လူၤကၣ်

၁၅ ပှၤထၢ တၢ်ခိတၢ်သွဲဖိခဲလၢာ် ဒီးပှၤတၢ်ဒဲးဘးဖိတဖၣ်​ ဟဲပာ်ဖှိၣ်ထီၣ်အသး ဝးတရံးအီၤ ဒ်သိး ကဒိကနၣ်အတဲတၢ်အဂီၢ်လီၤ.+ ၂ မ့မ့ၢ်ပှၤဖၤရံၤၡဲ ဒီးပှၤကွဲးလံာ်ဖိတဖၣ်​ ဆဲးကဒူးကဒ့ၣ်ဝဲလၢ “ပှၤတဂၤအံၤ တူၢ်လိာ်ဝဲ ပှၤတၢ်ဒဲးဘးဖိတဖၣ်​ ဒီးအီၣ်တၢ်ဒီး အဝဲသ့ၣ်လီၤ.” ၃ အဃိ ယ့ၣ်ၡူးတဲဘၣ်​ အဝဲသ့ၣ်လၢ တၢ်ကတိၤဒိအံၤလီၤ. အဝဲတဲဝဲလၢ ၄ “ဆိကမိၣ်ကွၢ် ဘၣ်ဃးဒီး ပှၤတဂၤလၢ အအိၣ်ဒီးအသိအဒု ၁၀၀ နီၤ. အသိ မ့ၢ်လီၤမၢ်ကွံာ်ဝဲ တဒုန့ၣ်​ အကပာ်တ့ၢ် အသိအဂၤ ၉၉ ဒုလၢ ပှၢ်မုၢ်ကနၢဒီး လဲၤဃုအသိလၢ အလီၤမၢ်ကွံာ်တဒု တုၤလၢ အထံၣ်က့ၤဝဲ တမ့ၢ်ဧီၤ.+ ၅ ဖဲအဝဲ ထံၣ်က့ၤဝဲအခါ အပာ်ထီၣ်ဝဲလၢ အဖံဘၣ်ခိၣ်လိၤ ဒီးပှဲၤဝဲဒီး တၢ်သးခုလီၤ. ၆ ဖဲအဝဲက့ၤတုၤလၢ ဟံၣ်အခါ ကိးဖှိၣ်ဝဲ အသကိး ဒီးပှၤလၢ အဟံၣ်ခိၣ်ဟံၣ်ဃၢၤတဖၣ်​ ဒီးတဲအဝဲသ့ၣ်လၢ ‘ယသိလၢ အလီၤမၢ်တဒုန့ၣ်​ ယထံၣ်က့ၤအီၤလံအဃိ သးခုစၢၤယၤဟီ.’+ ၇ ဒ်န့ၣ်အသိး ယကတဲဘၣ်သုလၢ ဖဲပှၤတၢ်ဒဲးဘးဖိတဂၤ ပီၢ်ယၢ်လီၤက့ၤအသးအခါ+ တၢ်သးခု ကအိၣ်ဝဲ လၢမူခိၣ်လၢ ပှၤတၢ်ဒဲးဘးဖိတဂၤန့ၣ်အဃိ အါန့ၢ်ဒံးလၢ ပှၤတီပှၤလိၤ ၉၉ ဂၤလၢ အတလိၣ်​ ပီၢ်ယၢ်လီၤက့ၤအသးဘၣ်တဖၣ်​ အဃိဒံးလီၤ.

၈ “ဒီးပိာ်မုၣ်တဂၤအိၣ်ဒီး စ့ဒြးမူး* အဘ့ၣ်တဆံ ဒီးအစ့ဒြးမူး မ့ၢ်လီၤမၢ်တဘ့ၣ်န့ၣ်​ အကဒွဲၣ်ထီၣ်​ မ့ၣ်အူဒၢ ဒီးခွဲပျီအဟံၣ်​ ဒီးဃုကွၢ်ဝဲ လီၤတံၢ်လီၤဆဲးတုၤလၢ အထံၣ်န့ၢ်က့ၤဝဲ တမ့ၢ်ဧီၤ. ၉ ဖဲအထံၣ်န့ၢ်က့ၤဝဲအခါ အကိးဖှိၣ်​ အသကိး ဒီးပှၤလၢ အဟံၣ်ခိၣ်ဟံၣ်ဃၢၤတဖၣ်​ ဒီးတဲဝဲလၢ ‘ယစ့ဒြးမူးလၢ အလီၤမၢ်တဘ့ၣ်န့ၣ်​ ယထံၣ်က့ၤအီၤလံအဃိ သးခုစၢၤယၤဟီ.’ ၁၀ ဒ်န့ၣ်အသိး ယကတဲဘၣ်သု ဖဲပှၤတၢ်ဒဲးဘးဖိတဂၤ ပီၢ်ယၢ်လီၤက့ၤအသးအခါ ကစၢ်ယွၤ အမူခိၣ်ကလူးတဖၣ်​ သးခုဝဲလီၤ.”+

