၂ ကရံၣ်သူး

၁၁ ယမ့ၢ်ဖျါဒ်သိးဒီး ပှၤလၢ အသးတဆးဘၣ်တစဲး သနာ်က့ ယမုၢ်လၢ်လၢ သုကဝံသးစူၤယၤလီၤ. နီၢ်ကီၢ်န့ၣ် သုဝံသးစူၤယၤ သပှၢ်တၢၢ်လီၤ. ၂ ယနီၢ်ကစၢ်ဒၣ်ယဲ ယအၢၣ်လီၤလၢ ယကဟ့ၣ်လီၤသုလၢ သုကဖျီသုသးဒီး ပိာ်ခွါတဂၤ လၢအမ့ၢ်ခရံာ် ဒီးယအဲၣ်ဒိး ပာ်ဖျါထီၣ်သုလၢ ခရံာ်အမဲာ်ညါ ဒ်မုၣ်ကနီၤစီဆှံတဂၤ အသိးလီၤ.+ လၢတၢ်န့ၣ်အဃိ ယသးအိၣ်သု သပှၢ်တၢၢ် ဒ်ကစၢ်ယွၤ သးအိၣ်သုအသိးလီၤ. ၃ ဘၣ်ဆၣ် ဒ်ဂုၢ်ကွဲန့ၢ်လွဲန့ၢ် နီၢ်အံၣ်အု ခီဖျိလၢ တၢ်လီတၢ်ဝ့ၤအသိး+ ယဘၣ်ယိၣ်လၢ ပှၤကမၤဘၣ်အၢ သုတၢ်ဆိကမိၣ် ဒ်သိး သုကပာ်တ့ၢ်ကွံာ် တၢ်သူၣ်ဘျၢသးဘျၢ ဒီးတၢ်စီဆှံလၢ သုကြၢးပာ်ဖျါထီၣ်န့ၢ် ခရံာ်လီၤ.+ ၄ ယတဲဒ်န့ၣ်မ့ၢ်လၢ ပှၤတဂၤဂၤမ့ၢ်ဟဲ စံၣ်တဲၤတဲလီၤ ယ့ၣ်ၡူးလၢအဂၤတဂၤလၢ ပတစံၣ်တဲၤတဲလီၤ အဂ့ၢ်ဘၣ်မ့ၢ်ဂ့ၤ, အဝဲမ့ၢ်ဟဲစိာ်န့ၢ်သု သးအဂၤလၢ အလီၤဆီဒီး သုဒိးန့ၢ်ဘၣ် တ့ၢ်အီၤမ့ၢ်ဂ့ၤ, အဝဲမ့ၢ်ဟဲစိာ် တၢ်သးခုကစီၣ်အဂၤလၢ အလီၤဆီဒီး တၢ်လၢ သုတူၢ်လိာ်တ့ၢ်အီၤမ့ၢ်ဂ့ၤ+ သုဝံသးစူၤအီၤ ညီညီဖိလီၤ. ၅ ယဆိကမိၣ်လၢ တၢ်လၢ အပာ်ဖျါထီၣ်လၢ ယဆံးန့ၢ်ဒံး သုတၢ်မၢဖိ ဖးဒိၣ်တဖၣ် လၢအအိၣ်လၢသုကျါန့ၣ် တအိၣ်နီတမံၤဘၣ်.+ ၆ ယတၢ်သ့တၢ်ဘၣ် လၢတၢ်စံးတၢ်ကတိၤတကပၤ မ့ၢ်တအိၣ်ဘၣ်သနာ်က့+ လၢတၢ်သ့ၣ်ညါနၢ်ပၢၢ် တကပၤန့ၣ် လ့ၤတက့ၤ တမ့ၢ်ဒ်န့ၣ်ဘၣ်. ပပာ်ဖျါထီၣ်န့ၢ်သု တၢ်သ့ၣ်ညါနၢ်ပၢၢ် လၢတၢ်ကိးမံၤဒဲးအပူၤ ဒီးလၢကျဲကိးဘိဒဲးလီၤ.

