၁ တံၤမသ့း
၁ ယၤ, စီၤပီလူးအံၤ ယမ့ၢ် ယ့ၣ်ၡူးခရံာ် အတၢ်မၢဖိ ခီဖျိလၢ ကစၢ်ယွၤ လၢအမ့ၢ် ပတၢ်အုၣ်က့ၤခီၣ်က့ၤ ဒီးယ့ၣ်ၡူးခရံာ်လၢအမ့ၢ် ပတၢ်မုၢ်လၢ်န့ၣ်+ ဟ့ၣ်လီၤတၢ်ကလုၢ်အဃိလီၤ. ၂ ဒီးယကွဲးလံာ်အံၤဆူ ပှၤလၢအစူၢ်က့ၤနာ်က့ၤတၢ် ကဒဲကဒဲ စီၤတံၤမသ့း*+ လၢယပာ်အီၤဒ်သိးဒီး ဖိခွါနီၢ်ကီၢ်တဂၤန့ၣ်+ အအိၣ်လီၤ.
မ်နဒိးန့ၢ်ဘၣ် တၢ်သးကညီၤဒိၣ်ဒိၣ်မုၢ်မုၢ်, တၢ်သူၣ်အိၣ်သးအိၣ် ဒီးတၢ်သူၣ်မံသးမုာ်လၢ ပၢ်ကစၢ်ယွၤ ဒီးပကစၢ်ယ့ၣ်ၡူးခရံာ် အအိၣ်တက့ၢ်.
၃ လၢညါဖဲ ယဘူးထီၣ်ကလဲၤလၢ ကီၢ်မၤက့းဒနံအခါ ယဟ့ၣ်ဂံၢ်ဟ့ၣ်ဘါနၤလၢ နကအိၣ်တ့ၢ်လၢ ဝ့ၢ်အ့းဖ့းစူးလီၤ. ခဲအံၤ ယဟ့ၣ်ဂံၢ်ဟ့ၣ်ဘါနၤလၢ နကမၤဒ်န့ၣ်စ့ၢ်ကီး ဒ်သိး နကမၤလိာ် ပှၤတနီၤနီၤလၢ အတဘၣ်သိၣ်လိ တၢ်သိၣ်လိလၢ အလီၤဆီတဂ့ၤ, ၄ အသုတကနၣ်ဃုာ် ပူလၢအကမၣ်တဖၣ်+ ဒီးတၢ်ကွဲးဖျါထီၣ် တၢ်ဟဲလီၤစၢၤလီၤသွဲၣ် အမံၤအသၣ်တဖၣ် တဂ့ၤအဂီၢ်လီၤ. တၢ်သ့ၣ်တဖၣ်န့ၣ် တကဲဘျုး နီတမံၤဘၣ်.+ အိၣ်ဒၣ်အဒုးအိၣ်ထီၣ် တၢ်သံကွၢ်တဖၣ် ဒီးအတဘၣ်ဃးဒီး တၢ်လၢ ကစၢ်ယွၤဟ့ၣ်လီၤ ဒ်သိး ကမၤဂၢၢ်ကျၢၤ တၢ်နာ်အဂီၢ်ဘၣ်. ၅ တၢ်ဟံးစုနဲၣ်ကျဲသ့ၣ်တဖၣ်အံၤ အတၢ်တိာ်ပာ်န့ၣ် မ့ၢ်ဒ်သိး ပကအိၣ်ဒီး တၢ်အဲၣ်တၢ်ကွံလၢ+ အဟဲအိၣ်ထီၣ် ခီဖျိလၢ တၢ်သးကဆှီ, သးလၢအသ့ၣ်ညါဒၣ်တၢ် လၢအဂ့ၤ ဒီးတၢ်နာ်+ လၢအတအိၣ်ဒီး တၢ်ပာ်မၤအသးဘၣ်လီၤ. ၆ ဘၣ်ဆၣ် ပှၤတနီၤနီၤ တတူၢ်လိာ် တၢ်သ့ၣ်တဖၣ်န့ၣ်ဘၣ်အဃိ အဝဲသ့ၣ်နုာ်လီၤပၣ်ဃုာ်ဝဲလၢ တၢ်တဲသကိးတၢ်လၢ အခီပညီတအိၣ်ဘၣ်လီၤ.+ ၇ အဝဲသ့ၣ် အဲၣ်ဒိးကဲထီၣ် သရၣ်လၢအသိၣ်လိ+ တၢ်သိၣ်တၢ်သီ ဘၣ်ဆၣ် တၢ်လၢအဝဲသ့ၣ် တဲဝဲတဖၣ်မ့ၢ်ဂ့ၤ, တၢ်လၢအဝဲသ့ၣ် တဲဝဲလၢ တၢ်သူၣ်ဆူၣ်သးဆူၣ်အပူၤမ့ၢ်ဂ့ၤ အနီၢ်ကစၢ်မး တနၢ်ပၢၢ်ဝဲဘၣ်.
