ယိၤၡူ
၉ ဒီးစီၤပၤကိးဂၤဒဲး လၢအအိၣ်လၢ ထံကျိယၢ်ဒ့ၣ် အမုၢ်နုာ်တခီ,+ လၢကစၢၢ်ကလိကျါ, လၢၡ့ဖလၣ်, လၢပီၣ်လဲၣ်ဖးဒိၣ် အကၢၢ်နံၤခဲလၢာ်+ ဒီးလၢလဘၤနိၣ်ကစၢၢ်ကလိ အမဲာ်ညါတခီန့ၣ် နၢ်ဟူတၢ်ကစီၣ်အံၤလီၤ. စီၤပၤတဖၣ်အံၤ မ့ၢ်ဝဲ ပှၤဃ့ၤသးဖိ, ပှၤအမိၢ်ဖိ, ပှၤကနၤဧၣ်ဖိ, ပှၤပရးစၤဖိ, ပှၤဃံၤဝံဖိ ဒီးပှၤယဘူၣ်ဖိတဖၣ် အစီၤပၤလီၤ.+ ၂ စီၤပၤတဖၣ်အံၤ ဖီၣ်လိာ်သးစု ဒ်သိးကဒုး စီၤယိၤၡူ ဒီးပှၤအံၣ်စရ့လးဖိလီၤ.+
၃ ဒီးစီၤယိၤၡူ မၤဝဲ ဝ့ၢ်ယရံၤဃိ+ ဒီးဝ့ၢ်ဂဲဒ်လဲၣ်န့ၣ်+ ပှၤကံးဘိၣ်ဖိတဖၣ်+ နၢ်ဟူဘၣ်ဝဲစ့ၢ်ကီးလီၤ. ၄ အဃိ လၢတၢ်ကူၣ်သ့အပူၤ အဝဲသ့ၣ်ဖၢနုာ် တၢ်အီၣ်တၢ်အီတဖၣ်လၢ ထၢၣ်လီၢ်လံၤအပူၤ ဝံၤဒီးပာ်ထီၣ်အီၤဃုာ်ဒီး စပံးထံ အထၢၣ်တၢ်ဖံးလီၢ်လံၤလၢ အညာ် ဒီးဘၣ်တၢ်ဆးကျးထီၣ်က့ၤအီၤတဖၣ် လၢအဝဲသ့ၣ် အကသ့ၣ်ယီၤအလိၤလီၤ. ၅ အဝဲသ့ၣ် ဒိးစ့ၢ်ကီးဝဲ ခီၣ်ဖံးလီၢ်လံၤဖီဃး ဒီးသိးဝဲ တၢ်ကူတၢ်သိး လၢအလီၢ်လံၤဖီဃးတဖၣ်လီၤ. ဒီးကိၣ်လၢ အလဲၤစိာ်ဝဲခဲလၢာ်န့ၣ် ဃ့ထီ ဒီးလီၤဘျဲးဝဲလီၤ. ၆ ဒီးအဝဲသ့ၣ်လဲၤလၢ စီၤယိၤၡူအအိၣ် လၢဒဲကဝီၤ လၢဝ့ၢ်ကံးလကၤလးန့ၣ်လီၤ.+ ဒီးအဝဲသ့ၣ်တဲဘၣ် စီၤယိၤၡူ ဒီးပှၤအံၣ်စရ့လးဖိတဖၣ်လၢ “ပဟဲလၢ တၢ်လီၢ်ဖးယံၤညါ. အဃိ ခဲအံၤ မၤတၢ်အၢၣ်လီၤအီလီၤဒီးပှၤမီၤ.” ၇ ဘၣ်ဆၣ် ပှၤအံၣ်စရ့လးဖိ တဲကဒါ ပှၤဃံၤဝံဖိလၢ+ “ဘၣ်သ့ၣ်သ့ၣ် သုကအိၣ်ဘူးဒီးပှၤလီၤဧါသၢၤ. အဃိ ပမၤ တၢ်အၢၣ်လီၤအီလီၤ ဒီးသုကသ့ဒ်လဲၣ်.”+ ၈ ဒီးအဝဲသ့ၣ် တဲဆၢက့ၤ စီၤယိၤၡူလၢ “ပမ့ၢ်နကုၢ်နပှၤတဖၣ်လီၤ.”
