၂ သ့းစၤလနံ
၂ ဒီပုၢ်ဝဲၢ်သ့ၣ်ဧၢ, ဘၣ်ဃးဒီး ပကစၢ်ယ့ၣ်ၡူးခရံာ် ဟဲက့ၤအိၣ်ဒီးပှၤ အဆၢကတီၢ်+ ဒီးတၢ်ကပာ်ဖှိၣ်ပှၤ ဒ်သိးပကအိၣ်ဒီးအီၤ တပူၤဃီအဂ့ၢ်န့ၣ်+ ပဃ့ကညးသုလၢ ၂ ပှၤတဂၤဂၤ မ့ၢ်တဲသုလၢ ယဟိဝၤယွၤ* အမုၢ်နံၤ+ ဟဲတုၤလံ သနာ်က့ တဘၣ်သးဒံဝ့ၤဒံဝီၤ ဒီးတဘၣ်ဘၣ်ယိၣ်တၢ်တဂ့ၤ. ဒီးအမ့ၢ်ဖျါလၢ တၢ်ကစီၣ်အံၤ ဟဲလၢကစၢ်ယွၤ အအိၣ်+ ဒီးတၢ်ကတိၤ ဒီးလံာ်ပရၢန့ၣ် မ့ၢ်ဖျါလၢ အဟဲလၢပအိၣ်ဒၣ်လဲာ် တဘၣ်သူၣ်ကိၢ်သးဂီၤတၢ်တဂ့ၤ.
၃ တဘၣ်ပျဲ ပှၤလံၣ်န့ၢ်လီန့ၢ်သုနီတဂၤတဂ့ၤ. တချုးလၢမုၢ်နံၤအဝဲန့ၣ် ဟဲတုၤဒံးဘၣ်န့ၣ် တၢ်စူးကွံာ်ညိကွံာ်တၢ်နာ်*+ ကဘၣ်အိၣ်ထီၣ်ဆိဝဲ ဒီးပိာ်ခွါအၢသီတဂၤ+ လၢအမ့ၢ် တၢ်ဟးဂီၤအဖိခွါန့ၣ်+ ကဘၣ်တၢ်လီၣ်ဖျါထီၣ်အီၤလီၤ. ၄ အဝဲကဂဲၤဆၢထၢၣ်ထီဒါတၢ် ဒီးပာ်ထီၣ်ထီအသးလၢ ပှၤလၢအဘၣ်တၢ်ကိးအီၤ လၢယွၤကိးဂၤဒဲး ဒီးတၢ်လၢပှၤဟီၣ်ခိၣ်ဖိ ဘူၣ်ထီၣ်ဘါထီၣ်ဝဲခဲလၢာ် အဖီခိၣ်လီၤ. အဃိ အဝဲကဆ့ၣ်နီၤလၢ ကစၢ်ယွၤအတၢ်လုၢ်ဟံၣ် ဒီးပာ်ဖျါထီၣ်အသးပျီပျီလၢ အမ့ၢ်ယွၤတဂၤလီၤ. ၅ ဖဲယအိၣ်ဒီးသုအခါ ယတဲတ့ၢ်သု တၢ်ဂ့ၢ်တဖၣ်အံၤန့ၣ် သုတနီၣ်ဘၣ်ဧီၤ.
၆ ပိာ်ခွါအၢသီတဂၤအံၤ ဒ်သိးအသုတဘၣ် တၢ်လီၣ်ဖျါထီၣ်အီၤ တချုးလၢ တၢ်ဆၢကတီၢ်လၢ အဘၣ်တၢ်ပာ်ပနီၣ်အီၤ ဘၣ်ဒံးဘၣ်တဂ့ၤအဂီၢ် တၢ်မနုၤတြီဃာ်အီၤလဲၣ်န့ၣ် ခဲအံၤ သုသ့ၣ်ညါလံ. ၇ မ့ၢ်လီၤ, ပိာ်ခွါတဂၤအံၤ အတၢ်အၢတၢ်သီလၢ အအိၣ်ခူသူၣ်ဝဲန့ၣ် စးထီၣ်မၤတၢ်လံ.+ ဘၣ်ဆၣ် အကအိၣ်ခူသူၣ်ဝဲ တုၤလၢ ပှၤလၢအ တြီဃာ်အီၤတဂၤန့ၣ် တအိၣ်လၢၤဘၣ်လီၤ. ၈ ဖဲန့ၣ်အခါ ပိာ်ခွါအၢသီတဂၤန့ၣ် ကအိၣ်ဖျါထီၣ်ဝဲအနီၢ်ကီၢ်လီၤ. ဒီးကစၢ်ယ့ၣ်ၡူး ကပာ်ဖျါထီၣ်ဝဲလၢ အဟဲက့ၤအိၣ်ဒီးပှၤလံ+ ဒီးအဝဲကမၤဟးဂီၤ ဒီးမၤလီၤမၢ်ကွံာ် ပိာ်ခွါအၢသီတဂၤအံၤ ခီဖျိလၢ တၢ်စိတၢ်ကမီၤလၢ အဟဲထီၣ်လၢအထးခိၣ်လီၤ.+ ၉ ပိာ်ခွါအၢသီတဂၤအံၤ အိၣ်ဖျါထီၣ်ဝဲလၢ မုၣ်ကီၤလံၢ်* အဃိလီၤ.