ယူဒၤ
၁ ယၤ, စီၤယူဒၤ လၢအမ့ၢ် ယ့ၣ်ၡူးခရံာ်အကုၢ် ဒီးစီၤယၤကိာ်+ အဒီပုၢ်ဝဲၢ်ခွါန့ၣ် ကွဲးလံာ်အံၤဆူပှၤလၢ အဘၣ်တၢ်ကိးန့ၢ်အီၤတဖၣ်+ အအိၣ်လီၤ. သုမ့ၢ်ပှၤလၢ ပၢ်ကစၢ်ယွၤ အဲၣ်ဘၣ်ဝဲဒီး ဒီသဒၢဝဲလၢ ယ့ၣ်ၡူးခရံာ်အဂီၢ်လီၤ.+
၂ မ်သုဒိးန့ၢ်အါထီၣ် တၢ်သးကညီၤ, တၢ်ဃူတၢ်ဖိး ဒီးတၢ်အဲၣ်တၢ်ကွံတက့ၢ်.
၃ ဒီပုၢ်ဝဲၢ်သးဘိသ့ၣ်ဧၢ, လၢအပူၤကွံာ်န့ၣ် ယသးဆူၣ်လၢ ယကကွဲးန့ၢ်သု ဘၣ်ဃးဒီး တၢ်အုၣ်က့ၤခီၣ်က့ၤလၢ အကဲဘျုးလၢ ပဝဲခဲလၢာ်အဂီၢ်လီၤ.+ ဘၣ်ဆၣ် ယထံၣ်လၢ အလီၢ်အိၣ်လၢ ယကကွဲး ဘၣ်ဃးဒီးတၢ်နာ်လၢ အဘၣ်တၢ်ဟ့ၣ်လီၤ ပှၤစီဆှံတဖၣ် ထဲတဘျီ ဒီးဟ့ၣ်သဆၣ်ထီၣ်သု ဒ်သိးသုကဒုးတၢ်ဆူၣ်ဆူၣ်လၢ ကဒီသဒၢတၢ်နာ်အံၤ အဂီၢ်လီၤ.+ ၄ ခီဖျိလၢ ပိာ်ခွါတနီၤနီၤလၢ တၢ်ကွဲးအသးတဖၣ် ပာ်ပနီၣ်အဝဲသ့ၣ် လၢပျၢၤလံၤလံၤ လၢတၢ်စံၣ်ညီၣ်အံၤအဂီၢ်န့ၣ် ဟဲနုာ်လီၤ ကစုဒုလၢသုကျါအဃိ ယကွဲးန့ၢ်သု လံာ်ပရၢအံၤလီၤ. အဝဲသ့ၣ်မ့ၢ်ပှၤလၢ အတယူးတယီၣ်ယွၤဘၣ်. ဘၣ်ဃးဒီးကစၢ်ယွၤ အတၢ်သးကညီၤ ဒိၣ်ဒိၣ်မုၢ်မုၢ်န့ၣ် အဝဲသ့ၣ်သူဝဲ လၢကတဲပူၤဖျဲးအသးလၢ ကမၤတၢ်ကမၣ်လၢ တအိၣ်ဒီး တၢ်မဲာ်ဆှးဘၣ်အဂီၢ်*+ ဒီးအဝဲသ့ၣ် ပာ်ဖျါထီၣ်ဝဲလၢ အဝဲသ့ၣ်တတီဒီး ပကစၢ်ထဲတဂၤ လၢအမ့ၢ်ယ့ၣ်ၡူးခရံာ်လၢ+ အပှ့ၤပှၤန့ၣ်ဘၣ်.