ဒီးစီၤယိၤၡူ တဲအဝဲသ့ၣ်လၢ “သုမ့ၢ်မတၤတဖၣ်လဲၣ်. ဒီးသုဟဲဖဲလဲၣ်.” ၉ အဝဲသ့ၣ် တဲဘၣ်အီၤလၢ “ပဝဲနခ့နပှၤတဖၣ်အံၤ ပဟဲလၢထံကီၢ်လၢ အယံၤဒိၣ်မးတဘ့ၣ်လီၤ.+ မ့ၢ်လၢ သုကစၢ်ယဟိဝၤယွၤ အမံၤဟူသၣ်ဖျါ ဒီးပပာ်ကဲအမံၤ ဒီးပနၢ်ဟူဘၣ် တၢ်လၢအမၤဝဲလၢ ကီၢ်အဲၤကူပတူးအပူၤ ကိးမံၤဒဲးအဃိ ပဟဲလီၤ.+ ၁၀ တကးဒံးဘၣ် ပနၢ်ဟူလၢ အမၤနၢၤ ပှၤအမိၢ်ဖိ အစီၤပၤခံဂၤလၢ အအိၣ်လၢယၢ်ဒ့ၣ်ဝၢ်ခီ, ဝ့ၢ်ဃ့ၡဘိၣ် အစီၤပၤစံဃိၣ်+ ဒီးဘၤၡၣ် အစီၤပၤဧိာ်+ လၢအအိၣ်ဝဲလၢ ဝ့ၢ်ဧၤၡတြိးန့ၣ်လီၤ. ၁၁ အဃိ ပပှၤသူၣ်က့သးပှၢ်တဖၣ် ဒီးပပှၤထံဖိကီၢ်ဖိတဖၣ် တဲပှၤလၢ ‘ဟံးန့ၢ်တၢ်အီၣ်တၢ်အီလၢ သုတၢ်လဲၤတၢ်က့ၤအဂီၢ် ဒီးလဲၤထံၣ်လိာ်သး ဒီးအဝဲသ့ၣ်တက့ၢ်. တဲဘၣ်အဝဲသ့ၣ်လၢ “ပကကဲသုကုၢ်သုပှၤလီၤ.+ ခဲအံၤ မၤတၢ်အၢၣ်လီၤအီလီၤ ဒီးပှၤတက့ၢ်.”’+ ၁၂ ကွၢ်လၢအံၤမီၤ, ကိၣ်လၢပဟဲစိာ်လၢ ပကအီၣ်အဂီၢ်အံၤ ဖဲပဟးထီၣ်လၢ ပဟံၣ်အခါ အကိၢ်ဒံး. ဘၣ်ဆၣ် ခဲအံၤန့ၣ် အဃ့ထီ ဒီးလီၤဘျဲးလၢာ်လံ.+ ၁၃ ထၢၣ်တၢ်ဖံးတဖၣ်အံၤ ဖဲပဘိလီၤစပံးထံ လၢအပူၤအခါ အသီဒံးလီၤ. ခဲအံၤ အညာ်လၢာ်လံ.+ ဒီးခီဖျိလၢ ပဘၣ်ဟဲတၢ်လီၢ်ယံၤအဃိ ပတၢ်ကူတၢ်သိး ဒီးပခီၣ်ဖံးတဖၣ်အံၤ လီၢ်လံၤဖီဃးလၢာ်လံ.”
