၁ ကွဲးနီၣ်တၢ်
၁၁ လၢခံ ပှၤအံၣ်စရ့လးဖိ ခဲလၢာ် ဟဲပာ်ဖှိၣ်ထီၣ်အသးလၢ စီၤဒၤဝံးအအိၣ် လၢဝ့ၢ်ဃ့ဘြိၣ်+ ဒီးတဲဝဲလၢ “ပမ့ၢ် နသွံၣ်နထံလီၤ.*+ ၂ လၢညါ ဖဲစီၤစီလူး ကဲစီၤပၤအခါ နမ့ၢ်ပှၤလၢ အတီခိၣ်ရိၤမဲ အံၣ်စရ့လးလၢ ကလဲၤဒုးတၢ် အဂီၢ်လီၤ.+ ဒီးနကစၢ်ယဟိဝၤယွၤ တဲနၤလၢ ‘ဒ်ပှၤကွၢ်သိတဂၤအသိး နကအံးထွဲကွၢ်ထွဲ ယပှၤဂီၢ်မုၢ် အံၣ်စရ့လး ဒီးနကကဲထီၣ် ယပှၤဂီၢ်မုၢ် အံၣ်စရ့လး အခိၣ်လီၤ.’”+ ၃ အဃိ အံၣ်စရ့လး အပှၤသူၣ်က့သးပှၢ် ခဲလၢာ် ဟဲလၢစီၤပၤအအိၣ်လၢ ဝ့ၢ်ဃ့ဘြိၣ်လီၤ. ဒီးစီၤဒၤဝံး မၤတၢ်အၢၣ်လီၤအီလီၤဒီး အဝဲသ့ၣ်လၢ ယဟိဝၤယွၤ အမဲာ်ညါ ဖဲဝ့ၢ်ဃ့ဘြိၣ်လီၤ. ဒီးအဝဲသ့ၣ် ဒိးဖှူဝဲ စီၤဒၤဝံး ဒ်စီၤပၤတဂၤအသိးလၢ အံၣ်စရ့လးအဂီၢ်+ ဒ်ယဟိဝၤယွၤ တဲပာ်စၢၤ ခီဖျိ စီၤၡမူၤအ့လးန့ၣ်လီၤ.+
၄ လၢခံ စီၤပၤဒၤဝံး ဒီးအံၣ်စရ့လး သုးဖိခဲလၢာ် လဲၤဝဲလၢ ဝ့ၢ်ယရူၤၡလ့ၣ် လၢအမ့ၢ် ဝ့ၢ်ယဘူၣ်+ ဖဲပှၤယဘူၣ်ဖိ+ အိၣ်ဝဲအလီၢ်န့ၣ်လီၤ. ၅ ပှၤလၢအအိၣ်လၢ ဝ့ၢ်ယဘူၣ်အပူၤန့ၣ် တဲဆဲးအဲး စီၤဒၤဝံးလၢ “နဟဲနုာ်လီၤဖဲအံၤ တသ့နီတဘျီဘၣ်.”+ ဘၣ်ဆၣ် စီၤဒၤဝံး မၤန့ၢ်ဝဲ တၢ်အိၣ်သဒၢအလီၢ် လၢအမ့ၢ် စံယိၣ်+ လၢခဲအံၤ ကဲထီၣ်က့ၤဝဲ စီၤဒၤဝံး အဝ့ၢ်န့ၣ်လီၤ.+ ၆ အဃိ စီၤဒၤဝံး တဲဝဲလၢ “ပှၤတဂၤဂ့ၤ တဂၤဂ့ၤ လၢအဒုးဆိ ပှၤယဘူၣ်ဖိန့ၣ် အကကဲထီၣ် သုးခိၣ်ကျၢၢ်လီၤ.” ဒီးနီၢ်စရူယၤ အဖိခွါ စီၤယိၤအာ်+ လဲၤထီၣ်ဝဲ အဆိကတၢၢ် ဒီးအဝဲကဲထီၣ် သုးခိၣ်ကျၢၢ်လီၤ. ၇ လၢခံ စီၤဒၤဝံး လဲၤအိၣ်ဝဲလၢ တၢ်အိၣ်သဒၢအလီၢ်လီၤ. လၢတၢ်န့ၣ်အဃိ ပှၤကိးဝဲ တၢ်လီၢ်အဝဲန့ၣ်လၢ စီၤဒၤဝံးအဝ့ၢ်လီၤ. ၈ ဒီးစီၤဒၤဝံး တ့ထီၣ်က့ၤ ဝ့ၢ်အံၤဝးဝး စးထီၣ်လၢ တၢ်လူၢ်* အလိၤ တုၤလၢ တၢ်လီၢ်လၢ အခိၣ်အဃၢၤ ဒီးစီၤယိၤအာ် ဘှီဂ့ၤထီၣ်က့ၤ တၢ်အဂၤတဖၣ် လၢဝ့ၢ်ပူၤလီၤ. ၉ ဒီးစီၤဒၤဝံး အတၢ်စိတၢ်ကမီၤ ဒံးယံာ်ဒံးဆူၣ်ထီၣ်+ ဒီးတၢ်သုးမုၢ်ဂီၢ်မုၢ် အကစၢ် ယဟိဝၤယွၤ အိၣ်ဒီးအီၤလီၤ.
