ဧ့စြၤ

၉ တၢ်န့ၣ်တဖၣ်​ ဝံၤအလီၢ်ခံ ပှၤဂီၢ်မုၢ် အပဒိၣ်တဖၣ်​ ဟဲတဲဘၣ်ယၤလၢ “ပှၤအံၣ်စရ့လးဖိတဖၣ်, ပှၤလုၢ်တၢ်ဒိၣ်တဖၣ်​ ဒီးပှၤလ့ၤဝံဖိတဖၣ်န့ၣ်​ တမၤလီၤဖးအသးဒီး ပှၤကနၤဧၣ်ဖိ, ပှၤဃ့ၤသးဖိ, ပှၤပရးစၤဖိ, ပှၤယဘူၣ်ဖိ, ပှၤဧၣ်မိၣ်ဖိ, ပှၤမိၤအးဖိ, ပှၤအဲၤကူပတူးဖိ+ ဒီးပှၤအမိၢ်ဖိတဖၣ်ဘၣ်.+ ဒီးအဝဲသ့ၣ်​ မၤထွဲ ပှၤကလုာ်တဖၣ်အံၤ အလုၢ်လၢ်လၢ အလီၤသးဘၣ်အၢတဖၣ်လီၤ.+ ၂ အဝဲသ့ၣ်​ ဟံးန့ၢ်ပှၤသ့ၣ်တဖၣ်န့ၣ်​ အဖိမုၣ်​ ဒ်အမါအသိး ဒီးဒုးဖျီဝဲဒီး အဖိခွါတဖၣ်​ စ့ၢ်ကီးလီၤ.+ အဃိ ပှၤအံၣ်စရ့လးဖိတဖၣ်​ လၢအမ့ၢ် ပှၤစီဆှံ တကလုာ်န့ၣ်*+ ကျဲၣ်ကျီအသးဒီး ပှၤကလုာ်တဖၣ်လံ.+ တကးဒံးဘၣ်​ ပှၤခိၣ်ပှၤနၢ်တဖၣ်​ ဒီးပဒိၣ်တဖၣ်န့ၣ်​ မ့ၢ်ပှၤအဆိကတၢၢ်တဖၣ်လၢ အမၤကမၣ်တၢ် ဒ်အံၤလီၤ.”

၃ ဖဲယနၢ်ဟူ ဒ်န့ၣ်အခါ ယဖှီညာ် ယဆ့ကၤ အဖီခိၣ်တဘ့ၣ်​ ဒီးအဖီလာ်တဘ့ၣ်​ ဒီးယထဲးထီၣ်​ ယခိၣ်ဆူၣ်တနီၤ ဒီးယခၣ်ဆူၣ်တနီၤလီၤ. ဒီးယသးဟးဂီၤ သပှၢ်တၢၢ် ဒီးယဆ့ၣ်နီၤလီၤ. ၄ ယသးဟးဂီၤ သပှၢ်တၢၢ် ဒီးယဆ့ၣ်နီၤအိၣ်ဖဲန့ၣ်​ တုၤလီၤလၢ ဟါခီ တၢ်လုၢ်ဘု အဆၢကတီၢ်လီၤ.+ ဒီးကယဲၢ်ပှၤလၢ အပာ်ဒိၣ်ပာ်ကဲ အံၣ်စရ့လး အကစၢ်ယွၤ အကလုၢ်ကထါန့ၣ်​ ဟဲပာ်ဖှိၣ်ထီၣ်အသးလၢ ယကပိာ်ကပၤ မ့ၢ်လၢ ပှၤလၢ အဘၣ်တၢ်က့ၤဖီၣ်အီၤတဖၣ်န့ၣ်* အတၢ်သးတီ တအိၣ်ဘၣ်​ အဃိလီၤ.