၇ လၢတၢ်သးခုအပူၤ ယစံၣ်တဲၤတဲလီၤ ကစၢ်ယွၤ အတၢ်သးခုကစီၣ်လၢ ပှၤတလိၣ် ဟ့ၣ်ယၤအပှ့ၤဘၣ် ဒီးယဆီၣ်လီၤယသး ဒ်သိးသုကဘၣ် တၢ်ပာ်ထီၣ်ထီသုန့ၣ် ယမၤကမၣ်တၢ် တမံၤမံၤဧီၤ.+ ၈ ယတမျာ် တၢ်အိၣ်ဖှိၣ်အဂၤတဖၣ် ခီဖျိ ယတူၢ်လိာ် တၢ်မၤစၢၤလၢ နီၢ်ခိတခီလၢ အဝဲသ့ၣ်အအိၣ် ဒ်သိးယမၤ တၢ်အခ့အပှၤအတၢ်မၤ လၢသုကျါ ကသ့အဂီၢ်လီၤ.+ ၉ ဖဲယအိၣ်ဒီးသု ဒီးယလိၣ်ဘၣ် တၢ်မၤစၢၤအခါ မ့ၢ်လၢ ဒီပုၢ်ဝဲၢ်တဖၣ် လၢအဟဲလၢ ကီၢ်မၤက့းဒနံန့ၣ် မၤလၢပှဲၤန့ၢ် ယတၢ်လိၣ်ဘၣ် ခဲလၢာ်ခဲဆ့အဃိ ယတကဲထီၣ် တၢ်ဝံဃၢလၢ ပှၤဂီၢ်နီတဂၤဘၣ်.+ မ့ၢ်လီၤ, ယပလီၢ်ယသး ဒ်သိး ယသုတကဲထီၣ် တၢ်ဝံဃၢလၢသုဂီၢ် လၢကျဲနီတဘိတဂ့ၤအဂီၢ် ဒီးယကဆဲးပလီၢ်ယသး လၢခါဆူညါလီၤ.+ ၁၀ ဒ်တၢ်မ့ၢ်တၢ်တီ ဘၣ်ဃးဒီး ခရံာ်အိၣ်လၢယပူၤအသိး ယကဆဲး ပာ်ကဖၢလၢ ယသးလၢ တၢ်ဂ့ၢ်အံၤအဃိလၢ+ အဃါယၤကီၢ်ရ့ၣ် အဟီၣ်ကဝီၤတဖၣ် အပူၤလီၤ. ၁၁ ဘၣ်မနုၤအဃိ ယမၤဒ်န့ၣ်လဲၣ်. မ့ၢ်လၢ ယတအဲၣ်သုဘၣ် အဃိဧါ. ယအဲၣ်သုန့ၣ် ကစၢ်ယွၤ သ့ၣ်ညါဝဲလီၤ.

၁၂ ပှၤတနီၤနီၤ အဲၣ်ဒိးပာ်ကဖၢလၢအသး ဒီးဃုတၢ်ဂ့ၢ်ဒ်သိး အဝဲသ့ၣ်ပာ်အသး ထဲသိးဒီးပှၤ ကန့ၢ်အဂီၢ်လီၤ. ဘၣ်ဆၣ် တၢ်လၢယမၤန့ၣ် ယကဆဲးမၤအီၤ+ ဒ်သိး အဝဲသ့ၣ်သု တအိၣ်ဒီးတၢ်ဂ့ၢ်လၢ ကပာ်ကဖၢလၢ အသးတဂ့ၤအဂီၢ်လီၤ. ၁၃ ပှၤဒ်န့ၣ်အသိးတဖၣ်န့ၣ် မ့ၢ်ဝဲ တၢ်မၢဖိအဘျၣ်တဖၣ်, ပှၤမၤတၢ်ဖိလၢ အလံၣ်အီၣ်လီအီၣ်တၢ်တဖၣ် ဒီးအဝဲသ့ၣ် ပာ်မၤအသး ဒ်အမ့ၢ်ခရံာ် အတၢ်မၢဖိတဖၣ် အသိးလီၤ.+ ၁၄ ဘၣ်ဆၣ် ပကမၢကမၣ် အလီၢ်တအိၣ်ဘၣ်, မ့ၢ်လၢ မုၣ်ကီၤလံၢ်* အနီၢ်ကစၢ်ဒၣ်လဲာ် ပာ်မၤအသးဒ် တၢ်ကပီၤ အကလူးအသိးလီၤ.+ ၁၅ အဃိ မုၣ်ကီၤလံၢ် အခ့အပှၤတဖၣ် မ့ၢ်ပာ်မၤအသးဒ် တၢ်တီတၢ်လိၤ အခ့အပှၤတဖၣ် အသိးန့ၣ် တမ့ၢ်တၢ်လၢ အလီၤကမၢကမၣ်ဘၣ်. ဘၣ်ဆၣ် လၢခံကတၢၢ် တၢ်ကမၤအသးဒီး အဝဲသ့ၣ် ဒ်တၢ်လၢအဝဲသ့ၣ်မၤဝဲအသိးလီၤ.+

