၁ သ့းစၤလနံ
၄ လၢခံကတၢၢ်န့ၣ် ယဒီပုၢ်ဝဲၢ်သ့ၣ်ဧၢ, သုဒိးန့ၢ်ဘၣ် တၢ်ဟံးစုနဲၣ်ကျဲလၢပအိၣ် ဘၣ်ဃးဒီး သုကဘၣ်အိၣ်မူဒ်လဲၣ် ဒီးမၤတၢ်ဘၣ်ကစၢ်ယွၤအသးဒ်လဲၣ်န့ၣ်လီၤ.+ နီၢ်ကီၢ်န့ၣ် သုအိၣ်မူမၤထွဲအီၤလံ. အဃိ ခဲအံၤန့ၣ် ပဟ့ၣ်ဂံၢ်ဟ့ၣ်ဘါဒီး ပဃ့ကညးသုလၢ ကစၢ်ယ့ၣ်ၡူး အမံၤအပူၤလၢ သုကဆဲးအိၣ်မူမၤထွဲအီၤ အါန့ၢ်အလီၢ်လီၤ. ၂ တၢ်ဟံးစုနဲၣ်ကျဲလၢ ပဟ့ၣ်လီၤသုခီဖျိ ကစၢ်ယ့ၣ်ၡူးန့ၣ် သုသ့ၣ်ညါအီၤလီၤ.
၃ ကစၢ်ယွၤ အဲၣ်ဒိးဝဲလၢ သုကအိၣ်စီဆှံ+ ဒီးဟးဆှဲး တၢ်မၤကမၣ်မုၣ်ကမၣ်ခွါလီၤ.*+ ၄ သုဝဲတဂၤစုာ်စုာ် ကဘၣ်ပၢၤ သုနီၢ်ကစၢ်အနီၢ်ခိလၢ+ တၢ်စီဆှံ+ ဒီးတၢ်လၤကပီၤအပူၤဒ်လဲၣ်န့ၣ် သုကြၢးသ့ၣ်ညါလီၤ. ၅ ဒီးသုတဘၣ်အိၣ်ဒီး တၢ်သးကတၢလၢ အပၣ်ဃုာ်ဒီးတၢ်သးကွံ ဒီးတၢ်ပၢၤသူၣ်ပၢၤသးတအိၣ်ဘၣ်+ ဒ်ပှၤကလုာ်တဖၣ်လၢ အတသ့ၣ်ညါ ကစၢ်ယွၤဘၣ် အသိးန့ၣ်တဂ့ၤ.+ ၆ ဘၣ်ဃးဒီး တၢ်ဂ့ၢ်တခါအံၤန့ၣ် ပှၤတကြၢးမၤတၢ်လၢ အတကြၢးတဘၣ် ဒီးဟံးန့ၢ်တၢ်ခွဲးတၢ်ယာ်လၢ အဒီပုၢ်ဝဲၢ်အဖီခိၣ် နီတဂၤဘၣ်. ဒ်ပတဲသုလၢညါ ဒီးဟ့ၣ်ပလီၢ်သု ဆူၣ်ဆူၣ်အသိး ယဟိဝၤယွၤ* ကစံၣ်ညီၣ်ပှၤလၢ အမၤတၢ်သ့ၣ်တဖၣ်န့ၣ်လီၤ. ၇ ကစၢ်ယွၤကိးဃီၤပှၤန့ၣ် တမ့ၢ်လၢ ပကမၤ တၢ်တကဆှီဘၣ်အဂီၢ်ဘၣ်. မ့ၢ်လၢပကစီဆှံအဂီၢ်လီၤ.+ ၈ အဃိ ပှၤလၢ အတကနၣ် တၢ်ဟ့ၣ်ပလီၢ်အံၤဘၣ်န့ၣ် အတကနၣ်ပှၤကညီဘၣ်န့ၣ် တမ့ၢ်ဘၣ်. မ့ၢ်ဝဲ အတကနၣ် ကစၢ်ယွၤလၢ+ အဟ့ၣ်လီၤသုလၢ အသးစီဆှံဘၣ်လီၤ.+
