ရိမ့ၤ
၁၆ ယပာ်ဖျါထီၣ်န့ၢ်သု ပဒီပုၢ်ဝဲၢ်မုၣ်ဖံဘ့ၤ လၢအမၤစၢၤတၢ်လၢ ဝ့ၢ်က့ၣ်ဃရ့း အတၢ်အိၣ်ဖှိၣ်အပူၤလီၤ.+ ၂ ဝံသးစူၤတူၢ်လိာ်မုာ်အီၤ ဒ်ပှၤကြၢးတူၢ်လိာ် ကစၢ်အပှၤစီဆှံတဖၣ် အသိးတက့ၢ်. အဝဲကဲပှၤလၢအဒီသဒၢယၤ ဒီးပှၤအါဂၤလီၤ. အဃိ တၢ်လၢ အလိၣ်ဘၣ်ဝဲ တမံၤဂ့ၤတမံၤဂ့ၤန့ၣ် မၤစၢၤအီၤတက့ၢ်.+
၃ ဆၢဂ့ၤဆၢဝါန့ၢ်ယၤ နီၢ်ပြံစကံးလၤ ဒီးစီၤအကူလၤ+ လၢအမ့ၢ် ပှၤမၤသကိးတၢ်ဒီးယၤလၢ ယ့ၣ်ၡူးခရံာ် အတၢ်မၤန့ၣ်တက့ၢ်. ၄ အဝဲသ့ၣ် ဒိးလီၤအကိာ်လၢယဂီၢ်+ ဒီးယစံးဘျုးဘၣ် အဝဲသ့ၣ်လီၤ. ဘၣ်ဆၣ် တမ့ၢ်ထဲလၢယၤတဂၤဘၣ်, ပှၤကလုာ်တဖၣ် အတၢ်အိၣ်ဖှိၣ်ခဲလၢာ် စံးဘျုးစံးဖှိၣ်အဝဲသ့ၣ် စ့ၢ်ကီးလီၤ. ၅ ဆၢဂ့ၤဆၢဝါန့ၢ်ယၤ တၢ်အိၣ်ဖှိၣ်လၢ အအိၣ်ဖှိၣ်လၢ အဝဲသ့ၣ် အဟံၣ်ပူၤတက့ၢ်.+ ဒီးဆၢဂ့ၤဆၢဝါန့ၢ်ယၤ ယပှၤသးဘိ စီၤအ့ပဲန့းတူးတက့ၢ်. လၢအၤစံအကီၢ်ရ့ၣ် အပူၤန့ၣ် အဝဲမ့ၢ် ပှၤလၢအကဲထီၣ် ခရံာ်အပျဲၢ်အဘီၣ် အဆိကတၢၢ်တဖၣ် အကျါတဂၤလီၤ.* ၆ ဆၢဂ့ၤဆၢဝါန့ၢ်ယၤ နီၢ်မၤရံ လၢအမၤတၢ်ဆူၣ်ဆူၣ်လၢ သုဂီၢ်တဂၤန့ၣ်တက့ၢ်. ၇ ဆၢဂ့ၤဆၢဝါန့ၢ်ယၤ စီၤအၤဒြနံကူး ဒီးစီၤယူၤနံ လၢအမ့ၢ် ယဘူးယတံၢ်တဖၣ်+ ဒီးပှၤလၢအလီၤဘၣ်လၢ ဃိာ်ပူၤဒီးယၤတက့ၢ်. တၢ်မၢဖိတဖၣ် သ့ၣ်ညါအဝဲသ့ၣ်ဂ့ၤဂ့ၤ ဒီးအဝဲသ့ၣ် မ့ၢ်ပှၤလၢ အပိာ်ဝဲခရံာ်အခံ ယံာ်န့ၢ်ဒံးယၤလီၤ.
