၁ ကရံၣ်သူး
၁၄ ဂုာ်ကျဲးစၢးလၢ အဂ့ၤကတၢၢ်ဒ်သိး သုကပာ်ဖျါထီၣ် တၢ်အဲၣ်တၢ်ကွံတက့ၢ်. ဒီးဂုာ်ကျဲးစၢးဆူၣ်ဆူၣ် ဒ်သိးသုကဒိးန့ၢ်ဘၣ် သးစီဆှံအတၢ်ဟ့ၣ်တဖၣ် လီၤဆီဒၣ်တၢ် လၢသုကတဲတၢ်ဒ် ဝံအသိးတက့ၢ်.+ ၂ ပှၤလၢအတဲတၢ်လၢ ကျိာ်အဂၤန့ၣ် တမ့ၢ်အတဲတၢ်ဒီး ပှၤဟီၣ်ခိၣ်ဖိဘၣ် မ့ၢ်အတဲတၢ်ဒီး ကစၢ်ယွၤလီၤ. ဒီးပှၤတနၢ်ပၢၢ် အတၢ်ကတိၤ နီတဂၤဘၣ်.+ ဘၣ်ဆၣ် အဝဲတဲ တၢ်ခူသူၣ်စီဆှံတဖၣ်+ ခီဖျိသးစီဆှံလီၤ. ၃ ဘၣ်ဆၣ် ပှၤလၢအတဲတၢ် ဒ်ဝံအသိးန့ၣ် မၤဆူၣ်ထီၣ်ပှၤသး, ဟ့ၣ်ဂံၢ်ဟ့ၣ်ဘါပှၤဂၤ ဒီးမၤမုာ်ထီၣ်ပှၤသး ခီဖျိလၢ အတၢ်ကတိၤလီၤ. ၄ ပှၤလၢအတဲတၢ်လၢ ကျိာ်အဂၤန့ၣ် မၤဆူၣ်ထီၣ် အနီၢ်ကစၢ်အဂံၢ်ဘါ ဘၣ်ဆၣ် ပှၤလၢအတဲတၢ် ဒ်ဝံအသိးန့ၣ် မၤဆူၣ်ထီၣ် တၢ်အိၣ်ဖှိၣ်ဒီတဖု အဂံၢ်ဘါလီၤ. ၅ ယအဲၣ်ဒိးလၢ သုကိးဂၤဒဲး ကတဲတၢ်လၢ ကျိာ်အဂၤတဖၣ်လီၤ.+ ဘၣ်ဆၣ် ယလီကီဒိၣ်လၢ သုကတဲတၢ်ဒ် ဝံအသိးလီၤ.+ နီၢ်ကီၢ်န့ၣ် ပှၤလၢအတဲတၢ်လၢ ကျိာ်အဂၤတဖၣ်န့ၣ် အမ့ၢ်တကျိာ်ထံတၢ် ဒ်သိးတၢ်အိၣ်ဖှိၣ် ကန့ၢ်ဂံၢ်န့ၢ်ဘါအဂီၢ်ဘၣ်န့ၣ် ပှၤလၢ အတဲတၢ်ဒ်ဝံအသိးတဂၤ ဒိၣ်န့ၢ်ဒံးအီၤလီၤ. ၆ ဒီပုၢ်ဝဲၢ်သ့ၣ်ဧၢ, ဆၢကတီၢ်ခဲအံၤ ယမ့ၢ်လဲၤလၢသုအိၣ် ဒီးယမ့ၢ်တဲတၢ်ဒီးသုလၢ ကျိာ်အဂၤဘၣ်ဆၣ် ယမ့ၢ်တတဲတၢ်ခီဖျိ တၢ်လီၣ်ဖျါမ့ၢ်ဂ့ၤ,+ မ့ၢ်တတဲတၢ်လၢအပှဲၤဒီး တၢ်သ့ၣ်ညါနၢ်ပၢၢ်မ့ၢ်ဂ့ၤ,+ မ့ၢ်တတဲတၢ်ဒ် ဝံအသိးမ့ၢ်ဂ့ၤ, မ့ၢ်တတဲ တၢ်သိၣ်လိ တခါခါမ့ၢ်ဂ့ၤန့ၣ် မ့ၢ်အဘျုးကအိၣ်လၢ သုဂီၢ်ဒ်လဲၣ်.
