၂ ကွဲးနီၣ်တၢ်
၂၆ လၢခံ ပှၤဂီၢ်မုၢ်ခဲလၢာ်လၢ ယူဒၤဘီမုၢ်အပူၤန့ၣ် ပာ်ထီၣ်ဝဲ စီၤဧူးစံယါ*+ လၢစီၤပၤ လၢအပၢ် စီၤအမၤစယါ အလီၢ်န့ၣ်လီၤ.+ ဖဲန့ၣ်အခါ စီၤဧူးစံယါ အသးနံၣ်အိၣ်ဝဲ ၁၆ နံၣ်လီၤ. ၂ ဖဲစီၤပၤ အမၤစယါ သံဝဲဒ် အမိၢ်ပၢ်ဖံဖု လၢပျၢၤတဖၣ်အသိး+ ဝံၤအလီၢ်ခံ စီၤဧူးစံယါ မၤန့ၢ်က့ၤ ဝ့ၢ်အ့လိး+ လၢယူဒၤဘီမုၢ်အဂီၢ် ဒီးတ့ထီၣ်ကဒါက့ၤဝဲလီၤ. ၃ ဖဲစီၤဧူးစံယါ+ ကဲထီၣ် စီၤပၤအခါ အသးနံၣ်အိၣ်ဝဲ ၁၆ နံၣ် ဒီးအဝဲပၢဘၣ်တၢ်လၢ ဝ့ၢ်ယရူၤၡလ့ၣ်အပူၤ ၅၂ နံၣ်လီၤ. အမိၢ်မ့ၢ်ဝဲ နီၢ်ယကိးလယၤ လၢအအိၣ်လၢ ဝ့ၢ်ယရူၤၡလ့ၣ်န့ၣ်လီၤ.+ ၄ စီၤဧူးစံယါ ဆဲးမၤတၢ်လၢ ယဟိဝၤယွၤ ထံၣ်ဝဲလၢအဂ့ၤ ဒ်အပၢ် စီၤအမၤစယါ မၤတ့ၢ်ဝဲအသိးလီၤ.+ ၅ စီၤစကၤရယၤ မ့ၢ်ပှၤတဂၤလၢ အသိၣ်လိအီၤ တၢ်ပျံၤယွၤ ဒီးဖဲစီၤစကၤရယၤ အိၣ်မူဒံးအခါ စီၤဧူးစံယါ ဃုကစၢ်ယွၤထီဘိလီၤ. ဖဲအဝဲဃု ယဟိဝၤယွၤ အဆၢကတီၢ်န့ၣ် ယွၤလၢ အမ့ၢ်အတီတဂၤ ဆိၣ်ဂ့ၤအီၤလီၤ.+
၆ စီၤဧူးစံယါ လဲၤထီၣ်ဒုးဝဲ ပှၤဖလ့ၡသးဖိတဖၣ်+ ဒီးအဝဲမၤနၢၤကွံာ် ဝ့ၢ်ကၤသး,+ ဝ့ၢ်ယၤဘန့+ ဒီးဝ့ၢ်အၤစဒိာ်လီၤ.+ ဝံၤဒီး အဝဲသူၣ်ထီၣ် ဝ့ၢ်တဖၣ်လၢအအိၣ်ဘူးဒီး ဝ့ၢ်အၤစဒိာ် ဒီးလၢပှၤဖလ့ၡသးဖိ အတၢ်လီၢ်အဂၤတဖၣ် အပူၤလီၤ. ၇ ဒီးယွၤလၢအမ့ၢ်အတီတဂၤ ဆဲးမၤစၢၤအီၤ ဒ်သိးအကဒုးဝဲ ပှၤဖလ့ၡသးဖိ, ပှၤဧ့ရ့းဖိ+ လၢအအိၣ်လၢ ကူၢ်ဘဧၤလး ဒီးပှၤမူနးဖိလီၤ. ၈ ပှၤဧၣ်မိၣ်ဖိ+ ဟ့ၣ်စီၤဧူးစံယါ လၢတၢ်ခိတၢ်သွဲလီၤ. စီၤဧူးစံယါ အစိကမီၤဒိၣ်ထီၣ်ဝဲ ဒိၣ်မးအဃိ အမံၤလၤသၣ်ကပီၤ ရၤလီၤအသးတုၤလၢ ကီၢ်အဲၤကူပတူးလီၤ. ၉ တကးဒံးဘၣ် စီၤဧူးစံယါ တ့ထီၣ်တၢးလၢ+ အကျၢၤတဖၣ်လၢ ဝ့ၢ်ယရူၤၡလ့ၣ်အပူၤ လၢအဘူးဒီး တၢ်သနၢၣ်အတြဲၤ,+ တၢ်တြီၤအတြဲၤ+ ဒီးဖဲဝ့ၢ်အဒူၣ် အထူၣ်လီၤ. ၁၀ ဒီးမ့ၢ်လၢ အဝဲသူၣ်အီၣ်ဖျးအီၣ်တၢ်မုာ်အဃိ အဝဲတ့ထီၣ်ဝဲ တၢးတဖၣ်လၢ+ ပှၢ်မုၢ်ကနၢအပူၤ ဒီးခူၣ်ဝဲ ထံကမါ ဒီဒူၣ် (မ့ၢ်လၢ အဆၣ်ဖိကီၢ်ဖိ အိၣ်ဝဲဒီဒူၣ်အဃိ) လီၤ. တကးဒံးဘၣ် လၢၡ့ဖလၣ် ဒီးတၢ်ပၢၤခိၣ်စ့ၢ်ကီး အဝဲမၤဝဲဒ်န့ၣ်လီၤ. အဝဲအိၣ်ဒီး အပှၤမၤစံာ်ဖိ ဒီးအပှၤမၤစပံးကျီးဖိတဖၣ် လၢကစၢၢ်ကလိကျါ ဒီးလၢကၢ်မ့ၤလးအပူၤလီၤ.