၁၄ ဖဲန့ၣ်အခါ ပှၤအံၣ်စရ့လးပိာ်ခွါ ဟံးန့ၢ်အဝဲသ့ၣ် အတၢ်အီၣ်တၢ်အီတနီၤ ဒ်သိးကကွၢ်ထံကွၢ်ဆးဝဲအဂီၢ် ဘၣ်ဆၣ် အဝဲသ့ၣ် တဃ့တၢ်ဟ့ၣ်ကူၣ်လၢ ယဟိဝၤယွၤအအိၣ်ဘၣ်.+ ၁၅ အဃိ စီၤယိၤၡူ မၤတၢ်ဃူတၢ်ဖိး+ ဒီးမၤတၢ်အၢၣ်လီၤအီလီၤဒီး အဝဲသ့ၣ် ဒ်သိးအသုတမၤသံ အဝဲသ့ၣ်တဂ့ၤ အဂီၢ်လီၤ. ဒီးပှၤဂီၢ်မုၢ်* အခိၣ်အနၢ်တဖၣ် အၢၣ်လီၤပှၤဃံၤဝံဖိလၢ အဝဲသ့ၣ်ကတီဒီး အတၢ်အၢၣ်လီၤန့ၣ်လီၤ.+
၁၆ အဝဲသ့ၣ် မၤတၢ်အၢၣ်လီၤအီလီၤဝံၤ သၢသီအလီၢ်ခံန့ၣ် အဝဲသ့ၣ်နၢ်ဟူဘၣ်ဝဲလၢ ပှၤဃံၤဝံဖိတဖၣ် အိၣ်တၢ်လီၢ် ဘူးဒီးအဝဲသ့ၣ်လီၤ. ၁၇ အဃိ လၢသၢနံၤတနံၤန့ၣ် ပှၤအံၣ်စရ့လးဖိတဖၣ် လဲၤဝဲလၢ ပှၤဃံၤဝံဖိတဖၣ် အဝ့ၢ်လီၤ. ပှၤဃံၤဝံဖိတဖၣ် အဝ့ၢ်မ့ၢ်ဝဲ ဝ့ၢ်ကံးဘိၣ်,+ ဝ့ၢ်ကဖံရၤ, ဝ့ၢ်ဘအ့ရိး ဒီးဝ့ၢ်ကံးရယးယဧၤရံၣ်လီၤ.+ ၁၈ ဘၣ်ဆၣ် မ့ၢ်လၢ ပှၤဂီၢ်မုၢ် အခိၣ်အနၢ် မၤတၢ်အၢၣ်လီၤအီလီၤ ဒီးအဝဲသ့ၣ် လၢအံၣ်စရ့လးအကစၢ် ယဟိဝၤယွၤ အမဲာ်ညါ+ ဝံၤလံအဃိ ပှၤအံၣ်စရ့လးဖိတဖၣ် တဒုးအဝဲသ့ၣ်ဘၣ်. အဃိ ပှၤဂီၢ်မုၢ်ခဲလၢာ် စးထီၣ် ကဒူးကဒ့ၣ်ဝဲ ပှၤခိၣ်ပှၤနၢ်တဖၣ်လီၤ. ၁၉ ဒီးပှၤခိၣ်ပှၤနၢ်ခဲလၢာ် တဲဘၣ်ပှၤဂီၢ်မုၢ် ဒီတဖုလၢ “ပမၤ တၢ်အၢၣ်လီၤအီလီၤဒီး အဝဲသ့ၣ် လၢအံၣ်စရ့လး အကစၢ်ယဟိဝၤယွၤ အမဲာ်ညါ ဝံၤလံအဃိ ပမၤဘၣ်ဒိအဝဲသ့ၣ် တန့ၢ်ဘၣ်. ၂၀ ဘၣ်ဆၣ် ပကမၤဒ်အံၤလီၤ. ခီဖျိလၢ ပမၤတၢ်အၢၣ်လီၤအီလီၤ ဒီးအဝဲသ့ၣ် ဝံၤလံအဃိ ဒ်သိးကစၢ်ယွၤ သုတသးထီၣ်ပှၤတဂ့ၤအဂီၢ် ပကပာ်မူ အဝဲသ့ၣ်လီၤ.”+ ၂၁ ဒီးပှၤခိၣ်ပှၤနၢ်တဖၣ် ဆဲးတဲဝဲလၢ “ပာ်မူအဝဲသ့ၣ်တက့ၢ်. ဘၣ်ဆၣ် မၢအဝဲသ့ၣ် ကဲထီၣ်ပှၤထၢသ့ၣ်မုၣ် ဒီးပှၤဒၢၣ်ထံလၢ ပှၤဂီၢ်မုၢ်ခဲလၢာ်အဂီၢ်တက့ၢ်.” အဝဲအံၤမ့ၢ်ဝဲ တၢ်အၢၣ်လီၤလၢ ပှၤခိၣ်ပှၤနၢ်တဖၣ် အၢၣ်လီၤဝဲန့ၣ်လီၤ.