၅ ယသးအုး တုၤလၢ ဟါလီၤခီလီၤ. ဖဲဟါခီ တၢ်လုၢ်ဘု အဆၢကတီၢ်န့ၣ်+ ယဂဲၤဆၢထၢၣ်​ ဒီးယကၤဃာ်ဒံးဆ့ကၤ အဖီခိၣ်တဘ့ၣ်​ ဒီးအဖီလာ်တဘ့ၣ်လၢ ယဖှီညာ်အီၤလီၤ. ယချံးလီၤယခီၣ်​ ဒီးယသလၣ်ထီၣ်​ ယစုလၢ ယကစၢ် ယဟိဝၤယွၤ အအိၣ်လီၤ. ၆ ဒီးယတဲလၢ “အိ ယကစၢ်ယွၤဧၢ, ပတၢ်ကမၣ်​ အါထီၣ်မးအါထီၣ်​ တုၤလၢအတလၢကွံာ် ပခိၣ်သၣ်ဃံ ဒီးပတၢ်ဒဲးဘး ပူၣ်ထီၣ်အသး တုၤလၢ မူခိၣ်လံ. အဃိ ကစၢ်ယွၤဧၢ, ယမဲာ်ဆှး ဒီးယတူၢ်ဘၣ်လၢ ယတကြၢး ဃ့ထုကဖၣ်တၢ် လၢနအိၣ်ဘၣ်.+ ၇ စးထီၣ်လၢ ပမိၢ်ပၢ်ဖံဖု လၢပျၢၤတဖၣ်အစိၤ တုၤလီၤလၢ ပစိၤခဲအံၤန့ၣ်​ ပတၢ်ဒဲးဘး ဒိၣ်ဝဲဒိၣ်မးလီၤ.+ ဒီးမ့ၢ်လၢ ပတၢ်ကမၣ်အိၣ်အဃိ နဟ့ၣ်လီၤ ပဝဲသ့ၣ်တဖၣ်, ပစီၤပၤတဖၣ်​ ဒီးပပှၤလုၢ်တၢ်ဒိၣ်တဖၣ်လၢ ထံကီၢ်အဂၤတဖၣ်​ အစီၤပၤ အစုပူၤလီၤ. ဒီးအဝဲသ့ၣ်​ မၤသံပှၤလၢနး,+ က့ၤဖီၣ်ပှၤ,+ ဂုာ်န့ၢ်ဆူၣ်ပတၢ်+ ဒီးပတူၢ်ဘၣ်တၢ်မဲာ်ဆှး ဒ်လၢမုၢ်မဆါတနံၤအံၤ အသိးလီၤ.+ ၈ ဘၣ်ဆၣ်​ တဘျီအံၤ ယဟိဝၤယွၤ ပာ်ဖျါထီၣ်​ တၢ်သးကညီၤ လၢပဖီခိၣ်န့ၣ်​ အိၣ်တစိၢ်တလီၢ်လံ. အဝဲ မၤပူၤဖျဲးထီၣ်​ ပဝဲလၢအအိၣ်တ့ၢ်ဒံးစှၤဂၤ ဒီးဒုးအိၣ်ပှၤ ဘံၣ်ဘံၣ်ဘၢဘၢ လၢအတၢ်စီဆှံအလီၢ်+ ဒ်သိး ကမၤကပီၤထီၣ်​ ပမဲာ် ဒီးကဒုးအိၣ်ဘှံးပှၤ တစဲးဖိ ဖဲပကဲဒံးကုၢ်အခါလီၤ. ၉ ပကဲကုၢ်တဖၣ်+ ဘၣ်ဆၣ်​ ပကစၢ်ယွၤ တပာ်တ့ၢ်ပှၤဘၣ်. အဝဲ ပာ်ဖျါထီၣ်​ တၢ်အဲၣ်လၢအတီ လၢပဖီခိၣ်​ ဒီးမၤဝဲဒ်သိး ဖၢၡၢၣ်​ အစီၤပၤတဖၣ်​ ကဘၣ်သူၣ်ဘၣ်သးပှၤအဂီၢ်လီၤ.+ အဃိ ပကစၢ်ယွၤ ဟ့ၣ်လီၤကဒီးပှၤ တၢ်ဂံၢ်တၢ်ဘါ လၢအသီ ဒ်သိး ပကက့ၤသူၣ်ထီၣ်က့ၤ အဟံၣ်လၢ အဟးဂီၤအဂီၢ်+ ဒီးဒ်သိး အကဟ့ၣ်လီၤပှၤ တၢ်အဒူၣ်လၢ အဒီသဒၢပှၤ လၢယူၤဒၤ ဒီးယရူၤၡလ့ၣ်​ အပူၤလီၤ.