၇ အဒိ တၢ်ဒ့တၢ်အူလၢ အသးသမူတအိၣ်ဘၣ် ဒ်သိးဒီး ပံ မ့တမ့ၢ် တနၢ်န့ၣ် ပှၤအူအီၤမ့ၢ်တသ့ဘၣ် မ့တမ့ၢ် ဒ့အီၤမ့ၢ်တဘၣ်ဘၣ်န့ၣ် ပှၤသ့ၣ်ညါနီၤဖး တၢ်သးဝံၣ်အယုၢ် ကသ့လၢကျဲဒ်လဲၣ်. ၈ ဒီးကွဲၤအကလုၢ် သီၣ်မ့ၢ်တၡဲဘၣ်န့ၣ် မ့ၢ်မတဂၤ ကအိၣ်ကတဲာ်ကတီၤအသးလၢ ကဒုးတၢ်အဂီၢ်လဲၣ်. ၉ ဒ်န့ၣ်အသိး သုမ့ၢ်တသူသုပျ့ၤ ဒ်သိးသုကတဲတၢ်လၢ ပှၤနၢ်ပၢၢ်အီၤညီဘၣ်န့ၣ် ပှၤနၢ်ပၢၢ်တၢ်လၢ သုတဲကသ့ဒ်လဲၣ်. နီၢ်ကီၢ်န့ၣ် ကလီၤဂာ်ဒ်သိးဒီး သုတဲတၢ်ကတိၤလၢ အခီပညီတအိၣ်ဘၣ်. ၁၀ လၢဟီၣ်ခိၣ်ချၢအံၤ ကျိာ်လၢပှၤတဲအီၤ အိၣ်ဝဲအကလုာ်ကလုာ်လီၤ. ဘၣ်ဆၣ် တၢ်ကတိၤအကျိာ်လၢ အခီပညီတအိၣ်ဘၣ်န့ၣ် တအိၣ်နီတကျိာ်ဘၣ်. ၁၁ ယမ့ၢ်တနၢ်ပၢၢ် တၢ်ကတိၤလၢ ပှၤတဲအီၤဘၣ်န့ၣ် ယကလီၤဂာ်ဒ် ပှၤထံဂၤကီၢ်ဂၤဖိလၢ ပှၤတဲတၢ်တဂၤန့ၣ်အဂီၢ် ဒီးပှၤလၢအတဲတၢ်တဂၤန့ၣ် ကလီၤဂာ်ဒ် ပှၤထံဂၤကီၢ်ဂၤဖိ လၢယဂီၢ်လီၤ. ၁၂ ဒ်န့ၣ်အသိး သုဝဲစ့ၢ်ကီး မ့ၢ်လၢသုလီကီ သးစီဆှံအတၢ်ဟ့ၣ်တဖၣ် သပှၢ်ကတၢၢ်အဃိ ဂုာ်ကျဲးစၢး ဒ်သိးသုကအိၣ်ဒီး သးစီဆှံ အတၢ်ဟ့ၣ်တဖၣ် လၢအကမၤဆူၣ်ထီၣ် တၢ်အိၣ်ဖှိၣ်အဂံၢ်ဘါ အဂီၢ်တက့ၢ်.+