၅ သုသ့ၣ်ညါ တၢ်ဂ့ၢ်တဖၣ်အံၤ ခဲလၢာ်ဂ့ၤဂ့ၤလံ. ဘၣ်ဆၣ် ယအဲၣ်ဒိး ဒုးသ့ၣ်နီၣ်ထီၣ်က့ၤသုလၢ ယဟိဝၤယွၤ* မၤပူၤဖျဲးထီၣ် အပှၤဂီၢ်မုၢ်တဖၣ်လၢ ကီၢ်အဲၤကူပတူးအပူၤလီၤ.+ ဘၣ်ဆၣ် ဖဲန့ၣ်ဝံၤအလီၢ်ခံ အဝဲမၤဟးဂီၤကွံာ်ဝဲ ပှၤလၢအတၢ်နာ် တအိၣ်ဘၣ်တဖၣ်န့ၣ်လီၤ.+ ၆ ဒီးမူခိၣ်ကလူးတဖၣ်လၢ အတဟံးဃာ် အလီၢ်အလၤလၢ အခီၣ်ထံးဘၣ် ဒီးပာ်တ့ၢ်ကွံာ် အတၢ်အိၣ်တၢ်ဆိးအလီၢ်လၢ အကြၢးဝဲဘၣ်ဝဲန့ၣ်+ ကစၢ်ယွၤစၢဃာ် အဝဲသ့ၣ် လီၤထူလီၤယိာ် လၢတၢ်ခံးသူအပူၤလၢ မုၢ်နံၤဖးဒိၣ် အတၢ်စံၣ်ညီၣ် အဂီၢ်လီၤ.+ ၇ ဒ်န့ၣ်အသိး ဝ့ၢ်စဒိၣ် ဒီးဝ့ၢ်ဂမိရၤ ဒီးဝ့ၢ်လၢ အခိၣ်အဃၢၤတဖၣ် ဟ့ၣ်လီၤကွံာ်အသးလၢ ကမၤကမၣ်မုၣ်ကမၣ်ခွါ* လၢအအၢအသီဒိၣ်မး ဒီးလူၤတၢ်ဖံးတၢ်ညၣ် အတၢ်သူၣ်လီသးကွံလၢ အထီဒါလိာ်သးဒီးန့ဆၢၣ်လီၤ.+ ဒီးတၢ်စံၣ်ညီၣ်အဝဲသ့ၣ်လၢ မ့ၣ်အူအထူအယိာ်အဃိ+ ကဲထီၣ်တၢ်အဒိအတဲာ်လၢ အဟ့ၣ်ပလီၢ်ပှၤလီၤ.
၈ မ့မ့ၢ် ပှၤလၢအဟဲနုာ်လီၤ ကစုဒုလၢသုကျါန့ၣ် မံမီၢ်တၢ်ထီဘိ, မၤဘၣ်အၢ အနီၢ်ကစၢ်ဒီးပှၤဂၤ, ဆိကမိၣ်ဆံး ပှၤလၢအအိၣ်ဒီး တၢ်စိတၢ်ကမီၤတဖၣ် ဒီးဒုၣ်ဒွဲၣ်စံးအၢ ပှၤလၢအအိၣ်ဒီး အလၤအကပီၤတဖၣ်လီၤ.+ ၉ ဘၣ်ဆၣ် ဖဲမူခိၣ်ကလူးအခိၣ်+ မံၤက့လး+ တဲအါလိာ်အသးဒီး မုၣ်ကီၤလံၢ် ဘၣ်ဃးဒီး စီၤမိၤၡ့ အစိၣ်အဂ့ၢ်အခါ+ အဝဲစံၣ်ညီၣ် မုၣ်ကီၤလံၢ်လၢ တၢ်ဒုၣ်ဒွဲၣ်စံးအၢအပူၤ တဘူၣ်ဘၣ်.+ လၢတၢ်န့ၣ်အလီၢ် အဝဲတဲဝဲလၢ “မ်ယဟိဝၤယွၤ သိၣ်ဃီၣ်နၤတက့ၢ်.”+ ၁၀ ဘၣ်ဆၣ် ကယဲၢ်တၢ်လၢ ပိာ်ခွါတဖၣ်အံၤ ဒုၣ်ဒွဲၣ်စံးအၢဝဲတဖၣ်န့ၣ် မ့ၢ်တၢ်လၢအဝဲသ့ၣ် တနၢ်ပၢၢ်ဝဲဘၣ်.+ ဒီးအဝဲသ့ၣ် လီၤဂာ်ဒီး ဆၣ်ဖိကီၢ်ဖိလၢ အပဲာ်ထံနီၤဖးတၢ် တဘၣ်ဘၣ်တဖၣ်လီၤ.+ တၢ်ခဲလၢာ်လၢ အဝဲသ့ၣ်မၤဝဲန့ၣ် လီၤဂာ်ဒ်သိးဒီး ဆၣ်ဖိကီၢ်ဖိ အလုၢ်လၢ်သကဲာ်ပဝး အဃိ အဝဲသ့ၣ် မၤဘၣ်အၢလီၤ အနီၢ်ကစၢ်အသးလီၤ.
