၁ ကရံၣ်သူး

၁ ယၤ, စီၤပီလူး လၢအဘၣ်တၢ်ကိးန့ၢ်အီၤ ဒ်သိးကကဲထီၣ် ယ့ၣ်ၡူးခရံာ်အတၢ်မၢဖိတဂၤ+ ဒ်ကစၢ်ယွၤ အတၢ်ဘၣ်သးအသိး ဒီးပဒီပုၢ်ဝဲၢ်ခွါ စီၤစိၤစသ့ၣ်န့ၣ် ၂ ပကွဲးန့ၢ် လံာ်ပရၢတဘ့ၣ်အံၤလၢ ကစၢ်ယွၤ အတၢ်အိၣ်ဖှိၣ် လၢဝ့ၢ်ကရံၣ်သူးအပူၤလီၤ.+ သုဝဲလၢအမ့ၢ် ပှၤစီဆှံလၢ အဘၣ်တၢ်ပာ်စီဆှံအီၤ လၢယ့ၣ်ၡူးခရံာ်အပူၤ+ ဒီးပှၤခဲလၢာ်လၢ အအိၣ်လၢတၢ်လီၢ်ဝးဝး လၢအကိးထီၣ် ပကစၢ်ယ့ၣ်ၡူးခရံာ်အမံၤ+ လၢအမ့ၢ် အဝဲသ့ၣ်အကစၢ် ဒီးပကစၢ်န့ၣ်

၃ မ်သုဒိးန့ၢ်ဘၣ် တၢ်သးကညီၤ ဒိၣ်ဒိၣ်မုၢ်မုၢ် ဒီးတၢ်ဃူတၢ်ဖိးလၢ အဟဲလၢ ပပၢ်ကစၢ်ယွၤ ဒီးကစၢ်ယ့ၣ်ၡူးခရံာ် အအိၣ်န့ၣ်တက့ၢ်.

၄ ယကစၢ်ယွၤန့ၣ် ပာ်ဖျါထီၣ် အတၢ်သးကညီၤ ဒိၣ်ဒိၣ်မုၢ်မုၢ် လၢသုဖီခိၣ် ခီဖျိလၢ ယ့ၣ်ၡူးခရံာ် အဃိ ယစံးဘျုးဘၣ် ယကစၢ်ယွၤထီဘိလီၤ. ၅ ခီဖျိသုအိၣ်လၢ ခရံာ်အပူၤအဃိ သုဘၣ်ဆိၣ်ဂ့ၤ ထူးထူးတီၤတီၤ လၢတၢ်ခဲလၢာ်အပူၤလီၤ. လၢတၢ်န့ၣ်အဃိ သုအိၣ်ဒီးတၢ်သ့တၢ်ဘၣ် လၢလၢပှဲၤပှဲၤ လၢကတဲတၢ်အဂီၢ် ဒီးသုအိၣ်ဒီးတၢ်သ့ၣ်ညါ လၢလၢပှဲၤပှဲၤ စ့ၢ်ကီးလီၤ.+ ၆ တၢ်အုၣ်အသးလၢ အဘၣ်ဃးဒီး ခရံာ်အဂ့ၢ်န့ၣ်+ အိၣ်သူၣ်လီၤအသး ဂၢၢ်ဂၢၢ်ကျၢၤကျၢၤ လၢသုပူၤ ၇ အဃိ ဖဲသုအိၣ်ခိးကွၢ်လၢ် တၢ်လၢတၢ်သူၣ်ဆူၣ် သးဆူၣ်အပူၤလၢ တၢ်ကလီၣ်ဖျါထီၣ် ပကစၢ်ယ့ၣ်ၡူးခရံာ် အဆၢကတီၢ်န့ၣ်+ တၢ်ဟ့ၣ်လၢ သုတဒိးန့ၢ်ဘၣ်အီၤဘၣ်န့ၣ် တအိၣ်နီတခါဘၣ်. ၈ ဒီးဖဲပကစၢ်ယ့ၣ်ၡူးခရံာ် အမုၢ်နံၤအတီၢ်ပူၤန့ၣ်+ ဒ်သိး တၢ်ပာ်ဒ့ၣ်ပာ်ကမၣ်သု အလီၢ်သုတအိၣ်တဂ့ၤအဂီၢ် ကစၢ်ယွၤ ကမၤဂၢၢ်မၤကျၢၤသု တုၤလၢ တၢ်အကတၢၢ်လီၤ. ၉ ကစၢ်ယွၤလၢ အတီဝဲတဂၤန့ၣ်+ အဝဲကိးဃီၤသု ဆူတၢ်ရ့လိာ်သးဒီး ပကစၢ်ယ့ၣ်ၡူးခရံာ် လၢအမ့ၢ်အဖိခွါလီၤ.

