ယိၤဟၣ်

၅ တၢ်န့ၣ်ဝံၤအလီၢ်ခံ ပှၤယူဒၤဖိ အဘူၣ်ဘၣ်ဝဲ+ ဒီးယ့ၣ်ၡူး လဲၤထီၣ်လၢ ဝ့ၢ်ယရူၤၡလ့ၣ်လီၤ. ၂ ဒီးလၢဝ့ၢ်ယရူၤၡလ့ၣ်အပူၤ ဖဲသိတြဲၤအကပၤန့ၣ်+ ကမါအိၣ်ဝဲတဖျၢၣ်​ ဒီးလၢဧ့ၤဘြံၤကျိာ်န့ၣ်​ ပှၤကိးအီၤလၢ ဘ့ၤသ့းစဒါ လီၤ. ကမါအံၤအိၣ်ဒီး ကျဲယဲၢ်ဘိလၢ အိၣ်ဒီးအခိၣ်ဒုးလီၤ. ၃ ဖဲန့ၣ်န့ၣ်​ ပှၤဂီၢ်မုၢ်လၢ အဆိးက့, အမဲာ်တထံၣ်တၢ်, အခီၣ်ဟးဂီၤ ဒီးအစုသံခီၣ်သံတဖၣ်* မံနီၤဝဲလီၤ. ၄ *— ၅ ဒီးပိာ်ခွါလၢ အဆိးက့န့ၢ်ဝဲ ၃၈ နံၣ်တဂၤ အိၣ်ဝဲဖဲန့ၣ်လီၤ. ၆ ယ့ၣ်ၡူးထံၣ်ဝဲ ပှၤတဂၤန့ၣ်​ မံနီၤဖဲန့ၣ်ဒီး သ့ၣ်ညါဝဲလၢ အဆိးက့န့ၢ်ဝဲ ဖးယံာ်လံအဃိ သံကွၢ်အီၤလၢ “နအဲၣ်ဒိး အိၣ်ဆူၣ်ထီၣ်က့ၤဧါ.”+ ၇ ပှၤလၢ အဆိးက့တဂၤန့ၣ်​ တဲဆၢအီၤလၢ “ကစၢ်ဧၢ, ဖဲထံဟူးထီၣ်အခါ ပှၤလၢ ကလဲၤစိာ်လီၤယၤလၢ ကမါပူၤ တအိၣ်နီတဂၤဘၣ်. ဒီးဖဲယလဲၤ လၢကျဲအခါ ပှၤအဂၤ လဲၤလီၤဆိလၢယမဲာ်ညါလီၤ.” ၈ ယ့ၣ်ၡူး တဲအီၤလၢ “ဂဲၤဆၢထၢၣ်​ ဟံးထီၣ်နလီၢ်မံဒီး ဟးတက့ၢ်.”+ ၉ ဒီးပှၤတဂၤန့ၣ်​ အိၣ်ဆူၣ်ထီၣ်က့ၤဝဲ တဘျီဃီဒီး ဟံးထီၣ်အလီၢ်မံ ဒီးဟးဝဲလီၤ.

တၢ်တနံၤန့ၣ်​ မ့ၢ်ဝဲမုၢ်အိၣ်ဘှံးနံၤလီၤ. ၁၀ အဃိ ပှၤယူဒၤဖိတဖၣ်​ တဲဝဲပှၤလၢ အတၢ်ဆါဘျါကွံာ် တဂၤန့ၣ်လၢ “တနံၤအံၤမ့ၢ်ဝဲ မုၢ်အိၣ်ဘှံးနံၤအဃိ နတကြၢးစိာ် နလီၢ်မံဘၣ်.”+ ၁၁ ဘၣ်ဆၣ်​ အဝဲတဲဆၢက့ၤ အဝဲသ့ၣ်လၢ “ပှၤတဂၤလၢ အမၤဘျါက့ၤယၤန့ၣ်​ တဲယၤလၢ ‘ဟံးထီၣ်နလီၢ်မံ ဒီးဟးတက့ၢ်.’” ၁၂ အဝဲသ့ၣ်​ သံကွၢ်အီၤလၢ “ပှၤလၢအတဲနၤ ‘ဟံးထီၣ်နလီၢ်မံ ဒီးဟးတက့ၢ်’ န့ၣ်မ့ၢ်မတဂၤလဲၣ်.” ၁၃ ဘၣ်ဆၣ်​ မ့ၢ်လၢယ့ၣ်ၡူး ဟးထီၣ်ကွံာ်ကစုဒုလၢ ပှၤဂီၢ်မုၢ်လၢ အအိၣ်ဖဲန့ၣ်တဖၣ်​ အကဆူးအဃိ မ့ၢ်မတဂၤ မၤဘျါအီၤလဲၣ်န့ၣ်​ ပှၤလၢအဘျါက့ၤတဂၤ တသ့ၣ်ညါဝဲဘၣ်.

