၂ ကရံၣ်သူး
၇ ပှၤသးဘိသ့ၣ်ဧၢ, ခီဖျိလၢ ပအိၣ်ဒီး တၢ်အၢၣ်လီၤအီလီၤတဖၣ်အံၤအဃိ+ မ်ပမၤကဆှီထီၣ် ပသးလၢ တၢ်ခဲလၢာ်လၢ အမၤဘၣ်အၢ ပဖံးပညၣ် ဒီးပသူၣ်ပသး+ ဒ်သိး ပကမၤလၢထီၣ်ပှဲၤထီၣ် တၢ်စီဆှံလၢ တၢ်ပျံၤယွၤအပူၤ အဂီၢ်တက့ၢ်.
၂ အိးထီၣ်သုသးဒ်သိး သုကတူၢ်လိာ် ပှၤအဂီၢ်တက့ၢ်.+ ပတမၤကမၣ် ပှၤနီတဂၤဘၣ်, ပတမၤဘၣ်ဒိ ပှၤနီတဂၤဘၣ် ဒီးပတဟံးန့ၢ် တၢ်ခွဲးတၢ်ယာ်လၢ ပှၤဂၤအဖီခိၣ် နီတဂၤဘၣ်.+ ၃ ယတဲဒ်အံၤန့ၣ် တမ့ၢ်ဒ်သိး ယကစံၣ်ညီၣ် သုအဂီၢ်ဘၣ်. ဒ်ယတဲလၢညါအသိး ပသံမ့ၢ်ဂ့ၤ, ပမူမ့ၢ်ဂ့ၤ သုအိၣ်လၢ ပသးပူၤလီၤ. ၄ ယတဲသုပျီပျီ အလီၢ်အိၣ်ဝဲ သပှၢ်တၢၢ်လီၤ. ယပာ်ကဖၢလၢ ယသးလၢသုဃိ အလီၢ်အိၣ်ဝဲ သပှၢ်တၢၢ်လီၤ. ယဒိးန့ၢ်ဘၣ် တၢ်မၤမုာ်ထီၣ်က့ၤ လၢလၢပှဲၤပှဲၤ ဒီးလၢပတၢ်ကီတၢ်ခဲ ခဲလၢာ်အပူၤန့ၣ် ယတၢ်သးခု ပှဲၤလုၢ်ဘၢကွံာ်ယၤလီၤ.+
၅ ဖဲပလဲၤတုၤလၢ ကီၢ်မၤက့းဒနံအခါ+ တၢ်အမုာ်တအိၣ်ဒီးပှၤ နီတစဲးဒံးဘၣ်. ပဆဲးထံၣ်ဘၣ် တၢ်ကီတၢ်ခဲ လၢတၢ်ကိးမံၤဒဲးအပူၤလီၤ. ပှၤထီဒါပှၤလၢ တၢ်ချၢတခီခီ ဒီးပဘၣ်ကိၢ်ဘၣ်ဂီၤတၢ်လၢ တၢ်ပူၤတခီခီလီၤ. ၆ ဘၣ်ဆၣ် ကစၢ်ယွၤလၢ အမၤမုာ်ထီၣ်က့ၤ ပှၤလၢ အသးဟးဂီၤတဖၣ်န့ၣ်+ မၤမုာ်ထီၣ်က့ၤပှၤ ခီဖျိ စီၤတံတူး ဟဲဝဲအဃိလီၤ. ၇ ဒီးတမ့ၢ်ထဲလၢ အဝဲဟဲအဃိဘၣ်, ပဘၣ်တၢ်မၤမုာ်ထီၣ်က့ၤပှၤ ခီဖျိလၢ တၢ်မၤမုာ်ထီၣ်က့ၤလၢ အဝဲဒိးန့ၢ်ဘၣ်လၢ သုအိၣ်လီၤ. အဝဲဟဲက့ၤ တဲဘၣ်ပှၤလၢ သုအဲၣ်ဒိးထံၣ်ယၤ, သုသးအုးဒိၣ်မး ဒီးသုဘၣ်ယိၣ်တၢ်လၢ ယဂီၢ်အဃိ မၤသးခုဒိၣ်ထီၣ်ယသးလီၤ.