၁၀ စီၤဒၤဝံး အပှၤဒူပှၤဃိၤ အခိၣ်အနၢ်တဖၣ်န့ၣ် ဘၣ်တၢ်ပာ်ဖျါထီၣ်အဂ့ၢ် ဒ်လၢလာ်အံၤအသိးလီၤ. အဝဲသ့ၣ် ဃုာ်ဒီးပှၤအံၣ်စရ့လးဖိ ခဲလၢာ် ဆီၣ်ထွဲ စီၤဒၤဝံး အဘီမုၢ်တၢ်ပၢ လၢလၢပှဲၤပှဲၤ ဒီးမၤစၢၤဝဲ ဒ်သိးကဒုးကဲထီၣ်အီၤလၢ စီၤပၤအဂီၢ် ဒ်ယဟိဝၤယွၤ အၢၣ်လီၤ ပှၤအံၣ်စရ့လးဖိ အသိးလီၤ.+ ၁၁ အအံၤ မ့ၢ်စီၤဒၤဝံး အပှၤဒူပှၤဃိၤတဖၣ် အမံၤလီၤ. လၢပှၤဒူပှၤဃိၤ သၢဂၤအကျါန့ၣ် ပှၤဃၤကမိၣ်ဖိတဂၤ အဖိခွါ စီၤယၤၡဘၣ်န့ၣ်+ မ့ၢ်ဝဲအခိၣ်လီၤ.+ ဘၣ်တဘျီ အဝဲသူဝဲ အဘီဒ်သိး ကမၤသံ ပှၤပိာ်ခွါအဂၤ ၃၀၀ လီၤ.+ ၁၂ လၢခံတဂၤန့ၣ် မ့ၢ်ဝဲ စီၤအလၤဧစၢ်လီၤ.+ အဝဲမ့ၢ်ဝဲ ပှၤအဃိဃးဖိ+ စီၤဒိဒိၤ အဖိခွါလီၤ. အဝဲပၣ်ဃုာ်လၢ ပှၤဒူပှၤဃိၤ သၢဂၤအကျါလီၤ. ၁၃ ဘၣ်တဘျီ ဖဲပှၤဖလ့ၡသးဖိ ပာ်ဖှိၣ်ထီၣ်အသး လၢကဒုးတၢ်အဂီၢ်အခါ စီၤအလၤဧစၢ် အိၣ်ဒီး စီၤဒၤဝံး ဖဲပၤစဒးမံၣ်န့ၣ်လီၤ.+ ဖဲန့ၣ်အိၣ်ဝဲဒီး ဟီၣ်ခိၣ်တကဝီၤလၢ အပှဲၤဒီး ဘုမုယီၤလီၤ. ဒီးပှၤသုးဖိတဖၣ် ပျံၤဝဲ ပှၤဖလ့ၡသးဖိအဃိ အဝဲသ့ၣ် ဃ့ၢ်ကွံာ်ဝဲလီၤ. ၁၄ ဘၣ်ဆၣ် အဝဲဆၢထၢၣ်ဝဲလၢ ဟီၣ်ခိၣ်တကဝီၤန့ၣ် အခၢၣ်သး ဒီးတပျဲလၢ ပှၤဖလ့ၡသးဖိ ကမၤန့ၢ် ဟီၣ်ခိၣ်တကဝီၤန့ၣ်ဘၣ်. ဒီးအဝဲ မၤသံဝဲ ပှၤဖလ့ၡသးဖိ တဂၤဝံၤတဂၤအဃိ ယဟိဝၤယွၤ ဟ့ၣ်ပှၤအံၣ်စရ့လးဖိ တၢ်မၤနၢၤ ဒိၣ်ဒိၣ်မုၢ်မုၢ်လီၤ.+