၁၀ ဒီပုၢ်ဝဲၢ်သ့ၣ်ဧၢ, ခီဖျိလၢ ပကစၢ်ယ့ၣ်ၡူးခရံာ် အမံၤအဃိ ယဟ့ၣ်သဆၣ်ထီၣ် သုကိးဂၤဒဲးလၢ သုကတဲတၢ်တမံၤဃီ ဒီးဒ်သိး တၢ်လီၤမုၢ်လီၤဖး သုတအိၣ်လၢ သုကျါတဂ့ၤအဂီၢ်လီၤ.+ လၢတၢ်န့ၣ်အလီၢ် သုကဘၣ် အိၣ်ဃူအိၣ်ဖိး လၢလၢပှဲၤပှဲၤ လၢတၢ်သးတဖျၢၣ်ဃီအပူၤ ဒီးလၢတၢ်ဆိကမိၣ် တမံၤဃီအပူၤလီၤ.+ ၁၁ ယဒီပုၢ်ဝဲၢ်သ့ၣ်ဧၢ, နီၢ်ကျိးအ့ၤ အဟံၣ်ဖိဃီဖိတနီၤ ဒုးသ့ၣ်ညါယၤလၢ တၢ်အ့ၣ်လိာ်ဆိးက့ အိၣ်ထီၣ်လၢသုကျါလီၤ. ၁၂ တၢ်လၢယအဲၣ်ဒိးတဲန့ၣ် မ့ၢ်ဒ်အံၤလီၤ. သုတဲလိာ်သုသး တဂၤဒီးတဂၤလၢ “ယမ့ၢ်စီၤပီလူးအပျဲၢ်” “ယၤန့ၣ် ယမ့ၢ်စီၤအပီးလိၤအပျဲၢ်”+ “မ့မ့ၢ်ယၤန့ၣ် ယမ့ၢ်စီၤက့ၤဖး* အပျဲၢ်” “ဘၣ်ဆၣ် မ့မ့ၢ်ယၤန့ၣ် ယမ့ၢ်ခရံာ်အပျဲၢ်လီၤ.” ၁၃ ခရံာ်န့ၣ်မ့ၢ် အလီၤဖးလိာ်အသးဧါ. မ့ၢ်စီၤပီလူးန့ၣ် ဘၣ်တၢ်မၤသံအီၤလၢ သ့ၣ်တၢၣ်အလိၤလၢ သုဂီၢ်ဧါ. ဒီးမ့ၢ်သုဒိးဘျၢသုသးလၢ စီၤပီလူးအမံၤဧါ. ၁၄ ယစံးဘျုးဘၣ် ကစၢ်ယွၤလၢ ယတဒိးဘျၢသုလၢထံ နီတဂၤဘၣ်, ယဒိးဘျၢထဲဒၣ် စီၤကြံစပူး+ ဒီးစီၤကါယူးလီၤ.+ ၁၅ အဃိ သုတဲလၢ သုဘျၢထံလၢယမံၤ တသ့နီတဂၤဘၣ်. ၁၆ မ့ၢ်လံ, ယဒိးဘျၢစ့ၢ်ကီး စီၤစတ့းဖနၣ် အဟံၣ်ဖိဃီဖိလီၤ.+ မ့မ့ၢ်ပှၤအဂၤတဖၣ် မ့ၢ်ယဒိးဘျၢအဝဲသ့ၣ် တဂၤဂၤဧါန့ၣ် ယတနီၣ်ဘၣ်လၢၤဘၣ်. ၁၇ ခရံာ်တဆှၢလီၤယၤ ဒ်သိးယကဘျၢ ပှၤဂၤလၢထံအဂီၢ်ဘၣ်. မ့ၢ်ဒ်သိးယကစံၣ်တဲၤတဲလီၤ တၢ်သးခုကစီၣ်အဂီၢ်လီၤ.+ ဒီးဒ်သိးခရံာ် အတၢ်မၤအၢမၤနး အသ့ၣ်တၢၣ်* သုတကဲထီၣ် တၢ်ကလီကလီ တဂ့ၤအဂီၢ် ယတသူ ပှၤကူၣ်ဘၣ်ကူၣ်သ့ အတၢ်ကတိၤတဖၣ်ဘၣ်.

