ယိၤနါ
၁ ယဟိဝၤယွၤ တဲဘၣ် စီၤအမံးတဲၤအဖိခွါ စီၤယိၤနါလၢ*+ ၂ “ဂဲၤဆၢထၢၣ် ဒီးလဲၤလၢ ဝ့ၢ်နံၤနဝ့+ လၢအမ့ၢ်ဝ့ၢ်ဖးဒိၣ်တဖျၢၣ် ဒီးတဲဘၣ်အီၤလၢ တၢ်ကစံၣ်ညီၣ်အဝဲသ့ၣ် မ့ၢ်လၢ ယထံၣ်ဘၣ် အဝဲသ့ၣ် အတၢ်အၢတၢ်သီ အဃိလီၤ.”
၃ ဒီးစီၤယိၤနါ ကလဲၤလၢ ဝ့ၢ်တၢ်ၡံၣ် ဒ်သိးကဃ့ၢ်ဟးထီၣ်ကွံာ်လၢ ယဟိဝၤယွၤ အအိၣ်အဂီၢ်လီၤ. အဝဲလဲၤလီၤလၢ ယၤဖိၤ ကဘီသန့ ဒီးထံၣ်ဝဲ ကဘီတဘ့ၣ် လၢကလဲၤလၢ ဝ့ၢ်တၢ်ၡံၣ်လီၤ. ဒ်သိးအကဃ့ၢ်ယံၤထီၣ်ဒီး ယဟိဝၤယွၤအဂီၢ် အဝဲဟ့ၣ်လီၤ ကဘီအပှ့ၤ ဒီးဒိးထီၣ်ကဘီ ဒီးလဲၤပိာ်ပှၤခံ လၢဝ့ၢ်တၢ်ၡံၣ်လီၤ.
၄ အဃိ ယဟိဝၤယွၤ ဒုးဟဲကလံၤဆူၣ်ဆူၣ် လၢပီၣ်လဲၣ်ပူၤ ဒီးမ့ၢ်လၢကလံၤမုၢ်ဟဲ ဆူၣ်ဒိၣ်မးအဃိ ကဘီတဘ့ၣ်အံၤ ဘူးကဟးဂီၤဝဲလီၤ. ၅ ဒီးပှၤကဘီဖိန့ၣ် ပျံၤတၢ်ဒိၣ်မးအဃိ အဝဲသ့ၣ် တဂၤစုာ်စုာ် ကိးထီၣ်အယွၤ လၢကမၤစၢၤအီၤအဂီၢ်လီၤ. ဒီးတၢ်ဖိတၢ်လံၤလၢ အအိၣ်လၢ ကဘီပူၤန့ၣ် အဝဲသ့ၣ် တၢၤလီၤဝဲလၢ ပီၣ်လဲၣ်ပူၤ ဒ်သိး ကဘီကဖှံလီၤအဂီၢ်လီၤ.+ ဘၣ်ဆၣ် မ့မ့ၢ် စီၤယိၤနါန့ၣ် အဝဲလဲၤလီၤလၢ ကဘီအဒၢးပူၤ ဒီးမံနီၤဝဲ ဒီးမံဘၣ်အသးလီၤ. ၆ ဒီးကဘီခိၣ် လဲၤလၢအအိၣ် ဒီးတဲအီၤလၢ “ဘၣ်မနုၤအဃိလၢ နမံလဲၣ်. ဂဲၤဆၢထၢၣ် ကိးထီၣ်နကစၢ်ယွၤမီၤ. ဘၣ်သ့ၣ်သ့ၣ် ကစၢ်ယွၤလၢ အမ့ၢ်အတီတဂၤ ကသးကညီၤပှၤဒီး ပတတုၤလၢ တၢ်ဟးဂီၤဘၣ်.”+
၇ ဒီးအဝဲသ့ၣ် တဲလိာ်အသးလၢ “ပကကွံာ်လီၤတၢ်ဖး+ ဒ်သိး ပကသ့ၣ်ညါဘၣ်လၢ တၢ်ကီတၢ်ခဲအံၤ ဟဲအိၣ်ထီၣ်လၢ မတဂၤအဃိလဲၣ်.” အဃိ အဝဲသ့ၣ် ကွံာ်လီၤတၢ်ဖး ဒီးတၢ်ဖးလီၤဘၣ် စီၤယိၤနါလီၤ.+ ၈ အဝဲသ့ၣ် တဲအီၤလၢ “တၢ်ကီတၢ်ခဲလၢ အဘၣ်ပှၤအံၤ မ့ၢ်လၢမတဂၤအဃိလဲၣ်. နမၤတၢ်မၤ မနုၤလဲၣ်. ဒီးနဟဲလၢ တၢ်လီၢ်ဖဲလဲၣ်. နထံကီၢ်အိၣ်ဖဲလဲၣ် ဒီးနကဲကလုာ် မနုၤလဲၣ်. ဝံသးစူၤ တဲဘၣ်ပှၤသၢၤ.”
