မၢ်ကူး

၁၃ ဖဲယ့ၣ်ၡူး ဟးထီၣ်လၢ တၢ်လုၢ်ဟံၣ်ပူၤအခါ အပျဲၢ်အဘီၣ်တဂၤ တဲအီၤလၢ “သရၣ်ဧၢ, ကွၢ်လၢန့ၣ်, လၢၢ်တဖၣ်​ ဒီးတၢ်သူၣ်ထီၣ်တဖၣ်​ လီၤဘီလီၤမုၢ်ဒိၣ်မး.”+ ၂ ဘၣ်ဆၣ်​ ယ့ၣ်ၡူးတဲအီၤလၢ “နထံၣ်တၢ်သူၣ်ထီၣ်ဖးဒိၣ်တဖၣ်အံၤနီၤ. တၢ်သူၣ်ထီၣ်အလၢၢ်တဖၣ်န့ၣ်​ ကဘၣ်တၢ်မၤလီၤပှီၢ်ကွံာ်အီၤခဲလၢာ် ဒီးလ့ၤတက့ၤ လၢၢ်တဖၣ်အံၤ တအိၣ်လၢတဖျၢၣ်ဒီးတဖျၢၣ်​ အဖီခိၣ်လၢၤဘၣ်.”+

၃ ဖဲယ့ၣ်ၡူးဆ့ၣ်နီၤလၢ ကစၢၢ်သ့ၣ်စၤယံးအလိၤ ဒီးကွၢ်စိဃီၤဝဲ တၢ်လုၢ်ဟံၣ်အခါ စီၤပ့းတရူး, စီၤယၤကိာ်, စီၤယိၤဟၣ်​ ဒီးစီၤအၣ်ဒရ့း သံကွၢ်ခူသူၣ်အီၤလၢ ၄ “တၢ်သ့ၣ်တဖၣ်န့ၣ်​ ကမၤအသးဆံးယံာ်လဲၣ်. ဒီးဖဲတၢ်သ့ၣ်တဖၣ်န့ၣ်ခဲလၢာ် အကတၢၢ်ဘူးထီၣ်အခါ တၢ်ပနီၣ်မနုၤ ကမၤအသးလဲၣ်.”+ ၅ အဃိ ယ့ၣ်ၡူးတဲအဝဲသ့ၣ်လၢ “ဒ်သိး ပှၤသုတကွဲန့ၢ်လွဲန့ၢ်သု နီတဂၤတဂ့ၤအဂီၢ် ပလီၢ်သုသးတက့ၢ်.+ ၆ ပှၤအါဂၤကဟဲလၢယမံၤ ဒီးကတဲဝဲလၢ အမ့ၢ်ခရံာ် ဒီးကကွဲန့ၢ်လွဲန့ၢ် ပှၤအါဂၤလီၤ. ၇ တကးဒံးဘၣ်​ သုကနၢ်ဟူတၢ်ဒုးတၢ်ယၤအသီၣ်​ ဒီးတၢ်ဒုးတၢ်ယၤအကစီၣ်လီၤ. ပျံၤတၢ်တဂ့ၤ, တၢ်သ့ၣ်တဖၣ်န့ၣ်​ ကဘၣ်ဟဲကဲထီၣ်အသးလီၤ. ဘၣ်ဆၣ်​ တၢ်အကတၢၢ်န့ၣ်​ တတုၤဒံးဘၣ်.+

၈ “ပှၤကလုာ်တဒူၣ်ဒီးတဒူၣ်​ ကဒုးလိာ်အသး ဒီးဘီမုၢ်တဘ့ၣ်ဒီးတဘ့ၣ်​ ကဒုးလိာ်အသးလီၤ.+ ဒီးဟီၣ်ခိၣ်ကဟူးဝဲလၢ တၢ်လီၢ်တတီၤဝံၤတတီၤ ဒီးတၢ်သၣ်ဝံၤလီၤဒိ ကအိၣ်ထီၣ်ဝဲစ့ၢ်ကီးလီၤ.+ တၢ်မၤအသးတဖၣ်န့ၣ်​ ခဲလၢာ်န့ၣ်​ မ့ၢ်ဒၣ်​ တၢ်ကိၢ်တၢ်ဂီၤ* အခီၣ်ထံးဒံးလီၤ.+

