စံးထီၣ်ပတြၢၤ
လၢတၢ်သူၣ်ဝံၣ်သးဆၢအခိၣ်အဂီၢ်. စီၤကိၤရး အဖိခွါတဖၣ်+ အထါသးဝံၣ်.
၄၉ ပှၤဂီၢ်မုၢ်ခဲလၢာ်သ့ၣ်ဧၢ, ဒိကနၣ် လၢအံၤတက့ၢ်.
ပှၤအိၣ်လၢ ဟီၣ်ခိၣ်ချၢခဲလၢာ်သ့ၣ်ဧၢ, ဒိကနၣ် လီၤတံၢ်လီၤဆဲးတက့ၢ်.
၂ ပှၤအဒိၣ်မ့ၢ်ဂ့ၤ, ပှၤအဆံးမ့ၢ်ဂ့ၤ,
ပှၤဖှီၣ်ဖိယာ်ဖိမ့ၢ်ဂ့ၤ, ပှၤထူးပှၤတီၤမ့ၢ်ဂ့ၤ ကနၣ်ကိးဂၤဒဲးတက့ၢ်.
၃ ယထးခိၣ် ကတဲတၢ်လၢတၢ်ကူၣ်သ့အပူၤ
ဒီးတၢ်လၢယဆိကမိၣ်ထံအီၤလၢ ယသးပူၤန့ၣ်+ ကပာ်ဖျါထီၣ် တၢ်သ့ၣ်ညါနၢ်ပၢၢ်လီၤ.
၄ ယကပာ်သူၣ်ပာ်သး တၢ်ကတိၤဒိတခါ,
ဖဲယဒ့တနၢ်အခါ ယကတဲဖျါထီၣ် ယတၢ်ကတိၤလီၤဘၢ အခီပညီလီၤ.
၅ ဖဲတၢ်ကီတၢ်ခဲအဆၢကတီၢ်
ဒီးဖဲပှၤလၢ အဂုာ်ကျဲးစၢး မၤနၢၤယၤတဖၣ် ကဝီၤဃာ်ယၤလၢ အတၢ်မၤလၢ အအၢအသီအခါ ယတပျံၤတၢ်ဘၣ်.+
၆ ပှၤလၢ အပာ်ဂံၢ်ပာ်ဘါ အတၢ်ထူးတၢ်တီၤ+
ဒီးပှၤလၢ အပာ်ကဖၢလၢသးလၢ အတၢ်ထူးတၢ်တီၤအါအဃိန့ၣ်+
၇ အဝဲသ့ၣ် တဂၤမးပှ့ၤက့ၤ အဒီပုၢ်ဝဲၢ် တသ့နီတဘျီဘၣ်.
ဒီးအဝဲသ့ၣ် ဟ့ၣ်တၢ်ပှ့ၤက့ၤလၢ အဒီပုၢ်ဝဲၢ်အဂီၢ် လၢကစၢ်ယွၤအအိၣ် တသ့ဘၣ်.+
၈ (တၢ်အပှ့ၤလၢ ကပှ့ၤက့ၤ အဝဲသ့ၣ်အသးသမူအဂီၢ်န့ၣ် အလုၢ်ဒိၣ်ပှ့ၤဒိၣ်ဝဲဒိၣ်မး
အဃိ အဝဲသ့ၣ် ဟ့ၣ်ထီၣ်တၢ်အပှ့ၤ တန့ၢ်နီတဘျီဘၣ်.)
၉ ဒီးဒ်သိးအဒီပုၢ်ဝဲၢ် ကအိၣ်မူဘၣ် လီၤထူလီၤယိာ် ဒီးအသုတထံၣ်ဘၣ် တၢ်ပူၤ* တဂ့ၤအဂီၢ် အဝဲသ့ၣ် ပှ့ၤက့ၤအီၤတန့ၢ်ဘၣ်.+
၁၀ အဝဲသ့ၣ်ထံၣ်ဝဲလၢ ပှၤကူၣ်တၢ်သ့ဒၣ်လဲာ်သံဝဲ
ဒီးပှၤဟးဂီၤဖိ ဒီးပှၤအသူၣ်တဆးသးတဆးဘၣ်န့ၣ် ဟးဂီၤဝဲတပူၤဃီ+
ဒီးပှၤသ့ၣ်တဖၣ်အံၤ ဘၣ်ပာ်တ့ၢ်ကွံာ် အတၢ်ထူးတၢ်တီၤလၢ ပှၤဂၤအဂီၢ်လီၤ.+
၁၁ ပှၤတဖၣ်အံၤ မုၢ်လၢ်လၢ အဟံၣ်တဖၣ် ကအိၣ်ဝဲလီၤထူလီၤယိာ်
ဒီးအဒဲတဖၣ် ကအိၣ်ဂၢၢ်ကျၢၤဝဲ တစိၤဝံၤတစိၤလီၤ.