၈ ဆၢဂ့ၤဆၢဝါန့ၢ်ယၤ စီၤအၣ်ပျံ လၢအမ့ၢ် ယပှၤသးဘိ ဒီးမ့ၢ်စ့ၢ်ကီး ကစၢ်အပျဲၢ်အဘီၣ် န့ၣ်တက့ၢ်. ၉ ဆၢဂ့ၤဆၢဝါန့ၢ်ယၤ စီၤအူၢ်ဘါနူး လၢအမ့ၢ် ပှၤလၢအမၤသကိးတၢ်ဒီးပှၤလၢ ခရံာ်အတၢ်မၤ ဒီးယပှၤသးဘိ စီၤစတါဃူၣ် တက့ၢ်. ၁၀ ဆၢဂ့ၤဆၢဝါန့ၢ်ယၤ စီၤအၤပ့းလ့ၣ် လၢအမ့ၢ် ပှၤလၢခရံာ် ဘၣ်သူၣ်ဘၣ်သးအီၤတဂၤန့ၣ်တက့ၢ်. ဒီးဆၢဂ့ၤဆၢဝါန့ၢ်ယၤ စီၤအရံးစတီးဘူလူး အဟံၣ်ဖိဃီဖိတက့ၢ်. ၁၁ ဆၢဂ့ၤဆၢဝါန့ၢ်ယၤ စီၤဟ့ၤရဒံ လၢအမ့ၢ် ယဘူးယတံၢ်န့ၣ်တက့ၢ်. ဒီးဆၢဂ့ၤဆၢဝါန့ၢ်ယၤ စီၤနၢ်ကံစူး အဟံၣ်ဖိဃီဖိ လၢအမ့ၢ် ကစၢ်အပျဲၢ်အဘီၣ်တဖၣ်န့ၣ်တက့ၢ်. ၁၂ ဆၢဂ့ၤဆၢဝါန့ၢ်ယၤ နီၢ်တြူဖဲၤနၤ ဒီးနီၢ်တြူဖိၤစၤ လၢအမ့ၢ် ပိာ်မုၣ်လၢ အမၤတၢ်ဆူၣ်ဆူၣ်လၢ ကစၢ်အဂီၢ်န့ၣ်တက့ၢ်. ဒီးဆၢဂ့ၤဆၢဝါန့ၢ်ယၤ ပပှၤသးဘိနီၢ်ပ့ၢ်စံ မ့ၢ်လၢအမၤတ့ၢ်တၢ်အါမး လၢကစၢ်အဂီၢ်န့ၣ်တက့ၢ်. ၁၃ ဆၢဂ့ၤဆၢဝါန့ၢ်ယၤ ကစၢ်အပှၤဃုထၢဖိ စီၤရူဖူး ဒီးအမိလၢ ယပာ်အီၤဒ်သိးဒီးယမိန့ၣ်တက့ၢ်. ၁၄ ဆၢဂ့ၤဆၢဝါန့ၢ်ယၤ စီၤအစူၣ်ကြံတူး, စီၤဖျ့ကီၣ်, စီၤဟ့ၢ်မ့ၤ, စီၤပၤတြီးဘၤ, စီၤဟ့ၣ်မ့ၣ် ဒီးဒီပုၢ်ဝဲၢ်ခွါတဖၣ် လၢအအိၣ်ဒီး အဝဲသ့ၣ်န့ၣ်တက့ၢ်. ၁၅ ဆၢဂ့ၤဆၢဝါန့ၢ်ယၤ စီၤဖံၤလလီးကူး ဒီးနီၢ်ယူၤလံ, စီၤနၤရ့း ဒီးအဒီပုၢ်ဝဲၢ်မုၣ်, စီၤအီးလူၣ်ပၤ ဒီးပှၤစီဆှံခဲလၢာ် လၢအအိၣ်ဒီး အဝဲသ့ၣ်န့ၣ်တက့ၢ်. ၁၆ ဆၢဂ့ၤဆၢဝါလိာ်သးလၢ တၢ်အဲၣ်တၢ်ကွံ* အပူၤတက့ၢ်. ခရံာ်အတၢ်အိၣ်ဖှိၣ်ခဲလၢာ် ဆၢဂ့ၤဆၢဝါသုလီၤ.
၁၇ ဒီပုၢ်ဝဲၢ်သ့ၣ်ဧၢ, ယဟ့ၣ်သဆၣ်ထီၣ်သုလၢ သုကပလီၢ်သုသး ဘၣ်ဃးဒီး ပှၤလၢအဒုးအိၣ်ထီၣ် တၢ်လီၤမုၢ်လီၤဖး ဒီးတၢ်လီၤဃံၢ်အလီၢ် လၢအထီဒါလိာ်သးဒီး တၢ်သိၣ်လိလၢ သုမၤလိတ့ၢ်န့ၣ်လီၤ. ဒီးဟးဆှဲးပှၤတဖၣ်န့ၣ်တက့ၢ်.+ ၁၈ ပှၤဒ်အံၤတဖၣ်န့ၣ် တမ့ၢ်ပကစၢ်ခရံာ်အကုၢ်ဘၣ်. အဝဲသ့ၣ် မၤတၢ်လၢ အနီၢ်ကစၢ် အတၢ်သးကွံ* အဂီၢ်လီၤ. ခီဖျိလၢ အဝဲသ့ၣ်တဲတၢ်သ့ ဒီးတဲမုာ်ပှၤသးအဃိ အဝဲသ့ၣ် လံၣ်န့ၢ်လီန့ၢ်ပှၤလၢ အနာ်တၢ်ညီသ့ၣ်တဖၣ်လီၤ. ၁၉ သုအိၣ်ဒီး တၢ်ဒိကနၣ်န့ၣ် ပှၤခဲလၢာ်သ့ၣ်ညါဝဲ ဒီးယသးခုလၢသုဃိလီၤ. ဘၣ်ဆၣ် ယအဲၣ်ဒိးလၢ သုကကူၣ်တၢ်သ့လၢ တၢ်ဂ့ၤတကပၤ ဒီးဟးဆှဲးတၢ်အၢလီၤ.+ ၂၀ ကစၢ်ယွၤလၢ အဟ့ၣ်လီၤ တၢ်ဃူတၢ်ဖိးတဂၤန့ၣ် တယံာ်လၢၤဘၣ် ကမၤသဘှံး မုၣ်ကီၤလံၢ်*+ လၢသုခီၣ်ဖီလာ်လီၤ. မ်သုဒိးန့ၢ်ဘၣ် ပကစၢ်ယ့ၣ်ၡူး အတၢ်သးကညီၤ ဒိၣ်ဒိၣ်မုၢ်မုၢ်တက့ၢ်.