၁၃ အဃိ ပှၤလၢအတဲတၢ်လၢ ကျိာ်အဂၤန့ၣ် မ်အဃ့ထုကဖၣ်တၢ် ဒ်သိးအကျိာ်ထံ တၢ်လၢအတဲဝဲတဖၣ် ကသ့အဂီၢ်တက့ၢ်.+ ၁၄ ယမ့ၢ်ဃ့ထုကဖၣ်တၢ်လၢ ကျိာ်အဂၤန့ၣ် တမ့ၢ်လၢ ယဃ့ဘၣ်, မ့ၢ်ဝဲသးစီဆှံ အတၢ်ဟ့ၣ်လၢ အဘၣ်တၢ်ဟ့ၣ်လီၤယၤန့ၣ် ဃ့ဝဲလီၤ. အဃိ ယတနၢ်ပၢၢ်တၢ်လၢ ယတဲတဖၣ်ဘၣ်. ၁၅ မ့မ့ၢ်ဒ်န့ၣ်န့ၣ် ယကဘၣ်မၤဒ်လဲၣ်. ယကဃ့ထုကဖၣ်တၢ် ခီဖျိသးစီဆှံ အတၢ်ဟ့ၣ် ဘၣ်ဆၣ် ယကဃ့ထုကဖၣ်တၢ်လၢ ကျိာ်လၢ ယနၢ်ပၢၢ်စ့ၢ်ကီးလီၤ. ဒီးယကသးဝံၣ် စံးထီၣ်ပတြၢၤတၢ် ခီဖျိ သးစီဆှံအတၢ်ဟ့ၣ် ဘၣ်ဆၣ် ယကသးဝံၣ် စံးထီၣ်ပတြၢၤတၢ်လၢ ကျိာ်လၢ ယနၢ်ပၢၢ်စ့ၢ်ကီးလီၤ. ၁၆ နမ့ၢ်စံးဘျုး ကစၢ်ယွၤခီဖျိ သးစီဆှံအတၢ်ဟ့ၣ်တမံၤမံၤန့ၣ် ပှၤမုၢ်ဆ့ၣ်မုၢ်ဂီၤဖိလၢ အအိၣ်ဖဲန့ၣ် တနၢ်ပၢၢ်တၢ်လၢ နတဲသ့ၣ်တဖၣ်ဘၣ်အဃိ အဝဲတဲ “အၤမ့ၣ်” ကသ့ဒ်လဲၣ်. ၁၇ မ့ၢ်လီၤ, နတၢ်စံးဘျုး ကစၢ်ယွၤန့ၣ် ဂ့ၤဒိၣ်မး ဘၣ်ဆၣ် အတမၤဆူၣ်ထီၣ် ပှၤတဂၤန့ၣ်အသးဘၣ်. ၁၈ ယစံးဘျုးဘၣ် ကစၢ်ယွၤမ့ၢ်လၢ ယတဲတၢ်လၢ ကျိာ်အဂၤ အါန့ၢ်ဒံး သုခဲလၢာ်အဃိလီၤ. ၁၉ ဘၣ်ဆၣ် ဖဲတၢ်အိၣ်ဖှိၣ်အပူၤန့ၣ် လၢယကတဲ တၢ်ကတိၤအဖျၢၣ် ၁၀,၀၀၀ လၢကျိာ်အဂၤအလီၢ် ယအဲၣ်ဒိးတဲ တၢ်ကတိၤယဲၢ်ဖျၢၣ် လၢပှၤနၢ်ပၢၢ်အီၤသ့, ဒ်သိးယကသိၣ်လိ ပှၤဂၤအဂီၢ်လီၤ.+
၂၀ ဒီပုၢ်ဝဲၢ်သ့ၣ်ဧၢ, လၢတၢ်သ့ၣ်ညါနၢ်ပၢၢ် တကပၤန့ၣ် သုတဘၣ်လီၤဂာ်ဒ် ဖိသၣ်အသိးတဂ့ၤ.+ ဘၣ်ဆၣ် မ့မ့ၢ်လၢ တၢ်အၢတၢ်သီတကပၤန့ၣ် လီၤဂာ်ဒ်ဖိသၣ် အသိးတက့ၢ်.+ ဒီးကဲထီၣ် ပှၤဒိၣ်တုာ်ခိၣ်ပှဲၤလၢ တၢ်သ့ၣ်ညါနၢ်ပၢၢ် တကပၤန့ၣ်တက့ၢ်.