၂၂ စီၤယိၤၡူ ကိးအဝဲသ့ၣ်ဒီး တဲအဝဲသ့ၣ်လၢ “နီၢ်ကီၢ်န့ၣ် သုအိၣ်ဘူးဒီးပှၤလီၤ. ဘၣ်မနုၤအဃိ သုဟဲလံၣ်န့ၢ်လီန့ၢ်ပှၤ ဒီးတဲလၢ ‘ပဟဲလၢ တၢ်လီၢ်ဖးယံၤညါ’ လဲၣ်.+ ၂၃ စးထီၣ် ခဲအံၤန့ၣ် သုဘၣ်တၢ်ဆိၣ်အၢ+ ဒီးသုကကဲထီၣ် ပှၤထၢသ့ၣ်မုၣ် ဒီးပှၤဒၢၣ်ထံလၢ ယကစၢ်ယွၤ အဟံၣ်အဂီၢ် ဒ်ကုၢ်တဖၣ်အသိးထီဘိလီၤ. ၂၄ အဝဲသ့ၣ် တဲဆၢက့ၤ စီၤယိၤၡူလၢ “ပမၤဒ်အံၤန့ၣ် မ့ၢ်လၢ ပဝဲလၢအမ့ၢ် နခ့နပှၤတဖၣ်အံၤ ပနၢ်ဟူလၢ သုကစၢ်ယဟိဝၤယွၤ မၤလိာ်အခ့အပှၤစီၤမိၤၡ့လၢ အကဟ့ၣ်လီၤသု ကီၢ်ခဲလၢာ် ဒီးအကမၤဟးဂီၤ ပှၤအိၣ်လၢအပူၤခဲလၢာ် လၢသုမဲာ်ညါလီၤ.+ ဒီးပဘၣ်ယိၣ်တၢ်လၢ ပသးသမူအဂီၢ်အဃိ+ ပမၤဘၣ်ဒ်အံၤလီၤ.+ ၂၅ ခဲအံၤပအိၣ်လၢ သုစုပူၤလီၤ. မၤပှၤဖဲသုအဲၣ်ဒိးမၤ ဒ်သုဆိကမိၣ်လၢ အဘၣ်အသိးန့ၣ်တက့ၢ်.” ၂၆ ဒီးစီၤယိၤၡူ မၤဝဲဒ်န့ၣ်လီၤ. စီၤယိၤၡူ မၤပူၤဖျဲး အဝဲသ့ၣ် ဒ်သိးပှၤအံၣ်စရ့လးဖိတဖၣ် သုတမၤသံ အဝဲသ့ၣ် တဂ့ၤအဂီၢ်လီၤ. ၂၇ စးထီၣ်ဖဲနံၤအဝဲန့ၣ် စီၤယိၤၡူ မၢအဝဲသ့ၣ် ကဲပှၤထၢသ့ၣ်မုၣ် ဒီးပှၤဒၢၣ်ထံလၢ ပှၤဂီၢ်မုၢ်အဂီၢ်+ ဒီးလၢ ယဟိဝၤယွၤ အတၢ်လုၢ်လီၢ်အဂီၢ် ဖဲတၢ်လီၢ်လၢ ကစၢ်ယွၤဃုထၢဝဲန့ၣ်လီၤ.+ ဒီးအဝဲသ့ၣ် မၤတၢ်ဒ်န့ၣ် တုၤလၢမုၢ်မဆါတနံၤညါအံၤလီၤ.+