၁၅ ဒီးဖဲပှၤဖလ့ၡသး သုးဖိ လဲၤဆီလီၤအသး လၢရၤဖၤအတၢ်တြီၤပူၤ+ အခါ ပှၤသၢဂၤလၢ ပှၤအခိၣ်အဂၤ ၃၀ အကျါန့ၣ် လဲၤလီၤလၢ စီၤဒၤဝံး အအိၣ်လၢ ဧဒူးလၣ် အလ့ပူၤလီၤ.+ ၁၆ ဖဲန့ၣ်အခါ စီၤဒၤဝံး အိၣ်ဝဲလၢ တၢ်အိၣ်သဒၢအလီၢ် ဒီးလၢဝ့ၢ်ဘ့ၤသလ့ဃ့ၣ်အပူၤန့ၣ် ပှၤဖလ့ၡသး အသုးဖိ အိၣ်ဝဲတဒူၣ်လီၤ. ၁၇ စီၤဒၤဝံးတဲဝဲလၢ “ယမ့ၢ်အီဘၣ်ထံလၢ ကမါလၢအအိၣ်လၢ ဝ့ၢ်ဘ့ၤသလ့ဃ့ၣ် အတြဲၤဃၢၤဒု ယကသးခုဖးဒိၣ်ညါ.”+ ၁၈ အဃိ ပှၤသၢဂၤန့ၣ် လဲၤနုာ်ဆူၣ်ဝဲလၢ ပှၤဖလ့ၡသး သုးဖိ အဒဲကဝီၤပူၤ ဒီးဒၢၣ်ထံလၢကမါပူၤ လၢဝ့ၢ်ဘ့ၤသလ့ဃ့ၣ် အတြဲၤဃၢၤ ဒီးဟဲက့ၤစိာ်ဝဲလၢ စီၤဒၤဝံးအအိၣ်လီၤ. ဘၣ်ဆၣ် စီၤဒၤဝံးတအီဝဲဘၣ်. ဒီးအဝဲလူလီၤကွံာ်ဝဲလၢ ယဟိဝၤယွၤအမဲာ်ညါလီၤ. ၁၉ စီၤဒၤဝံးတဲဝဲလၢ “မ့ၢ်ယကြၢးအီ ပှၤပိာ်ခွါ လၢအလဲၤဒုးအိၣ်ထီၣ် တၢ်ဘၣ်ယိၣ်အလီၢ်လၢ အသးသမူအဂီၢ်တဖၣ်အံၤ အသွံၣ်ဧါ.+ အဝဲသ့ၣ် ဟဲက့ၤစိာ်ထံအံၤန့ၣ် တၢ်လီၤဘၣ်ယိၣ်အလီၢ်အိၣ်လၢ အသးသမူအဂီၢ်အဃိ ယမ့ၢ်အီန့ၣ် လ့ၤတက့ၤ ယကစၢ်ယွၤ တဘၣ်သးဘၣ်.” အဃိ စီၤဒၤဝံးတအီထံန့ၣ်ဘၣ်. ဒီးတၢ်သ့ၣ်တဖၣ်န့ၣ် မ့ၢ်ဝဲတၢ်လၢ ပှၤဒူပှၤဃိၤတဖၣ် မၤဝဲန့ၣ်လီၤ.
၂၀ လၢပှၤဒူပှၤဃိၤ အဂၤသၢဂၤ အကျါန့ၣ် စီၤယိၤအာ်+ အဒီပုၢ်ဝဲၢ် စီၤအဘံၡဲၤန့ၣ်+ ကဲထီၣ်အဝဲသ့ၣ်အခိၣ်လီၤ. ဘၣ်တဘျီ အဝဲသူဝဲအဘီ ဒ်သိးကမၤသံ ပှၤပိာ်ခွါအဂၤ ၃၀၀ လီၤ. ဒီးအမံၤဟူသၣ်ဖျါ ထဲသိးဒီး ပှၤဒူပှၤဃိၤ အဆိကတၢၢ် သၢဂၤန့ၣ်လီၤ.+ ၂၁ လၢပိာ်ခွါသၢဂၤအံၤအကျါန့ၣ် အမံၤဟူသၣ်ဖျါ ဒိၣ်န့ၢ်ဒံး အဝဲခံဂၤ ဒီးအဝဲကဲ အဝဲသ့ၣ်အခိၣ် ဘၣ်ဆၣ် အလီၢ်အလၤ တဒိၣ်ထဲသိးဒီး ပှၤဒူပှၤဃိၤ အဆိကတၢၢ် သၢဂၤန့ၣ်ဘၣ်.