+ ၂၁ လၢစီၤမိၤၡ့ အတၢ်သိၣ်တၢ်သီအပူၤန့ၣ် တၢ်ကွဲးအသးအိၣ်ဝဲဒ်အံၤလီၤ. ‘ယဟိဝၤယွၤ* တဲဝဲလၢ “ယကသူ ပှၤလၢအတဲကျိာ်အဂၤတဖၣ် ဒီးပှၤထံဂၤကီၢ်ဂၤဖိ ဒ်သိးယကတဲတၢ်ဒီး ပှၤဂီၢ်မုၢ်တဒူၣ်အံၤ အဂီၢ်လီၤ. ဘၣ်ဆၣ် ပှၤဂီၢ်မုၢ်တဒူၣ်အံၤ တသးအိၣ်ဒိကနၣ် ယကလုၢ်ဒံးဘၣ်.”’+ ၂၂ အဃိ ကျိာ်အဂၤတဖၣ်န့ၣ် တမ့ၢ်တၢ်ပနီၣ်လၢ ပှၤလၢအစူၢ်က့ၤနာ်က့ၤတၢ်တဖၣ် အဂီၢ်ဘၣ်. မ့ၢ်ဝဲလၢ ပှၤလၢအတစူၢ် တနာ်တၢ်တဖၣ် အဂီၢ်လီၤ.+ မ့မ့ၢ် တၢ်တဲတၢ်ဒ်ဝံအသိးန့ၣ် တမ့ၢ်လၢ ပှၤလၢအတစူၢ်တနာ်တၢ်တဖၣ် အဂီၢ်ဘၣ်. မ့ၢ်လၢ ပှၤလၢအစူၢ်က့ၤ နာ်က့ၤတၢ်တဖၣ် အဂီၢ်လီၤ. ၂၃ အဃိ တၢ်အိၣ်ဖှိၣ်ဒီဖုညါ မ့ၢ်ပာ်ဖှိၣ်ထီၣ်အသးဖဲ တၢ်လီၢ်တတီၤဃီဝံၤ ပှၤခဲလၢာ် မ့ၢ်တဲတၢ်လၢ ကျိာ်အဂၤတဖၣ် ဒီးပှၤမုၢ်ဆ့ၣ်မုၢ်ဂီၤဖိ မ့တမ့ၢ် ပှၤတစူၢ်တနာ်တၢ်တဖၣ် မ့ၢ်ဟဲနုာ်လီၤန့ၣ် အဝဲသ့ၣ်ကတဲလၢ သုပျုၢ် တမ့ၢ်ဘၣ်ဧါ. ၂၄ ဘၣ်ဆၣ် သုဝဲကိးဂၤဒဲး မ့ၢ်တဲတၢ်ဒ်ဝံအသိး ဒီးပှၤတစူၢ်တနာ်တၢ် မ့တမ့ၢ် ပှၤမုၢ်ဆ့ၣ်မုၢ်ဂီၤဖိတဂၤ မ့ၢ်ဟဲနုာ်လီၤန့ၣ် အဝဲကဘၣ် တၢ်သိၣ်ဃီၣ်အီၤ ဒီးကဘၣ်တၢ်သမံသမိးအီၤ ခီဖျိလၢ သုဝဲခဲလၢာ် အတၢ်ကတိၤလီၤ. ၂၅ ဒီးတၢ်လၢ အအိၣ်ခူသူၣ်လၢ အသးပူၤန့ၣ် ကအိၣ်ဖျါထီၣ်ဝဲ ဒီးအဝဲကထိၣ်လီၤပှီၤအသး, ကဘူၣ်ထီၣ်ဘါထီၣ် ကစၢ်ယွၤဒီးကတဲဝဲလၢ “ကစၢ်ယွၤအိၣ်လၢ သုကျါနီၢ်ကီၢ်လီၤ.”+