၉ “မ့မ့ၢ် သုန့ၣ်​ ပလီၢ်သုသးတက့ၢ်. ပှၤကဟ့ၣ်လီၤကွံာ်သုလၢ လီၢ်ကဝီၤအရူ+ ဒီးပှၤကတီၢ်သုလၢ ဘူၣ်ဘျီၣ်ပူၤ+ ဒီးသုကဘၣ်လဲၤလၢ ပဒိၣ်ပပှၢ်တဖၣ်​ ဒီးစီၤပၤတဖၣ်​ အမဲာ်ညါလၢယဃိလီၤ. ဖဲန့ၣ်အခါ သုအုၣ်သုသးလၢ အဝဲသ့ၣ်အမဲာ်ညါကသ့လီၤ.+ ၁၀ တကးဒံးဘၣ်​ တၢ်သးခုကစီၣ်​ ကဘၣ်တၢ်စံၣ်တဲၤတဲလီၤဆိအီၤလၢ ပှၤကိးကလုာ်ဒဲးအအိၣ်လီၤ.+ ၁၁ ဒီးဖဲပှၤလဲၤကိးသု ဒ်သိးကဟ့ၣ်လီၤကွံာ်သုအခါ သုကဘၣ်တဲ မနုၤလဲၣ်န့ၣ်​ တဘၣ်သူၣ်ကိၢ်သးဂီၤတဂ့ၤ. သုတမ့ၢ်ပှၤလၢ အတဲတၢ်ဘၣ်, မ့ၢ်သးစီဆှံတဲတၢ် ခီဖျိလၢသုလီၤ.+ အဃိ တဲတၢ်ဂ့ၢ်လၢ သးစီဆှံ ဟံးစုနဲၣ်ကျဲသု ဖဲနၣ်ရံၣ်အဝဲန့ၣ်တက့ၢ်. ၁၂ တကးဒံးဘၣ်​ ပှၤဒီပုၢ်ဝဲၢ်ခွါ ကဟ့ၣ်လီၤကွံာ် အဒီပုၢ်ဝဲၢ်ခွါလၢ ကဘၣ်တၢ်မၤသံအီၤအဂီၢ် ဒီးပၢ်စ့ၢ်ကီးကမၤအဖိဒ်န့ၣ်လီၤ. ဒီးဖိတဖၣ်​ ကထီဒါက့ၤအမိၢ်အပၢ် ဒီးကဟ့ၣ်လီၤကွံာ်အဝဲသ့ၣ်​ ဒ်သိးကဘၣ်တၢ်မၤသံအီၤအဂီၢ်လီၤ.+ ၁၃ ဒီးပှၤခဲလၢာ်ကသးဟ့သုလၢ ယမံၤအဃိလီၤ.+ ဘၣ်ဆၣ်​ ပှၤလၢအတူၢ်တၢ်လၢ တၢ်သးတီအပူၤတုၤလၢ အကတၢၢ်န့ၣ်+ ကတုၤလၢ တၢ်အုၣ်က့ၤခီၣ်က့ၤလီၤ.+

၁၄ “ဘၣ်ဆၣ်​ သုကထံၣ်တၢ်လၢ အလီၤသးဘၣ်အၢလၢ အမၤဟးဂီၤတၢ်+ ဆၢထၢၣ်လၢ တၢ်လီၢ်လၢ အတကြၢးဆၢထၢၣ်ဘၣ်လီၤ. (မ်ပှၤဖးလံာ်ဖိ ပဲာ်ထံနီၤဖးတၢ်တက့ၢ်.) ဖဲန့ၣ်အခါ မ်ပှၤအိၣ်လၢ ယူဒၤအဟီၣ်ကဝီၤအပူၤန့ၣ်​ လဲၤဃ့ၢ်ထီၣ်လၢ ကစၢၢ်ကလိတဖၣ်တက့ၢ်.+ ၁၅ ပှၤအိၣ်လၢ ဟံၣ်ခိၣ်န့ၣ်​ တဘၣ်စံၣ်လီၤလၢဟံၣ်ပူၤ ဒီးတဘၣ်က့ၤနုာ်လီၤလၢဟံၣ်ပူၤ ဒ်သိးကက့ၤဟံးန့ၢ်တၢ်နီတမံၤတဂ့ၤ. ၁၆ ဒီးပှၤအိၣ်လၢ စံာ်ပျီပူၤန့ၣ်​ တဘၣ်ဟဲက့ၤ ဒ်သိးကဟံးန့ၢ် အတၢ်ကူတၢ်ကၤတဂ့ၤ. ၁၇ လၢမုၢ်နံၤတဖၣ်န့ၣ်အတီၢ်ပူၤ ပှၤမိၢ်ဒၢ ဒီးပှၤလၢအဒုးအီအဖိနုၢ်န့ၣ်​ ကဘၣ်ကီဘၣ်ခဲလီၤ.+ ၁၈ ဆဲးဃ့ထုကဖၣ်တၢ် ဒ်သိးအသုတဘၣ်ဖဲ တၢ်ဂိၢ်ခါန့ၣ်တဂ့ၤ. ၁၉ မုၢ်နံၤတဖၣ်န့ၣ်​ ကမ့ၢ်ဝဲ တၢ်နးတၢ်ဖှီၣ်အဆၢကတီၢ်လီၤ.+ စးထီၣ်လၢ ကစၢ်ယွၤတ့လီၤတၢ် တုၤလီၤလၢဆၢကတီၢ်ဖဲန့ၣ်န့ၣ်​ တၢ်နးတၢ်ဖှီၣ်​ တဟဲကဲထီၣ်အသး နးထဲန့ၣ်​ နီတဘျီဘၣ်. ဒီးလၢခံစ့ၢ်ကီး တကဲထီၣ်အသး နီတဘျီလၢၤဘၣ်.+ ၂၀ နီၢ်ကီၢ်န့ၣ်​ ယဟိဝၤယွၤ* မ့ၢ်တမၤစှၤလီၤ မုၢ်နံၤတဖၣ်န့ၣ်ဘၣ်န့ၣ်​ ပှၤ* တတုၤလၢ တၢ်အုၣ်က့ၤခီၣ်က့ၤ နီတဂၤဘၣ်. ဘၣ်ဆၣ်​ ခီဖျိလၢ ပှၤလၢအဘၣ်တၢ်ဃုထၢအီၤတဖၣ်အဃိ အဝဲကမၤစှၤလီၤ မုၢ်နံၤတဖၣ်န့ၣ်လီၤ.+