အဝဲသ့ၣ် ကိးန့ၢ် အဟီၣ်ခိၣ်လီၢ်တဖၣ် ဒ်အနီၢ်ကစၢ်အမံၤ အိၣ်ဝဲအသိးလီၤ.
၁၂ ပှၤဟီၣ်ခိၣ်ဖိလၢ ပှၤပာ်ဒိၣ်ပာ်ကဲအီၤဒၣ်လဲာ် တဆဲးအိၣ်မူဘၣ် ယံာ်ယံာ်ဘၣ်.+
အဝဲသ့ၣ် တဂ့ၤဒိၣ်န့ၢ်ဒံး ဆၣ်ဖိကီၢ်ဖိလၢ အဘၣ်သံတဖၣ်ဘၣ်.+
၁၃ ပှၤဟးဂီၤဖိ+ ဒီးပှၤလၢအဘၣ်သူၣ်ဘၣ်သးအဝဲသ့ၣ် အတၢ်ကတိၤကလီကလီတဖၣ်
ဒီးပိာ်အဝဲသ့ၣ်အခံန့ၣ် အကျဲကကတၢၢ်ဒ်အံၤလီၤ. (စ့လၤ)
၁၄ တၢ်သံကကဲ ဒ်ပှၤကွၢ်သိတဂၤလၢ အဝဲသ့ၣ်အဂီၢ်
ဒီးအဝဲသ့ၣ် ကကဲဒ်သိတဖၣ်အသိး ဒီးကဘၣ်လဲၤလၢ တၢ်သွၣ်ခိၣ်လီၤ.*
လၢဂီၤခီန့ၣ် ပှၤတီပှၤလိၤ ကပၢအဝဲသ့ၣ်+
ဒီးအဝဲသ့ၣ်အစိၣ် ကလီၤအုၣ်လီၤကျၣ် လၢာ်လၢာ်ဆ့ဆ့+
ဒီးအဝဲသ့ၣ် အဟံၣ်တကဲဝဲနီ* လၢၤဘၣ်.+ တဘျီအံၤ အဝဲသ့ၣ် အဟံၣ်မ့ၢ်ဒၣ် တၢ်သွၣ်ခိၣ်လီၤ.+
၁၅ ဘၣ်ဆၣ် မ့မ့ၢ်ယၤန့ၣ် ကစၢ်ယွၤ ကမၤပူၤဖျဲးယၤ* လၢတၢ်သွၣ်ခိၣ်+ အစိအကမီၤ* အဖီလာ်လီၤ.
ဒီးအဝဲကထုးထီၣ်ကွံာ်ယၤ ဒ်သိးကဒီသဒၢယၤအဂီၢ်လီၤ. (စ့လၤ)
၁၆ တဘၣ်ပျံၤတၢ် ခီဖျိလၢ ပှၤတဂၤ ထူးထီၣ်တီၤထီၣ်အဃိ
ဒီးခီဖျိလၢ အဟံၣ်လီၤဘီလီၤမုၢ်ဒိၣ်ထီၣ် အဃိန့ၣ်တဂ့ၤ.
၁၇ ဖဲအဝဲသံအခါ အဝဲက့ၤစိာ်တၢ်တသ့ နီတမံၤဘၣ်.+
အဝဲက့ၤစိာ်ဃုာ်ဒီး အတၢ်ထူးတၢ်တီၤ တသ့ဘၣ်.+
၁၈ ဖဲအအိၣ်မူဒံးအဆၢကတီၢ် အပတြၢၤလီၤအသးလီၤ.+
(ဖဲနဘီၣ်ထီၣ်ညီထီၣ်အခါ ပှၤပတြၢၤနၤ.)+
၁၉ ဘၣ်ဆၣ် လၢခံကတၢၢ်န့ၣ် အဝဲကအိၣ်တပူၤဃီဒီး အမိၢ်ပၢ်ဖံဖု လၢပျၢၤတဖၣ်လီၤ.
ဒီးအဝဲသ့ၣ် တထံၣ်ဘၣ် တၢ်ကပီၤနီတဘျီလၢၤဘၣ်.
၂၀ ပှၤလၢ အတနၢ်ပၢၢ်တၢ်ဂ့ၢ်တခါအံၤဘၣ်န့ၣ် ပှၤမ့ၢ်ပာ်ဒိၣ်ပာ်ကဲအီၤ+ သနာ်က့
အတဂ့ၤဒိၣ်န့ၢ်ဒံး ဆၣ်ဖိကီၢ်ဖိလၢ အဘၣ်သံတဖၣ်ဘၣ်.