၂၆ မ့မ့ၢ်ဒ်န့ၣ်န့ၣ် ဒီပုၢ်ဝဲၢ်သ့ၣ်ဧၢ, သုကဘၣ်မၤဒ်လဲၣ်. ဖဲသုအိၣ်ဖှိၣ် တပူၤဃီအခါ တဂၤန့ၣ် ကသးဝံၣ် စံးထီၣ်ပတြၢၤတၢ်, အဂၤတဂၤန့ၣ် ကသိၣ်လိတၢ် ဒီးအဂၤတဂၤန့ၣ် ကတဲတၢ် ခီဖျိတၢ်လီၣ်ဖျါ, အဂၤတဂၤန့ၣ် ကတဲတၢ်လၢကျိာ်အဂၤ ဒီးအဂၤတဂၤန့ၣ် ကကျိာ်ထံတၢ်လီၤ.+ မ်တၢ်ခဲလၢာ် မၤအသးဒ်သိး ကမၤဆူၣ်ထီၣ် ပှၤသးအဂီၢ်တက့ၢ်. ၂၇ ဒီးပှၤမ့ၢ်တဲတၢ်လၢ ကျိာ်အဂၤန့ၣ် မ်အဝဲသ့ၣ်တဲတၢ် အအါကတၢၢ် ထဲခံဂၤသၢဂၤ ဒီးတဲတၢ်တဂၤဝံၤတဂၤ ဒီးမ်ပှၤတဂၤဂၤ ကျိာ်ထံက့ၤဝဲတက့ၢ်.+ ၂၈ ဘၣ်ဆၣ် ပှၤတဲကျိာ်ထံတၢ် မ့ၢ်တအိၣ်ဘၣ်န့ၣ် အဝဲကဘၣ်အိၣ်ဘှ့ၣ်ဝဲ လၢတၢ်အိၣ်ဖှိၣ်အပူၤ ဒီးတဲတၢ်ဒီးကစၢ်ယွၤ လၢအသးပူၤလီၤ. ၂၉ မ်ဝံခံဂၤ, သၢဂၤ+ တဲတၢ်ဒီး မ်ပှၤအဂၤတဖၣ် ပဲာ်ထံနီၤဖးအခီပညီတက့ၢ်. ၃၀ ဘၣ်ဆၣ် ပှၤလၢအဂၤတဂၤ မ့ၢ်ဒိးန့ၢ် တၢ်လီၣ်ဖျါ ဖဲအဝဲဆ့ၣ်နီၤ ဖဲန့ၣ်အခါန့ၣ် မ်ပှၤလၢအတဲတၢ် အဆိကတၢၢ်တဂၤန့ၣ် အိၣ်ဘှ့ၣ်တက့ၢ်. ၃၁ ဒ်သိးပှၤခဲလၢာ် ကမၤလိန့ၢ်တၢ် ဒီးကန့ၢ်ဂံၢ်န့ၢ်ဘါအဂီၢ် သုဝဲခဲလၢာ် တဲတၢ်ဒ်ဝံအသိး တဂၤဝံၤတဂၤတက့ၢ်.+ ၃၂ အဃိ ဖဲဝံတဖၣ် သူဝဲသးစီဆှံ အတၢ်ဟ့ၣ်တဖၣ်အခါ အဝဲသ့ၣ် ကဘၣ်အိၣ်ဒီး တၢ်ကီၤသူၣ်ကီၤသးလီၤ. ၃၃ ကစၢ်ယွၤန့ၣ် တမ့ၢ်ကစၢ်လၢ အဒုးအိၣ်ထီၣ် တၢ်ဘံဘူတဖၣ်ဘၣ်. အဝဲမ့ၢ်တၢ်ဃူတၢ်ဖိး အကစၢ်လီၤ.+