၂၁ “ဒီးပှၤတဂၤဂၤ မ့ၢ်တဲသုလၢ ‘ကွၢ်လၢအံၤ, ခရံာ်အိၣ်ဖဲအံၤ’ မ့တမ့ၢ် ‘ကွၢ်လၢန့ၣ်, အအိၣ်လၢန့ၣ်’ န့ၣ်တဘၣ်​ နာ်အီၤတဂ့ၤ.+ ၂၂ ခရံာ်အဘျၣ်​ ဒီးဝံအဘျၣ်တဖၣ်​ ကအိၣ်ထီၣ်ဝဲ+ ဒီးကမၤတၢ်ပနီၣ်​ ဒီးတၢ်လီၤလးတဖၣ်​ ဒ်သိး မ့ၢ်သ့န့ၣ်​ ကကွဲန့ၢ်လွဲန့ၢ် ပှၤလၢအဘၣ်​ တၢ်ဃုထၢအီၤတဖၣ်လီၤ. ၂၃ တချုးလၢ အမၤအသးဒံးဘၣ်န့ၣ်​ ယတဲဆိပာ်စၢၤသု တၢ်ခဲလၢာ်လံအဃိ ပလီၢ်သုသးနီၤ.+

၂၄ “ဘၣ်ဆၣ်​ ဖဲမုၢ်နံၤတဖၣ်လၢ တၢ်နးတၢ်ဖှီၣ်အဝဲန့ၣ်​ ဝံၤအလီၢ်ခံန့ၣ်​ မုၢ်ကခံးလီၤ ဒီးလါတကပီၤလၢၤဘၣ်.+ ၂၅ ဒီးဆၣ်တဖၣ်လၢအ အိၣ်လၢမူခိၣ်န့ၣ်​ ကလီၤတဲာ်ဝဲ ဒီးတၢ်စိတၢ်ကမီၤတဖၣ်လၢ အအိၣ်လၢမူခိၣ်န့ၣ်​ ကဘၣ်တၢ်မၤဟူးမၤဝးအီၤလီၤ. ၂၆ ဒီးပှၤကထံၣ်ဘၣ်​ ပှၤကညီဖိခွါအံၤ+ ဟဲဝဲလၢ တၢ်အၢၣ်တဖၣ်အကျါ ပှဲၤဒီးတၢ်စိတၢ်ကမီၤ ဒီးတၢ်လၤတၢ်ကပီၤ ဒိၣ်ဒိၣ်မုၢ်မုၢ်လီၤ.+ ၂၇ ဒီးအကဆှၢလီၤဝဲ မူခိၣ်ကလူးတဖၣ်​ ဒီးကပာ်ဖှိၣ်ဝဲ ပှၤလၢအဘၣ်တၢ်ဃုထၢအီၤတဖၣ်​ လၢကလံၤလွံၢ်ကျိၤ စးထီၣ်လၢ ဟီၣ်ခိၣ်အသနၢၣ်​ လၢအံၤတခီ ဒီးပၢၢ်တုၤလၢ မူခိၣ်အသနၢၣ်လၢ အဝဲတခီလီၤ.+