၁၆ ယကတဲကဒီးလၢ ပှၤတဘၣ်ဆိကမိၣ်လၢ ယမ့ၢ်ပှၤလၢ အသးတဆးဘၣ် နီတဂၤတဂ့ၤ. ဘၣ်ဆၣ် သုမ့ၢ်ဆိကမိၣ်လၢ ယမ့ၢ် ပှၤလၢ အသးတဆးဘၣ် သနာ်က့ ဝံသးစူၤယၤဒ်သိး ယပာ်ကဖၢလၢယသး ကသ့တစဲးအဂီၢ် စ့ၢ်ကီးတက့ၢ်. ၁၇ တၢ်လၢယတဲခဲအံၤန့ၣ် တမ့ၢ်လၢ ယမၤထွဲ ဒ်ကစၢ်အဒိအတဲာ် အသိးဘၣ်. မ့ၢ်ယတဲတၢ် ဒ်ပှၤလၢ အသးတဆးဘၣ် လၢအပာ်ကဖၢလၢအသး ဒီးနာ်န့ၢ်လီၤအသး အါတလၢတဂၤ အသိးလီၤ. ၁၈ မ့ၢ်လၢပှၤအါဂၤ ပာ်ကဖၢလၢအသး ဘၣ်ဃးဒီး တၢ်လၢအဘၣ်ထွဲဒီး ဟီၣ်ခိၣ်အဃိ ယၤစ့ၢ်ကီး ယကပာ်ကဖၢလၢ ယသးလီၤ. ၁၉ ဒီးမ့ၢ်လၢ သုမ့ၢ် “ပှၤလၢအသးဆး” ဒိၣ်မးအဃိ သုသးအိၣ်ဝံသးစူၤ ပှၤလၢအသးတဆးဘၣ် တဖၣ်လီၤ. ၂၀ တကးဒံးဘၣ် သုဝံသးစူၤပှၤလၢ အဒုးကဲကုၢ်သု, ပှၤလၢ အယူၢ်လီၤကွံာ် သုတၢ်စုလီၢ်ခီၣ်ခိၣ်, ပှၤလၢ အဟံးန့ၢ်တၢ်လၢ အအိၣ်ဒီးသု, ပှၤလၢ အပာ်ထီၣ်ထီအသးလၢ သုဖီခိၣ် ဒီးပှၤလၢ အဒဲသုမဲာ်ကိးဂၤဒဲးလီၤ.

၂၁ တၢ်လၢယတဲဖဲမၢကၢာ်န့ၣ် ကဲထီၣ် တၢ်မဲာ်ဆှးလၢပဂီၢ်လီၤ. ဘၣ်ဆၣ်ယတဲဒ်န့ၣ် မ့ၢ်လၢ သုထံၣ်ပှၤဒ်သိးဒီး ပှၤလၢ အဂံၢ်စၢ်ဘါစၢ် အဃိလီၤ.

