စကၤရယၤ
၁၃ “ဖဲတၢ်တနံၤန့ၣ် တၢ်ကခူၣ်န့ၢ် ထံကမျၢတဖျၢၣ်* လၢစီၤဒၤဝံးအစၢၤအသွဲၣ်* ဒီးပှၤလၢအအိၣ်လၢ ယရူၤၡလ့ၣ်အဂီၢ် လၢတၢ်ကမၤကဆှီထီၣ် တၢ်ဒဲးဘး ဒီးတၢ်လၢအတကဆှီဘၣ်တဖၣ် အဂီၢ်လီၤ.”+
၂ တၢ်သုးမုၢ်ဂီၢ်မုၢ် အကစၢ် ယဟိဝၤယွၤ တဲဝဲလၢ “ဖဲတၢ်တနံၤန့ၣ် ယကမၤဟးဂီၤကွံာ် တၢ်ဂီၤတၢ်ဖှီၣ်တဖၣ် လၢကီၢ်ပူၤ+ ဒီးတၢ်တသ့ၣ်နီၣ်ထီၣ် အီၤလၢၤဘၣ်. ဒီးယကမၤလီၤမၢ်ကွံာ် ဝံတဖၣ်လၢကီၢ်ပူၤ+ ဒီးတၢ်ဝံတၢ်နါ အစိအကမီၤလီၤ. ၃ ဒီးပှၤတဂၤ မ့ၢ်တဲကဒီးတၢ်ဒ် ဝံအသိးန့ၣ် အမိၢ်အပၢ်လၢ အထီၣ်ဖိအီၤန့ၣ် ကတဲအီၤလၢ ‘မ့ၢ်လၢ နတဲလံၣ်တဲလီတၢ်လၢ ယဟိဝၤယွၤအမံၤပူၤ အဃိ နကဘၣ်သံလီၤ.’ ဒီးမ့ၢ်လၢ အတဲတၢ်ဒ် ဝံအသိးအဃိ အမိၢ်အပၢ်လၢ အထီၣ်ဖိအီၤန့ၣ် ကဆဲးသံအီၤလီၤ.+
၄ “ဖဲတၢ်တနံၤန့ၣ် ဝံတဂၤစုာ်စုာ်လၢ အတဲတၢ်ဒ် ဝံအသိးန့ၣ် ကမဲာ်ဆှးဝဲလၢ အတၢ်ထံၣ်လၢညါခီ အဃိလီၤ. အဝဲသ့ၣ် တကူတသိး ဝံအတၢ်ကူတၢ်သိး*+ ဒ်သိး ကလံၣ်န့ၢ်လီန့ၢ် ပှၤဂၤ အဂီၢ်လၢၤဘၣ်. ၅ ဒီးအဝဲ ကတဲဝဲလၢ ‘ယတမ့ၢ် ဝံဘၣ်. ပှၤပှ့ၤယၤ ဒ်ကုၢ်တဂၤအသိးလၢ ယနီၢ်ဆံးခါလံၤလံၤ အဃိ ယမ့ၢ် ပှၤသူၣ်တၢ်ဖျးတၢ်ဖိလီၤ.’ ၆ ဒီးပှၤတဂၤဂၤ မ့ၢ်သံကွၢ်အီၤလၢ ‘တၢ်ပူၤလီၢ်တဖၣ်လၢ နလိၤန့ၣ်* ဟဲကဲထီၣ်သးဒ်လဲၣ်’ န့ၣ်အဝဲ ကတဲဆၢက့ၤဝဲလၢ ‘ပှၤတီၢ်ယၤလၢ ယသကိးတဖၣ် အဟံၣ်ပူၤအဃိ ယအိၣ်ဒီး တၢ်ပူၤလီၢ်တဖၣ်အံၤလီၤ.’”
၇ တၢ်သုးမုၢ်ဂီၢ်မုၢ် အကစၢ် ယဟိဝၤယွၤ တဲဝဲလၢ “အိ နးဧၢ, ပၢၢ်ထီၣ် ဒီးလဲၤကျီ ယပှၤကွၢ်သိ+
ဒီးကျီကွံာ် ပှၤတဂၤ လၢအမ့ၢ် ယသကိးသၢၤ.
ကျီကွံာ် ပှၤကွၢ်သိ+ ဒီးသိတဖၣ်ကလီၤပြံလီၤပြါဝဲလီၤ.+
ဒီးယကသိၣ်က့ၤသီက့ၤ ပှၤလၢအရ့တဒိၣ်ဘၣ်တဖၣ်လီၤ.”
၈ ယဟိဝၤယွၤ တဲဝဲလၢ “လၢကီၢ်ဒီဘ့ၣ်အပူၤန့ၣ်
ပှၤခံပူ ကဘၣ်တၢ်မၤဟးဂီၤအီၤ ဒီးမၤသံကွံာ်အီၤ
ဒီးပှၤသၢပူတပူန့ၣ် ကအိၣ်တ့ၢ်ဝဲလၢ အပူၤလီၤ.
၉ ဒီးပှၤသၢပူတပူၤအံၤ ယကဒုးလဲၤခီဂာ်အီၤလၢ မ့ၣ်အူလီၤ.
ဒီးယကပှံၢ်စီ အဝဲသ့ၣ် ဒ်သိးဒီး ပှၤပှံၢ်စီ စ့ညၣ်
ဒီးယကမၤကွၢ် အဝဲသ့ၣ် ဒ်သိးဒီး ပှၤမၤကွၢ်ထူလီၤ.+
အဝဲသ့ၣ် ကကိးထီၣ်ယမံၤ
ဒီးယကစံးဆၢ အဝဲသ့ၣ်လီၤ.
ယကတဲလၢ ‘အဝဲသ့ၣ် မ့ၢ်ယပှၤဂီၢ်မုၢ်’+
ဒီးအဝဲသ့ၣ် ကတဲဝဲလၢ ‘ယဟိဝၤမ့ၢ် ပယွၤလီၤ.’”