၈ ပသ့ၣ်ညါလၢ စီၤမိၤၡ့ အတၢ်သိၣ်တၢ်သီန့ၣ် ဂ့ၤဝဲလီၤ. ဘၣ်ဆၣ် ပှၤကဘၣ်သူအီၤလၢ ကျဲလၢအဘၣ်လီၤ. ၉ အဃိ ပှၤကဘၣ်နၢ်ပၢၢ်လၢ တၢ်ဒုးအိၣ်ထီၣ် တၢ်သိၣ်တၢ်သီန့ၣ် တမ့ၢ်လၢ ပှၤတီပှၤလိၤအဂီၢ်ဘၣ်, မ့ၢ်လၢ ပှၤလၢအမၤကမၣ်တၢ်,+ ပှၤလၢအထီဒါတၢ်, ပှၤလၢအတယူးတယီၣ်ယွၤဘၣ်, ပှၤတၢ်ဒဲးဘးဖိ, ပှၤလၢတၢ်သးတီတအိၣ်ဘၣ်,* ပှၤလၢအတတူၢ်လိာ် တၢ်လၢအစီအဆှံဘၣ်, ပှၤလၢအမၤသံအမိၢ် ဒီးပှၤလၢအမၤသံအပၢ်, ပှၤလၢအမၤသံပှၤကညီ, ၁၀ ပှၤလၢ အမၤကမၣ်မုၣ်ကမၣ်ခွါ,* ပိာ်ခွါလၢ အမံဃုာ်ဒီးပိာ်ခွါကဒဲကဒဲ, ပှၤလၢအစံၣ်စိာ်ပှၤကညီ, ပှၤလံၣ်တၢ်လီတၢ်, ပှၤလၢအတတီဒီး အတၢ်အၢၣ်လီၤဘၣ် ဒီးပှၤလၢအမၤ တၢ်အဂၤခဲလၢာ်လၢ အထီဒါလိာ်အသးဒီး တၢ်သိၣ်လိလၢ အဂ့ၤအဘၣ်တဖၣ်အဂီၢ်လီၤ.+ ၁၁ တၢ်သိၣ်လိအဝဲန့ၣ် ဒိးသန့ၤထီၣ်အသးလၢ တၢ်သးခုကစီၣ် လၢအပှဲၤဒီး တၢ်လၤကပီၤလၢ အဟဲလၢ ကစၢ်ယွၤလၢ အသးခုတဂၤ အအိၣ်လီၤ. ဒီးကစၢ်ယွၤအးလီၤယၤလၢ+ တၢ်သးခုကစီၣ်အံၤလီၤ.
၁၂ ပကစၢ်ယ့ၣ်ၡူးခရံာ် လၢအဟ့ၣ်လီၤယၤ တၢ်စိတၢ်ကမီၤန့ၣ် ယစံးဘျုးဘၣ်အီၤလီၤ. အဝဲပာ်ယၤဒ် ပှၤလၢအသးတီ ခီဖျိ အဟ့ၣ်လီၤယၤမူဒါ လၢအဘၣ်ဃးဒီး တၢ်စံၣ်တဲၤတဲလီၤ တၢ်မၤလီၤ.+ ၁၃ လၢအပူၤကွံာ်န့ၣ် ယမ့ၢ်ပှၤလၢ အကတိၤထီဒါ ကစၢ်ယွၤ, ယမၤအၢမၤနး အပှၤဂီၢ်မုၢ် ဒီးယမ့ၢ်ပှၤလၢ အပာ်ထီၣ်ထီသးလီၤ.+ ဘၣ်ဆၣ် ယတသ့ၣ်ညါဘၣ်အဃိ ယမၤဘၣ် ဒီးယတၢ်နာ် တအိၣ်ဘၣ်အဃိ ခရံာ်ပာ်ဖျါထီၣ် တၢ်သးကညီၤ လၢယဖီခိၣ်လီၤ. ၁၄ ဒီးယဒိးန့ၢ်ဘၣ် တၢ်သးကညီၤ ဒိၣ်ဒိၣ်မုၢ်မုၢ်လၢ ကစၢ်အအိၣ် အါအါဂီၢ်ဂီၢ် ဒီးယဒိးန့ၢ်ဘၣ်တၢ်နာ်ဒီး တၢ်အဲၣ်လၢ ယ့ၣ်ၡူးခရံာ်အအိၣ်လီၤ. ၁၅ တၢ်ကတိၤလၢ ယကတဲတခါအံၤ မ့ၢ်ဝဲတီဝဲ ဒီးပကြၢးတူၢ်လိာ်အီၤ လၢပသးဒီဖျၢၣ်လီၤ. ယ့ၣ်ၡူးခရံာ် ဟဲလီၤလၢ ဟီၣ်ခိၣ်ချၢန့ၣ် မ့ၢ်ဒ်သိး ကအုၣ်က့ၤခီၣ်က့ၤ ပှၤတၢ်ဒဲးဘးဖိအဂီၢ်လီၤ.