၁၁ လီၤသးအုးလၢ အဝဲသ့ၣ်အဂီၢ်ဒိၣ်မး မ့ၢ်လၢအဝဲသ့ၣ်ပိာ်ဝဲ စီၤကၤယံၣ်အကျဲလီၤ.+ ဒီးဒ်သိး အဝဲသ့ၣ်ကန့ၢ်ဘၣ် ခိၣ်ဖးအဂီၢ် အဝဲသ့ၣ် လဲၤသဖှိနုာ်လီၤလၢ စီၤဘံးလၣ်အကျဲလၢအကမၣ်+ ဒီးအဝဲသ့ၣ်ဟးဂီၤဝဲ မ့ၢ်လၢ အဝဲသ့ၣ်တဲတၢ်လၢ အထီဒါတၢ်+ ဒ်စီၤကိၤရးအသိး+ အဃိလီၤ. ၁၂ ဖဲအဝဲသ့ၣ် အီၣ်သကိး အီသကိးတၢ်ဒီးသုလၢ သုတၢ်အဲၣ်အမူးတဖၣ်အခါ+ အဝဲသ့ၣ်လီၤဂာ်ဒ်သိးဒီး လၢၢ်တဖၣ်လၢ အအိၣ်ခူသူၣ်လၢ ထံဖီလာ်, ပှၤကွၢ်သိတဖၣ်လၢ အတၢ်မဲာ်ဆှးတအိၣ်ဘၣ်လၢ+ အဆိကမိၣ်ထဲအနီၢ်ကစၢ်အဂီၢ်,* တၢ်အၢၣ်တဖၣ်လၢ ကလံၤဆှၢကဒံဆှၢကဒါအီၤဒီး+ အတဒုးစူၤလီၤတၢ်ဘၣ်, သ့ၣ်တဖၣ်လၢ အတသၣ်ထီၣ်ဘၣ်လၢ အဆၢကတီၢ်ဒၣ်ဝဲဘၣ်လၢ အသံကွံာ်ဝဲဒီတထူၣ်* ဒီးဘၣ်တၢ်ထဲးထီၣ်ကွံာ်အီၤဃုာ်ဒီး အဂံၢ်လီၤ. ၁၃ ပှၤတဖၣ်အံၤ လီၤဂာ်ဒ်သိးဒီး ပီၣ်လဲၣ်အလပီလၢ အတပျုာ်တပျီၤလၢ အကွံာ်ထီၣ်အသဘှဲ လၢအမ့ၢ် တၢ်လၢအလီၤမဲာ်ဆှးလၢ အဝဲသ့ၣ်အဂီၢ်လီၤ.+ ဒီးအဝဲသ့ၣ် လီၤဂာ်ဒ်သိးဒီး ဆၣ်လၢအတလဲၤတၢ်လၢ အကျိၤအကျဲဘၣ်လၢ အကဘၣ်တၢ်ပာ်လီၤအီၤလၢ တၢ်လီၢ်ခံးသူဒိၣ်ကတၢၢ် လီၤထူလီၤယိာ်လီၤ.*+
