢ်ပှၤလၢ အဝဲသ့ၣ်အကျါတဂၤ အနီၢ်ကီၢ်လီၤ.” ၇၁ ဘၣ်ဆၣ်​ စီၤပ့းတရူး ဆိၣ်အၢလီၤအသး* ဒီးအၢၣ်လီၤဝဲလၢ “ပှၤလၢသုတဲအဂ့ၢ် တဂၤန့ၣ်​ ယတသ့ၣ်ညါအီၤဘၣ်.” ၇၂ တဘျီဃီန့ၣ်​ ဆီဖါအိၣ်အိ ပှဲၤထီၣ်ဝဲ ခံဘျီတဘျီလီၤ.+ ဒီးစီၤပ့းတရူး သ့ၣ်နီၣ်ထီၣ်က့ၤတၢ်လၢ ယ့ၣ်ၡူးတဲအီၤလၢ “တချုးဆီဖါအိၣ်အိ ပှဲၤထီၣ်​ ခံဘျီတဘျီန့ၣ်​ နကသမၢယၤသၢဘျီလီၤ.”+ ဒီးအသးဘၣ်ဒိဒိၣ်မး ဒီးဟီၣ်ဝဲလီၤ.