၁ ၡမူၤအ့လး
၁၂ လၢခံကတၢၢ်န့ၣ် စီၤၡမူၤအ့လး တဲဘၣ် ပှၤအံၣ်စရ့လးဖိ ခဲလၢာ်လၢ “ကယဲၢ်တၢ်လၢ သုဃ့ယၤန့ၣ် ယမၤန့ၢ်သုဝံၤလံ ဒီးယပာ်ထီၣ် စီၤပၤတဂၤ လၢအကပၢတၢ် လၢသုဖီခိၣ်လံ.+ ၂ ဒီးစီၤပၤ လၢအတီခိၣ်ရိၤမဲ သုန့ၣ် အိၣ်ဖဲအံၤလီၤ.+ မ့မ့ၢ်ယၤန့ၣ် ယသးပှၢ်ထီၣ် ဒီးယခိၣ်ဝါထီၣ်လံ ဒီးယဖိခွါတဖၣ် အိၣ်လၢသုကျါလီၤ.+ ယတီခိၣ်ရိၤမဲသု စးထီၣ်လၢ ယသးစၢ်လံၤလံၤ တုၤလၢတနံၤအံၤလီၤ.+ ၃ ယအိၣ်ဖဲအံၤလီၤ. အဃိ သုမ့ၢ်အဲၣ်ဒိး ကဒူးကဒ့ၣ်ယၤ တမံၤမံၤန့ၣ် အုၣ်သုသးခဲအံၤလၢ ယဟိဝၤယွၤ ဒီးပှၤလၢအဒိးဖှူအသးတဂၤ အမဲာ်ညါတက့ၢ်.+ မ့ၢ်ယဟံးန့ၢ် ပှၤတဂၤဂၤ အကျီၢ်ဖါ မ့တမ့ၢ် ပှၤတဂၤဂၤ အကသ့ၣ်ယီၤဧါ.+ မ့ၢ်ယလံၣ်အီၣ်လီအီၣ်တၢ် ဒ်သိးယကန့ၢ်ဘၣ် ပှၤဂၤအတၢ် မ့တမ့ၢ် မၤနၢၤအီၣ်ဃီၣ် ပှၤတဂၤဂၤဧါ. ဒ်သိး ယကကွၢ်ကပာ် တၢ်တမံၤမံၤအဂီၢ် မ့ၢ်ယတူၢ်လိာ် တၢ်ထီးကျိၣ်ထီးစ့ လၢပှၤတဂၤဂၤ အအိၣ်ဧါ.+ လၢညါ ယမ့ၢ်မၤဘၣ် တၢ်ဒ်အံၤန့ၣ် ယကဟ့ၣ်ကဒါသု တၢ်လၢယဟံးန့ၢ်အီၤလီၤ.”+ ၄ ဖဲန့ၣ် အဝဲသ့ၣ် တဲဝဲလၢ “နတလံၣ်အီၣ်လီအီၣ်တၢ် ဒ်သိးနကန့ၢ်ဘၣ် ပှၤဂၤအတၢ် မ့တမ့ၢ် မၤနၢၤအီၣ်ဃီၣ် ပှၤနီတဂၤဘၣ်. နတတူၢ်လိာ် တၢ်ထီးကျိၣ်ထီးစ့ လၢပှၤအိၣ် နီတဂၤဘၣ်.” ၅ အဃိ စီၤၡမူအ့လး တဲအဝဲသ့ၣ်လၢ “သုပာ်ဒ့ၣ်ပာ်ကမၣ်ယၤ အလီၢ်တအိၣ်ဘၣ်န့ၣ် ယဟိဝၤယွၤ ဒီးပှၤလၢအဒိးဖှူအသးတဂၤန့ၣ် မ့ၢ်ပှၤအုၣ်အသး လၢတနံၤအံၤလီၤ.” ဝံၤဒီး အဝဲသ့ၣ် တဲဝဲလၢ “အဝဲမ့ၢ် ပှၤအုၣ်အသးလီၤ.”
