၂ ကရံၣ်သူး
၁ ယၤ, စီၤပီလူး လၢအမ့ၢ် ယ့ၣ်ၡူးခရံာ်အတၢ်မၢဖိ ဒ်ကစၢ်ယွၤ အတၢ်ဘၣ်သးအသိး ဒီးပဒီပုၢ်ဝဲၢ် စီၤတံၤမသ့းန့ၣ်+ ဆှၢလံာ်အံၤဆူ ယွၤအတၢ်အိၣ်ဖှိၣ်လၢ ဝ့ၢ်ကရံၣ်သူးအပူၤ ဒီးပှၤစီဆှံခဲလၢာ် လၢအအိၣ်လၢ အဃါယၤကီၢ်ရ့ၣ်အပူၤလီၤ.+
၂ မ်သုဒိးန့ၢ်ဘၣ် တၢ်သးကညီၤ ဒိၣ်ဒိၣ်မုၢ်မုၢ် ဒီးတၢ်ဃူတၢ်ဖိးလၢ အဟဲလၢ ပပၢ်ကစၢ်ယွၤ ဒီးကစၢ်ယ့ၣ်ၡူးခရံာ် အအိၣ်တက့ၢ်.
၃ မ်ပှၤစံးထီၣ်ပတြၢၤ ကစၢ်ယွၤလၢအမ့ၢ် ပကစၢ်ယ့ၣ်ၡူးခရံာ်အပၢ်တက့ၢ်.+ အမ့ၢ် ပၢ်လၢအပှဲၤဒီး တၢ်သးကညီၤ+ ဒီးအမ့ၢ်ဝဲ တၢ်မၤမုာ်ခဲလၢာ် အကစၢ်လီၤ.+ ၄ အဝဲမၤမုာ်ထီၣ်က့ၤ* ပှၤလၢ တၢ်မၤကွၢ်* ခဲလၢာ်အပူၤလီၤ.+ အဃိ ဖဲပှၤဂၤမ့ၢ်ထံၣ်ဘၣ် တၢ်မၤကွၢ် တမံၤဂ့ၤတမံၤဂ့ၤအခါ ပဝဲစ့ၢ်ကီး ပမၤမုာ်ထီၣ်က့ၤ အဝဲသ့ၣ်ကသ့+ ခီဖျိလၢ တၢ်မၤမုာ်ထီၣ်က့ၤလၢ ပဒိးန့ၢ်ဘၣ်အီၤလၢ ကစၢ်ယွၤ အအိၣ်လီၤ.+ ၅ ဒ်ပတူၢ်ဘၣ် တၢ်နးတၢ်ဖှီၣ် အါအါဂီၢ်ဂီၢ် လၢခရံာ်အဃိအသိး+ ပဒိးန့ၢ်ဘၣ် တၢ်မၤမုာ်ထီၣ်က့ၤပသး အါအါဂီၢ်ဂီၢ် ခီဖျိလၢ ခရံာ်အဃိစ့ၢ်ကီးလီၤ. ၆ အဃိ ပမ့ၢ်ထံၣ်ဘၣ် တၢ်မၤကွၢ်တဖၣ်န့ၣ် မ့ၢ်ဒ်သိး အကမၤမုာ်ထီၣ်က့ၤသု ဒီးသုကန့ၢ်ဘၣ် တၢ်အုၣ်က့ၤခီၣ်က့ၤအဂီၢ်လီၤ. ဒီးပမ့ၢ်ဘၣ် တၢ်မၤမုာ်ထီၣ်က့ၤပှၤန့ၣ် သုစ့ၢ်ကီး ကဘၣ်တၢ်မၤမုာ်ထီၣ်က့ၤသု ဒ်သိးကကဲထီၣ် တၢ်မၤစၢၤလၢ သုတူၢ်တၢ်နးတၢ်ဖှီၣ် လၢပတူၢ်ဘၣ်အီၤတဖၣ် ကန့ၢ်အဂီၢ်စ့ၢ်ကီးလီၤ. ၇ ပသ့ၣ်ညါလၢ ဒ်သုတူၢ်ဃုာ် တၢ်နးတၢ်ဖှီၣ်အသိး သုကဒိးန့ၢ်ဃုာ် တၢ်မၤမုာ်ထီၣ်က့ၤစ့ၢ်ကီးလီၤ.+ အဃိ ပတၢ်မုၢ်လၢ်လၢ အဘၣ်ဃးဒီးသုန့ၣ် တကဒံကဒါဘၣ်.