၁၁ ဝံၤဒီး ယ့ၣ်ၡူးတဲဝဲလၢ “ပှၤတဂၤ အဖိခွါအိၣ်ခံဂၤလီၤ. ၁၂ ဒီးအဆံးတဂၤန့ၣ်​ တဲအပၢ်လၢ ‘ပါဧၢ, ဟ့ၣ်ယၤတၢ်န့ၢ်သါလၢ ယကြၢးဒိးန့ၢ်ဘၣ်အီၤတဖၣ်မီၤ.’ ဒီးပၢ်တဂၤန့ၣ်​ ဟ့ၣ်နီၤလီၤအဖိခွါ ခံဂၤအံၤ တၢ်န့ၢ်သါလီၤ. ၁၃ စှၤနံၤစှၤသီ ဝံၤအလီၢ်ခံ အဖိခွါလၢ အဆံးတဂၤန့ၣ်​ ပာ်ဖှိၣ်ထီၣ်​ အတၢ်ဖိတၢ်လံၤ ဒီးလဲၤဝဲလၢ ထံကီၢ်လၢအယံၤဒီး မၤလၢာ်ဂီၤကွံာ် အတၢ်စုလီၢ်ခီၣ်ခိၣ်တဖၣ်​ ခီဖျိ အအိၣ်မူလီၤရၢၢ်လီၤစၢၢ်လီၤ.* ၁၄ ဖဲအဝဲသူလၢာ်ကွံာ် တၢ်လၢအအိၣ်ဒီးအီၤ ခဲလၢာ်ဝံၤအလီၢ်ခံ တၢ်သၣ်ဝံၤလီၤဒိ အိၣ်ထီၣ်ဝဲလၢ ကီၢ်တဘ့ၣ်န့ၣ်အပူၤဝးဝး ဒီးအတၢ်တအိၣ်​ နီတမံၤလၢၤဘၣ်. ၁၅ အဃိ အဝဲလဲၤ ဒိးငါလီၤအသးလၢ ထံကီၢ်တဘ့ၣ်န့ၣ်​ အပှၤထံဖိကီၢ်ဖိ တဂၤအအိၣ်​ ဒီးပှၤတဂၤန့ၣ်​ မၢအလဲၤကွၢ်ထီး လၢစံာ်ပျီပူၤလီၤ.+ ၁၆ ဒီးအဝဲအဲၣ်ဒိးအီၣ်​ ပထီးကၤရိာ် လၢထီးတဖၣ်အီၣ်ဝဲ ဘၣ်ဆၣ်​ ပှၤတဂၤမးတဟ့ၣ်အီၤတၢ် နီတမံၤဘၣ်.

၁၇ “ဖဲအဝဲ သ့ၣ်ညါလီၤက့ၤ အသးအခါ အတဲဝဲလၢ ‘ယပါ အပှၤမၤတၢ်ဖိတဖၣ်​ အီၣ်ဘၣ်အီဘၣ်​ လၢလၢပှဲၤပှဲၤ, ဘၣ်ဆၣ်​ မ့မ့ၢ်ယၤန့ၣ်​ ယလီၤဒိတုၤလၢ ယကသံလီၤ. ၁၈ ယကက့ၤလၢယပၢ်အအိၣ်​ ဒီးတဲအီၤလၢ “ပါဧၢ, ယမၤကမၣ်ဘၣ်​ ကစၢ်ယွၤ* ဒီးနၤလံ. ၁၉ တကြၢးလၢ ပှၤကကိးယၤလၢ နဖိခွါလၢၤဘၣ်. ပာ်ယၤဒ်သိးဒီး နပှၤမၤတၢ်ဖိတဂၤမီၤ.”’ ၂၀ အဃိ အဝဲ က့ၤဝဲလၢ အပၢ်အအိၣ်လီၤ. ဖဲအဝဲအိၣ်စီၤစုၤ ဖးယံၤဒံးအခါ အပၢ်ထံၣ်စိအီၤ ဒီးသးကညီၤဘၣ်အီၤ ဒီးလဲၤဃ့ၢ်လၢအအိၣ်, ဖိးဟုအီၤ ဒီးနၢမူအီၤ ကဖီလီဖိလီၤ. ၂၁ ဝံၤဒီးအဖိခွါ တဲဘၣ်အီၤလၢ ‘ပါဧၢ, ယမၤကမၣ်ဘၣ်​ ကစၢ်ယွၤ ဒီးနၤလံ.+ တကြၢးလၢ ပှၤကကိးယၤလၢ နဖိခွါလၢၤဘၣ်.’ ၂၂ ဘၣ်ဆၣ်​ ပၢ်န့ၣ်​ တဲဘၣ်အကုၢ်တဖၣ်လၢ ‘မၤချ့ချ့, ဟဲစိာ်ဆ့ဖးထီလၢ အဂ့ၤကတၢၢ်တဘ့ၣ်​ ဒီးဒုးသိးထီၣ်အီၤ ဒီးဖျီၣ်ထီၣ်ပသံးလၢ အစုလိၤ ဒီးဒုးဒိးထီၣ်အီၤ ခီၣ်ဖံးဟီ. ၂၃ တကးဒံးဘၣ်​ ဟဲမူၤကျီၢ်ဖိလၢ အဘီၣ်တဒု, မၤသံအီၤ ဒီးပကအီၣ်သကိး ဒီးသူၣ်ဖှံသးညီသကိး, ၂၄ မ့ၢ်လၢ ယဖိခွါတဂၤအံၤ အသံတ့ၢ်ဝဲဘၣ်ဆၣ်​ ဟဲက့ၤသမူထီၣ်က့ၤလံ+ ဒီးအဟးဖျိးဝဲ ဘၣ်ဆၣ်​ အဟဲက့ၤကဒါက့ၤလံ.’ ဒီးအဝဲသ့ၣ်​ စးထီၣ်မၤဝဲ တၢ်သူၣ်ဖှံသးညီလီၤ.

