လီၣ်ဖျါ
၁၈ တၢ်န့ၣ်ဝံၤအလီၢ်ခံ ယထံၣ်ဘၣ် မူခိၣ်ကလူးအဂၤတဂၤန့ၣ် ဟဲလီၤလၢမူခိၣ်လီၤ. ဒီးအဝဲအိၣ်ဒီး တၢ်စိတၢ်ကမီၤဖးဒိၣ် ဒီးဟီၣ်ခိၣ်ကပီၤထီၣ်လၢ အလၤကပီၤအဃိလီၤ. ၂ အဝဲကိးပသူထီၣ်လၢ အကလုၢ်ဖးဒိၣ်လၢ “ပိာ်မုၣ်ဆါလီၤအီၣ်သး ဘၤဘူၤလိၣ်ဖးဒိၣ် လီၤပှီၢ်လံ,+ အဝဲလီၤပှီၢ်လံ. ဒီးအကဲထီၣ် တၢ်အိၣ်တၢ်ဆိးအလီၢ်လၢ တၢ်ဝံတၢ်နါတဖၣ်အဂီၢ် ဒီးတၢ်လီၢ်လၢ ပှၤနီၢ်သးဖိလၢ အတကဆှီဘၣ်တဖၣ်, ဒီးထိၣ်လၢအတကဆှီဘၣ် ဒီးလၢအလီၤသးဟ့ခဲလၢာ် အိၣ်ဝဲအလီၢ်လီၤ.+ ၃ ခီဖျိလၢ တၢ်သးကတၢ အစပံးထံလၢ အဘၣ်ဃးဒီး ပိာ်မုၣ်အံၤ အတၢ်မၤ ကမၣ်မုၣ်ကမၣ်ခွါ* အဃိ ပှၤကလုာ်ခဲလၢာ် ဘၣ်ဘျးဝဲလီၤ.+ ဟီၣ်ခိၣ်အစီၤပၤတဖၣ် မၤကမၣ်မုၣ်ကမၣ်ခွါဒီးအီၤ+ ဒီးပှၤပှ့ၤတၢ်ဆါတၢ်ဖိတဖၣ်* လၢဟီၣ်ခိၣ်ဒီဘ့ၣ်ညါ ထူးထီၣ်တီၤထီၣ်ဝဲ ခီဖျိလၢ ပိာ်မုၣ်အံၤ အတၢ်ထူးတၢ်တီၤလၢ အအိၣ်ဝဲ အါအါဂီၢ်ဂီၢ်လၢ အတကဲထီၣ် တၢ်မဲာ်ဆှး လၢအဂီၢ်ဘၣ် အဃိလီၤ.”
၄ ဒီးယနၢ်ဟူ တၢ်ကလုၢ် အဂၤတခါလၢ မူခိၣ်န့ၣ် တဲဝဲလၢ “ယပှၤဂီၢ်မုၢ်သ့ၣ်ဧၢ,+ သုမ့ၢ်တအဲၣ်ဒိးပၣ်ဃုာ်လၢ ပိာ်မုၣ်အံၤ အတၢ်ဒဲးဘးအပူၤဘၣ် ဒီးသုမ့ၢ်တအဲၣ်ဒိးတူၢ် အတၢ်နးတၢ်ဖှီၣ်တဖၣ်ဘၣ်န့ၣ်+ ဟးထီၣ်ကွံာ်လၢ အပူၤတက့ၢ်. ၅ ပိာ်မုၣ်အံၤ အတၢ်ဒဲးဘး ပာ်ဖှိၣ်ထီၣ်အသး ထီဝဲတုၤလၢမူခိၣ်+ ဒီးကစၢ်ယွၤနီၣ်ဘၣ် အတၢ်မၤတဖၣ်လၢ အပှဲၤဒီး တၢ်တတီတလိၤလံ.+ ၆ ဒ်အဝဲမၤပှၤဂၤအသိးန့ၣ် ဟ့ၣ်ကၣ်က့ၤအီၤဒ်န့ၣ်တက့ၢ်.