၁၄ စီၤဃနိာ်+ လၢအမ့ၢ် ပှၤနွံဂၤတဂၤလၢ စီၤအၤဒၣ်အလီၢ်ခံန့ၣ် တဲဝဲဝံအတၢ်စံးပာ်လၢ အဘၣ်ဃးဒီးအဝဲသ့ၣ်လီၤ. အဝဲတဲဝဲလၢ “ကွၢ်မီၤ, ယဟိဝၤယွၤကဟဲဒီး အမူခိၣ်ကလူးစီဆှံ လၢအကလးတဖၣ်+ ၁၅ ဒ်သိးကစံၣ်ညီၣ် ပှၤခဲလၢာ်+ ဒီးပာ်ဖျါထီၣ် ပှၤတၢ်ဒဲးဘးဖိလၢ အတယူးယီၣ်အီၤဘၣ် ကိးဂၤဒဲးန့ၣ် အတၢ်ကမၣ်အဂီၢ်လီၤ. ကစၢ်ယွၤကမၤဒ်အံၤ မ့ၢ်လၢ ပှၤလၢအတယူးတယီၣ်ယွၤဘၣ်န့ၣ် မၤကမၣ်တၢ်လၢ ကျဲလၢ အပာ်ဖျါထီၣ် တၢ်တယူးတယီၣ်ယွၤဘၣ်အဃိ ဒီးမ့ၢ်လၢ အဝဲသ့ၣ်တဲတၢ်လၢ အလီၤကမၢကမၣ်လၢ အထီဒါအီၤ အဃိလီၤ.”+
၁၆ ပိာ်ခွါတဖၣ်အံၤ မ့ၢ်ပှၤလၢ အကဒူးကဒ့ၣ်တၢ်+ ဒီးအသးတမံဒီး တၢ်လၢအိၣ်ဒီးအဝဲသ့ၣ်လၢ အတၢ်အိၣ်မူအပူၤဘၣ်. အဝဲသ့ၣ် မၤပိာ်ထွဲဒ်အနီၢ်ကစၢ် အတၢ်သူၣ်လီသးကွံအသိး,+ အဝဲသ့ၣ် တဲဂ့ၤလီၤအသး ဒီးဟးပတြၢၤပှၤဂၤလၢ အဝဲသ့ၣ်အနီၢ်ကစၢ် အဘျုးအဂီၢ်လီၤ.+
၁၇ ဒီပုၢ်ဝဲၢ်သးဘိသ့ၣ်ဧၢ, မ့မ့ၢ်သုန့ၣ် သ့ၣ်နီၣ်ထီၣ်က့ၤ တၢ်ကတိၤလၢ ပကစၢ်ယ့ၣ်ၡူးခရံာ် အတၢ်မၢဖိတဖၣ် တဲဆိပာ်ဝဲန့ၣ်တက့ၢ်. ၁၈ လၢညါ အဝဲသ့ၣ်တဲသုလၢ “လၢမုၢ်နံၤခံကတၢၢ်န့ၣ် ပှၤလၢအဒုၣ်ဒွဲၣ်စံးအၢတၢ်တဖၣ် ကမၤထွဲဝဲ အနီၢ်ကစၢ် အတၢ်သူၣ်လီသးကွံလၢ အအၢအသီလီၤ.”+ ၁၉ အဝဲသ့ၣ်မ့ၢ်ပှၤလၢ အဒုးအိၣ်ထီၣ် တၢ်လီၤမုၢ်လီၤဖး,+ အဝဲသ့ၣ် မၤထီၣ်အသး ဒ်ဆၣ်ဖိကီၢ်ဖိအသိး ဒီးကစၢ်ယွၤ အသးစီဆှံ တအိၣ်ဒီးအဝဲသ့ၣ်ဘၣ်. ၂၀ ဒီပုၢ်ဝဲၢ်သးဘိသ့ၣ်ဧၢ, မ့မ့ၢ်သုန့ၣ် မၤဂၢၢ်ကျၢၤထီၣ် သုနီၢ်ကစၢ်အသး