၉ ဒ်လဲၣ်ဂ့ၤဒ်လဲၣ်ဂ့ၤ ဘၣ်ဃးဒီး ဒီပုၢ်ဝဲၢ်တၢ်အဲၣ်န့ၣ်+ ပတလိၣ်ကွဲးန့ၢ်သုလၢၤဘၣ်. ကစၢ်ယွၤ သိၣ်လိသုလၢ သုကအဲၣ်လိာ်သုသး တဂၤဒီးတဂၤလံ.+ ၁၀ ဒီးနီၢ်ကီၢ်န့ၣ် သုပာ်ဖျါထီၣ် တၢ်အဲၣ်ဒ်အံၤ လၢဒီပုၢ်ဝဲၢ်ခဲလၢာ် အကျါလၢ ကီၢ်မၤက့းဒနံ ဒီဘ့ၣ်ညါအပူၤလံ. ဘၣ်ဆၣ် ဒီပုၢ်ဝဲၢ်သ့ၣ်ဧၢ, ပဟ့ၣ်သဆၣ်ထီၣ် သုလၢ သုကမၤဒ်အံၤ အါန့ၢ်အလီၢ်လီၤ. ၁၁ ဒ်ပသိၣ်လိတ့ၢ်သုအသိး ပာ်လီၤသုသးလၢ သုကအိၣ်မူကစုဒု+ ဒီးတဘၣ် မၤဘၣ်ထွဲလိာ်သုသးဒီး ပှၤဂၤအတၢ်ဂ့ၢ်တဂ့ၤ.+ မၤတၢ်လၢ သုနီၢ်ကစၢ်အစု+ ၁၂ ဒ်သိးသုကအိၣ်မူ ဂ့ၤဂ့ၤဘၣ်ဘၣ်လၢ ပှၤတၢ်ချၢတဖၣ် အမဲာ်ညါအဂီၢ်+ ဒီးဒ်သိး သုသုတလိၣ်ဘၣ် တၢ်နီတမံၤတဂ့ၤ အဂီၢ်တက့ၢ်.
၁၃ တကးဒံးဘၣ် ဒီပုၢ်ဝဲၢ်သ့ၣ်ဧၢ, ဒ်သိးသုသုတသးအုး ဒ်ပှၤအဂၤလၢ အတၢ်မုၢ်လၢ် တအိၣ်ဘၣ်အသိးတဂ့ၤအဂီၢ်+ ပအဲၣ်ဒိးလၢ သုကနၢ်ပၢၢ် ဘၣ်ဃးဒီး ပှၤသံ* အဂ့ၢ်လီၤ.+ ၁၄ ပနာ်လၢ ယ့ၣ်ၡူးသံဒီး ဂဲၤဆၢထၢၣ်က့ၤဝဲလီၤ.+ ဒ်န့ၣ်အသိး ယ့ၣ်ၡူးအပျဲၢ်အဘီၣ်လၢ အသံတ့ၢ်တဖၣ်န့ၣ် ပနာ်လၢ ကစၢ်ယွၤ ကဒုးဂဲၤဆၢထၢၣ်က့ၤ အဝဲသ့ၣ် ဒ်သိးအကအိၣ်ဒီး ယ့ၣ်ၡူးအဂီၢ်လီၤ.+ ၁၅ တၢ်လၢ ပကတဲသု ခဲအံၤန့ၣ် မ့ၢ်အဟဲခီဖျိလၢ ယဟိဝၤယွၤ အကလုၢ်ကထါလီၤ. ပဝဲလၢအအိၣ်မူ ဖဲကစၢ် ဟဲက့ၤအိၣ်ဒီးပှၤ အဆၢကတီၢ်န့ၣ် ပတလဲၤထီၣ်ဆိလၢ ပှၤလၢအသံတ့ၢ်တဖၣ် အမဲာ်ညါဘၣ်. ၁၆ ပကစၢ်ကဟဲလီၤလၢမူခိၣ်လီၤ. အကကိးပသူထီၣ်ဖးဒိၣ်လၢ မူခိၣ်ကလူးအခိၣ်+ အကလုၢ် ဒီးကစိာ်ဝဲဒီး ကစၢ်ယွၤအကွဲၤလီၤ. ဒီးခရံာ်အပျဲၢ်အဘီၣ်လၢ အသံတ့ၢ်တဖၣ်န့ၣ် ကဂဲၤဆၢထၢၣ်ဆိဝဲလီၤ.+ ၁၇ လၢခံ ပဝဲလၢအအိၣ်မူဒံးန့ၣ် တၢ်ကထုးထီၣ်ပှၤလၢ တၢ်အၢၣ်အပူၤ+ ဒ်သိးပကအိၣ်မူ တပူၤဃီဒီးအဝဲသ့ၣ် ဒီးဒ်သိးပကသဂၢၢ်ဘၣ်ကစၢ်+ လၢကလံၤကျါအဃိ ပကအိၣ်ဒီးကစၢ်ထီဘိလီၤ.+ ၁၈ အဃိ ဆဲးမၤမုာ်ထီၣ်လိာ်သုသး တဂၤဒီးတဂၤလၢ တၢ်ကတိၤတဖၣ်အံၤတက့ၢ်.