လီၣ်ဖျါ
၂၀ ဒီးယထံၣ်ဘၣ် မူခိၣ်ကလူးတဂၤ ဟဲလီၤလၢမူခိၣ် ဒီးအဝဲအိၣ်ဒီး တၢ်ပူၤယိာ်အသီးခွဲး+ ဒီးပျံၤထးဖးဒိၣ်တဘိ အိၣ်လၢအစုပူၤလီၤ. ၂ အဝဲဖီၣ်န့ၢ်ပယိၤ,+ ဂုၢ်လၢအခီၣ်ထံးတဘိ+ လၢအမ့ၢ် စၤတၣ်+ မုၣ်ကီၤလံၢ်+ ဒီးစၢဃာ်အီၤအနံၣ် ၁,၀၀၀ လီၤ. ၃ အဝဲကွံာ်လီၤအီၤလၢ တၢ်ပူၤယိာ်အပူၤ+ ဒီးကးပံးဃာ် တၢ်ပူၤယိာ် ဒီးစဲပနီၣ်ဃာ် တၢ်ပူၤယိာ် အခိၣ်ထိး ဒ်သိးတချုးအနံၣ် ၁,၀၀၀ ကတၢၢ်ဒံးဘၣ်န့ၣ် အသုတလံၣ်န့ၢ်လီန့ၢ် ပှၤကလုာ်တဖၣ်လၢၤတဂ့ၤ အဂီၢ်လီၤ. တၢ်န့ၣ်ဝံၤအလီၢ်ခံ အကဘၣ် တၢ်ပျၢ်ထီၣ်ကွံာ်အီၤ တစိၢ်ဖိလီၤ.+
၄ ဒီးယထံၣ်ဘၣ် လီၢ်ပစိာ်တဖၣ် ဒီးပှၤလၢ အဆ့ၣ်နီၤလၢအလိၤန့ၣ် ကစၢ်ယွၤ ဟ့ၣ်လီၤအဝဲသ့ၣ် တၢ်စိတၢ်ကမီၤလၢ ကစံၣ်ညီၣ်တၢ်အဂီၢ်လီၤ. မ့ၢ်လီၤ, ယထံၣ်ဘၣ် ပှၤ* လၢအဘၣ်တၢ်မၤသံအီၤ ခီဖျိလၢ အဝဲသ့ၣ်အုၣ်အသးလၢ ယ့ၣ်ၡူးအဂ့ၢ် ဒီးစံၣ်တဲၤတဲလီၤ ကစၢ်ယွၤအဂ့ၢ် အဃိလီၤ. ပှၤတဖၣ်န့ၣ် တဘူၣ်ထီၣ်ဘါထီၣ် ဆၣ်ဖိကီၢ်ဖိလၢ အအၢတဒုမ့ၢ်ဂ့ၤ အဂီၤမ့ၢ်ဂ့ၤန့ၣ်ဘၣ်. ဒီးအဝဲသ့ၣ် တဒိးန့ၢ်ဘၣ် တၢ်ပနီၣ်လၢ အမဲာ်တူၢ်ခိၣ် ဒီးလၢအစုလိၤဘၣ်.+ အဝဲသ့ၣ်သမူထီၣ်က့ၤ ဒီးပၢဃုာ်တၢ်ဒီးခရံာ်+ အနံၣ် ၁,၀၀၀ ဒ်စီၤပၤတဖၣ် အသိးလီၤ. ၅ အဝဲသ့ၣ် မ့ၢ်ပှၤလၢ အဂဲၤဆၢထၢၣ်သမူထီၣ်က့ၤလၢ တၢ်ဂဲၤဆၢထၢၣ် အဆိကတၢၢ် တတီၤလီၤ.+ (မ့မ့ၢ် ပှၤသံအဂၤတဖၣ်န့ၣ်+ အနံၣ် ၁,၀၀၀ မ့ၢ်တကတၢၢ်ဒံးဘၣ်ဒီး တမူထီၣ်ဝဲဘၣ်.) ၆ ပှၤလၢအပၣ်ဃုာ်လၢ တၢ်ဂဲၤဆၢထၢၣ်သမူထီၣ်က့ၤ အဆိကတၢၢ် တတီၤအံၤန့ၣ်+ စီဆှံဝဲ ဒီးသးခုဝဲလီၤ. တၢ်သံခံစုတစု+ တအိၣ်ဒီးတၢ်စိတၢ်ကမီၤလၢ+ ပှၤတဖၣ်အံၤ အဖီခိၣ်ဘၣ်. အဝဲသ့ၣ်ကကဲထီၣ် ပှၤလုၢ်တၢ်ဒိၣ်တဖၣ်+ လၢအဘၣ်ဃးဒီး ကစၢ်ယွၤဒီးခရံာ် ဒီးကပၢဃုာ်တၢ်ဒီးအီၤ* အနံၣ် ၁,၀၀၀+ ဒ်စီၤပၤတဖၣ် အသိးလီၤ.