၁၄ လၢခံ ယ့ၣ်ၡူးထံၣ်ဘၣ်အီၤလၢ တၢ်လုၢ်ဟံၣ်ပူၤ ဒီးတဲအီၤလၢ “ခဲအံၤနဘျါက့ၤလံ. ဒ်သိး တၢ်လၢအနးန့ၢ်အအံၤ သုတဟဲကဲထီၣ်အသးဒီးနၤ တဂ့ၤအဂီၢ် မၤတၢ်ဒဲးဘးလၢၤတဂ့ၤ.” ၁၅ ဒီးပှၤတဂၤန့ၣ်​ လဲၤတဲဘၣ်​ ပှၤယူဒၤဖိတဖၣ်လၢ ပှၤလၢအမၤဘျါအီၤတဂၤန့ၣ်​ မ့ၢ်ဝဲယ့ၣ်ၡူးလီၤ. ၁၆ မ့ၢ်လၢ ယ့ၣ်ၡူး မၤတၢ်သ့ၣ်တဖၣ်အံၤလၢ မုၢ်အိၣ်ဘှံးနံၤ အဃိ ပှၤယူဒၤဖိတဖၣ်​ မၤကီမၤခဲအီၤလီၤ. ၁၇ ဘၣ်ဆၣ်​ ယ့ၣ်ၡူးတဲဆၢ အဝဲသ့ၣ်လၢ “ယပၢ်မၤတၢ်တုၤလၢခဲအံၤ ဒီးယၤစ့ၢ်ကီး ယဆဲးမၤတၢ်လီၤ.”+ ၁၈ မ့ၢ်လၢ ယ့ၣ်ၡူးကိးဝဲကစၢ်ယွၤလၢ အပၢ်အဃိ+ လၢအဝဲသ့ၣ်အတၢ်ထံၣ်န့ၣ်​ ယ့ၣ်ၡူးဒုးကဲထီၣ်​ အနီၢ်ကစၢ်ထဲသိးဒီး ကစၢ်ယွၤ+ တကးဒံးဘၣ်​ အဝဲသ့ၣ်ဆိကမိၣ်လၢ ယ့ၣ်ၡူးမၤကမၣ်​ မုၢ်အိၣ်ဘှံးနံၤ အတၢ်သိၣ်တၢ်သီလီၤ. အဃိ ပှၤယူဒၤဖိတဖၣ်​ ဂုာ်ကျဲးစၢးဝဲ အါန့ၢ်အလီၢ် ဒ်သိး ကမၤသံယ့ၣ်ၡူး အဂီၢ်လီၤ.