၆ စီၤၡမူၤအ့လး တဲဘၣ် ပှၤဂီၢ်မုၢ်လၢ “ယဟိဝၤယွၤ လၢအသူဝဲ စီၤမိၤၡ့ ဒီးစီၤအၤဟရိၣ် ဒီးဒုးဟးထီၣ်ကွံာ်ဝဲ သုမိၢ်ပၢ်ဖံဖု လၢပျၢၤတဖၣ် လၢကီၢ်အဲၤကူပတူးအပူၤန့ၣ်+ မ့ၢ်ပှၤအုၣ်အသးလီၤ. ၇ ဒီးခဲအံၤ ဟဲသုးဘူးထီၣ်သုသး ဒီးယကစံၣ်ညီၣ်သုလၢ ယဟိဝၤယွၤ အမဲာ်ညါ ခီဖျိလၢ ယဟိဝၤယွၤ မၤတၢ်တီတီလိၤလိၤ လၢသုဖီခိၣ် ဒီးလၢသုမိၢ်ပၢ်ဖံဖု လၢပျၢၤတဖၣ် အဖီခိၣ်အဃိလီၤ.
၈ “စီၤယၤကိာ် လဲၤအိၣ်လၢ ကီၢ်အဲၤကူပတူးအပူၤ+ ဒီးလၢခံ ဖဲသုမိၢ်ပၢ်ဖံဖု လၢပျၢၤတဖၣ် ဃ့တၢ်မၤစၢၤလၢ ယဟိဝၤယွၤ အအိၣ်အခါ+ ယဟိဝၤယွၤ ဆှၢလီၤ စီၤမိၤၡ့+ ဒီးစီၤအၤဟရိၣ် တဘျီဃီ ဒ်သိးကဒုးဟးထီၣ်ကွံာ် သုမိၢ်ပၢ်ဖံဖု လၢပျၢၤတဖၣ်လၢ ကီၢ်အဲၤကူပတူးအပူၤ ဒီးအဝဲသ့ၣ် ဒုးအိၣ် သုမိၢ်ပၢ်ဖံဖု လၢပျၢၤတဖၣ် လၢတၢ်လီၢ်ဖဲအံၤလီၤ.+ ၉ ဘၣ်ဆၣ် အဝဲသ့ၣ် သးပ့ၤနီၣ်ကွံာ် အကစၢ် ယဟိဝၤယွၤ အဃိ ကစၢ်ယွၤ ဟ့ၣ်လီၤကွံာ်*+ အဝဲသ့ၣ်လၢ ဝ့ၢ်ဃါစိၢ် အသုးမုၢ်အခိၣ် စီၤစံစရၤအစုပူၤ,+ ပှၤဖလ့ၡသးဖိ အစုပူၤ+ ဒီးပှၤမိၤအးဖိ အစီၤပၤ အစုပူၤလီၤ.+ ဒီးပှၤတဖၣ်အံၤ ဒုးအဝဲသ့ၣ်လီၤ. ၁၀ အဝဲသ့ၣ် ဃ့တၢ်မၤစၢၤလၢ ယဟိဝၤယွၤအအိၣ်+ ဒီးတဲဝဲလၢ ‘ပပာ်တ့ၢ် ယဟိဝၤယွၤ ဒ်သိး ပကဘူၣ်ထီၣ်ဘါထီၣ် ဘဧၤလး+ ဒီးဧၤၡတြိး+ တၢ်ဂီၤတၢ်ဖှီၣ်တဖၣ် အဃိ ပမၤကမၣ်တၢ်လံ.+ ဘၣ်ဆၣ် ခဲအံၤ မၤထူၣ်ဖျဲးထီၣ်ပှၤလၢ ပဒုၣ်ပဒါ အစုပူၤ ဒ်သိး ပကဘူၣ်ထီၣ်ဘါထီၣ်နၤ အဂီၢ်တက့ၢ်.’ ၁၁ ဒီးဒ်သိး သုကအိၣ်ဘၣ် ဘံၣ်ဘံၣ်ဘၢဘၢအဂီၢ် ယဟိဝၤယွၤ ဆှၢလီၤ စီၤယရူဘဧၤလး,+ စီၤဘဒၣ်, စီၤယံးဖသၤ+ ဒီးယၤ စီၤၡမူၤအ့လး+ ဒီးမၤထူၣ်ဖျဲးထီၣ် သုလၢ သုဒုၣ်သုဒါလၢ အအိၣ်ဝးတရံးသု အစုပူၤလီၤ.+ ၁၂ ဒီးဖဲသုထံၣ်ဘၣ်လၢ ပှၤဧၣ်မိၣ်ဖိ အစီၤပၤ စီၤနၤဃၣ်+ ဟဲဝဲဒ်သိး ကဒုးသုအဂီၢ်အခါ သုကစၢ် ယဟိဝၤယွၤ မ့ၢ်သုစီၤပၤ+ သနာ်က့ သုတဲယၤ တဘျီဝံၤတဘျီလၢ ‘ပပာ်လီၤပသး သပှၢ်တၢၢ်လၢ ပကအိၣ်ဒီး စီၤပၤတဂၤလၢ ပဖီခိၣ်လီၤ.’+ ၁၃ ဒီးခဲအံၤ စီၤပၤလၢ သုဃုထၢထီၣ်အီၤ ဒီးသုဃ့န့ၢ်အီၤတဂၤန့ၣ် အိၣ်ဖဲအံၤလီၤ. ကွၢ်မီၤ, ယဟိဝၤယွၤ ပာ်ထီၣ် စီၤပၤတဂၤ လၢသုဖီခိၣ်လံ.+ ၁၄ ဒီးသုမ့ၢ်ပျံၤ ယဟိဝၤယွၤ,+ ဘူၣ်ထီၣ်ဘါထီၣ်အီၤ,+ ဒိကနၣ်အကလုၢ်+ ဒီးသုမ့ၢ်တထီဒါက့ၤ ယဟိဝၤယွၤ အတၢ်မၤလိာ်ဘၣ် ဒီးသုဝဲဒီး သုစီၤပၤလၢ အပၢတၢ်လၢ သုဖီခိၣ်န့ၣ် မ့ၢ်တီဒီး သုကစၢ် ယဟိဝၤယွၤန့ၣ် ဂ့ၤလံ. ၁၅ ဘၣ်ဆၣ် သုမ့ၢ်တဒိကနၣ် ယဟိဝၤယွၤ အကလုၢ်ဘၣ် ဒီးသုမ့ၢ်ထီဒါက့ၤ ယဟိဝၤယွၤ အတၢ်မၤလိာ်န့ၣ် ယဟိဝၤယွၤ အစုကထီဒါသု ဒီးသုပၢ်တဖၣ်လီၤ.+ ၁၆ ခဲအံၤန့ၣ် ဟဲသုးဘူးထီၣ် သုသး ဒီးသုကထံၣ်ဘၣ် တၢ်လၢအလီၤကမၢကမၣ်တမံၤ လၢယဟိဝၤယွၤ ကမၤဝဲလၢ သုမဲာ်ညါလီၤ. ၁၇ ခဲအံၤ ဘၣ်လၢ ပှၤကူးဘုကၠူၣ် အဆၢကတီၢ် တမ့ၢ်ဧီၤ. ယကကိးထီၣ် ယဟိဝၤယွၤ ဒ်သိး လီကသီၣ် ဒီးတၢ်ကစူၤ အဂီၢ်လီၤ. ဒီးဖဲန့ၣ် သုကသ့ၣ်ညါနၢ်ပၢၢ်လၢ သုမၤတၢ်အၢတၢ်သီ ဖးဒိၣ်တမံၤလၢ ယဟိဝၤယွၤအမဲာ်ညါ ခီဖျိလၢ သုဃ့န့ၢ် စီၤပၤတဂၤ လၢသုနီၢ်ကစၢ်အဂီၢ် အဃိလီၤ.”+
