၁ သ့းစၤလနံ
၃ ပ* အိၣ်ခိးဒ်သိးကနၢ်ဟူဘၣ် သုကစီၣ် တကဲလၢၤဘၣ်. အဃိ ပဆၢတဲာ်လၢ ပကအိၣ်တ့ၢ်လၢ ဝ့ၢ်အၤသ့ၣ်အပူၤ ထဲတဂၤ+ ၂ ဒီးဆှၢလီၤ ပဒီပုၢ်ဝဲၢ်စီၤတံၤမသ့း+ လၢအမ့ၢ် ကစၢ်ယွၤအခ့အပှၤ* လၢတၢ်သးခုကစီၣ် ဘၣ်ဃးဒီး ခရံာ်အဂီၢ်လီၤ. ပဆှၢလီၤအီၤလၢ အကဟ့ၣ်ဂံၢ်ဟ့ၣ်ဘါသု, ကမၤမုာ်ထီၣ်သု ဒ်သိးကကဲဘျုးလၢ သုတၢ်နာ်အဂီၢ် ၃ ဒီးဒ်သိးသုသု တဒံဝ့ၤဒံဝီၤလၢ တၢ်နးတၢ်ဖှီၣ်တဖၣ်အံၤ အဃိ နီတဂၤတဂ့ၤ အဂီၢ်လီၤ. သုသ့ၣ်ညါပာ်စၢၤလၢ ပဟးဆှဲးတၢ်နးတၢ်ဖှီၣ်တဖၣ်အံၤ တသ့ဘၣ်.+ ၄ ဖဲပအိၣ်ဒီးသုအခါန့ၣ် ပတဲဆိပာ်သုလၢ ပကတူၢ်ဘၣ်တၢ်နးတၢ်ဖှီၣ် ဒီးဒ်သုသ့ၣ်ညါအသိး တၢ်ဟဲကဲထီၣ်အသး ဒ်န့ၣ်လီၤ.+ ၅ အဃိ ဖဲယအိၣ်ခိးတကဲလၢၤဘၣ်အခါ ယဆှၢလီၤစီၤတံၤမသ့း ဒ်သိး ယကသ့ၣ်ညါဘၣ် သုတၢ်သးတီအဂ့ၢ်လီၤ.+ ယမၤဒ်န့ၣ်ခီဖျိလၢ ယဘၣ်ယိၣ်တၢ်လၢ ပှၤလ့ပစီတၢ်တဂၤ+ ကလ့ပစီသုလၢ ကျဲတဘိဘိ ဒီးပတၢ်မၤကကဲထီၣ် တၢ်ကလီကလီအဃိလီၤ.
၆ စီၤတံၤမသ့း လဲၤလၢသုအိၣ် ဒီးခဲအံၤဟဲက့ၤတုၤလၢ ပအိၣ်လံ.+ အဝဲတဲဘၣ်ပှၤ တၢ်သးခုကစီၣ် ဘၣ်ဃးဒီး သုတၢ်သးတီ, သုတၢ်အဲၣ်တၢ်ကွံ, သုသ့ၣ်နီၣ်ပှၤထီဘိ ဒီးသုအဲၣ်ဒိးထံၣ်ပှၤဒိၣ်မး ဒ်ပအဲၣ်ဒိးထံၣ်သု အသိးလီၤ. ၇ အဃိ ဒီပုၢ်ဝဲၢ်သ့ၣ်ဧၢ, ပဘၣ်ကိၢ်ဘၣ်ဂီၤ ဒီးပှၤမၤနးမၤဖှီၣ်ပှၤ သနာ်က့ ဖဲပနၢ်ဟူဘၣ်ဃးဒီးသု ဒီးသုတၢ်သးတီအဂ့ၢ်အခါ ပသးမုာ်ထီၣ်က့ၤလီၤ.+ ၈ ဒီးခဲအံၤ သုဆဲးသးတီဒီးကစၢ်* အဃိ ကဲထီၣ် တၢ်ဂံၢ်တၢ်ဘါ လၢပဂီၢ်လီၤ. ၉ ပသးခုလၢ ကစၢ်ယွၤအမဲာ်ညါဒိၣ်မး ခီဖျိလၢ သုဃိလီၤ. ပကစံးဘျုးက့ၤ ကစၢ်ယွၤလၢသုဃိ လၢကျဲဒ်လဲၣ်. ၁၀ လၢမုၢ်နၤဒီးလၢမုၢ်ဆါန့ၣ် ပဃ့ကညး ကစၢ်ယွၤသပှၢ်တၢၢ်လၢ ပကထံၣ်ဘၣ်ကဒီးသုမဲာ် ဒီးဟ့ၣ်သုတၢ်လၢ သုလိၣ်ဘၣ်ဒ်သိး ကမၤဂၢၢ်မၤကျၢၤထီၣ် သုတၢ်နာ်အဂီၢ်လီၤ.+
၁၁ မ်ပပၢ်ကစၢ်ယွၤ အနီၢ်ကစၢ်ဒၣ်ဝဲ ဒီးပကစၢ်ယ့ၣ်ၡူး အိးဟိထီၣ်န့ၢ်ပကျဲ ဒ်သိးပကလဲၤဘၣ်လၢ သုအိၣ်တက့ၢ်. ၁၂ တကးဒံးဘၣ် မ်ကစၢ်မၤစၢၤသု ဒ်သိး သုတၢ်အဲၣ်လိာ်ကွံလိာ်သုသး တဂၤဒီးတဂၤ ဒီးသုတၢ်အဲၣ်ပှၤခဲလၢာ် ကအါထီၣ်ဝဲ ဒီးကအိၣ်ဝဲ အါအါဂီၢ်ဂီၢ်+ ဒ်ပတၢ်အဲၣ်သုအိၣ်ဝဲ အါအါဂီၢ်ဂီၢ် အသိးတက့ၢ်. ၁၃ တၢ်မ့ၢ်မၤအသးဒ်န့ၣ်န့ၣ် ဖဲပကစၢ်ယ့ၣ်ၡူး ဟဲက့ၤအိၣ်ဒီးပှၤ+ ဃုာ်ဒီး အပှၤစီဆှံခဲလၢာ် အဆၢကတီၢ် သုသးကဂၢၢ်ကျၢၤ, တၢ်ပာ်ဒ့ၣ်ပာ်ကမၣ်သု အလီၢ်တအိၣ်ဘၣ် ဒီးသုကစီဆှံလၢ ပပၢ်ကစၢ်ယွၤ အမဲာ်ညါလီၤ.+