မၢ်ကူး

၇ ပှၤဖၤရံၤၡဲ ဒီးပှၤကွဲးလံာ်ဖိတနီၤ လၢအအိၣ်ဟဲလၢ ဝ့ၢ်ယရူၤၡလ့ၣ်န့ၣ်​ လဲၤလၢ ယ့ၣ်ၡူးအအိၣ်လီၤ.+ ၂ အဝဲသ့ၣ်ထံၣ်ဝဲ ယ့ၣ်ၡူး အပျဲၢ်အဘီၣ်တနီၤ အီၣ်တၢ်ဒီးအစုလၢ အတကဆှီဘၣ်, အဲၣ်ဒိးတဲဝဲ တသ့အစုဘၣ်.* ၃ (ပှၤဖၤရံၤၡဲတဖၣ်​ ဒီးပှၤယူဒၤဖိခဲလၢာ်န့ၣ်​ မ့ၢ်လၢ အဝဲသ့ၣ်မၤထွဲဝဲ မိၢ်ပၢ်ဖံဖု လၢပျၢၤတဖၣ်​ အလုၢ်အလၢ်အဃိ အဝဲသ့ၣ်​ မ့ၢ်တသ့ဆိအစုတုၤလၢ အစုနၢၣ်ခံဘၣ်န့ၣ်​ အဝဲသ့ၣ်​ တအီၣ်တၢ်ဘၣ်. ၄ ဒီးဖဲအဝဲသ့ၣ်​ ဟဲက့ၤလၢ တၢ်ဆါတၢ်ပှ့ၤအလီၢ်အခါ အဝဲသ့ၣ်​ မ့ၢ်တသ့ကဆှီအသးဘၣ်န့ၣ်​ အဝဲသ့ၣ်​ တအီၣ်တၢ်ဘၣ်. ဒီးအဝဲသ့ၣ်ဒိးန့ၢ်ဘၣ်​ ဒီးမၤထွဲ လုၢ်လၢ်အဂၤအါမံၤ ဒ်သိးဒီး ဒုးဘျၢဝဲထံခွး, ထံအီဒၢ ဒီးသပၢၤတိၢ်ဘီတဖၣ်​ လၢထံကျါလီၤ.)+ ၅ အဃိ ပှၤဖၤရံၤၡဲ ဒီးပှၤကွဲးလံာ်ဖိတဖၣ်​ သံကွၢ်ယ့ၣ်ၡူးလၢ “ဘၣ်မနုၤအဃိ နပျဲၢ်နဘီၣ်တဖၣ်​ တမၤထွဲ မိၢ်ပၢ်ဖံဖု လၢပျၢၤတဖၣ်​ အလုၢ်အလၢ်ဘၣ်လဲၣ်. အဝဲသ့ၣ်​ အီၣ်တၢ်ဒီး အစုလၢ အတကဆှီဘၣ်​ ဘၣ်လဲၣ်”+ ၆ ယ့ၣ်ၡူး တဲဘၣ်အဝဲသ့ၣ်လၢ “ပှၤပာ်မၤအသးသ့ၣ်ဧၢ, ဝံယၡါယၤ တဲဆိပာ်စၢၤသုဂ့ၢ်န့ၣ်​ ဘၣ်တီတီလီၤ. အဝဲကွဲးဝဲလၢ ‘ပှၤသ့ၣ်တဖၣ်အံၤ မၤလၤကပီၤယၤထဲလၢ အထးခိၣ်လီၤ. မ့မ့ၢ် အသးန့ၣ်​ ယံၤဝဲဒီးယၤ ဖးယံၤညါ.+ ၇ မ့ၢ်လၢ အဝဲသ့ၣ်​ အတၢ်သိၣ်လိတဖၣ်န့ၣ်​ မ့ၢ်ဝဲပှၤဟီၣ်ခိၣ်ဖိ အတၢ်မၤလိာ်အဃိ+ အဝဲသ့ၣ်​ ဆဲးဘူၣ်ထီၣ်ဘါထီၣ်ယၤ သနာ်က့ မ့ၢ်ဝဲ တၢ်ကလီကလီလီၤ.’ ၈ သုပာ်တ့ၢ်ကွံာ် ကစၢ်ယွၤ အတၢ်မၤလိာ် ဒီးသုဟံးဃာ် ပှၤဟီၣ်ခိၣ်ဖိ အလုၢ်အလၢ်လီၤ.”+