၈ ဒီပုၢ်ဝဲၢ်သ့ၣ်ဧၢ, ပအဲၣ်ဒိးလၢ သုကသ့ၣ်ညါ ဘၣ်ဃးဒီး တၢ်ကီတၢ်ခဲလၢ ပလဲၤခီဖျိဘၣ်အီၤလၢ အၤစံကီၢ်ရ့ၣ်အပူၤလီၤ.+ ဖဲန့ၣ်ပထံၣ်ဘၣ် တၢ်ဆီၣ်သနံးနးမး တုၤဒၣ်လဲာ် ပတူၢ်အီၤလၢ ပနီၢ်ကစၢ် အဂံၢ်အဘါတကဲဘၣ်. ဒီးပကမူဧါ တမူဧါန့ၣ် ပတသ့ၣ်ညါလၢၤဘၣ်.+ ၉ နီၢ်ကီၢ်န့ၣ် ပတူၢ်ဘၣ်လၢ ပဘၣ်တၢ်စံၣ်ညီၣ်သံပှၤလီၤ. ဘၣ်ဆၣ် တၢ်ကဲထီၣ်သးတဖၣ်အံၤန့ၣ် မ့ၢ်ဒ်သိး ပကနာ်န့ၢ် ကစၢ်ယွၤတဂၤလၢ အဒုးဂဲၤဆၢထၢၣ်က့ၤ ပှၤသံတဖၣ် ဒီးဒ်သိးပသု တနာ်န့ၢ်လီၤ ပနီၢ်ကစၢ်အသးတဂ့ၤ အဂီၢ်လီၤ.+ ၁၀ ဒ်ကစၢ်ယွၤ မၤပူၤဖျဲးတ့ၢ်ပှၤလၢ တၢ်လီၤဘၣ်ယိၣ်လၢ ပသးသမူအဂီၢ်အသိး အဝဲကမၤပူၤဖျဲးပှၤဒံးလီၤ. ဒီးပမုၢ်လၢ်လၢ အဝဲကဆဲး မၤပူၤဖျဲးပှၤလီၤ.+ ၁၁ သုဝဲစ့ၢ်ကီး သုမၤစၢၤပှၤသ့ ခီဖျိ သုဃ့ကညးန့ၢ်တၢ်လၢ ပဂီၢ်လီၤ.+ သုမ့ၢ်မၤဒ်န့ၣ်န့ၣ် ကစၢ်ယွၤကမၤစၢၤပှၤ ခီဖျိလၢ ပှၤအါဂၤ အတၢ်ထုကဖၣ်အဃိလီၤ. ဒီးတၢ်မ့ၢ်မၤအသးဒ်န့ၣ်န့ၣ် ပှၤအါဂၤ ကစံးဘျုးက့ၤယွၤလီၤ.+
၁၂ ပသးလၢအသ့ၣ်ညါဒၣ်တၢ် အုၣ်အသးလၢ ဖဲပအိၣ်လၢ ဟီၣ်ခိၣ်ချၢအံၤ လီၤဆီဒၣ်တၢ် ဖဲပအိၣ်လၢ သုကျါအခါ ပပာ်ဖျါထီၣ်တၢ်စီဆှံ ဒီးတၢ်သူၣ်ဘျၢသးဘျၢလၢ အဟဲလၢယွၤအအိၣ် အဃိ ပပာ်ကဖၢလၢပသး အလီၢ်အိၣ်ဝဲလီၤ. ဒီးပတပာ်ဖျါထီၣ် ပှၤဟီၣ်ခိၣ်ဖိ အတၢ်ကူၣ်သ့ဘၣ်.+ ပပာ်ဖျါထီၣ် ကစၢ်ယွၤ အတၢ်သးကညီၤ ဒိၣ်ဒိၣ်မုၢ်မုၢ်လီၤ. ၁၃ ပတကွဲးန့ၢ်သုလၢ တၢ်အဂုၤအဂၤ နီတမံၤဘၣ်. ပကွဲးထဲဒၣ်တၢ်လၢ သုဖးသ့* ဒီးသုနၢ်ပၢၢ်ညီလီၤ. ဒီးပမုၢ်လၢ်လၢ သုကဆဲးနၢ်ပၢၢ် တၢ်ဂ့ၢ်တဖၣ်အံၤ လၢလၢပှဲၤပှဲၤလီၤ.* ၁၄ ပကဲထီၣ် တၢ်ပာ်ကဖၢလၢသးအလီၢ် လၢသုဂီၢ်န့ၣ် သုနၢ်ပၢၢ်တ့ၢ် ဖဲအကြၢးလီၤ. ဒီးဖဲပကစၢ်ယ့ၣ်ၡူး အမုၢ်နံၤအတီၢ်ပူၤန့ၣ် သုကကဲထီၣ် တၢ်ပာ်ကဖၢလၢသးအလီၢ် လၢပဂီၢ်စ့ၢ်ကီးလီၤ.