+ တၢ်လၢ အဝဲမၤတ့ၢ်ဝဲတဖၣ်န့ၣ်+ ဟ့ၣ်ကၣ်က့ၤအီၤ ခံစးတက့ၢ်. လၢခွးလၢအဝဲ+ ကတဲာ်ကတီၤ တၢ်ထံတၢ်နိလၢအပူၤန့ၣ် ကတဲာ်ကတီၤ တၢ်ထံတၢ်နိလၢအဂီၢ် ခံစးတက့ၢ်.+ ၇ ခီဖျိလၢ အဝဲမၤလၤကပီၤလီၤ အနီၢ်ကစၢ်အသး သပှၢ်တၢၢ် ဒီးအပာ်ဖှိၣ် တၢ်ထူးတၢ်တီၤတဖၣ်လၢ အတကဲထီၣ် တၢ်မဲာ်ဆှးလၢအဂီၢ်ဘၣ် အဃိ အကြၢးဘၣ်နးဘၣ်ဖှီၣ် ဒီးဟီၣ်ဝဲယၢၤဝဲ သပှၢ်တၢၢ်လီၤ. အဝဲဆဲးတဲဝဲလၢ အသးပူၤလၢ ‘ယဆ့ၣ်နီၤဒ်နီၢ်ပၤမုၣ်အသိး ဒီးယတမ့ၢ် မုၣ်ကမဲဘၣ်. ဒီးတမ့ၢ်လၢ ယကဘၣ်ဟီၣ်ဘၣ်ယၢၤ နီတဘျီဘၣ်.’+ ၈ လၢတၢ်န့ၣ်အဃိ လၢတနံၤဃီအတီၢ်ပူၤ အတၢ်နးတၢ်ဖှီၣ်တဖၣ် လၢအမ့ၢ် တၢ်သံ, တၢ်ဟီၣ်တၢ်ယၢၤ ဒီးတၢ်သၣ်ဝံၤလီၤဒိန့ၣ် ကဟဲဘၣ်အီၤလီၤ. ဒီးအဝဲကဘၣ် တၢ်ဒွဲၣ်အူအီၤလၢမ့ၣ်အူ လၢာ်လၢာ်ဆ့ဆ့+ မ့ၢ်လၢ ယဟိဝၤယွၤ* လၢအစံၣ်ညီၣ်အီၤန့ၣ် အဂံၢ်ဆူၣ်ဘါဆူၣ် အဃိလီၤ.+
၉ “ဒီးဟီၣ်ခိၣ် အစီၤပၤတဖၣ်လၢ အမၤကမၣ် မုၣ်ကမၣ်ခွါဒီးအီၤ ဒီးပာ်ဖှိၣ် တၢ်ထူးတၢ်တီၤတဖၣ်လၢ အတကဲထီၣ် တၢ်မဲာ်ဆှးလၢအဂီၢ်ဘၣ် ဃုာ်ဒီးအီၤန့ၣ် ဖဲအဝဲသ့ၣ်ထံၣ်ဘၣ် မ့ၣ်အူလၢအအီၣ်ကွံာ်အီၤ အခုၣ်ထီၣ်အခါ အဝဲသ့ၣ်ကဟီၣ် ဒီးကဒဲလီၤ အသးနါပှၢ်လၢ ပိာ်မုၣ်အံၤအဃိလီၤ. ၁၀ အဝဲသ့ၣ် ကဆၢထၢၣ်လၢအယံၤ မ့ၢ်လၢအပျံၤဝဲလၢ ကတူၢ်ဘၣ် တၢ်မၤနးမၤဖှီၣ် ဒ်သိးဒီးအီၤ အဃိလီၤ. ဒီးကတဲဝဲလၢ ‘လီၤသးအုးထဲလဲၣ်, လီၤသးအုးထဲလဲၣ်. ဝ့ၢ်ဖးဒိၣ်လၢ+ အဂံၢ်ဆူၣ်ဘါဆူၣ် ဘၤဘူၤလိၣ်ဧၢ, နဘၣ် တၢ်စံၣ်ညီၣ်နၤလၢ တနၣ်ရံၣ် အတီၢ်ပူၤလီၤ.’