၉ ယ့ၣ်ၡူး တဲဘၣ်အဝဲသ့ၣ်လၢ “ဒ်သိး သုကမၤထွဲ သုလုၢ်သုလၢ်အဂီၢ် သုကွၢ်ကပာ်ကွံာ် ကစၢ်ယွၤ အတၢ်သိၣ်တၢ်သီသ့မး.+ ၁၀ အဒိ စီၤမိၤၡ့ တဲဝဲလၢ ‘ယူးယီၣ်ပာ်ကဲ နမိၢ်ဒီးနပၢ်တက့ၢ်.’+ ဒီး ‘ပှၤလၢ အဒုၣ်ဒွဲၣ်စံးအၢ အမိၢ် မ့တမ့ၢ် အပၢ်န့ၣ်​ ကဘၣ်တၢ်မၤသံအီၤလီၤ.’+ ၁၁ ဘၣ်ဆၣ်​ သုတဲလၢ ‘ပှၤလၢ အတဲအမိၢ် မ့တမ့ၢ် အပၢ်လၢ “တၢ်လၢအအိၣ်ဒီးယၤ လၢအကကဲဘျုး လၢနဂီၢ်န့ၣ်​ ယအၢၣ်လီၤလၢ အမ့ၢ်ဝဲကီၤဘၣ်​ (အခီပညီန့ၣ်​ မ့ၢ်ဝဲ တၢ်ဟ့ၣ်လၢ ကစၢ်ယွၤအဂီၢ်) ဝံၤလံ အဃိ ယမၤစၢၤသုတသ့လၢၤဘၣ်”’ န့ၣ်​ ၁၂ အဝဲသ့ၣ်​ တဘၣ်မၤန့ၢ်တၢ်လၢ အမိၢ် မ့တမ့ၢ် အပၢ်အဂီၢ် နီတမံၤလၢၤဘၣ်.+ ၁၃ အဃိ သုကွၢ်ကပာ် ကစၢ်ယွၤ အတၢ်မၤလိာ် ခီဖျိလၢ သုမၤထွဲ သုလုၢ်သုလၢ်လီၤ.+ တကးဒံးဘၣ်​ သုမၤတၢ်အဂၤအါမံၤ ဒ်န့ၣ်စ့ၢ်ကီးလီၤ.”+ ၁၄ အဝဲကိးဃီၤကဒီး ပှၤဂီၢ်မုၢ် ဒီးတဲအဝဲသ့ၣ်လၢ “သုဝဲခဲလၢာ် ဒိကနၣ်တၢ်လၢ ယတဲ ဒီးနၢ်ပၢၢ် အခီပညီတက့ၢ်.+ ၁၅ တၢ်လၢ အလဲၤနုာ်လီၤလၢ ပှၤကိာ်ပူၤန့ၣ်​ တမၤဘၣ်အၢ အနီၢ်ကစၢ်ဘၣ်. မ့မ့ၢ် တၢ်လၢ အဟဲထီၣ်လၢ ပှၤကိာ်ပူၤန့ၣ်​ မၤဘၣ်အၢ အနီၢ်ကစၢ်လီၤ.”+ ၁၆ *—

၁၇ ဒီးဖဲယ့ၣ်ၡူးဟးထီၣ်လၢ ပှၤဂီၢ်မုၢ်အကျါအခါ အဝဲလဲၤနုာ်လီၤလၢဟံၣ်ပူၤ ဒီးအပျဲၢ်အဘီၣ်တဖၣ်​ သံကွၢ်အီၤ ဘၣ်ဃးဒီး တၢ်ကတိၤဒိအဝဲန့ၣ်​ အဂ့ၢ်လီၤ.+ ၁၈ အဃိ ယ့ၣ်ၡူး တဲဘၣ်အဝဲသ့ၣ်လၢ “သုဝဲစ့ၢ်ကီး သုတနၢ်ပၢၢ်တၢ်ဘၣ်​ ဒ်သိးဒီးအဝဲသ့ၣ်လီၤဧါ. တၢ်လၢအနုာ်လီၤလၢ ပှၤတဂၤအပူၤန့ၣ်​ အမၤဘၣ်အၢအီၤ တသ့ဘၣ်န့ၣ်​ သုတသ့ၣ်ညါဧီၤ. ၁၉ အိၣ်ဒၣ်​ အလဲၤနုာ်လီၤလၢ အဟၢဖၢပူၤ ဒီးဟးထီၣ်ကွံာ်လၢ အမိၢ်ပှၢ်အပူၤလီၤ. အတလဲၤနုာ်လီၤလၢ အသးပူၤဘၣ်.” အဃိ အဝဲအဲၣ်ဒိးတဲဝဲလၢ တၢ်အီၣ်ခဲလၢာ်န့ၣ်​ ကဆှီဝဲလီၤ. ၂၀ ဒီးအဝဲတဲဝဲလၢ “တၢ်လၢအဟဲထီၣ်လၢ ပှၤတဂၤအသးပူၤန့ၣ်​ မ့ၢ်တၢ်လၢ အမၤဘၣ်အၢအီၤလီၤ.