၁၉ လၢတၢ်န့ၣ်အဃိ ယ့ၣ်ၡူးတဲဆၢက့ၤ အဝဲသ့ၣ်လၢ “ယကတဲဘၣ်သု တီတီလၢ ဖိခွါန့ၣ်​ တမၤတၢ်ဖဲအသးနီတမံၤဘၣ်.* အဝဲမၤဝဲထဲဒၣ်​ တၢ်လၢ အထံၣ်ပၢ်မၤဝဲလီၤ.+ တၢ်လၢ ပၢ်မၤဝဲ တမံၤဂ့ၤတမံၤဂ့ၤန့ၣ်​ ဖိခွါမၤဝဲဒ်န့ၣ်စ့ၢ်ကီးလီၤ. ၂၀ ပၢ်အဲၣ်ဖိခွါ+ ဒီးဒုးနဲၣ်အီၤလၢ တၢ်ခဲလၢာ်လၢအမၤဝဲ ဒီးအဝဲကဒုးနဲၣ်အီၤလၢ တၢ်လၢအဒိၣ်န့ၢ်ဒံး တၢ်သ့ၣ်တဖၣ်အံၤ ဒ်သိး သုကကမၢကမၣ်​ အဂီၢ်လီၤ.+ ၂၁ ဒ်ပၢ်မၤသမူထီၣ်​ ပှၤသံတဖၣ်အသိး+ ဖိခွါစ့ၢ်ကီး မၤသမူထီၣ်​ ပှၤလၢအသးအိၣ်​ မၤသမူထီၣ်ဝဲတဖၣ်လီၤ.+ ၂၂ ပၢ်တစံၣ်ညီၣ်​ ပှၤနီတဂၤဘၣ်​ ဘၣ်ဆၣ်​ အဝဲအးလီၤဝဲ တၢ်စံၣ်ညီၣ်ခဲလၢာ်လၢ ဖိခွါအစုပူၤ+ ၂၃ ဒ်သိး ပှၤခဲလၢာ် ကယူးယီၣ်ပာ်ကဲဖိခွါ ဒ်အဝဲသ့ၣ်​ ယူးယီၣ်ပာ်ကဲပၢ်အသိးလီၤ. ပှၤလၢ အတယူးယီၣ်ပာ်ကဲ ဖိခွါဘၣ်န့ၣ်​ တယူးယီၣ်ပာ်ကဲပၢ်လၢ အဆှၢလီၤအီၤဘၣ်.+ ၂၄ ယကတဲဘၣ်သု တီတီလၢ ပှၤလၢအနၢ်ဟူ ယတၢ်ကတိၤတဖၣ်​ ဒီးနာ်ဝဲပှၤလၢ အဆှၢလီၤယၤတဂၤန့ၣ်​ ကဒိးန့ၢ်ဘၣ်​ တၢ်မူအထူအယိာ်လီၤ.+ ဒီးအဝဲတဘၣ်​ တၢ်စံၣ်ညီၣ်ဘၣ်, အဝဲလီၤဂာ်ဒ်သိးဒီး ပှၤလၢအသံတ့ၢ် ဒီးမူထီၣ်လံ.+

၂၅ “ယကတဲဘၣ်သုတီတီလၢ တၢ်ဆၢကတီၢ် ကဘၣ်ဝဲလၢ ပှၤသံတဖၣ်​ ကနၢ်ဟူ ကစၢ်ယွၤအဖိခွါ အကလုၢ် ဒီးပှၤလၢ အမၤထွဲဝဲတဖၣ်န့ၣ်​ ကမူဝဲလီၤ. ခဲအံၤန့ၣ်​ တၢ်ဆၢကတီၢ်အံၤ ဘၣ်ဝဲလံ. ၂၆ ဒ်ပၢ်အိၣ်ဒီး တၢ်မူလၢ အနီၢ်ကစၢ် အပူၤအသိးန့ၣ်+ အဝဲပျဲဝဲလၢ ဖိခွါစ့ၢ်ကီး ကအိၣ်ဒီး တၢ်မူလၢ အနီၢ်ကစၢ်အပူၤလီၤ.+ ၂၇ ဒီးအဝဲဟ့ၣ်လီၤအီၤ တၢ်စိတၢ်ကမီၤ ဒ်သိး ကစံၣ်ညီၣ်တၢ်အဂီၢ်+ မ့ၢ်လၢအဝဲမ့ၢ် ပှၤကညီဖိခွါအဃိလီၤ.