၉ စီၤယိၤနါ တဲဆၢဝဲလၢ “ယမ့ၢ် ပှၤဧ့ၤဘြံၤဖိ ဒီးယဘူၣ်ထီၣ်ဘါထီၣ် မူခိၣ်အကစၢ် ယဟိဝၤယွၤ လၢအမ့ၢ် ပှၤတဂၤလၢ အတ့လီၤ ပီၣ်လဲၣ် ဒီးဟီၣ်ခိၣ်လီၤ.”
၁၀ လၢတၢ်ဂ့ၢ်အံၤအဃိ ပှၤသ့ၣ်တဖၣ်န့ၣ် ပျံၤတၢ်ဒိၣ်ထီၣ် ဒီးအဝဲသ့ၣ် သံကွၢ်အီၤလၢ “နမၤဘၣ်တၢ်မနုၤလဲၣ်.” (မ့ၢ်လၢစီၤယိၤနါ တဲဘၣ်အဝဲသ့ၣ် အဃိ အဝဲသ့ၣ် သ့ၣ်ညါထီၣ်လၢ စီၤယိၤနါ ဃ့ၢ်ယံၤထီၣ်ဒီး ယဟိဝၤယွၤလီၤ.) ၁၁ မ့ၢ်လၢ ပီၣ်လဲၣ်အလပီတဖၣ် ဒိၣ်ထီၣ်ဝဲ ကွ့ၢ်ကွ့ၢ်အဃိ အဝဲသ့ၣ်သံကွၢ်အီၤလၢ “ဒ်သိး ပီၣ်လဲၣ်ကဂၢၢ်ထီၣ်အဂီၢ် ပကဘၣ်မၤနၤဒ်လဲၣ်.” ၁၂ စီၤယိၤနါ တဲဆၢဝဲလၢ “စိာ်ထီၣ်ယၤ ဒီးကွံာ်လီၤယၤလၢ ပီၣ်လဲၣ်ပူၤဟီ. ဒီးပီၣ်လဲၣ် ကအိၣ်ဂၢၢ်ဝဲ လၢသုဂီၢ်လီၤ. ယသ့ၣ်ညါလၢ ကလံၤမုၢ်လၢအဆူၣ်အံၤ ဟဲဘၣ်သုန့ၣ် မ့ၢ်လၢယဃိလီၤ.” ၁၃ မ့ၢ်လၢ ပီၣ်လဲၣ်အလပီတဖၣ်န့ၣ် ဟဲဆူၣ်ထီၣ်ဝဲကွ့ၢ်ကွ့ၢ် အဃိ ပှၤတဖၣ်န့ၣ် ဝၢ်ဝဲအကဘီဆူၣ်ဆူၣ် ဒ်သိး ကတုၤလၢ ခိသူခိၣ်အဂီၢ် ဘၣ်ဆၣ် အဝဲသ့ၣ် မၤဝဲတန့ၢ်ဘၣ်.
၁၄ အဝဲသ့ၣ်ကိးထီၣ် ယဟိဝၤယွၤ ဒီးတဲဝဲလၢ “အိ ယဟိဝၤယွၤဧၢ, ဝံသးစူၤ မ်ပသုတသံလၢ ပှၤတဂၤအံၤအဃိတဂ့ၤ. အိ ယဟိဝၤယွၤဧၢ, မ့ၢ်လၢ ပမၤဒ် နတၢ်ဘၣ်သးအသိး အဃိ တဘၣ်ဟံးပှၤအရ့လၢ ပှၤလၢအတၢ်ကမၣ် တအိၣ်ဘၣ်တဂၤအံၤ ကသံ* အဃိတဂ့ၤ.” ၁၅ အဝဲသ့ၣ် စိာ်ထီၣ် စီၤယိၤနါ ဒီးတၢၤလီၤအီၤလၢ ပီၣ်လဲၣ်ပူၤ ဒီးပီၣ်လဲၣ် အိၣ်ဂၢၢ်ထီၣ်က့ၤလီၤ. ၁၆ ဒီးအဝဲသ့ၣ်န့ၣ် ပျံၤယဟိဝၤယွၤဒိၣ်မး+ ဒီးအဝဲသ့ၣ် လုၢ်ထီၣ်တၢ်လၢ ယဟိဝၤယွၤအအိၣ် ဒီးမၤဝဲ တၢ်အၢၣ်လီၤတဖၣ်လီၤ.
၁၇ ဒီးယဟိဝၤယွၤ ဆှၢလီၤညၣ်ဖးဒိၣ်တဘ့ၣ် ဒ်သိးကယူၢ်လီၤ စီၤယိၤနါအဂီၢ်လီၤ. ဒီးစီၤယိၤနါ ဘၣ်အိၣ်ဝဲလၢ ညၣ်အဟၢဖၢပူၤ သၢနံၤဒီးသၢနၤလီၤ.+