+ မ့မ့ၢ်ယၤန့ၣ် ယမ့ၢ်ပှၤတၢ်ဒဲးဘးဖိ အဒိၣ်ကတၢၢ်လီၤ.+ ၁၆ ဘၣ်ဆၣ် တၢ်ပာ်ဖျါထီၣ် တၢ်သးကညီၤ လၢယဖီခိၣ် ဒ်သိးခရံာ် ကပာ်ဖျါထီၣ် အတၢ်ဝံသးစူၤခဲလၢာ် ခီဖျိလၢယၤ လၢအမ့ၢ် ပှၤတၢ်ဒဲးဘးဖိ အဒိၣ်ကတၢၢ်တဂၤအံၤလီၤ. ဒီးအဒုးကဲထီၣ်ယၤလၢ တၢ်အဒိအတဲာ်လၢ ပှၤလၢ အကစူၢ်က့ၤနာ်က့ၤအီၤလၢ အကန့ၢ်ဘၣ် တၢ်မူအထူအယိာ်တဖၣ် အဂီၢ်လီၤ.+
၁၇ စီၤပၤအထူအယိာ်+ လၢအဟးဂီၤတသ့ဘၣ်ဒီး+ ပှၤထံၣ်အီၤတသ့ဘၣ်တဂၤ+ လၢအမ့ၢ် ကစၢ်ယွၤထဲတဂၤန့ၣ်+ မ်တၢ်ကဟုကညီၢ် ဒီးတၢ်လၤကပီၤ အိၣ်ဒီးအီၤ လီၤထူလီၤယိာ်တက့ၢ်. အၤမ့ၣ်.
၁၈ ယဖိခွါ စီၤတံၤမသ့းဧၢ, ယအးလီၤနၤလၢ တၢ်ဟံးစုနဲၣ်ကျဲအံၤ ဒ်ဝံအတၢ်စံးပာ်လၢညါ လၢအဘၣ်ဃးဒီးနဂ့ၢ် အိၣ်ဝဲအသိးလီၤ. တၢ်စံးပာ်တဖၣ်အံၤ ကဟ့ၣ်ဂံၢ်ဟ့ၣ်ဘါနၤ ဒ်သိးနကဆဲးဒုး တၢ်ဒုးလၢအဂ့ၤ+ အဂီၢ်လီၤ. ၁၉ ဖဲနမၤဒ်န့ၣ်အခါ ဆဲးပၢၤဃာ်နတၢ်နာ် ဒီးနသးလၢ အသ့ၣ်ညါဒၣ်တၢ် လၢအဂ့ၤတက့ၢ်.+ မ့မ့ၢ်ပှၤတနီၤနီၤန့ၣ် တကနၣ်ဃုာ် အသးလၢအသ့ၣ်ညါဒၣ်တၢ် လၢၤဘၣ်အဃိ အဝဲသ့ၣ် အတၢ်နာ် ဟးဂီၤဝဲ ဒ်ကဘီဟးဂီၤကွံာ်ဝဲ အသိးလီၤ. ၂၀ လၢပှၤသ့ၣ်တဖၣ်အံၤ အကျါန့ၣ် ပၣ်ဃုာ်ဒီး စီၤဟူၤမ့းနဲ+ ဒီးစီၤအလ့းစၣ်ဒြူးလီၤ. ဒီးယသိၣ်ဃီၣ် အဝဲသ့ၣ် ခီဖျိလၢ ယဟ့ၣ်လီၤကွံာ် အဝဲသ့ၣ်လၢ မုၣ်ကီၤလံၢ်*+ အစုပူၤ ဒ်သိးအဝဲသ့ၣ် ကန့ၢ်ဘၣ် တၢ်မၤလိလၢ အသုတကတိၤထီဒါ ကစၢ်ယွၤ တဂ့ၤအဂီၢ်လီၤ.