၂၈ “ဟံးန့ၢ်တၢ်မၤလိလၢ ချၢၣ်ဒၢထူၣ်အအိၣ်တက့ၢ်. ဖဲအဒ့ဘီၣ်ဟဲထီၣ်​ ဒီးအလၣ်ဒိးထီၣ်ဝဲအခါန့ၣ်​ သုသ့ၣ်ညါလၢ တၢ်ကိၢ်ခါဘူးကတုၤလံ.+ ၂၉ ဒ်န့ၣ်အသိး သုစ့ၢ်ကီး ဖဲသုထံၣ်ဘၣ်တၢ်သ့ၣ်တဖၣ်န့ၣ်​ မၤအသးအခါ သုကဘၣ်သ့ၣ်ညါလၢ ပှၤကညီဖိခွါန့ၣ်​ အိၣ်ဘူးထီၣ်လၢ တြဲၤအခီၣ်ထံးလံ.+ ၃၀ ယကတဲဘၣ်သု တီတီလၢ ပှၤတစိၤအံၤ တချုးသံလၢာ်ဒံးဘၣ်န့ၣ်​ တၢ်သ့ၣ်တဖၣ်န့ၣ်​ ကမၤအသးခဲလၢာ်လီၤ.+ ၃၁ မူခိၣ်ဒီးဟီၣ်ခိၣ်​ ကဒံကွံာ်ဝဲဘၣ်ဆၣ်+ ယတၢ်ကတိၤတဖၣ်န့ၣ်​ လ့ၤတက့ၤတဒံကွံာ်ဝဲဘၣ်.+

၃၂ “ဘၣ်ဃးဒီး မုၢ်နံၤအဝဲန့ၣ်​ ဒီးနၣ်ရံၣ်အဝဲန့ၣ်​ ပှၤတသ့ၣ်ညါနီတဂၤဘၣ်. မူခိၣ်ကလူးတဖၣ်လၢ အအိၣ်လၢ မူခိၣ်မ့ၢ်ဂ့ၤ ဖိခွါမ့ၢ်ဂ့ၤ တသ့ၣ်ညါဝဲဘၣ်. သ့ၣ်ညါထဲဒၣ်ပၢ်တဂၤလီၤ.+ ၃၃ မ့ၢ်လၢတၢ်ဆၢကတီၢ်လၢ အဘၣ်တၢ်ပာ်ပနီၣ်အီၤန့ၣ်​ သုတသ့ၣ်ညါဘၣ်အဃိ+ ခိးကွၢ်တၢ် ဒီးဆိးသီ* ထီဘိတက့ၢ်.+ ၃၄ တၢ်မၤအသးအံၤ လီၤဂာ်ဒီးပှၤတဂၤလၢ အကလဲၤလၢ ထံဂၤကီၢ်ဂၤအဃိ အပာ်တ့ၢ်ကွံာ် အဟံၣ်ဒီး ဟ့ၣ်လီၤတၢ်စိတၢ်ကမီၤလၢ အကုၢ်တဖၣ်​ အစုပူၤလီၤ.+ ဒီးအဝဲဟ့ၣ်လီၤအဝဲသ့ၣ်​ တဂၤစုာ်စုာ်အမူဒါ ဒီးမၤလိာ် ပှၤခိးတြဲၤတဂၤ လၢကအိၣ်ပလီၢ်သးထီဘိလီၤ.+ ၃၅ ဟံၣ်ကစၢ်ကဟဲက့ၤတုၤလၢဟံၣ်+ လၢဟါလီၤခီဧါ, လၢဖးဖီမုၢ်ဧါ, တချုးမုၢ်ဝါထီၣ်ဧါ* မ့တမ့ၢ် လၢဂီၤခီဂီၤဂီၤဧါန့ၣ်+ သုတသ့ၣ်ညါဘၣ်အဃိ အိၣ်ပလီၢ်သး ထီဘိတက့ၢ်. ၃၆ သုမ့ၢ်မၤဒ်န့ၣ်န့ၣ်​ ဖဲအဝဲဟဲက့ၤတုၤ သတူၢ်ကလာ်အခါ တမ့ၢ်လၢအဝဲကထံၣ်လၢသုမံဘၣ်.+ ၃၇ ဒ်ယတဲသုအသိး ယတဲစ့ၢ်ကီး ပှၤခဲလၢာ်လၢ အိၣ်ပလီၢ်သး ထီဘိတက့ၢ်.”+