၁ ယိၤဟၣ်

၁ ပကွဲးန့ၢ်သု ဘၣ်ဃးဒီး တၢ်မူအကလုၢ်လၢ+ အအိၣ်ဝဲလၢ အခီၣ်ထံးတဂၤအဂ့ၢ်လီၤ. ပနၢ်ဟူတ့ၢ်အီၤ, ပထံၣ်ဘၣ်အီၤလၢ ပမဲာ်, ပကွၢ်ထံကွၢ်ဆးအီၤ ဒီးပပလၢၢ်ဘၣ်အီၤလၢ ပစုလီၤ. ၂ မ့ၢ်လီၤ, တၢ်မူန့ၣ် ဘၣ်တၢ်ပာ်ဖျါထီၣ်တ့ၢ်အီၤ ဒီးပထံၣ်လံ. ဒီးပအုၣ်ပသး+ ဒီးပတဲဖျါထီၣ်န့ၢ်သု ဘၣ်ဃးဒီး တၢ်မူအထူအယိာ်လၢ+ အဟဲလၢပၢ်ဒီးလၢအဘၣ် တၢ်ပာ်ဖျါထီၣ်အီၤလၢ ပအိၣ်လီၤ. ၃ တၢ်လၢ ပထံၣ်ဘၣ် ဒီးပနၢ်ဟူတ့ၢ်လံန့ၣ် ပတဲဖျါထီၣ်န့ၢ်သု+ ဒ်သိးသုဝဲစ့ၢ်ကီး သုကပၣ်ဃုာ်လၢ တၢ်ရ့လိာ်သးဒီးပှၤ အဂီၢ်လီၤ. ဒီးပတၢ်ရ့လိာ်သးအံၤ မ့ၢ်ဝဲပရ့လိာ်သးဒီးပၢ် ဒီးအဖိခွါယ့ၣ်ၡူးခရံာ်လီၤ.+ ၄ ဒီးပကွဲးတၢ်ဂ့ၢ်တဖၣ်အံၤ ဒ်သိးပကပှဲၤဒီးတၢ်သးခု အဂီၢ်လီၤ.

၅ ပကဒုးသ့ၣ်ညါသု တၢ်ကစီၣ်တခါလၢ ပနၢ်ဟူဘၣ်လၢ ယ့ၣ်ၡူးအအိၣ်လီၤ. ကစၢ်ယွၤမ့ၢ်ဝဲ တၢ်ကပီၤ+ ဒီးတၢ်ခံးတအိၣ်လၢ အပူၤ နီတစဲးဘၣ်. ၆ ပမ့ၢ်တဲလၢ “ပအိၣ်ဒီး တၢ်ရ့လိာ်သးဒီးအီၤလံ” ဘၣ်ဆၣ် ပမ့ၢ်ဆဲးလဲၤတၢ်လၢ တၢ်ခံးကျါန့ၣ် မ့ၢ်ဒၣ် ပလံၣ်တၢ်လီတၢ် ဒီးပတအိၣ်မူမၤထွဲ တၢ်မ့ၢ်တၢ်တီဘၣ်.+ ၇ ဘၣ်ဆၣ် ပမ့ၢ်လဲၤတၢ်လၢ တၢ်ကပီၤအကျါ ဒ်အနီၢ်ကစၢ်ဒၣ်ဝဲ အိၣ်လၢ တၢ်ကပီၤအကျါအသိးန့ၣ် ပအိၣ်ဒီးတၢ်ရ့လိာ်သး တဂၤဒီးတဂၤ ဒီးအဖိခွါယ့ၣ်ၡူးအသွံၣ်န့ၣ် သ့စီကွံာ် ပတၢ်ဒဲးဘးခဲလၢာ်လီၤ.+

၈ ပမ့ၢ်တဲလၢ “ပတၢ်ဒဲးဘးတအိၣ်ဘၣ်” န့ၣ် မ့ၢ်ဝဲပလံၣ်န့ၢ်လီန့ၢ် ပနီၢ်ကစၢ်အသး+ ဒီးတၢ်မ့ၢ်တၢ်တီ တအိၣ်လၢ ပသးပူၤဘၣ်. ၉ ကစၢ်ယွၤ မ့ၢ်ပှၤလၢအသးတီ ဒီးတီဝဲလိၤဝဲအဃိ ပမ့ၢ်အၢၣ်လီၤ ပတၢ်ဒဲးဘးန့ၣ် အဝဲကပျၢ်ကွံာ် ပတၢ်ကမၣ် ဒီးသ့စီကွံာ် ပတၢ်ဒဲးဘး ကိးမံၤဒဲးလီၤ.+ ၁၀ ပမ့ၢ်တဲလၢ “ပတမၤဘၣ် တၢ်ဒဲးဘးဘၣ်” န့ၣ်လီၤဂာ်လၢ ပဒုးကဲထီၣ် ကစၢ်ယွၤလၢ ပှၤလံၣ်တၢ်လီတၢ်တဂၤ ဒီးအကလုၢ်ကထါ တအိၣ်လၢပသးပူၤဘၣ်.