+ ၂၈ တဘၣ်​ ကမၢကမၣ်လၢ တၢ်ဂ့ၢ်အံၤအဃိတဂ့ၤ. ဆၢကတီၢ် ကဟဲဝဲဖဲ ပှၤကိးဂၤဒဲးလၢ တၢ်သွၣ်ခိၣ်တဖၣ်အပူၤန့ၣ်​ ကနၢ်ဟူအကလုၢ်+ ၂၉ ဒီးကဟဲက့ၤသမူထီၣ်ဝဲလီၤ. ပှၤလၢ အမၤတၢ်ဂ့ၤတဖၣ်န့ၣ်* ကဒိးန့ၢ်ဘၣ်​ တၢ်မူ* ဒီးပှၤလၢ အမၤတၢ်အၢတဖၣ်န့ၣ်​ ကဘၣ်တၢ်စံၣ်ညီၣ်အီၤလီၤ.*+ ၃၀ ယတမၤတၢ်ဖဲယသးနီတမံၤဘၣ်. ဒ်ယနၢ်ဟူအသိး ယစံၣ်ညီၣ်တၢ် ဒီးယတၢ်စံၣ်ညီၣ်န့ၣ်တီဝဲ,+ မ့ၢ်လၢ ယတအဲၣ်ဒိး မၤဖဲဒၣ်ယသးဘၣ်​ ဒီးယအဲၣ်ဒိးမၤဒ် ပှၤလၢအဆှၢလီၤယၤတဂၤ အတၢ်ဘၣ်သးအသိး အဃိလီၤ.+

၃၁ “ထဲယၤတဂၤဧိၤ ယမ့ၢ်အုၣ်ယသးလၢ ယနီၢ်ကစၢ်အဂ့ၢ်န့ၣ်​ ယတၢ်အုၣ်သးတဖၣ်​ တမ့ၢ်တတီဘၣ်.+ ၃၂ ပှၤအဂၤတဂၤလၢ အအုၣ်အသး လၢယဂ့ၢ်န့ၣ်အိၣ်ဝဲ ဒီးယသ့ၣ်ညါလၢ အတၢ်အုၣ်အသး ဘၣ်ဃးဒီးယၤန့ၣ်​ မ့ၢ်ဝဲတီဝဲလီၤ.+ ၃၃ သုဆှၢလီၤပှၤတဖၣ်လၢ စီၤယိၤဟၣ်အအိၣ်​ ဒီးအဝဲအုၣ်အသး ဘၣ်ဃးဒီးတၢ်မ့ၢ်တၢ်တီလီၤ.+ ၃၄ ဘၣ်ဆၣ်​ ယတလိၣ်ဘၣ်​ တၢ်အုၣ်အသးလၢ အဟဲလၢ ပှၤဟီၣ်ခိၣ်ဖိ အအိၣ်ဘၣ်​ ဒီးယတဲ တၢ်ဂ့ၢ်သ့ၣ်တဖၣ်အံၤ ဒ်သိး သုကဒိးန့ၢ်ဘၣ်​ တၢ်အုၣ်က့ၤခီၣ်က့ၤ အဂီၢ်လီၤ. ၃၅ ပှၤတဂၤန့ၣ်​ လီၤဂာ်ဒ်သိးဒီး မ့ၣ်အူဒၢလၢအကဲၤ ဒီးကပီၤထီၣ်ဝဲလီၤ. ဒီးသုသးအိၣ်လၢ သုကသးခုလၢ အတၢ်ကပီၤအပူၤ ဘၣ်ဆၣ်​ သုတၢ်သးအိၣ်အံၤ တအိၣ်ယံာ်ယံာ်ဘၣ်.+ ၃၆ ဘၣ်ဆၣ်​ ယအိၣ်ဒီး တၢ်အုၣ်အသးလၢ အဒိၣ်န့ၢ်ဒံး စီၤယိၤဟၣ်​ အတၢ်အုၣ်အသးလီၤ. ခီဖျိလၢ တၢ်မၤတဖၣ်လၢ ယမၤအီၤန့ၣ်​ မ့ၢ်ဝဲတၢ်မၤလၢ ယပၢ်မၢလီၤယၤလၢ ယကမၤဝံၤအီၤအဃိ မ့ၢ်ဝဲ တၢ်အုၣ်အသးလၢ ပၢ်ဆှၢလီၤယၤလီၤ.+ ၃၇ ဒီးပၢ်လၢ အဆှၢလီၤယၤတဂၤန့ၣ်​ အုၣ်အသး ဘၣ်ဃးဒီးယဂ့ၢ်လီၤ.+ သုတနၢ်ဟူအကလုၢ် ဒီးသုတထံၣ်ဘၣ်​ အက့ၢ်အဂီၤ နီတဘျီဘၣ်+ ၃၈ ဒီးသုတနာ်ပှၤလၢ ပၢ်ဆှၢလီၤဝဲ တဂၤဘၣ်အဃိ အကလုၢ်ကထါ တအိၣ်လၢသုပူၤဘၣ်.