၁၁ “ပှၤပှ့ၤတၢ်ဆါတၢ်ဖိတဖၣ် လၢဟီၣ်ခိၣ်ဒီဘ့ၣ်ညါစ့ၢ်ကီး ဟီၣ်ဝဲယၢၤဝဲလၢ ပိာ်မုၣ်အံၤအဃိ, မ့ၢ်လၢ ပှၤလၢအကပှ့ၤ အဝဲသ့ၣ် အတၢ်ဖိတၢ်လံၤခဲလၢာ်န့ၣ် တအိၣ်နီတဂၤလၢၤဘၣ် အဃိလီၤ. ၁၂ အဝဲသ့ၣ် အတၢ်ဖိတၢ်လံၤခဲလၢာ်န့ၣ် မ့ၢ်ဝဲ ထူ, စ့ညၣ်, လၢၢ်လၢအလုၢ်ဒိၣ်ပှ့ၤဒိၣ်တဖၣ်, ပလဲတဖၣ်, တၢ်ကံးညာ်လၢအညၣ်ဂ့ၤ, တၢ်ကံးညာ်လၢအလွဲၢ်လုး, သတိၢ်, တၢ်ကံးညာ်လၢ အလွဲၢ်ဂီၤဆှုၣ်ကလာ်, တၢ်ခဲလၢာ်လၢ အဘၣ်တၢ်တ့အီၤလၢ သ့ၣ်နၢမူ ဒီးတၢ်ဖိတၢ်လံၤ ကိးကလုာ်ဒဲးလၢ အဘၣ်တၢ်တ့ထီၣ်အီၤလၢ ကဆီမဲ, သ့ၣ်လၢအလုၢ်ဒိၣ်ပှ့ၤဒိၣ်, တိၢ်ဘီ, ထး ဒီးလၢၢ်ဝါကံၣ်ဃ့ ၁၃ တကးဒံးဘၣ် သ့ၣ်ကဒါရၤအဖံး, တၢ်နၢမူနၢဆှီလၢ ကီၢ်အ့ဒယါ, တၢ်နၢမူတဖၣ်, သိနၢမူ, လီၢ်ဘၣ်, စပံးထံ, သ့ၣ်စၤယံးအသိ, ကိၣ်ကမူၣ်လၢအဂ့ၤ, ဘုကၠူၣ်, ကျီၢ်, သိတဖၣ်, ကသ့ၣ်တဖၣ်, လ့ၣ်ကဟၣ်တဖၣ်, ကုၢ်တဖၣ် ဒီးပှၤဟီၣ်ခိၣ်ဖိ အသးသမူတဖၣ် ဒၣ်လဲာ်လီၤ. ၁၄ မ့ၢ်လီၤ, တၢ်ဖိတၢ်လံၤ လၢအဂ့ၤလၢ* န* သးလီအီၤတဖၣ်န့ၣ် လီၤမၢ်ကွံာ်လၢနအိၣ်လံ. တၢ်ဝံၣ်တၢ်ဘဲ ဒီးတၢ်လၢအဂ့ၤခဲလၢာ်န့ၣ် လီၤမၢ်ကွံာ်လၢနအိၣ် ဒီးပှၤတထံၣ်န့ၢ်အီၤလၢၤဘၣ်.
