၂ တံၤမသ့း
၁ ယၤ, စီၤပီလူးန့ၣ် ယမ့ၢ် ယ့ၣ်ၡူးခရံာ်အတၢ်မၢဖိ ခီဖျိ ကစၢ်ယွၤအတၢ်ဘၣ်သး ဒ်သိးကစံၣ်တဲၤတဲလီၤ တၢ်အၢၣ်လီၤ ဘၣ်ဃးဒီး တၢ်မူလၢအဘၣ် တၢ်ဟ့ၣ်လီၤပှၤ ခီဖျိလၢ ယ့ၣ်ၡူးခရံာ်လီၤ.+ ၂ ယကွဲးလံာ်အံၤဆူ ဖိခွါသးဘိ စီၤတံၤမသ့းအအိၣ်လီၤ.+
မ်နဒိးန့ၢ်ဘၣ် တၢ်သးကညီၤဒိၣ်ဒိၣ်မုၢ်မုၢ်, တၢ်သူၣ်အိၣ်သးအိၣ် ဒီးတၢ်သူၣ်မံသးမုာ်လၢ ပၢ်ကစၢ်ယွၤ ဒီးပကစၢ်ယ့ၣ်ၡူးခရံာ် အအိၣ်တက့ၢ်.
၃ ယမၤကစၢ်ယွၤ အတၢ်မၤစီဆှံဒ် ယမိၢ်ပၢ်ဖံဖု လၢပျၢၤတဖၣ် မၤတ့ၢ်ဝဲအသိး ဒီးယမၤအီၤလၢ ယသးလၢ အသ့ၣ်ညါဒၣ်တၢ် လၢအကဆှီလီၤ. ယစံးဘျုး ကစၢ်ယွၤ ဒီးဖဲယဃ့ကညးအီၤလၢ မုၢ်ဆါဒီး လၢမုၢ်နၤအခါ ယသ့ၣ်နီၣ်ထီၣ်နၤ ထီဘိလီၤ. ၄ ဖဲယသ့ၣ်နီၣ်ထီၣ်လၢ နမဲာ်ထံလီၤအခါ ယအဲၣ်ဒိးထံၣ်နၤ ဒိၣ်မးလီၤ. ဒီးယမ့ၢ်ထံၣ်နၤန့ၣ် ယကပှဲၤဒီးတၢ်သးခုလီၤ. ၅ ယသ့ၣ်နီၣ်ထီၣ်က့ၤ နတၢ်နာ်လၢ အတပၣ်ဒီး တၢ်ပာ်မၤအသးဘၣ်.+ တၢ်နာ်အံၤအိၣ်ဆိလၢ နဖံနီၢ်လိၤအ့ၣ် ဒီးနမိၢ်နီၢ်အူၤနံက့ၤ အသးပူၤလီၤ. ဒီးယနာ် သပှၢ်တၢၢ်လၢ တၢ်နာ်အံၤ အိၣ်လၢနသးပူၤစ့ၢ်ကီးလီၤ.
၆ လၢတၢ်ဂ့ၢ်အံၤအဃိ ယကဒုးသ့ၣ်နီၣ်နၤလၢ ကစၢ်ယွၤ အတၢ်ဟ့ၣ်လၢ နဒိးန့ၢ်ဘၣ်အီၤဖဲ ယပာ်ထီၣ်ယစုလၢနလိၤန့ၣ်+ နကဘၣ်သူအီၤလၢ တၢ်သူၣ်ဆူၣ်သးဆူၣ် ဒ်နမၤကဲၤဒိၣ်ထီၣ် မ့ၣ်အူအသိးလီၤ. ၇ ကစၢ်ယွၤ တဟ့ၣ်လီၤပှၤလၢ သးလၢအပျံၤတၢ်ညီဘၣ်.+ အဟ့ၣ်ပှၤသးလၢအအိၣ်ဒီး တၢ်စိတၢ်ကမီၤ,+ တၢ်အဲၣ်တၢ်ကွံ ဒီးတၢ်သ့တၢ်ဘၣ်လၢ ကပဲာ်ထံနီၤဖးတၢ် ဂ့ၤဂ့ၤအဂီၢ်လီၤ. ၈ အဃိ တဘၣ်မဲာ်ဆှးလၢ နကအုၣ်နသးလၢ ပကစၢ်အဂ့ၢ်တဂ့ၤ.+ ဒီးယၤလၢအကဲဘၣ် ပှၤဃိာ်ဖိလၢ ကစၢ်အဃိန့ၣ် တဘၣ်မဲာ်ဆှးလၢ ယဃိတဂ့ၤ. သန့ၤနသးလၢ ကစၢ်ယွၤ အတၢ်စိတၢ်ကမီၤ+ ဒီးတူၢ်လိာ် တၢ်နးတၢ်ဖှီၣ်လၢ တၢ်သးခုကစီၣ်အဂီၢ် န့ၣ်တက့ၢ်.+ ၉ ကစၢ်ယွၤအုၣ်က့ၤခီၣ်က့ၤပှၤ ဒီးကိးပှၤဒ်သိး ပကကဲထီၣ် ပှၤစီဆှံအဂီၢ်န့ၣ်+ တမ့ၢ်လၢ ပတၢ်မၤအဃိဘၣ်, မ့ၢ်လၢ အတၢ်တိာ်ပာ် ဒီးအတၢ်သးကညီၤ ဒိၣ်ဒိၣ်မုၢ်မုၢ်အဃိလီၤ.