၁၈ ဒီးစီၤၡမူၤအ့လး ကိးထီၣ် ယဟိဝၤယွၤ ဒီးတၢ်တနံၤန့ၣ် ယဟိဝၤယွၤ ဒုးသီၣ်ထီၣ်လီ ဒီးဒုးစူၤလီၤမူခိၣ်လီၤ. အဃိ ပှၤဂီၢ်မုၢ်ခဲလၢာ် ပျံၤယဟိဝၤယွၤ ဒီးစီၤၡမူၤအ့လး ဒိၣ်မးလီၤ. ၁၉ ဒီးပှၤဂီၢ်မုၢ်ခဲလၢာ် တဲစီၤၡမူၤအ့လးလၢ “လၢပတၢ်ဒဲးဘး အဂၤခဲလၢာ် အမဲာ်ညါန့ၣ် ပမၤအါထီၣ် ပတၢ်ကမၣ် ခီဖျိလၢ ပဃ့န့ၢ်စီၤပၤတဂၤအဃိလီၤ. ဘၣ်ဆၣ် ပတအဲၣ်ဒိးသံဘၣ်အဃိ ဃ့ဘါထုကဖၣ်လၢ နကစၢ် ယဟိဝၤယွၤအအိၣ် လၢပဝဲနခ့နပှၤတဖၣ် အဂီၢ်တက့ၢ်.”+
၂၀ အဃိ စီၤၡမူၤအ့လး တဲပှၤဂီၢ်မုၢ်လၢ “ပျံၤတၢ်တဂ့ၤ. သုမၤ တၢ်အၢတၢ်သီတဖၣ်အံၤ ခဲလၢာ်ဒု မ့ၢ်လံ. ဘၣ်ဆၣ် တဘၣ်ဃၣ်ကွံာ် သုသးလၢ ယဟိဝၤယွၤ အအိၣ်တဂ့ၤ.+ ဘူၣ်ထီၣ်ဘါထီၣ် ယဟိဝၤယွၤလၢ သုသးဒီဖျၢၣ်တက့ၢ်.+ ၂၁ တဘၣ်ဃၣ်ကွံာ် သုသးဒီး လူၤပိာ်ထွဲ တၢ်ကလီကလီ+ လၢအဘျုး တအိၣ်ဘၣ်+ ဒီးလၢအမၤထူၣ်ဖျဲးသု တသ့ဘၣ်အခံတဂ့ၤ. တၢ်သ့ၣ်တဖၣ်န့ၣ် မ့ၢ်ဝဲ တၢ်ကလီကလီလီၤ. ၂၂ လၢညါန့ၣ် ယဟိဝၤယွၤ သးအိၣ် ဒုးကဲထီၣ်သုလၢ အပှၤဂီၢ်မုၢ်+ ဒီးခီဖျိလၢ အမံၤလၢ အဒိၣ်အမုၢ်အဃိ+ ယဟိဝၤယွၤ တပာ်တ့ၢ် အပှၤဂီၢ်မုၢ်ဘၣ်.+ ၂၃ မ့မ့ၢ်ယၤဒု ယကမၤကမၣ် ယဟိဝၤယွၤ ခီဖျိ ယပတုာ် ဃ့ဘါထုကဖၣ် လၢသုဂီၢ်န့ၣ် လ့ၤတက့ၤ ယတမၤဘၣ်. ဒီးယကဆဲး သိၣ်လိနဲၣ်လိသု လၢတၢ်လၢအဂ့ၤ ဒီးအဘၣ်လီၤ. ၂၄ ပျံၤယဟိဝၤယွၤ+ ဒီးဘူၣ်ထီၣ်ဘါထီၣ်အီၤ လၢတၢ်သးတီအပူၤ* လၢသုသးဒီဖျၢၣ်တက့ၢ်. ဒီးသ့ၣ်နီၣ်ထီၣ်က့ၤ တၢ်လၢအလီၤကမၢကမၣ်တဖၣ် လၢကစၢ်ယွၤ မၤတ့ၢ်လၢ သုဂီၢ်တက့ၢ်.+ ၂၅ ဘၣ်ဆၣ် သုမ့ၢ်မၤတၢ်အၢတၢ်သီ လၢတၢ်သူၣ်အိၣ်သးအိၣ် အပူၤန့ၣ် သုဝဲ ဒီးသုစီၤပၤစ့ၢ်ကီး+ ကတုၤလၢ တၢ်ဟးဂီၤအပူၤလီၤ.”+