၂၅ “အဖိခွါလၢ အဒိၣ်တဂၤ အိၣ်လၢစံာ်ပျီပူၤလီၤ. ဒီးဖဲအဟဲက့ၤဘူးထီၣ်လၢ ဟံၣ်အခါ အဝဲနၢ်ဟူ တၢ်ဒ့တၢ်အူ ဒီးတၢ်ဂဲၤကလံၣ်​ အသီၣ်လီၤ. ၂၆ အဃိ အဝဲကိးဃီၤဝဲ အခ့အပှၤတဂၤ ဒီးသံကွၢ်ဝဲလၢ ပှၤမၤဒ်အံၤ ဘၣ်လဲၣ်. ၂၇ အဝဲတဲဘၣ်အီၤလၢ ‘နဒီပုၢ်ဝဲၢ်ခွါဟဲက့ၤလံ ဒီးအအိၣ်ဆူၣ်အိၣ်ချ့ဂ့ၤဂ့ၤ* အဃိ နပါမၤသံ ကျီၢ်ဖိလၢအဘီၣ်တဒုလီၤ.’ ၂၈ ဘၣ်ဆၣ်​ အဝဲသးဒိၣ်ထီၣ်တၢ် ဒီးတလဲၤနုာ်လီၤလၢ ဟံၣ်ပူၤဘၣ်. အဃိ အပၢ်ဟဲထီၣ်​ ဃ့ကညးအီၤလီၤ. ၂၉ အဝဲတဲဆၢက့ၤ အပၢ်လၢ ‘ကွၢ်လၢအံၤ, ယမၤန့ၢ်နတၢ် ဒ်သိးဒီး ကုၢ်တဂၤန့ၣ်​ အိၣ်အါနံၣ်လံ ဒီးယတဒိကနၣ်​ နကလုၢ်ဘၣ်​ တအိၣ်နီတဘျီဘၣ်. ဘၣ်ဆၣ်​ ဒ်သိး ယကသူၣ်ဖှံသးညီ ဒီးယသကိးတဖၣ်အဂီၢ် မဲာ်တဲးလဲးဖိ တဒုမး နတဟ့ၣ်လီၤယၤ နီတဘျီဘၣ်. ၃၀ မ့မ့ၢ်နဖိခွါလၢ အမၤလၢာ်ဂီၤ နကျိၣ်စ့ဒီး ပိာ်မုၣ်ဆါလီၤအီၣ်သးတဖၣ်န့ၣ်​ ဖဲအဝဲ ဟဲက့ၤတုၤအခါ နမၤသံကျီၢ်ဖိလၢ အဘီၣ်တဒု လၢအဂီၢ်တဘျီဃီလီၤ.’ ၃၁ ဒီးအပၢ်တဲအီၤလၢ ‘ဖိခွါဧၢ, နအိၣ်ဒီးယၤထီဘိလီၤ. တၢ်လၢအအိၣ်ဒီးယၤ ခဲလၢာ်န့ၣ်​ အကဲနတၢ်လီၤ. ၃၂ နဒီပုၢ်ဝဲၢ်ခွါလၢ အသံတ့ၢ်န့ၣ်​ သမူထီၣ်က့ၤဝဲ ဒီးအဟးဖျိးဝဲဘၣ်ဆၣ်​ အဟဲက့ၤကဒါက့ၤလံ အဃိပကဘၣ်​ သူၣ်ဖှံသးညီ ဒီးသးခုလီၤ.’”