+ လၢပျၢၤန့ၣ် အဝဲဆၢတဲာ်ဝဲလၢ ကပာ်ဖျါထီၣ် တၢ်သးကညီၤ ဒိၣ်ဒိၣ်မုၢ်မုၢ်အံၤလၢ ပဖီခိၣ် ခီဖျိလၢ ယ့ၣ်ၡူးခရံာ်လီၤ. ၁၀ ဘၣ်ဆၣ် ခဲအံၤန့ၣ် တၢ်သးကညီၤ ဒိၣ်ဒိၣ်မုၢ်မုၢ်အံၤ ဘၣ်တၢ်ပာ်ဖျါထီၣ်အီၤ လီၤတံၢ်လီၤဆဲး ခီဖျိလၢ ပတၢ်အုၣ်က့ၤခီၣ်က့ၤကစၢ် ယ့ၣ်ၡူးခရံာ် အိၣ်ဖျါထီၣ်ဝဲအဃိလီၤ.+ အဝဲမၤဟးဂီၤကွံာ်တၢ်သံ+ တကးဒံးဘၣ် အဝဲပာ်ဖျါထီၣ်န့ၢ်ပှၤလၢ ပဒိးန့ၢ်ဘၣ် တၢ်မူ+ ဒီးသးသမူလၢ အအုၣ်သံကျၣ်သံတသ့ဘၣ်+ ကသ့ဒ်လဲၣ်အဂ့ၢ် ခီဖျိလၢ တၢ်သးခုကစီၣ်လီၤ.+ ၁၁ လၢတၢ်သးခုကစီၣ်အံၤအဂီၢ် ကစၢ်ယွၤ* ဃုထၢထီၣ်ယၤ ဒ်ပှၤစံၣ်တဲၤတဲလီၤတၢ်ဖိ, တၢ်မၢဖိ ဒီးပှၤသိၣ်လိတၢ်တဂၤလီၤ.+
၁၂ လၢတၢ်ဂ့ၢ်အံၤအဃိ ယတူၢ်ဘၣ်တၢ်ဒ်န့ၣ်လီၤ.+ ဘၣ်ဆၣ် ယတမဲာ်ဆှးဘၣ်,+ မ့ၢ်လၢ ယသ့ၣ်ညါ ပှၤလၢ ယနာ်အီၤတဂၤ ဒီးယနာ်သပှၢ်တၢၢ်လၢ တၢ်လၢယအးလီၤအီၤန့ၣ် အဝဲကပၢၤဃာ်ဝဲ တုၤလၢမုၢ်နံၤလၢ အဘၣ်တၢ်ပာ်ပနီၣ်အီၤ ဘၣ်ဝဲတစုလီၤ.+ ၁၃ တၢ်ကတိၤ အဂ့ၤအဘၣ်တဖၣ်လၢ နနၢ်ဟူဘၣ်လၢယအိၣ်န့ၣ် ဆဲးဟံးဃာ်အီၤ ဒ်အမ့ၢ် တၢ်အဒိအတဲာ်အသိးတက့ၢ်.+ ဒီးဆဲးပာ်ဖျါထီၣ်တၢ်နာ် ဒီးတၢ်အဲၣ်တၢ်ကွံ ဒ်နမ့ၢ် ယ့ၣ်ၡူးခရံာ်အပျဲၢ်အဘီၣ်အသိး န့ၣ်တက့ၢ်. ၁၄ တၢ်လုၢ်ဒိၣ်ပှ့ၤဒိၣ်တမံၤအံၤလၢ အဘၣ်တၢ်အးလီၤအီၤလၢ နစုပူၤန့ၣ် ဒီသဒၢအီၤ ခီဖျိလၢသးစီဆှံ လၢအအိၣ်ဝဲဆိးဝဲလၢ ပပူၤန့ၣ်တက့ၢ်.+
၁၅ နသ့ၣ်ညါလၢ ပှၤခဲလၢာ်လၢ အအိၣ်လၢ အၤစံကီၢ်ရ့ၣ်အပူၤ+ ဃုာ်ဒီး စီၤဖူက့းလူး ဒီးစီၤအ့းရံမိက့းန့ၤန့ၣ် ပာ်တ့ၢ်ယၤလံ. ၁၆ မ်ကစၢ်သးကညီၤ စီၤအီးနံၤစံဖရူး အဟံၣ်ဖိဃီဖိတက့ၢ်.+ အဝဲမၤဆူၣ်ထီၣ်က့ၤ ယဂံၢ်ယဘါ အါဘျီ ဒီးအတမဲာ်ဆှးလၢ ယဘၣ်တၢ်စၢဃာ်ယၤလၢ ပျံၤထးအဃိဘၣ်. ၁၇ လၢတၢ်န့ၣ်အလီၢ် ဖဲအဝဲအိၣ်လၢ ဝ့ၢ်ရိမ့ၤအခါ အဟးဃုယၤ သပှၢ်တၢၢ် တုၤလၢအထံၣ်ယၤလီၤ. ၁၈ ဒီးတၢ်လၢ အမၤဝဲလၢ ဝ့ၢ်အ့းဖ့းစူးအပူၤ ခဲလၢာ်န့ၣ် နသ့ၣ်ညါအီၤ ဂ့ၤဂ့ၤလီၤ. မ်ကစၢ်ယဟိဝၤယွၤ* ပာ်ဖျါထီၣ် တၢ်သးကညီၤလၢအဖီခိၣ် ဖဲမုၢ်နံၤလၢ အဘၣ်တၢ်ပာ်ပနီၣ်အီၤ ဘၣ်ဝဲအခါန့ၣ်တက့ၢ်.