+ ဒီးမုၣ်ကီၤလံၢ် ဟ့ၣ်စိဟ့ၣ်ကမီၤအီၤလၢ အကမၤကယဲၢ်တၢ်မၤလၢ အိၣ်ဒီးအစိအကမီၤ, တၢ်ပနီၣ်လီၤလး, တၢ်လီၤလး ဒ်သိးကလံၣ်န့ၢ်လီန့ၢ်ပှၤဂၤအဂီၢ်+ ၁၀ ဒီးကယဲၢ်တၢ်လီတၢ်ဝ့ၤ လၢအဟဲခီဖျိ တၢ်တတီတလိၤလီၤ.+ တၢ်သ့ၣ်တဖၣ်န့ၣ် လံၣ်န့ၢ်လီန့ၢ်ဝဲ ပှၤလၢအကဘၣ်တၢ်မၤဟးဂီၤအီၤတဖၣ်လီၤ. တၢ်ကမၤဟးဂီၤအဝဲသ့ၣ် ဒ်တၢ်စံၣ်ညီၣ်အသိး မ့ၢ်လၢ အဝဲသ့ၣ်တတူၢ်လိာ် ဒီးတအဲၣ်တၢ်မ့ၢ်တၢ်တီ လၢကမၤပူၤဖျဲး အဝဲသ့ၣ်ဘၣ်အဃိလီၤ. ၁၁ လၢတၢ်န့ၣ်အဃိ ဒ်သိးအဝဲသ့ၣ်ကနာ်ဝဲ တၢ်လံၣ်တၢ်လီအဂီၢ် ကစၢ်ယွၤဟ့ၣ်အခွဲးလၢ တၢ်ကကွဲန့ၢ်လွဲန့ၢ်အဝဲသ့ၣ် ခီဖျိတၢ်သိၣ်လိလၢ အကမၣ်+ ၁၂ ဒ်သိးအဝဲသ့ၣ်ခဲလၢာ် ကဘၣ်တၢ်စံၣ်ညီၣ် မ့ၢ်လၢ အဝဲသ့ၣ်တနာ် တၢ်မ့ၢ်တၢ်တီဘၣ် ဒီးအဝဲသ့ၣ်မၤတၢ်လၢ အတတီတလိၤတဖၣ် မုာ်ဝဲအဃိလီၤ.
၁၃ ဒီပုၢ်ဝဲၢ်လၢ ယဟိဝၤယွၤ အဲၣ်အီၤသ့ၣ်ဧၢ, မ့ၢ်လၢ ကစၢ်ယွၤဃုထၢထီၣ်သုလၢ အခီၣ်ထံးလံၤလံၤ ဒ်သိးသုကဒိးန့ၢ်ဘၣ် တၢ်အုၣ်က့ၤခီၣ်က့ၤအဃိ ပကဘၣ်စံးဘျုး ကစၢ်ယွၤလၢသုဃိ ထီဘိလီၤ.+ အဝဲမၤဝဲ ခီဖျိအပာ်စီဆှံသုလၢ+ အသးစီဆှံ ဒီးခီဖျိသုနာ် တၢ်မ့ၢ်တၢ်တီအဃိလီၤ. ၁၄ အဝဲကိးဃီၤသုလၢ သုကဒိးန့ၢ်ဘၣ် တၢ်အုၣ်က့ၤခီၣ်က့ၤ ခီဖျိတၢ်သးခုကစီၣ်လၢ ပစံၣ်တဲၤတဲလီၤအီၤ ဒ်သိးသုကဒိးန့ၢ်ဘၣ် ပကစၢ်ယ့ၣ်ၡူးခရံာ် အလၤကပီၤအဂီၢ်လီၤ.+ ၁၅ အဃိ ဒီပုၢ်ဝဲၢ်သ့ၣ်ဧၢ, ဆၢထၢၣ်ဂၢၢ်ဂၢၢ်ကျၢၤကျၢၤ+ ဒီးဟံးဃာ်တၢ်ဟံးစုနဲၣ်ကျဲ လၢသုမၤလိဘၣ်တဖၣ်+ ခီဖျိတၢ်ကတိၤဒီး လံာ်ပရၢလၢအဟဲလၢ ပအိၣ်န့ၣ်တက့ၢ်. ၁၆ တကးဒံးဘၣ် ပပၢ်ကစၢ်ယွၤအဲၣ်ပှၤ+ ဒီးခီဖျိလၢ အတၢ်သးကညီၤ ဒိၣ်ဒိၣ်မုၢ်မုၢ်အဃိ အဝဲဟ့ၣ်ပှၤ တၢ်မၤမုာ်အထူအယိာ် ဒီးတၢ်မုၢ်လၢ်လၢအဂ့ၤလီၤ.+ မ်ပပၢ်ကစၢ်ယွၤ ဒီးပကစၢ်ယ့ၣ်ၡူးခရံာ် ၁၇ မၤမုာ်ထီၣ်သုသး ဒီးမၤဂၢၢ်ကျၢၤသု ဒ်သိးသုကမၤတၢ်ဒီး တဲတၢ်လၢအဂ့ၤ ထီဘိတက့ၢ်.