၃၉ “သုဃုကွၢ် တၢ်ကွဲးအသးတဖၣ်+ မ့ၢ်လၢ သုဆိကမိၣ်လၢ သုကဒိးန့ၢ်ဘၣ်​ တၢ်မူအထူအယိာ် ခီဖျိလၢ တၢ်သ့ၣ်တဖၣ်န့ၣ်* အဃိလီၤ. ဒီးတၢ်ကွဲးအသးတဖၣ်န့ၣ်​ ပာ်ဖျါထီၣ်​ တၢ်အုၣ်အသးလၢ အဘၣ်ဃးဒီး ယၤလီၤ.+ ၄၀ ဘၣ်ဆၣ်​ သုတသးအိၣ်​ ဟဲလၢယအိၣ်+ ဒ်သိး သုကန့ၢ် တၢ်မူအဂီၢ်ဘၣ်. ၄၁ ယတတူၢ်လိာ် တၢ်လၤကပီၤလၢ ပှၤဟီၣ်ခိၣ်ဖိ အအိၣ်ဘၣ်. ၄၂ မ့မ့ၢ်သုန့ၣ်​ ယသ့ၣ်ညါလီၤတံၢ်လၢ တၢ်အဲၣ်ယွၤ တအိၣ်လၢသုသးပူၤဘၣ်. ၄၃ ယဟဲလၢ ယပၢ်အမံၤ ဘၣ်ဆၣ်​ သုတတူၢ်လိာ်ယၤဘၣ်. ဒီးပှၤအဂၤတဂၤ မ့ၢ်ဟဲလၢ အနီၢ်ကစၢ်အမံၤန့ၣ်​ သုကတူၢ်လိာ်အီၤလီၤ. ၄၄ သုလီကီ တၢ်လၤကပီၤလၢ တဂၤဒီးတဂၤအအိၣ်​ ဒီးသုတဃု တၢ်လၤကပီၤလၢ အဟဲလၢ ကစၢ်ယွၤထဲတဂၤဧိၤ အအိၣ်ဘၣ်အဃိ သုနာ်ယၤ ကသ့ဒ်လဲၣ်.+ ၄၅ တဘၣ်ဆိကမိၣ်လၢ ယကပာ် တၢ်ကမၣ်လၢသုလိၤ လၢပၢ်အမဲာ်ညါတဂ့ၤ. ပှၤလၢအပာ် တၢ်ကမၣ်လၢသုလိၤန့ၣ်​ မ့ၢ်ဝဲ စီၤမိၤၡ့လၢ+ သုနာ်န့ၢ်အီၤ တဂၤန့ၣ်လီၤ. ၄၆ နီၢ်ကီၢ်န့ၣ်​ သုမ့ၢ်နာ် စီၤမိၤၡ့န့ၣ်​ သုကနာ်စ့ၢ်ကီးယၤ မ့ၢ်လၢ အကွဲးဝဲ ယဂ့ၢ်အဃိလီၤ.+ ၄၇ ဘၣ်ဆၣ်​ သုမ့ၢ်တနာ်တၢ်လၢ အကွဲးဝဲတဖၣ်ဘၣ်န့ၣ်​ သုကနာ်တၢ်လၢ ယတဲဒ်လဲၣ်.”