၁၅ မ့ၢ်လၢ ယနာ်ဒ်န့ၣ်အဃိ ယပာ်လီၤယသးလၢ ယကလဲၤဆိလၢသုအိၣ် ဒ်သိး သုကန့ၢ်ဘၣ် တၢ်သးခု ခံဘျီတဘျီလီၤ. ၁၆ လၢအခီၣ်ထံးန့ၣ် ယပာ်လီၤယသးလၢ ဖဲယလဲၤလၢကျဲဆူ ကီၢ်မၤက့းဒနံအခါ ယကလဲၤဟးလၢသုအိၣ် တဘျီ ဒီးဖဲယဟဲက့ၤလၢ ကီၢ်မၤက့းဒနံအခါ ယကလဲၤဟးကဒီးလၢသုအိၣ်လီၤ. ဝံၤဒီး ဖဲယကလဲၤလၢ ယူဒၤအဟီၣ်ကဝီၤအခါ ယကမၢသုလဲၤဆှၢယၤ လၢကျဲတကူာ်လီၤ.+ ၁၇ ယပာ်လီၤယသးဒ်န့ၣ်န့ၣ် ယတထံၣ်အီၤဒ်အမ့ၢ် တၢ်ဂ့ၢ်ဆံးဆံးဖိဘၣ်. မ့ၢ်ယထုးထီၣ် တၢ်ရဲၣ်တၢ်ကျဲၤတဖၣ် ဖဲဒၣ်ယသးဒ်သိး ယကတဲ “မ့ၢ်, မ့ၢ်” ဝံၤဒီး တဲကဒါက့ၤလၢ “တမ့ၢ်ဘၣ်, တမ့ၢ်ဘၣ်” န့ၣ်ဧါ. ၁၈ ပကတဲလၢ “မ့ၢ်” ဝံၤဒီး တဲကဒါက့ၤလၢ “တမ့ၢ်ဘၣ်” န့ၣ် တမ့ၢ်ဒ်န့ၣ်ဘၣ်. ဒ်ကစၢ်ယွၤ မ့ၢ်ပှၤလၢ အကလုၢ်တီအသိး တၢ်လၢပတဲသုန့ၣ် မ့ၢ်တၢ်မ့ၢ်တၢ်တီလီၤ. ၁၉ ကစၢ်ယွၤအဖိခွါ ယ့ၣ်ၡူးခရံာ် လၢယၤဒီး စီၤစံၤလဝ့နုၤ* ဒီးစီၤတံၤမသ့း+ စံၣ်တဲၤတဲလီၤသုလၢ အဂ့ၢ်တဂၤန့ၣ် အမ့ၢ်တဲဝဲလၢ “မ့ၢ်” ဝံၤအကတဲကဒါက့ၤလၢ “တမ့ၢ်ဘၣ်” န့ၣ် တမ့ၢ်ဒ်န့ၣ်ဘၣ်. အမ့ၢ်တဲလၢ “မ့ၢ်” န့ၣ် မ့ၢ်ဝဲ “မ့ၢ်” ထီဘိလီၤ. ၂၀ ကစၢ်ယွၤ အတၢ်အၢၣ်လီၤတဖၣ် မ့ၢ်အိၣ်အါထဲလဲၣ် သနာ်က့ အတၢ်အၢၣ်လီၤတဖၣ် ကဲထီၣ် “မ့ၢ်” ခီဖျိလၢ ယ့ၣ်ၡူးလီၤ.+ အဃိ ပတဲ “အၤမ့ၣ်” ဆူကစၢ်ယွၤအအိၣ်+ ခီဖျိလၢအီၤ ဒ်သိး ပကမၤလၤကပီၤ ကစၢ်ယွၤအဂီၢ်လီၤ. ၂၁ ဒီးကစၢ်ယွၤ မ့ၢ်ပှၤတဂၤလၢ အပာ်ဂၢၢ်ပာ်ကျၢၤဝဲလၢ ပဝဲဒၣ်ဒီးသုန့ၣ် မ့ၢ်ခရံာ်အတၢ်လီၤ. ဒီးအဝဲမ့ၢ်ပှၤလၢ အဒိးဖှူပှၤစ့ၢ်ကီးလီၤ.+ ၂၂ အဝဲပာ်လီၤတ့ၢ် အတၢ်စဲပနီၣ်လၢပလိၤ+ ဒီးဟ့ၣ်တ့ၢ်ပှၤ တၢ်အုၣ်ကီၤတခါ လၢအဘၣ်ဃးဒီး တၢ်လၢအကဟဲလၢ ခါဆူညါလီၤ. တၢ်အဝဲန့ၣ် မ့ၢ်ဝဲသးစီဆှံ+ လၢအအိၣ်လၢ ပသးပူၤလီၤ.
၂၃ ယတအဲၣ်ဒိး မၤသးအုးသုဘၣ်အဃိ ယတလဲၤလၢ ဝ့ၢ်ကရံၣ်သူးဒံးဘၣ် ဒီးကစၢ်ယွၤမ့ၢ် ယပှၤအုၣ်အသးလီၤ. ၂၄ ဘၣ်ဆၣ် ပတမ့ၢ်ကစၢ်လၢ သုတၢ်နာ်အဖီခိၣ်ဘၣ်.+ ပမ့ၢ်ဒၣ်ပှၤလၢ အမၤသကိးတၢ်ဒီးသု ဒ်သိး သုကအိၣ်ဒီး တၢ်သးခုအဂီၢ်လီၤ. သုဆၢထၢၣ်လၢ သုနီၢ်ကစၢ် အတၢ်နာ်အဃိလီၤ.