၂ သ့းစၤလနံ
၁ ယၤ စီၤပီလူး, စီၤစံၤလဝ့နုၤ* ဒီးစီၤတံၤမသ့း+ ဆှၢလံာ်အံၤ ဆူဝ့ၢ်သ့းစၤလနံ အတၢ်အိၣ်ဖှိၣ် လၢအမ့ၢ် ပပၢ်ကစၢ်ယွၤ ဒီးကစၢ် ယ့ၣ်ၡူးခရံာ် အတၢ်အိၣ်ဖှိၣ်န့ၣ် အအိၣ်လီၤ.
၂ မ်သုဒိးန့ၢ်ဘၣ် တၢ်သးကညီၤ ဒိၣ်ဒိၣ်မုၢ်မုၢ် ဒီးတၢ်ဃူတၢ်ဖိးလၢ အဟဲလၢပၢ်ကစၢ်ယွၤ ဒီးကစၢ်ယ့ၣ်ၡူးခရံာ် အအိၣ်န့ၣ်တက့ၢ်.
၃ ဒီပုၢ်ဝဲၢ်သ့ၣ်ဧၢ, ပကဘၣ်စံးဘျုး ကစၢ်ယွၤလၢ သုဃိထီဘိလီၤ. ပမၤဒ်န့ၣ်န့ၣ် မ့ၢ်တၢ်လၢ အကြၢးဝဲဘၣ်ဝဲ, မ့ၢ်လၢ သုတၢ်နာ်ဒိၣ်ထီၣ်ဝဲဒိၣ်မး ဒီးသုကိးဂၤဒဲး အတၢ်အဲၣ်လိာ်သး တဂၤဒီးတဂၤ အါထီၣ်ဝဲအဃိလီၤ.+ ၄ ပပာ်ကဖၢလၢသးလၢသုဃိလၢ+ ကစၢ်ယွၤ အတၢ်အိၣ်ဖှိၣ်တဖၣ်အပူၤ, မ့ၢ်လၢ သုအိၣ်ဒီးတၢ်နာ် ဒီးတၢ်တူၢ်န့ၢ်ခီၣ်ကဲလၢ တၢ်နးတၢ်ဖှီၣ် ဒီးတၢ်ကီတၢ်ခဲလၢ သုတူၢ်ဘၣ်တဖၣ်ခဲလၢာ် အပူၤလီၤ.+ ၅ အဝဲအံၤ မ့ၢ်ဝဲတၢ်အုၣ်အသးလၢ ကစၢ်ယွၤ အတၢ်စံၣ်ညီၣ်န့ၣ် တီဝဲလီၤ. ဒီးလၢတၢ်ဂ့ၢ်အံၤအဃိ ကစၢ်ယွၤကပာ်ပနီၣ်သုလၢ ပှၤလၢအကြၢးဝဲဘၣ်ဝဲဒီး အဘီမုၢ်လီၤ. ဒီးသုတူၢ်ဘၣ်တၢ်နးတၢ်ဖှီၣ်လၢ တၢ်ဂ့ၢ်အဝဲန့ၣ်အဃိလီၤ.+
၆ ကစၢ်ယွၤန့ၣ် တီဝဲလိၤဝဲအဃိ အဝဲကဟ့ၣ်ကၣ်က့ၤ ပှၤလၢ အမၤနးမၤဖှီၣ်သုလၢ တၢ်နးတၢ်ဖှီၣ်လီၤ.+ ၇ မ့မ့ၢ်သုဝဲလၢ အဘၣ်တၢ်မၤနးမၤဖှီၣ်တဖၣ်န့ၣ် ဖဲတၢ်လီၣ်ဖျါထီၣ် ပကစၢ် ယ့ၣ်ၡူးအခါ+ တၢ်ကဟ့ၣ်လီၤသု တၢ်အိၣ်ဘှံးဃုာ်ဒီးပှၤလီၤ. အဝဲကဟဲလၢမူခိၣ် အိၣ်ဒီး အမူခိၣ်ကလူးတဖၣ် လၢအပှဲၤဒီးတၢ်စိတၢ်ကမီၤ+ ၈ လၢမ့ၣ်အူလၣ်အပူၤ ဒ်သိးကဟ့ၣ်ကၣ်က့ၤ ပှၤလၢ အတသ့ၣ်ညါကစၢ်ယွၤ ဒီးပှၤလၢအတဒိကနၣ် တၢ်သးခုကစီၣ် ဘၣ်ဃးဒီး ပကစၢ် ယ့ၣ်ၡူးလီၤ.+ ၉ ပှၤတဖၣ်န့ၣ် ကဘၣ်တၢ်စံၣ်ညီၣ်အဝဲသ့ၣ်လၢ တၢ်ဟးဂီၤလီၤထူလီၤယိာ်+ ဒီးတၢ်ကထုးကွံာ်အဝဲသ့ၣ်လၢ ကစၢ်ဒီးအတၢ်စိတၢ်ကမီၤ လၢအပှဲၤဒီးအလၤကပီၤ အမဲာ်ညါလီၤ. ၁၀ တၢ်ကမၤအသးဒ်အံၤန့ၣ် ဖဲဆၢကတီၢ်လၢ ကစၢ်ဟဲတုၤ ဒ်သိးအကဘၣ် တၢ်မၤလၤကပီၤအီၤ ဃုာ်ဒီး အပှၤစီဆှံတဖၣ်အဂီၢ်လီၤ. ဒီးဖဲမုၢ်နံၤအဝဲန့ၣ် ပှၤလၢအစူၢ်က့ၤနာ်က့ၤတၢ် ကိးဂၤဒဲး ကပာ်ဒိၣ်ပာ်ကဲအီၤလီၤ. ဒီးမ့ၢ်လၢ သုနာ် တၢ်လၢပတဲဘၣ်သုတဖၣ်အဃိ သုကပၣ်ဃုာ်လၢ အဝဲသ့ၣ်အကျါလီၤ.
၁၁ လၢတၢ်န့ၣ်အဃိ ပဃ့ထုကဖၣ်န့ၢ်တၢ်လၢ သုဂီၢ်ထီဘိ ဒ်သိးကစၢ်ယွၤ ကပာ်ပနီၣ်သုလၢ ပှၤလၢအကြၢးဝဲဘၣ်ဝဲဒီး အတၢ်ကိးန့ၢ်သုအဂီၢ်လီၤ.+ မ်ကစၢ်ယွၤသူ အစိအကမီၤလၢ အကမၤလၢထီၣ်ပှဲၤထီၣ် တၢ်ဂ့ၤလၢ အအဲၣ်ဒိးမၤဝဲခဲလၢာ် ဒီးမၤကဲထီၣ်လိၣ်ထီၣ် သုတၢ်မၤခဲလၢာ်လၢ သုမၤအီၤခီဖျိ သုတၢ်နာ်အဃိတက့ၢ်. ၁၂ ပဃ့ထုကဖၣ်ဒ်အံၤန့ၣ် မ့ၢ်ဒ်သိး ပကစၢ်ယ့ၣ်ၡူးအမံၤ ကဘၣ်တၢ်မၤလၤကပီၤအီၤ ခီဖျိလၢသု ဒီးသုကဒိးန့ၢ်ဘၣ် တၢ်လၤကပီၤ ခီဖျိလၢအီၤ ဒ်ပကစၢ်ယွၤ ဒီးကစၢ်ယ့ၣ်ၡူးခရံာ် အတၢ်သးကညီၤ ဒိၣ်ဒိၣ်မုၢ်မုၢ် အိၣ်ဝဲအသိးလီၤ.