၂၂ စီၤယဟိၤယဒါ အဖိခွါ စီၤဘနါယၤန့ၣ်+ မ့ၢ်ပှၤလၢအသးဒူ ဒီးမၤတ့ၢ် တၢ်ဒိၣ်ဒိၣ်မုၢ်မုၢ်အါမး လၢကၤဘစ့လးလီၤ.+ အဝဲမၤသံ ပှၤမိၤအးဖိ စီၤအရံၤအ့လး အဖိခွါခံဂၤ ဒီးဖဲမူခိၣ်ဖီလီၤအနံၤန့ၣ် အဝဲလဲၤလီၤလၢ တၢ်ပူၤဒီး မၤသံခ့ယုၢ်တဒုလီၤ.+ ၂၃ အဝဲမၤသံစ့ၢ်ကီး ပှၤအဲၤကူပတူးဖိလၢ အနီၢ်ဖးဒိၣ်ဖးထီတဂၤ လၢအနီၢ်ထီဝဲ ယဲၢ်ပျၢ်လီၤ.*+ ပှၤအဲၤကူပတူးဖိတဂၤန့ၣ် အိၣ်ဒီးအဘီ လၢအမၤအသးဒ် ထၣ်အတီအဘိအသိး လၢအစုပူၤ+ ဘၣ်ဆၣ် အဝဲလဲၤသဂၢၢ်အီၤဒီး အနီၣ်ထိးဘိဒီး ပျ့ၢ်န့ၢ်ဘီ လၢပှၤအဲၤကူပတူးဖိအစုပူၤ ဒီးမၤသံကွံာ်အီၤလၢ အနီၢ်ကစၢ်အဘီလီၤ.+ ၂၄ စီၤယဟိၤယဒါ အဖိခွါ စီၤဘနါယၤ မၤတၢ်သ့ၣ်တဖၣ်န့ၣ်ဒီး အမံၤဟူသၣ်ဖျါ ထဲသိးဒီး ပှၤဒူပှၤဃိၤ အဆိကတၢၢ်သၢဂၤလီၤ. ၂၅ စီၤဘနါယၤ အမံၤဟူသၣ်ဖျါ ဒိၣ်န့ၢ်ဒံး ပှၤအဂၤ ၃၀ ဘၣ်ဆၣ် အလီၢ်အလၤ တဒိၣ်ထဲသိးဒီး ပှၤပိာ်ခွါလၢ အဆိကတၢၢ်သၢဂၤန့ၣ်ဘၣ်.+ ဘၣ်ဆၣ် စီၤဒၤဝံး ဃုထၢထီၣ်အီၤဒ် ပှၤတဂၤလၢ အဒီသဒၢအသးသမူလီၤ.