၁၅ “ပှၤပှ့ၤတၢ်ဆါတၢ်ဖိလၢ အဆါဝဲတၢ်သ့ၣ်တဖၣ်အံၤ ဒီးကဲဒိၣ်ထီၣ်ဝဲလၢအဃိန့ၣ် ကဆၢထၢၣ်ဝဲလၢအယံၤ မ့ၢ်လၢအဝဲသ့ၣ် ပျံၤဝဲလၢ အကတူၢ်ဘၣ် တၢ်မၤနးမၤဖှီၣ် ဒ်သိးဒီးအီၤအဃိလီၤ. ဒီးအဝဲသ့ၣ် ကဟီၣ်ဝဲယၢၤဝဲ ၁၆ ဒီးတဲဝဲလၢ ‘ဝ့ၢ်ဖးဒိၣ်တဖျၢၣ်အံၤလၢ အကၤဝဲတၢ်ကံးညာ် လၢအညၣ်ဂ့ၤ, တၢ်ကံးညာ်လၢအလွဲၢ်လုး ဒီးတၢ်ကံးညာ်လၢ အလွဲၢ်ဂီၤဆှုၣ်ကလာ် ဒီးမၤဃံမၤလၤထီၣ်အသး လၢထူ, လၢၢ်လၢ အလုၢ်ဒိၣ်ပှ့ၤဒိၣ်တဖၣ် ဒီးပလဲတဖၣ်န့ၣ်+ တၢ်ကဲထီၣ်အသးဒီးအီၤဒ်အံၤအဃိ မ့ၢ်တၢ်လၢ အလီၤသးအုးဒိၣ်မးလီၤ. ၁၇ လၢတနၣ်ရံၣ်အတီၢ်ပူၤ အတၢ်ထူးတၢ်တီၤ အါအါဂီၢ်ဂီၢ်တဖၣ်အံၤ လီၤမၢ်ကွံာ်လၢာ်လံ.’
“ဒီးကဘီခိၣ်ကိးဂၤဒဲး, ပှၤကိးဂၤဒဲးလၢ အလဲၤတၢ်က့ၤတၢ်လၢ ပီၣ်လဲၣ်အပူၤ, ပှၤကဘီဖိ, ဒီးပှၤခဲလၢာ်လၢ အလုၢ်အီၣ်အသးသမူ ခီဖျိလၢ ပီၣ်လဲၣ်န့ၣ် ဆၢထၢၣ်လၢ အယံၤ ၁၈ ဒီးဖဲအဝဲသ့ၣ်ကွၢ်စိဝဲ မ့ၣ်အူလၢအအီၣ်ကွံာ် ဝ့ၢ်ဖးဒိၣ်တဖျၢၣ်အံၤ အခုၣ်ထီၣ်အခါ အဝဲသ့ၣ်ကိးပသူထီၣ် ဒီးတဲဝဲလၢ ‘ဝ့ၢ်အဂၤလၢအလီၤဂာ်ဒီး ဝ့ၢ်ဖးဒိၣ်တဖျၢၣ်အံၤ ကအိၣ်တဖျၢၣ်ဖျၢၣ်ဒံးဧါ.’ ၁၉ အဝဲသ့ၣ် ဖှံထီၣ်အခိၣ်လၢ ဟီၣ်ခိၣ်ကမူၣ်, ကိးပသူထီၣ်ဝဲ, ဟီၣ်ဝဲယၢၤဝဲ ဒီးတဲဝဲလၢ ‘ကယဲၢ်ပှၤလၢ အအိၣ်ဒီး ကဘီတဖၣ်လၢ အအိၣ်လၢ ပီၣ်လဲၣ်ပူၤန့ၣ် ထူးထီၣ်တီၤထီၣ်ဝဲလၢ ဝ့ၢ်ဖးဒိၣ်တဖျၢၣ်အံၤ အတၢ်ထူးတၢ်တီၤ အဃိလီၤ. ခီဖျိလၢ ဝ့ၢ်ဖးဒိၣ်တဖျၢၣ်အံၤ ဘၣ်တၢ်မၤဟးဂီၤကွံာ်အီၤလၢ တနၣ်ရံၣ်အတီၢ်ပူၤအဃိ မ့ၢ်တၢ်လၢ အလီၤသးအုးဒိၣ်မးလီၤ.’+