ခီဖျိလၢ သုတၢ်နာ်စီဆှံကတၢၢ် ဒီးဃ့ထုကဖၣ်တၢ်လၢ သးစီဆှံအတၢ်ဟံးစုနဲၣ်ကျဲ+ အဖီလာ် ၂၁ ဒ်သိးသုကဆဲးအိၣ်လၢ ကစၢ်ယွၤ အတၢ်အဲၣ်တၢ်ကွံအပူၤ+ အဂီၢ်တက့ၢ်. ဒီးတကတီၢ်ဃီန့ၣ် ခိးကွၢ်လၢ် ကစၢ်ယ့ၣ်ၡူးခရံာ် အတၢ်သးကညီၤလၢ အကဒုးအိၣ်ထီၣ်ကျဲ ဒ်သိးသုကန့ၢ်ဘၣ် တၢ်မူအထူအယိာ်အဂီၢ်တက့ၢ်.+ ၂၂ ဒီးပှၤတနီၤနီၤလၢ အသးဒ့ဒီန့ၣ်+ ဆဲးပာ်ဖျါထီၣ် တၢ်သးကညီၤလၢ+ အဝဲသ့ၣ်အဖီခိၣ်တက့ၢ်. ၂၃ မၤပူၤဖျဲး အဝဲသ့ၣ်ခီဖျိ+ ထုးထီၣ်ကွံာ်အဝဲသ့ၣ်လၢ တၢ်ဟးဂီၤ* အပူၤတက့ၢ်. မ့မ့ၢ် ပှၤအဂၤတဖၣ်န့ၣ် ဆဲးပာ်ဖျါထီၣ် တၢ်သးကညီၤ လၢအဝဲသ့ၣ်အဖီခိၣ်လၢ တၢ်ပျံၤတၢ်ဖုးအပူၤတက့ၢ်. တကတီၢ်ဃီန့ၣ် သးဟ့လုၢ်လၢ်သကဲာ်ပဝးလၢ အဘၣ်အၢဘၣ်သီ ခီဖျိလၢ တၢ်ဒဲးဘးအဃိ* န့ၣ်တက့ၢ်.+
၂၄ ကစၢ်ယွၤ ဒီသဒၢသု ဒ်သိးသုသု တလီၤဃံၢ်တဂ့ၤအဂီၢ် ဒီးဒုးဆၢထၢၣ်သု ဒ်ပှၤလၢ အကဆှီအသိးလၢ+ အလၤကပီၤအမဲာ်ညါ ပှဲၤဒီးတၢ်သးခု ဒိၣ်ဒိၣ်မုၢ်မုၢ်န့ၣ် သ့ဝဲလီၤ. ၂၅ ကစၢ်ယွၤထဲတဂၤ လၢအမ့ၢ် ပှၤလၢအအုၣ်က့ၤခီၣ်က့ၤပှၤ ခီဖျိလၢ ပကစၢ်ယ့ၣ်ၡူးခရံာ်န့ၣ် မ်အဝဲအိၣ်ဒီး တၢ်လၤကပီၤ, တၢ်ကဟုကညီၢ်, တၢ်ဂံၢ်တၢ်ဘါ ဒီးတၢ်စိတၢ်ကမီၤ လီၤထူလီၤယိာ်, လၢအပူၤကွံာ်မ့ၢ်ဂ့ၤ, အခဲအံၤမ့ၢ်ဂ့ၤ ဒီးဆူညါအစိၤစိၤ အဃၣ်ဃၣ်တက့ၢ်. အၤမ့ၣ်.