ဒ်တၢ်မၤအသး လၢပှၤစီဆှံ အတၢ်အိၣ်ဖှိၣ်ခဲလၢာ်အပူၤ အသိးန့ၣ် ၃၄ တၢ်တဟ့ၣ်အခွဲးလၢ ပိာ်မုၣ်တဖၣ် ကတဲတၢ်ဘၣ်. အဃိ မ်ပိာ်မုၣ်တဖၣ် အိၣ်ဘှ့ၣ်ဝဲလၢ တၢ်အိၣ်ဖှိၣ်အပူၤတက့ၢ်.+ ဒီးမ်အဝဲသ့ၣ် ဒိးပၢအသးလၢ ပိာ်ခွါအဖီလာ်+ ဒ်စီၤမိၤၡ့ အတၢ်သိၣ်တၢ်သီ တဲစ့ၢ်ကီးဝဲအသိး န့ၣ်တက့ၢ်. ၃၅ ပိာ်မုၣ်မ့ၢ်တဲတၢ်လၢ တၢ်အိၣ်ဖှိၣ်အပူၤန့ၣ် ကဲထီၣ်တၢ်မဲာ်ဆှးအဃိ အဝဲသ့ၣ် မ့ၢ်အဲၣ်ဒိးနၢ်ပၢၢ်ထီၣ် တၢ်တမံၤမံၤန့ၣ် မ်အဝဲသ့ၣ်သံကွၢ်အဝၤ လၢအဟံၣ်တက့ၢ်.
၃၆ မ့ၢ်ကစၢ်ယွၤ အကလုၢ်ကထါ ဟဲအိၣ်ထီၣ်လၢသုအိၣ်ဟီဧါ. မ့တမ့ၢ်ဘၣ်န့ၣ် မ့ၢ်အလဲၤတုၤထဲလၢ သုအိၣ်လီၤဧါ.
၃၇ ပှၤတဂၤဂ့ၤတဂၤဂ့ၤ မ့ၢ်ဆိကမိၣ်ဝဲလၢ အမ့ၢ်ဝံ မ့တမ့ၢ် အဒိးန့ၢ်ဘၣ် တၢ်ဟ့ၣ်လီၤဆီလၢ သးစီဆှံအအိၣ်န့ၣ် အဝဲကဘၣ်တူၢ်လိာ်ဝဲလၢ တၢ်လၢယကွဲးန့ၢ်သုတဖၣ်န့ၣ် မ့ၢ်ဝဲကစၢ် အတၢ်မၤလိာ်လီၤ. ၃၈ ဘၣ်ဆၣ် ပှၤတဂၤဂၤ မ့ၢ်တကနၣ်ဃုာ် တၢ်ဂ့ၢ်အံၤဘၣ်န့ၣ် ကစၢ်ယွၤ တကနၣ်ဃုာ်အီၤ စ့ၢ်ကီးဘၣ်. ၃၉ အဃိ ယဒီပုၢ်ဝဲၢ်သ့ၣ်ဧၢ, ဆဲးဂုာ်ကျဲးစၢး ဆူၣ်ဆူၣ်လၢ သုကတဲတၢ်ဒ် ဝံအသိးတက့ၢ်.+ ဘၣ်ဆၣ် တဘၣ်တြီ ပှၤလၢအတဲတၢ်လၢ ကျိာ်အဂၤတဖၣ်တဂ့ၤ.+ ၄၀ မ်တၢ်ခဲလၢာ် လဲၤအသးလၢ အဂ့ၢ်အဝီ ဒ်တၢ်ရဲၣ်လီၤကျဲၤလီၤအီၤ အသိးတက့ၢ်.+