၂၀ “မူခိၣ်ဧၢ,+ သးခုလၢ တၢ်ကဲထီၣ်အသးဒီးအီၤ ဒ်အံၤအဃိတက့ၢ်. ပှၤစီဆှံတဖၣ်,+ တၢ်မၢဖိတဖၣ် ဒီးဝံတဖၣ်သ့ၣ်ဧၢ, မ့ၢ်လၢ ကစၢ်ယွၤစံၣ်ညီၣ်အီၤ လၢသုဂီၢ်အဃိ သးခုတက့ၢ်.”+
၂၁ ဒီးမူခိၣ်ကလူးလၢ အဂံၢ်ဆူၣ်ဘါဆူၣ်တဂၤ ဟံးထီၣ်လၢၢ်တဖျၢၣ် လၢအလီၤဂာ်ဒ် ဆၢၣ်ဂူာ်လၢၢ်အသိး ဒီးကွံာ်လီၤဝဲလၢ ပီၣ်လဲၣ်အပူၤ ဒီးတဲဝဲလၢ “တၢ်ကကွံာ်လီၤ ဝ့ၢ်ဖးဒိၣ်ဘၤဘူၤလိၣ် ချ့ချ့ဒ်န့ၣ်အသိး ဒီးပှၤတထံၣ်န့ၢ်အီၤ နီတဘျီလၢၤဘၣ်.+ ၂၂ ဒီးပှၤသးဝံၣ်တၢ်ဖိတဖၣ်လၢ အသးဝံၣ်တၢ်ဒီး ဒ့အတနၢ်တဖၣ်မ့ၢ်ဂ့ၤ, ပှၤဒ့တၢ်အူတၢ်တဖၣ်မ့ၢ်ဂ့ၤ, ပှၤအူပံမ့ၢ်ဂ့ၤ, ပှၤအူကွဲၤမ့ၢ်ဂ့ၤ ပှၤတနၢ်ဟူအီၤ လၢနပူၤ* နီတဘျီလၢၤဘၣ်. ဒီးပှၤစုသ့ဖိ လၢအမၤတၢ်မၤ တမံၤဂ့ၤတမံၤဂ့ၤန့ၣ် ပှၤတထံၣ်န့ၢ်အီၤလၢနပူၤ နီတဘျီလၢၤဘၣ်. ဒီးဆၢၣ်ဂူာ်လၢၢ်အသီၣ်န့ၣ် ပှၤတနၢ်ဟူအီၤလၢနပူၤ နီတဘျီလၢၤဘၣ်. ၂၃ မ့ၣ်အူဒၢ အတၢ်ကပီၤ တကပီၤထီၣ် လၢနပူၤနီတဘျီလၢၤဘၣ်. ဒီးတလးမူးပိာ်မုၣ် ဒီးတလးမူးပိာ်ခွါအကလုၢ်န့ၣ် ပှၤတနၢ်ဟူအီၤ လၢနပူၤ နီတဘျီလၢၤဘၣ်. တၢ်ကကဲထီၣ်အသးဒ်အံၤ မ့ၢ်လၢ နပှၤပှ့ၤတၢ်ဆါတၢ်တဖၣ်န့ၣ် မ့ၢ်ပှၤလၢ အပတီၢ်ထီကတၢၢ်လၢ ဟီၣ်ခိၣ်ချၢ ဒီးပှၤကိးကလုာ်ဒဲး ဘၣ်တၢ်ဆှၢကမၣ်အီၤ ခီဖျိလၢ နတၢ်ဝံတၢ်နါ အတၢ်ဖံးတၢ်မၤတဖၣ်+ အဃိလီၤ. ၂၄ မ့ၢ်လီၤ, လၢဝ့ၢ်အံၤအပူၤန့ၣ် တၢ်ထံၣ်န့ၢ် ဝံတဖၣ် ဒီးပှၤစီဆှံတဖၣ်အသွံၣ်+ ဒီးပှၤလၢ အဘၣ်တၢ်မၤသံအီၤလၢ ဟီၣ်ခိၣ်ချၢကိးဂၤဒဲး အသွံၣ်လီၤ.”+