၂၁ စီၤတံၤမသ့း လၢအမၤသကိးတၢ်ဒီးယၤန့ၣ် ဆၢဂ့ၤဆၢဝါသုလီၤ. ဒီးယဘူးယတံၢ်လၢအမ့ၢ် စီၤလူကံၤ, စီၤယါစီၣ် ဒီးစီၤစီးပၤတြူးစ့ၢ်ကီး ဆၢဂ့ၤဆၢဝါသုလီၤ.+
၂၂ ယမ့ၢ်စီၤတ့ၢ်တံၤ လၢအကွဲးလံာ်တဘ့ၣ်အံၤ ဒီးယဆှၢန့ၢ်သု ခရံာ်ဖိ အတၢ်ဆၢဂ့ၤဆၢဝါလီၤ.
၂၃ စီၤကါယူး+ မ့ၢ်ဟံၣ်ကစၢ်လၢ အတူၢ်လိာ်မုာ်ယၤ ဒီးတၢ်အိၣ်ဖှိၣ်ဒီတဖု အိၣ်ဖှိၣ်ဝဲလၢ အဟံၣ်ပူၤလီၤ. အဝဲဆၢဂ့ၤဆၢဝါသုလီၤ. ဝ့ၢ်အပှၤပၢၤစ့ စီၤအ့ရၤစတူး ဒီးအဒီပုၢ်ဝဲၢ်ခွါ စီၤကူအၢ်တူး ဆၢဂ့ၤဆၢဝါသုစ့ၢ်ကီးလီၤ. ၂၄ *—
၂၅ ကစၢ်ယွၤ မၤဂၢၢ်ကျၢၤထီၣ်သုသ့ ခီဖျိလၢ တၢ်သးခုကစီၣ်လၢ ယစံၣ်တဲၤတဲလီၤ ဒီးတၢ်စံၣ်တဲၤတဲလီၤ ဘၣ်ဃး ယ့ၣ်ၡူးခရံာ် အဂ့ၢ်လီၤ. တၢ်ကစီၣ်အံၤ ဘၣ်ထွဲလိာ်သးဒီး တၢ်လီၣ်ဖျါထီၣ် တၢ်ခူသူၣ်စီဆှံလၢ+ အဘၣ်တၢ်ပာ်ခူသူၣ်တ့ၢ်အီၤ လၢတၢ်ဆၢကတီၢ်ဖးယံာ်လံ. ၂၆ ဘၣ်ဆၣ် ခဲအံၤန့ၣ် တၢ်ခူသူၣ်စီဆှံအံၤ ဘၣ်တၢ်ပာ်ဖျါထီၣ်အီၤလီၤ. ဒီးပှၤကလုာ်တဖၣ် ဘၣ်တၢ်ဒုးသ့ၣ်ညါ အဝဲသ့ၣ်လၢ တၢ်ခူသူၣ်စီဆှံအံၤ ခီဖျိ တၢ်ကွဲးအသးလၢ အအိၣ်ဒီးဝံအတၢ်စံးပာ်တဖၣ် ဒ်ကစၢ်ယွၤလၢ အအိၣ်မူဝဲ လီၤထူလီၤယိာ်တဂၤ မၤလိာ်ဝဲအသိးလီၤ. အဝဲအဲၣ်ဒိးလၢ ပှၤကအိၣ်ဒီး တၢ်ဒိကနၣ်လၢ အဟဲခီဖျိတၢ်နာ်လီၤ. ၂၇ ကစၢ်ယွၤလၢအမ့ၢ် ပှၤထဲတဂၤ လၢအအိၣ်ဒီး တၢ်ကူၣ်သ့န့ၣ်+ မ်အဘၣ် တၢ်မၤလၤကပီၤအီၤ ခီဖျိယ့ၣ်ၡူးခရံာ် အစိၤစိၤဃၣ်ဃၣ်တက့ၢ်. အၤမ့ၣ်.