၂၆ ပှၤဒူပှၤဃိၤတဖၣ်လၢ သုးမုၢ်အကျါန့ၣ် မ့ၢ်ဝဲ စီၤယိၤအာ် အဒီပုၢ်ဝဲၢ်ခွါ စီၤဧစၤအ့လး,+ ပှၤဘ့ၤသလ့ဃ့ၣ်ဖိ+ စီၤဒိဒိၤ အဖိခွါ စီၤအ့လဃၤနၣ်, ၂၇ ပှၤဃရိးဖိ စီၤၡးမာ်, ပှၤပလိၣ်ဖိ စီၤဃ့လ့း, ၂၈ ပှၤတကိၤဖိ စီၤဧံးက့ၣ် အဖိခွါ စီၤဧံရၤ,+ ပှၤဧၤနသိးဖိ စီၤအဘံၤဧ့စၢ်,+ ၂၉ ပှၤဃူၡသးဖိ စီၤစံးဘကဲ,+ ပှၤအဃိဃးဖိ စီၤဧံလဲၤ, ၃၀ ပှၤနတိဖၤဖိ စီၤမၤဟရဲ,+ ပှၤနတိဖၤဖိ စီၤဘၤနါ အဖိခွါ စီၤဃ့လံး,+ ၃၁ စီၤရံဘဲၤ အဖိခွါ စီၤအံသဲၤ လၢအဟဲလၢ ပှၤဘံၣ်ယၤမံၣ်ဖိ+ အတၢ်လီၢ် ကံဘဧၤ, ပှၤပံးရၤသိၣ်ဖိ စီၤဘနါယၤ, ၃၂ စီၤဃူရဲၤ လၢအဟဲလၢ ကၤဧၣ်+ အတၢ်တြီၤတဖၣ်, ပှၤဧၤရဘၤဖိ စီၤအဘံၤအ့လး, ၃၃ ပှၤဘၤဃူရံၣ်ဖိ စီၤဧၤစမၤဝ့း, ပှၤၡၤလဘိၣ်ဖိ စီၤအ့လံယဘၤ, ၃၄ ပှၤကံးစိာ်ဖိ စီၤယၤၡ့ၣ် အဖိခွါတဖၣ်, ပှၤဟရၢ်ဖိ စီၤၡၤက့ အဖိခွါ စီၤယိနၤသၣ်, ၃၅ ပှၤဟရၢ်ဖိ စီၤစၤကၢ် အဖိခွါ စီၤအဃံအၣ်, စီၤအူၢ် အဖိခွါ စီၤအလံဖၤလဲး, ၃၆ ပှၤမက့ၤသးဖိ စီၤဃ့ဖ့ၢ်, ပှၤပလိၣ်ဖိ စီၤအဃံယၤ, ၃၇ ပှၤကၢ်မ့ၤလးဖိ စီၤဃ့စရိၤ, စီၤအ့စဘၤ အဖိခွါ စီၤနၤရဲ, ၃၈ စီၤနၤသၣ် အဒီပုၢ်ဝဲၢ်ခွါ စီၤယိၤအ့လး, စီၤဟကရံ အဖိခွါ စီၤမံးဘဃၢ်, ၃၉ ပှၤဧၣ်မိၣ်ဖိ စီၤစ့လ့း, ပှၤဘအ့ရိးဖိ စီၤနၤဃရဲ လၢအမ့ၢ် ပှၤလၢအစိာ်န့ၢ် နီၢ်စရူယၤအဖိခွါ စီၤယိၤအာ် အတၢ်စုကဝဲၤ, ၄၀ ပှၤယံသၢ်ဖိ စီၤဧံရၤ, ပှၤယံသၢ်ဖိ စီၤကၢ်ရ့း, ၄၁ ပှၤဃ့ၤသးဖိ စီၤအူၤရံယၤ,+ စီၤအဃၤလဲ အဖိခွါ စီၤစၤဘး, ၄၂ ပှၤရူၤဘ့ၣ်ဖိ စီၤၡံစၤ အဖိခွါ စီၤဧဒံနၤ, (စီၤဧဒံနၤ မ့ၢ်ဝဲ ပှၤရူၤဘ့ၣ်ဖိ အခိၣ်တဂၤ ဒီးပှၤအိၣ်ဒီးအီၤအဂၤ ၃၀) ၄၃ စီၤမၤကၤ အဖိခွါ စီၤဃၤနၣ်, ပှၤမံၤသၣ်ဖိ စီၤယဟိၡၤဖး, ၄၄ ပှၤဧၤၡတြိးဖိ စီၤဧူးစံယၤ, ပှၤဧရိၤဧ့ၢ်ဖိ စီၤဃိသၣ် အဖိခွါတဖၣ် လၢအမ့ၢ် စီၤၡၤမၤ ဒီးစီၤယံၤအ့လး, ၄၅ စီၤၡံမရံ အဖိခွါ စီၤယဒံၤဧ့လး ဒီးအဒီပုၢ်ဝဲၢ်ခွါ ပှၤတံစံၤဖိ စီၤယိဃၤ, ၄၆ ပှၤမၤဃဝးဖိ စီၤအလံၤအ့လး, စီၤအ့လနၣ် အဖိခွါတဖၣ် လၢအမ့ၢ် စီၤယရံဘဲဒီး စီၤယိၡဝယၤ, ပှၤမိၤအးဖိ စီၤယံးသမၤ, ၄၇ စီၤအလံၤအ့လး, စီၤဧိၤဘ့း ဒီးပှၤမစိဘယၤဖိ စီၤယၤစံအ့လးလီၤ.