၂ ယိၤဟၣ်

၁ ယၤ, လၢအမ့ၢ် ပှၤသးပှၢ်တဂၤန့ၣ် ကွဲးလံာ်အံၤဆူ ပိာ်မုၣ်လၢအဘၣ် တၢ်ဃုထၢအီၤ* ဒီးအဖိတဖၣ်လၢ ယအဲၣ်အီၤနီၢ်ကီၢ်အအိၣ်လီၤ. ဘၣ်ဆၣ် ပှၤလၢအအဲၣ်သုန့ၣ် တမ့ၢ်ထဲယၤတဂၤဘၣ်. ကယဲၢ်ပှၤလၢ အသ့ၣ်ညါ တၢ်မ့ၢ်တၢ်တီန့ၣ် အဲၣ်သု ၂ မ့ၢ်လၢ တၢ်မ့ၢ်တၢ်တီ အိၣ်လၢပသးပူၤ ဒီးအကဆဲးအိၣ်ဒီးပှၤ လီၤထူလီၤယိာ် အဃိလီၤ. ၃ ပၢ်ကစၢ်ယွၤ ဒီးပၢ်အဖိခွါ ယ့ၣ်ၡူးခရံာ် ကသိၣ်လိပှၤ တၢ်မ့ၢ်တၢ်တီ ဒီးကပာ်ဖျါထီၣ်တၢ်အဲၣ်လၢ ပဖီခိၣ်လီၤ. တကးဒံးဘၣ် အဝဲသ့ၣ်ကပာ်ဖျါထီၣ်တၢ်သးကညီၤ ဒိၣ်ဒိၣ်မုၢ်မုၢ်, တၢ်သူၣ်အိၣ်သးအိၣ်လၢပဖီခိၣ် ဒီးကဟ့ၣ်ပှၤ တၢ်ဃူတၢ်ဖိးလီၤ.

၄ ယထံၣ်ဘၣ်နဖိတနီၤ လဲၤတၢ်လၢ တၢ်မ့ၢ်တၢ်တီအပူၤ+ ဒ်ပဒိးန့ၢ်ဘၣ် တၢ်မၤလိာ်လၢ ပၢ်အအိၣ်အသိးအဃိ ယသးခုဒိၣ်မးလီၤ. ၅ အဃိ ပိာ်မုၣ်လၢအဘၣ် တၢ်ဃုထၢထီၣ်အီၤဧၢ, ခဲအံၤ ယဃ့နၤလၢ မ်ပကအဲၣ်လိာ်ကွံလိာ်သး တဂၤဒီးတဂၤတက့ၢ်. (ယတကွဲးန့ၢ်နၤ တၢ်မၤလိာ်လၢအသီဘၣ်. မ့ၢ်တၢ်မၤလိာ်လၢ အအိၣ်ဒီးပှၤလၢ အခီၣ်ထံးလံ.)+ ၆ ဒီးတၢ်အဲၣ်န့ၣ် အခီပညီမ့ၢ်ဝဲ ပအိၣ်မူမၤထွဲ ဒ်ပၢ်အတၢ်မၤလိာ်တဖၣ် အိၣ်ဝဲအသိးလီၤ.+ အဃိ ဆဲးပာ်ဖျါထီၣ် တၢ်အဲၣ်တၢ်ကွံ ဒ်တၢ်မၤလိာ်လၢ သုနၢ်ဟူတ့ၢ်လၢ အခီၣ်ထံးလံၤလံၤအသိးတက့ၢ်. ၇ ပှၤလၢအလံၣ်န့ၢ်လီန့ၢ်တၢ်အါဂၤ အိၣ်ထီၣ်လၢ ဟီၣ်ခိၣ်ချၢလံ.+ အဝဲသ့ၣ် တအၢၣ်လီၤတူၢ်လိာ်ဝဲလၢ ယ့ၣ်ၡူးခရံာ် ဟဲဒ်ပှၤဟီၣ်ခိၣ်ဖိအသိးဘၣ်.+ ပှၤလၢ အတအၢၣ်လီၤတူၢ်လိာ်ဝဲဘၣ်န့ၣ် မ့ၢ်ပှၤလၢ အလံၣ်န့ၢ်လီန့ၢ်တၢ်တဂၤန့ၣ် ဒီးမ့ၢ်စ့ၢ်ကီး ပှၤတဂၤလၢ အထီဒါခရံာ်လီၤ.+

၈ ဒ်သိးသုသု တတူၢ်ၡူကွံာ် တၢ်လၢပဂုာ်ကျဲးစၢး ဒုးအိၣ်ထီၣ်တဖၣ်တဂ့ၤ ဒီးဒ်သိးသုကဒိးန့ၢ်ဘၣ် ခိၣ်ဖးလၢလၢပှဲၤပှဲၤအဂီၢ်+ ပလီၢ်သုသးတက့ၢ်. ၉ ကယဲၢ်ပှၤလၢ အတအိၣ်မူမၤထွဲခရံာ် အတၢ်သိၣ်လိတဖၣ်ဘၣ် ဒီးသိၣ်လိ တၢ်လၢ အဂၤတမံၤန့ၣ် ကစၢ်ယွၤ တဘၣ်သးအီၤဘၣ်.+ ပှၤလၢအဆဲးအိၣ်မူမၤထွဲ ခရံာ်အတၢ်သိၣ်လိတဖၣ်န့ၣ် ပၢ်ဒီးဖိခွါ ဘၣ်သးအီၤလီၤ.+ ၁၀ ပှၤတဂၤဂ့ၤတဂၤဂ့ၤ မ့ၢ်ဟဲလၢသုအိၣ် ဒီးမ့ၢ်တသိၣ်လိတၢ် ဒ်ခရံာ်သိၣ်လိတ့ၢ်ဝဲအသိးဘၣ်န့ၣ် တဘၣ်တူၢ်လိာ် အဝဲသ့ၣ်လၢ သုဟံၣ်ပူၤတဂ့ၤ.+ ဒီးတဘၣ်ဆၢဂ့ၤဆၢဝါအီၤတဂ့ၤ. ၁၁ ပှၤလၢ အဆၢဂ့ၤဆၢဝါအီၤတဂၤန့ၣ် မ့ၢ်ဒၣ်အဆီၣ်ထွဲဝဲ အတၢ်ဖံးတၢ်မၤလၢ အအၢအသီလီၤ.

၁၂ ယကဘၣ်တဲသု တၢ်ဂ့ၢ်အိၣ်ဒံးဒီဒူၣ်ဒံး. ဘၣ်ဆၣ် ယတအဲၣ်ဒိးကွဲးအီၤလၢ လံာ်ဒီးကသံၣ်ထံဘၣ်. ယမုၢ်လၢ်လၢ ယကလဲၤလၢသုအိၣ် ဒီးတဲတၢ်ဒီးသုလၢ မဲာ်သကိးမဲာ် ဒ်သိးသုကပှဲၤဒီး တၢ်သးခုအဂီၢ်လီၤ.

၁၃ နဒီပုၢ်ဝဲၢ်မုၣ် လၢအမ့ၢ် ပှၤဃုထၢဖိတဂၤ အဖိတဖၣ်န့ၣ် ဆၢဂ့ၤဆၢဝါနၤလီၤ.