ပှၤမ့ၢ်ထံၣ်ယၤ ဒ်သိးဒီးပှၤလၢ အသးတဆးဘၣ်တဂၤ သနာ်က့ ပှၤဂၤမ့ၢ် ပာ်ဒူထီၣ်အသးန့ၣ် ယကပာ်ဒူထီၣ်ယသး စ့ၢ်ကီးလီၤ. ၂၂ အဝဲသ့ၣ်န့ၣ် မ့ၢ်ပှၤဧ့ၤဘြံၤဖိဧါ. ယမ့ၢ်စ့ၢ်ကီး ပှၤဧ့ၤဘြံၤဖိ တဂၤလီၤ.+ အဝဲသ့ၣ်န့ၣ် မ့ၢ်ပှၤအံၣ်စရ့လးဖိဧါ. ယမ့ၢ်စ့ၢ်ကီး ပှၤအံၣ်စရ့လးဖိ တဂၤလီၤ. အဝဲသ့ၣ်န့ၣ် မ့ၢ်စီၤအၤဘြၤဟၣ် အချံအသၣ်ဧါ. ယမ့ၢ်စ့ၢ်ကီး စီၤအၤဘြၤဟၣ် အချံအသၣ်လီၤ.+ ၂၃ မ့ၢ်အဝဲသ့ၣ်ကဲ ခရံာ်အခ့အပှၤ တဖၣ်ဧါ. ယကတဲဆၢ ဒ်ပှၤပျုၢ်အသိးလၢ ယပာ်ဖျါထီၣ်လၢ ယကဲခရံာ်အခ့အပှၤ အါန့ၢ်ဒံး အဝဲသ့ၣ်လီၤ. ယမၤတၢ်အါန့ၢ်ဒံး အဝဲသ့ၣ်,+ ယလီၤလၢဃိာ်ပူၤ အဘျီအါန့ၢ်ဒံး အဝဲသ့ၣ်,+ ပှၤဒိယၤတီၢ်ယၤ အဘျီအါ တုၤဒၣ်လဲာ်ယဒွးအီၤ တဘၣ်လၢၤဘၣ် ဒီးယဘူးကသံ တဘျုးဘျီညါလီၤ.+ ၂၄ ပှၤယူဒၤဖိ တီၢ်ယၤယဲၢ်ဘျီ ဒီးတဘျီန့ၣ် ၃၉ ထံၣ်လီၤ.+ ၂၅ ပှၤတီၢ်ယၤလၢ နီၣ်တီၢ်သၢဘျီ,+ ပှၤကွံာ်ယၤလၢ လၢၢ်တဘျီ,+ ကဘီဟးဂီၤန့ၢ်ယၤ လၢကျဲသၢဘျီ,+ ယဘၣ်အိၣ်လၢ ပီၣ်လဲၣ်ပူၤ တနံၤဒီးတနၤ, ၂၆ ယလဲၤတၢ်က့ၤတၢ် တလီၢ်လီၢ်, ယထံၣ်ဘၣ် တၢ်ဘၣ်ယိၣ်အလီၢ်လၢ ထံကျိတဖၣ်အဃိ, လၢတမျာ်တဖၣ်အဃိ, လၢယပှၤကလုာ်တဖၣ်အဃိ,+ လၢပှၤကလုာ်အဂၤတဖၣ်အဃိ,+ လၢဝ့ၢ်ပူၤ,+ လၢပှၢ်မုၢ်ကနၢ, လၢပီၣ်လဲၣ်ပူၤ ဒီးလၢဒီပုၢ်ဝဲၢ်ခွါ အဘျၣ်တဖၣ်အဃိလီၤ. ၂၇ ယဘၣ်ထဲးဂံၢ်ထဲးဘါ သပှၢ်တၢၢ် ဒီးဖံးတၢ်မၤတၢ်ဆူၣ်ဆူၣ်, ဘၣ်ကီၤမံအါနၤ,+ ယလီၤဘဲ* အီၣ်တၢ် ဒီးယလီၤဘဲအီထံ,+ ယတၢ်အီၣ်တအိၣ်ဘၣ် ခဲအံၤခဲအံၤ,+ ယဘၣ်အိၣ်လၢ တၢ်ဂိၢ်ကျါ ဒီးယတၢ်ကူတၢ်ကၤ တယၢဘၣ်.

၂၈ ထဲန့ၣ် တကးဒံးဘၣ် တနံၤဘၣ်တနံၤန့ၣ် ယသူၣ်ကိၢ်သးဂီၤတၢ်လၢ တၢ်အိၣ်ဖှိၣ်ခဲလၢာ် အဂီၢ်လီၤ.+ ၂၉ ပှၤတဂၤဂၤ အဂံၢ်မ့ၢ်လီၤစၢ်န့ၣ် ယၤစ့ၢ်ကီး ယဂံၢ်လီၤစၢ်လီၤ. ပှၤတဂၤဂၤ မ့ၢ်လီၤဃံၢ်န့ၣ် ယၤစ့ၢ်ကီး ယသးဒိၣ်ထီၣ်တၢ်လီၤ.

၃၀ ယမ့ၢ်ဘၣ် ပာ်ကဖၢလၢယသးဒီး ယကပာ် ကဖၢလၢယသးလၢ တၢ်လၢအပာ်ဖျါထီၣ် ယတၢ်ဂံၢ်စၢ်ဘါစၢ်လီၤ. ၃၁ ယတလံၣ်တၢ်ဘၣ်န့ၣ် ကစၢ်ယ့ၣ်ၡူးအပၢ် လၢအမ့ၢ်စ့ၢ်ကီး အကစၢ်ယွၤ လၢအဘၣ် တၢ်စံးထီၣ်ပတြၢၤအီၤ လီၤထူလီၤယိာ်တဂၤန့ၣ် သ့ၣ်ညါဝဲလီၤ. ၃၂ လၢဝ့ၢ်ဒၤမ့ၤစ့းအပူၤ ပဒိၣ်ဖးဒိၣ်လၢ အအိၣ်လၢ စီၤပၤအရံတၢ် အဖီလာ်တဂၤန့ၣ် ပၢၤဃာ်ဝဲ ဝ့ၢ်အတြဲၤ ဒ်သိးကဖီၣ်န့ၢ်ယၤ အဂီၢ်လီၤ. ၃၃ ဘၣ်ဆၣ် ဒီပုၢ်ဝဲၢ်တဖၣ် စဲၤလီၤယၤလၢ ဝ့ၢ်ဒူၣ်အပဲတြီဖိ လၢဃၤတဖျၢၣ်အပူၤ+ ဒီးယထူၣ်ဖျဲးကွံာ်လီၤ.