+ ၂၁ တၢ်လၢ အဟဲထီၣ်လၢ ပှၤသးပူၤန့ၣ်+ မ့ၢ်ဝဲတၢ်ဆိကမိၣ်လၢ အအၢအသီ လၢအဒုးအိၣ်ထီၣ်ဝဲ တၢ်မၤကမၣ်မုၣ်ကမၣ်ခွါ,* တၢ်ဟုၣ်တၢ်ဘျၣ်, တၢ်မၤသံတၢ်, ၂၂ တၢ်အဲၣ်ဘၢမါအဲၣ်ဘၢဝၤ, တၢ်သးကွံ, တၢ်မၤတၢ်အၢတၢ်သီ, တၢ်လီတၢ်ဝ့ၤ, တၢ်မၤကမၣ်တၢ်လၢ တအိၣ်ဒီးတၢ်မဲာ်ဆှး,* မဲာ်ချံလၢအသးက့ၣ်တၢ်, တၢ်တဲအၢတဲသီတၢ်, တၢ်ပာ်ထီၣ်ထီသး ဒီးတၢ်သူၣ်တဆးသးတဆးဘၣ်. ၂၃ ကယဲၢ်တၢ်အၢတၢ်သီတဖၣ်အံၤ ဟဲထီၣ်လၢပှၤသးပူၤ ဒီးမၤဘၣ်အၢအီၤလီၤ.”

၂၄ ယ့ၣ်ၡူး ဟးထီၣ်ဖဲန့ၣ်​ ဒီးလဲၤနုာ်လီၤလၢ စိၢ်ဒီးစံဒိၣ်​ အဟီၣ်ကဝီၤပူၤလီၤ.+ အဝဲလဲၤနုာ်လီၤလၢ ဟံၣ်တဖျၢၣ်အပူၤ ဒီးတအဲၣ်ဒိးလၢ ပှၤသ့ၣ်ညါနီတဂၤဘၣ်. ဘၣ်ဆၣ်​ ပှၤသ့ၣ်ညါဝဲလီၤ. ၂၅ ပိာ်မုၣ်လၢ တၢ်ဝံတၢ်နါအိၣ်လၢ အဖိမုၣ်အလိၤတဂၤ ဖဲအနၢ်ဟူဘၣ်​ ယ့ၣ်ၡူးအဂ့ၢ်အခါ ဟဲဝဲတဘျီဃီ ဒီးထိၣ်လီၤပှီၤအသးလၢ ယ့ၣ်ၡူးအခီၣ်ထံးလီၤ.+ ၂၆ ပိာ်မုၣ်တဂၤအံၤ မ့ၢ်ဝဲပှၤကြံးဖိ ဘၣ်ဆၣ်အအိၣ်ဝဲ* လၢစူၤရံဖံၤနံက့ၤ အဟီၣ်ကဝီၤပူၤလီၤ. အဝဲဃ့ကညး ယ့ၣ်ၡူးအါဘျီ ဒ်သိးအကနီဟးထီၣ်ကွံာ် တၢ်ဝံတၢ်နါလၢ အဖိမုၣ်အလိၤလီၤ. ၂၇ ဘၣ်ဆၣ်​ ယ့ၣ်ၡူးတဲအီၤလၢ “အဆိကတၢၢ်န့ၣ်​ ဖိသၣ်တဖၣ်​ ကဘၣ်အီၣ်တၢ် ဘျဲဘျဲလီၤ. ကိၣ်လၢဖိဒံဖိသၣ်အဂီၢ်န့ၣ်​ တကြၢးလၢ ပှၤဟံးန့ၢ်အီၤ ဒီးကွံာ်လီၤလၢ ထွံၣ်ဖိတဖၣ်အအိၣ်ဘၣ်.”