၈ ယလံာ်ပရၢတဘ့ၣ်န့ၣ် မ့ၢ်မၤသးအုးသု+ သနာ်က့ ယတသးအုးလၢ ယကွဲးအီၤအဃိဘၣ်. လၢအခီၣ်ထံးန့ၣ် ယမ့ၢ်သးအုး (မ့ၢ်လၢ ယထံၣ်ဘၣ်လၢ ယလံာ်ပရၢမၤသးအုးသု တစိၢ်တလီၢ်) သနာ်က့ ၉ ခဲအံၤ ယသးခုလီၤ. ဘၣ်ဆၣ် တမ့ၢ်ထဲလၢ သုသးအုးယိယိအဃိဘၣ်, မ့ၢ်လၢ သုသးအုးတုၤလၢ သုပီၢ်ယၢ်လီၤက့ၤ သုသးအဃိလီၤ. သုသးအုးလၢ ကျဲလၢအဘၣ် ကစၢ်ယွၤအသးအဃိ သုတဘၣ်ဒိဘၣ်ထံး လၢပဃိ နီတစဲးဘၣ်. ၁၀ တၢ်သးအုးလၢ ကျဲလၢအဘၣ် ကစၢ်ယွၤအသးန့ၣ် ဒုးအိၣ်ထီၣ် တၢ်ပီၢ်ယၢ်လီၤက့ၤသး လၢအဆှၢပှၤဆူ တၢ်အုၣ်က့ၤခီၣ်က့ၤ ဒီးအကဲဘျုးလၢ ပဂီၢ်ထီဘိလီၤ.+ မ့မ့ၢ် တၢ်သးအုးလၢ အဘၣ်ထွဲဒီး ဟီၣ်ခိၣ်န့ၣ် ဒုးအိၣ်ထီၣ်တၢ်သံလီၤ. ၁၁ သုသးအုးလၢကျဲလၢ အဘၣ် ကစၢ်ယွၤအသးအဃိ အဒုးအိၣ်ထီၣ်သု တၢ်ထဲးဂံၢ်ထဲးဘါ သပှၢ်တၢၢ်လီၤ. သုမၤဂ့ၤထီၣ်က့ၤသုမံၤ, သုသးတမုာ်ဘၣ် ခီဖျိလၢ တၢ်ကမၣ်လၢ အဘၣ်တၢ်မၤတ့ၢ်အီၤအဃိ, သုပျံၤယွၤ, သုသးအိၣ် ပီၢ်ယၢ်လီၤက့ၤသုသး, သုသးဆူၣ်ထီၣ် ဒီးသုဘှီဘၣ်ထီၣ်က့ၤ တၢ်ကမၣ်လၢ အဘၣ်တၢ်မၤတ့ၢ်အီၤလီၤ.+ ဘၣ်ဃးဒီး တၢ်ဂ့ၢ်တခါအံၤန့ၣ် သုပာ်ဖျါထီၣ်သုသးလၢ သုကဆှီထီၣ်လၢ တၢ်ခဲလၢာ်အပူၤလီၤ. ၁၂ ယကွဲးန့ၢ်သုလံာ်ဘၣ်ဆၣ် ယတကွဲးအီၤလၢ ပှၤလၢ အမၤကမၣ်တၢ်တဂၤန့ၣ် အဂီၢ်ဘၣ်.+ ဒီးတမ့ၢ်စ့ၢ်ကီးလၢ ပှၤလၢအဘၣ် တၢ်မၤကမၣ်အီၤတဂၤန့ၣ် အဂီၢ်ဘၣ်. ဘၣ်ဆၣ် ယကွဲးန့ၢ်သုဒ်သိး သုတၢ်သးအိၣ်ဒိကနၣ်ပှၤန့ၣ် ကအိၣ်ဖျါထီၣ်လၢ သုကျါ ဒီးလၢကစၢ်ယွၤ အမဲာ်ညါ အဂီၢ်လီၤ. ၁၃ လၢတၢ်ဂ့ၢ်အံၤအဃိ ပဘၣ်တၢ်မၤမုာ်ထီၣ်က့ၤပှၤလီၤ.
ဘၣ်ဆၣ် ပဘၣ်တၢ်မၤမုာ်ထီၣ်က့ၤပှၤ တကးဒံးဘၣ် ပသးခုဒိၣ်ထီၣ် မ့ၢ်လၢ သုဝဲခဲလၢာ် ဟ့ၣ်ဂံၢ်ဟ့ၣ်ဘါ စီၤတံတူးဒီး အသးခုထီၣ်ဝဲအဃိလီၤ. ၁၄ ယပာ်ကဖၢလၢယသးလၢ သုဃိလၢ စီၤတံတူးအမဲာ်ညါ ဒီးယတဒိးန့ၢ်ဘၣ် တၢ်မဲာ်ဆှးဘၣ်. ဘၣ်ဆၣ် ဒ်တၢ်ဂ့ၢ်လၢ ယတဲသုခဲလၢာ်န့ၣ် မ့ၢ်ဝဲတီဝဲအသိး ပပာ်ကဖၢလၢ ပသးလၢ စီၤတံတူး အမဲာ်ညါန့ၣ် ကဲထီၣ် တၢ်မ့ၢ်တၢ်တီ စ့ၢ်ကီးလီၤ. ၁၅ ဒီးစီၤတံတူး နီၣ်ဘၣ်လၢ သုကိးဂၤဒဲး အိၣ်ဒီးတၢ်ဒိကနၣ်+ ဒီးလၢသုတူၢ်လိာ်အီၤလၢ တၢ်ပျံၤတၢ်ဖုးဒီး တၢ်ကနိးကစုာ်အပူၤအဃိ အတၢ်အဲၣ်ဒီးတၢ်ကဟုကယာ်လၢ သုဖီခိၣ်ဒိၣ်ထီၣ်ဝဲလီၤ. ၁၆ လၢတၢ်ကိးမံၤဒဲးအပူၤ ယနာ်န့ၢ်သုသ့ သပှၢ်တၢၢ်အဃိ ယသးခုလီၤ.