၇ ဖဲအနံၣ် ၁,၀၀၀ ကတၢၢ်ဝဲအခါ မုၣ်ကီၤလံၢ် ကဘၣ်တၢ်ပျၢ်ထီၣ်ကွံာ်အီၤလၢ အဃိာ်ပူၤလီၤ. ၈ ဒီးအဝဲကဟးထီၣ် ဒ်သိးကဆှၢကမၣ်ဝဲ ပှၤကလုာ်တဖၣ် လၢအမ့ၢ် ပှၤကိးဖိ ဒီးပှၤမါကူးဖိ လၢအအိၣ်လၢ ဟီၣ်ခိၣ်အနၢၣ်လွံၢ်နၢၣ် ဒီးအကပာ်ဖှိၣ်ထီၣ် အဝဲသ့ၣ်လၢ တၢ်ဒုးအဂီၢ်လီၤ. အဝဲသ့ၣ်တဖၣ် အနီၣ်ဂံၢ်န့ၣ် လီၤဂာ်ဒ်သိးဒီး မဲးတဖၣ်လၢ ပီၣ်လဲၣ်နံၤလီၤ. ၉ ဒီးအဝဲသ့ၣ် ရၤလီၤအသး သကုၤလၢ ဟီၣ်ခိၣ်ဒီဘ့ၣ် ဒီးကဝီၤဃာ်ပှၤစီဆှံတဖၣ် အဒဲကဝီၤ ဒီးဝ့ၢ်လၢ အဘၣ်တၢ်အဲၣ်အီၤ တဖျၢၣ်န့ၣ်လီၤ. ဘၣ်ဆၣ် မ့ၣ်အူ ဟဲလီၤလၢမူခိၣ် ဒီးအီၣ်ကွံာ်အဝဲသ့ၣ်လီၤ.+ ၁၀ ဒီးမုၣ်ကီၤလံၢ်လၢ အဆှၢကမၣ်အဝဲသ့ၣ်န့ၣ် ဘၣ်တၢ်ကွံာ်လီၤအီၤလၢ နိၣ်မ့ၣ်အူလၢ အအိၣ်ဒီးကး* အပူၤ ဖဲဆၣ်ဖိကီၢ်ဖိလၢအအၢ+ ဒီးဝံလၢအဘျၣ် အိၣ်ဝဲအလီၢ်န့ၣ်လီၤ.+ ဒီးအဝဲသ့ၣ် ကဘၣ် တၢ်မၤနးမၤဖှီၣ်အီၤလၢ မုၢ်ဆါ ဒီးလၢမုၢ်နၤ လီၤထူလီၤယိာ်လီၤ.
၁၁ ဒီးယထံၣ်ဘၣ် လီၢ်ပစိာ်ဖးဒိၣ်လၢ အလွဲၢ်ဝါတဖျၢၣ် ဒီးပှၤလၢအဆ့ၣ်နီၤဝဲလၢ အလိၤတဂၤလီၤ.+ မူခိၣ် ဒီးဟီၣ်ခိၣ်ဃ့ၢ်ကွံာ်ဝဲလၢ+ အမဲာ်ညါ ဒီးပှၤတထံၣ်န့ၢ် မူခိၣ်ဒီးဟီၣ်ခိၣ်လၢၤဘၣ်. ၁၂ ဒီးယထံၣ်ဘၣ်ပှၤသံ အဒိၣ်မ့ၢ်ဂ့ၤ, အဆံးမ့ၢ်ဂ့ၤ ဆၢထၢၣ်လၢ လီၢ်ပစိာ်အမဲာ်ညါ ဒီးလံာ်ထူတဖၣ် ဘၣ်တၢ်အိးထီၣ်အီၤလီၤ. ဘၣ်ဆၣ် လံာ်ထူအဂၤတဘ့ၣ် လၢအမ့ၢ် လံာ်မူန့ၣ်+ ဘၣ်တၢ်အိးထီၣ်အီၤ စ့ၢ်ကီးလီၤ. ဒ်တၢ်ကွဲးအသးတဖၣ်လၢ အအိၣ်ဝဲလၢ လံာ်ထူတဖၣ်အပူၤ အသိးန့ၣ် ပှၤသံတဖၣ် ဘၣ်တၢ်စံၣ်ညီၣ်အီၤ ဒ်တၢ်လၢအဝဲသ့ၣ် မၤဝဲအသိးလီၤ.+ ၁၃ ဒီးပီၣ်လဲၣ် ပျဲဟးထီၣ်ပှၤသံလၢ အအိၣ်လၢအပူၤ ဒီးတၢ်သံဒီးတၢ်သွၣ်ခိၣ်န့ၣ်* ပျဲဟးထီၣ်ပှၤသံလၢ အအိၣ်လၢအပူၤလီၤ. ဒီးအဝဲသ့ၣ် ဘၣ်တၢ်စံၣ်ညီၣ်အီၤ တဂၤစုာ်စုာ် ဒ်တၢ်လၢအဝဲသ့ၣ် မၤဝဲတဖၣ်အသိးလီၤ.+ ၁၄ ဒီးတၢ်သံဒီးတၢ်သွၣ်ခိၣ်န့ၣ် ဘၣ်တၢ်ကွံာ်လီၤအီၤလၢ နိၣ်မ့ၣ်အူအပူၤလီၤ.+ တၢ်လၢနိၣ်မ့ၣ်အူန့ၣ်+ အခီပညီမ့ၢ်ဝဲ တၢ်သံခံစုတစုလီၤ.+ ၁၅ ဒီးပှၤလၢ အမံၤတအိၣ်လၢ လံာ်မူအပူၤဘၣ်န့ၣ်+ တၢ်ကွံာ်လီၤအဝဲသ့ၣ်လၢ နိၣ်မ့ၣ်အူအပူၤလီၤ.+