၁၈ ပှၤလၢအကတုၤလၢ တၢ်ဟးဂီၤတဖၣ်န့ၣ် ထံၣ်ဝဲတၢ်ကတိၤလၢ အဘၣ်ဃးဒီး တၢ်မၤအၢမၤနး အသ့ၣ်တၢၣ်န့ၣ် ဒ်တၢ်ကလီကလီအသိးလီၤ.+ မ့မ့ၢ်ပဝဲလၢ ဘၣ်တၢ်မၤပူၤဖျဲးပှၤန့ၣ် ပထံၣ်အီၤလၢအမ့ၢ် ကစၢ်ယွၤ အတၢ်စိတၢ်ကမီၤလီၤ.+ ၁၉ တၢ်ကွဲးအသးအိၣ်ဝဲလၢ “ယကမၤဟးဂီၤကွံာ် ပှၤကူၣ်ဘၣ်ကူၣ်သ့တဖၣ် အတၢ်ကူၣ်သ့ ဒီးယကဂ့ၢ်လိာ် ပှၤကူၣ်တၢ်သ့တဖၣ် အတၢ်သ့ၣ်ညါနၢ်ပၢၢ်လီၤ.”+ ၂၀ စိၤခဲအံၤန့ၣ် ပှၤကူၣ်တၢ်သ့အိၣ်ဖဲလဲၣ်, ပှၤကွဲးလံာ်ဖိအိၣ်ဖဲလဲၣ် ဒီးပှၤလၢအကတိၤ ထီဒါတၢ်သ့န့ၣ် အိၣ်ဖဲလဲၣ်. ဟီၣ်ခိၣ်အတၢ်ကူၣ်သ့အံၤ ကစၢ်ယွၤပာ်ဖျါထီၣ်အီၤ ဒ်အမ့ၢ် တၢ်ကလီကလီအသိး တမ့ၢ်ဧီၤ. ၂၁ ပှၤဟီၣ်ခိၣ်ဖိ တသ့ၣ်ညါထီၣ်ကစၢ်ယွၤ+ ခီဖျိလၢ အဝဲသ့ၣ်အနီၢ်ကစၢ် အတၢ်ကူၣ်သ့အဃိဘၣ်. ဘၣ်ဆၣ် လၢကစၢ်ယွၤ အတၢ်ကူၣ်သ့အပူၤန့ၣ်+ အဝဲဘၣ်သးလၢ ကအုၣ်က့ၤခီၣ်က့ၤပှၤလၢ အစူၢ်က့ၤနာ်က့ၤတၢ်တဖၣ် ခီဖျိပတၢ်စံၣ်တဲၤတဲလီၤ တၢ်ကစီၣ်လၢ ပှၤပာ်ပနီၣ်အီၤ ဒ်တၢ်ကလီကလီ အသိးလီၤ.+

၂၂ ပှၤယူဒၤဖိဃ့ဝဲ တၢ်ပနီၣ်လီၤလးတဖၣ်+ ဒီးပှၤကြံးဖိ ဃုကွၢ်ဝဲ တၢ်ကူၣ်သ့လီၤ. ၂၃ ဘၣ်ဆၣ် မ့မ့ၢ်ပဝဲဒၣ်အံၤ ပစံၣ်တဲၤတဲလီၤ ဘၣ်ဃးဒီး ခရံာ်ဘၣ်တၢ်မၤသံအီၤလၢ သ့ၣ်တၢၣ်အလိၤအဂ့ၢ်လီၤ. တၢ်ဂ့ၢ်အံၤ ကဲထီၣ်ဝဲ တၢ်လီၤဃံၢ်အလီၢ်လၢ ပှၤယူဒၤဖိအဂီၢ် ဒီးတၢ်ကလီကလီလၢ ပှၤကလုာ်တဖၣ်အဂီၢ်လီၤ.+ ၂၄ မ့မ့ၢ်လၢပှၤယူဒၤဖိ ဒီးပှၤကြံးဖိလၢ အဘၣ်တၢ်ကိးန့ၢ်အီၤတဖၣ် အဂီၢ်န့ၣ် ခရံာ်မ့ၢ်ဝဲ ကစၢ်ယွၤအစိကမီၤ ဒီးကစၢ်ယွၤအတၢ်ကူၣ်သ့လီၤ.+ ၂၅ တၢ်လၢအဟဲလၢ ကစၢ်ယွၤအအိၣ် လၢအဖျါလီၤဂာ်ဒ် တၢ်ကလီကလီအသိးန့ၣ် အကူၣ်တၢ်သ့ဒိၣ်န့ၢ်ဒံး ပှၤဟီၣ်ခိၣ်ဖိလီၤ. ဒီးတၢ်လၢအဟဲလၢ ကစၢ်ယွၤအအိၣ် လၢအဖျါလီၤဂာ်ဒ် တၢ်လၢအဂံၢ်စၢ်ဘါစၢ်အသိးန့ၣ် အဂံၢ်ဆူၣ်ဒိၣ်န့ၢ်ဒံး ပှၤဟီၣ်ခိၣ်ဖိလီၤ.+