+ ၂၈ ပိာ်မုၣ်တဂၤအံၤ တဲဆၢက့ၤအီၤလၢ “မ့ၢ်လီၤကစၢ်ဧၢ, ဘၣ်ဆၣ်​ ထွံၣ်ဖိတဖၣ်လၢ စီၢ်နီၤခိၣ်အဖီလာ်န့ၣ်​ အီၣ်ဝဲတၢ်လၢ ဖိသၣ်အီၣ်လီၤဆှုဝဲတဖၣ်လီၤ.” ၂၉ ယ့ၣ်ၡူးတဲဆၢက့ၤအီၤလၢ “မ့ၢ်လၢ နတဲဒ်န့ၣ်အဃိ က့ၤဟီ. တၢ်ဝံတၢ်နါ ဟးထီၣ်ကွံာ်လၢ နဖိမုၣ်အလိၤလံ.”+ ၃၀ အဃိ အဝဲက့ၤဝဲလၢ အဟံၣ်​ ဒီးထံၣ်ဝဲ ဖိသၣ်န့ၣ်မံနီၤလၢ လီၢ်မံခိၣ်​ ဒီးတၢ်ဝံတၢ်နါ တအိၣ်လၢ အလိၤလၢၤဘၣ်.+

၃၁ ယ့ၣ်ၡူး ဟးထီၣ်ကွံာ်ဝဲလၢ စိၢ်အဟီၣ်ကဝီၤ ဝံၤအလီၢ်ခံ အလဲၤခီဂာ်ဝဲစံဒိၣ်​ ဒီးဒ့းကၤပလံၣ်*+ အဟီၣ်ကဝီၤတုၤလၢ ပီၣ်လဲၣ်ကၤလံၤလါလီၤ. ၃၂ ဖဲန့ၣ်န့ၣ်​ ပှၤဟဲကိးပှၤလၢ အနၢ်တဟူတၢ် ဒီးတဲတၢ် တသ့ဂ့ၤဂ့ၤဘၣ်တဂၤ+ လၢအအိၣ်​ ဒီးအဝဲသ့ၣ်​ ဃ့ကညး ယ့ၣ်ၡူးလၢ ကပာ်အစုလၢ အလိၤလီၤ. ၃၃ ဒီးယ့ၣ်ၡူးကိးအီၤလၢ တၢ်တဒၢအလီၢ် လၢအယံၤထီၣ်ဒီး ပှၤဂီၢ်မုၢ်လီၤ. ဒီးယ့ၣ်ၡူးထၢနုာ်ဝဲ အစုနၢလၢ ပှၤတဂၤန့ၣ်​ အနၢ်ပူၤခံခီလၢာ်ဝံၤဒီး အဝဲထူးပှဲာ်တၢ် ဒီးထိးဝဲ ပှၤတဂၤန့ၣ်အပျ့ၤလီၤ.+ ၃၄ ဒီးအဝဲကွၢ်ထီၣ်တၢ် လၢမူခိၣ်​ ဒီးကသါသဖှိထီၣ်ဖးဒိၣ်​ ဒီးတဲအီၤလၢ “အ့ၤဖၤသါ” လၢအခီပညီမ့ၢ်ဝဲ “အိးထီၣ်တက့ၢ်.” ၃၅ ဖဲန့ၣ်အဆၢကတီၢ် အနၢ်န့ၣ်အိးထီၣ်အသး+ ဒီးအတဲတၢ်သ့ထီၣ်ဝဲ ဒ်ပှၤဂၤအသိးလီၤ. ၃၆ ဒီးယ့ၣ်ၡူးမၤလိာ်အဝဲသ့ၣ်​ ဒ်သိးအသုတတဲဘၣ်​ ပှၤနီတဂၤတဂ့ၤ+ ဘၣ်ဆၣ်​ ယ့ၣ်ၡူးဒံးတြီဝဲန့ၣ်​ အဝဲသ့ၣ်​ တဲဝဲဒံးအါထီၣ်လီၤ.+ ၃၇ ဒီးအဝဲသ့ၣ်​ ကမၢကမၣ်ဝဲဒိၣ်မး+ ဒီးအဝဲသ့ၣ်တဲဝဲလၢ “အဝဲဒုးနၢ်ဟူထီၣ်က့ၤ ပှၤလၢ အတနၢ်ဟူတၢ်တဖၣ်​ ဒီးအဝဲဒုးတဲထီၣ်က့ၤ ပှၤလၢ အတဲတၢ်တသ့ဘၣ်တဖၣ်လီၤ.+ တၢ်လၢ အမၤဝဲခဲလၢာ်န့ၣ်​ ဂ့ၤဝဲလီၤ.”