၁၀ “အိ ပကစၢ်ယွၤဧၢ, တၢ်ကဲထီၣ်အသး ဒ်အံၤလံအဃိ ပတဲတၢ်မနုၤ ကသ့လဲၣ်. ပပာ်တ့ၢ်ကွံာ် နတၢ်မၤလိာ်တဖၣ်လၢ ၁၁ နဟ့ၣ်လီၤပှၤ ခီဖျိလၢ ဝံတဖၣ်လီၤ. နမၢအဝဲသ့ၣ်​ တဲလၢ ‘ကီၢ်လၢ သုကလဲၤမၤန့ၢ်အီၤ တဘ့ၣ်န့ၣ်​ မ့ၢ်ကီၢ်လၢ အတကဆှီဘၣ်​ ခီဖျိလၢ ပှၤလၢအအိၣ်လၢ ကီၢ်ပူၤန့ၣ်​ တကဆှီဘၣ်​ အဃိလီၤ. အဝဲသ့ၣ်​ မၤဝဲ လုၢ်လၢ်လၢ အလီၤသးဘၣ်အၢ အဃိ ကီၢ်ဒီဘ့ၣ်ပှဲၤဝဲဒီး တၢ်လၢအတကဆှီဘၣ်တဖၣ်လီၤ.+ ၁၂ သုတဘၣ်ဟ့ၣ်​ သုဖိမုၣ်တဖၣ်လၢ အဝဲသ့ၣ်​ အဖိခွါတဖၣ်​ အဂီၢ်ဘၣ်. ဒီးအဝဲသ့ၣ်​ အဖိမုၣ်တဖၣ်န့ၣ်​ သုတဘၣ်​ ဟံးန့ၢ်အီၤလၢ သုဖိခွါတဖၣ်အဂီၢ် စ့ၢ်ကီးဘၣ်.+ သုတဘၣ်မၤစၢၤ အဝဲသ့ၣ်​ ဒ်သိး အဝဲသ့ၣ်​ ကအိၣ်ဘၣ်​ မုာ်မုာ်ခုၣ်ခုၣ်​ ဒီးအိၣ်ဘၣ်​ ဘီၣ်ဘီၣ်ညီညီဘၣ်.+ ဒီးသုမ့ၢ်မၤထွဲဒ်အံၤန့ၣ်​ သုကဆူၣ်ထီၣ်​ ဒီးသုကအီၣ်ဘၣ်​ တၢ်လၢအဂ့ၤ လၢကီၢ်ပူၤ ဒီးသုကဟ့ၣ်လီၤဘၣ်​ သုဖိခွါတဖၣ်​ လၢကီၢ်တဘ့ၣ်အံၤ ဒ်တၢ်န့ၢ်သါအသိး လီၤထူလီၤယိာ်လီၤ.’ ၁၃ မ့ၢ်လၢ ပတၢ်မၤလၢ အအၢအသီ ဒီးပတၢ်ဒဲးဘး အါဝဲအဃိ ပတူၢ်ဘၣ်တၢ် ဒီဒူၣ်လံ. ဘၣ်ဆၣ်​ ပကစၢ်ယွၤဧၢ, နတစံၣ်ညီၣ်ပှၤ ဒ်ပတၢ်ကမၣ်​ အိၣ်ဝဲအသိးဘၣ်.+ ဒီးနပျဲလၢ ပဝဲသ့ၣ်တဖၣ်​ ကပူၤဖျဲးထီၣ်လီၤ.+ ၁၄ ခဲအံၤ ပမၤကမၣ်ကဒီး နတၢ်မၤလိာ် ဒီးပဒီဒိၣ်လိာ်သး ဒီးပှၤလၢ အမၤလုၢ်လၢ်လၢ အလီၤသးဘၣ်အၢ တဖၣ်လံ.+ အဃိ နကသးထီၣ်ပှၤ ဒီးနကမၤဟးဂီၤကွံာ်ပှၤ လၢာ်လၢာ်ဆ့ဆ့ ဒီးနတပျဲပူၤပှၤ နီတဂၤဘၣ်တမ့ၢ်ဧီၤ. ၁၅ အံၣ်စရ့လး အကစၢ် ယဟိဝၤယွၤဧၢ, မ့ၢ်လၢ နမ့ၢ် ပှၤတီပှၤလိၤအဃိ+ ပဝဲစှၤဂၤ ပအိၣ်မူဘၣ်​ တုၤလၢ မုၢ်မဆါတနံၤအံၤလီၤ. ပမၤတၢ်ဒဲးဘးဒ်အံၤ အဃိ ပတကြၢးဒီး တၢ်ခွဲးတၢ်ယာ်လၢ ပကဆၢထၢၣ်လၢ နမဲာ်ညါ နီတဂၤဘၣ်​ သနာ်က့ ခဲအံၤ ပဆၢထၢၣ်လၢ နမဲာ်ညါလီၤ.”+