၂၆ ဒီပုၢ်ဝဲၢ်သ့ၣ်ဧၢ, ဒ်သုထံၣ်ဘၣ်အသိး လၢသုဝဲလၢ ကစၢ်ယွၤကိးန့ၢ်ဝဲတဖၣ်အကျါန့ၣ် ပှၤကူၣ်တၢ်သ့လၢ နီၢ်ခိတကပၤမ့ၢ်ဂ့ၤ,+ ပှၤလၢအစိကမီၤဒိၣ်မ့ၢ်ဂ့ၤ, ပှၤလၢအအိၣ်ဖျဲၣ်ထီၣ်လၢ အအိၣ်ဒီး အလီၢ်အလၤမ့ၢ်ဂ့ၤ တအိၣ်အါအါဘၣ်.+ ၂၇ ကစၢ်ယွၤဃုထၢ တၢ်ကလီကလီလၢ ဟီၣ်ခိၣ်ချၢ ဒ်သိးအကမၤမဲာ်ဆှး ပှၤကူၣ်တၢ်သ့ ဒီးကစၢ်ယွၤဃုထၢ ပှၤလၢအဂံၢ်စၢ်ဘါစၢ် လၢဟီၣ်ခိၣ်ချၢ ဒ်သိးအကမၤမဲာ်ဆှး ပှၤလၢအဂံၢ်ဆူၣ်ဘါဆူၣ်လီၤ.+ ၂၈ ဒီးကစၢ်ယွၤဃုထၢ ပှၤလၢ အရ့တဒိၣ်ဘၣ်တဖၣ် လၢဟီၣ်ခိၣ်ချၢ, တၢ်လၢ ပှၤဆိကမိၣ်ဆံးအီၤတဖၣ် ဒီးတၢ်လၢပှၤထံၣ်ဝဲလၢ အတမ့ၢ် တၢ်နီတမံၤဘၣ်တဖၣ် ဒ်သိးအကမၤဟးဂီၤကွံာ် တၢ်လၢပှၤထံၣ်ဝဲလၢ အရ့ဒိၣ်တဖၣ်အဂီၢ်လီၤ.+ ၂၉ ကစၢ်ယွၤမၤဝဲဒ်န့ၣ်န့ၣ် မ့ၢ်ဒ်သိးပှၤသု တပာ်ကဖၢလၢအသး လၢအမဲာ်ညါ နီတဂၤတဂ့ၤအဂီၢ်လီၤ. ၃၀ ဘၣ်ဆၣ် ခီဖျိလၢ ကစၢ်ယွၤအဃိ သုအိၣ်လၢ ယ့ၣ်ၡူးခရံာ်အပူၤလီၤ. ဒီးယ့ၣ်ၡူး ပာ်ဖျါထီၣ်န့ၢ်ပှၤ ကစၢ်ယွၤအတၢ်ကူၣ်သ့ ဒီးခီဖျိလၢ ယ့ၣ်ၡူးအဃိ တၢ်ပာ်တီပာ်လိၤပှၤ,+ ပကဲထီၣ် ပှၤစီဆှံ+ ဒီးအဝဲမၤပူၤဖျဲးပှၤ ခီဖျိလၢ တၢ်ပှ့ၤက့ၤအဃိ စ့ၢ်ကီးလီၤ.+ ၃၁ လၢတၢ်န့ၣ်အဃိ ဒ်တၢ်ကွဲးအသး အိၣ်ဝဲအသိး “ပှၤလၢ အပာ်ကဖၢလၢအသးန့ၣ် မ်အပာ်ကဖၢလၢအသးလၢ ယဟိဝၤယွၤ* အပူၤတက့ၢ်.”+