၁၁ စီၤဧူးစံယါ အိၣ်ဒီး အသုးမုၢ် လၢအအိၣ်ကတဲာ်ကတီၤအသးလၢ ကဒုးတၢ်အဂီၢ်လီၤ. ဒီးသုးဖိတဖၣ်အံၤ ဟးဒုးတၢ် ဒ်အဝဲသ့ၣ် အသုးက့အိၣ်ဝဲအသိးလီၤ. နဲၣ်ရွဲၣ်စီၤယံၤအ့လး+ ဒီးပဒိၣ် စီၤမၤစ့ယၤလၢ အအိၣ်လၢ စီၤပၤအပဒိၣ်ဖးဒိၣ် စီၤဃနၤနယၤ အတၢ်တီခိၣ်ရိၤမဲအဖီလာ်န့ၣ် ဂံၢ်ဝဲ သုးဖိတဖၣ်အံၤ ဒီးထၢအဝဲသ့ၣ်အမံၤလီၤ.+ ၁၂ ဒူၣ်ဖိထၢဖိ အခိၣ်အနၢ်လၢ အတီခိၣ်ရိၤမဲဝဲ ပှၤသုးဖိလၢ အဂံၢ်ဆူၣ်ဘါဆူၣ်တဖၣ်န့ၣ် အိၣ်ဝဲအဂၤ ၂,၆၀၀ လီၤ. ၁၃ လၢအဝဲသ့ၣ် အတၢ်တီခိၣ်ရိၤမဲ အဖီလာ်န့ၣ် ပှၤသုးဖိလၢ အအိၣ် ကတဲာ်ကတီၤပာ်စၢၤအသးလၢ ကဒုးတၢ်အဂီၢ်န့ၣ် အိၣ်ဝဲအဂၤ ၃၀၇,၅၀၀ လီၤ. အဃိ အဝဲသ့ၣ် မ့ၢ်ဝဲ သုးမုၢ်လၢ အဂံၢ်ဆူၣ်ဘါဆူၣ်တဒူၣ်လၢ ကဆီၣ်ထွဲ စီၤပၤ ဒီးတြီဆၢဒုၣ်ဒါတဖၣ်လီၤ.+ ၁၄ စီၤဧူးစံယါ ကတဲာ်ကတီၤန့ၢ်ဝဲ သုးမုၢ်ဒီတဖုလၢ ကတီၤ, ဘီဖးထီ,+ ခိၣ်ဖျီၣ်သုး, ဆ့ကၤသုး,+ ချံၣ် ဒီးလၢၢ်တဖၣ်လၢ အဝဲသ့ၣ်ကွံာ်ဝဲဒီး နီၣ်ဘျုးလီၤ.+ ၁၅ လၢဝ့ၢ်ယရူၤၡလ့ၣ်အပူၤ ပှၤမၤတၢ်သ့ဂ့ၤဂ့ၤတဖၣ် ဒုးအိၣ်ထီၣ် တၢ်အက့ၢ်အဂီၤဝံၤဒီး စီၤဧူးစံယါ တ့ထီၣ် တၢ်ပီးတၢ်လီတဖၣ်လၢ အခးပျၢ် ဒီးကွံာ်လၢၢ်ဖးဒိၣ်တဖၣ် သ့ဝဲလီၤ. ဒီးပှၤပာ်လီၤဝဲလၢ တၢးတဖၣ်အဖီခိၣ်+ ဒီးလၢတၢ်ဒူၣ်အသနၢၣ်တဖၣ် အဖီခိၣ်လီၤ. အဃိ အမံၤဟူသၣ်ဖျါ သကုၤဆးဒး ဒီးအဝဲဒိးန့ၢ်ဘၣ် တၢ်မၤစၢၤအါအါဂီၢ်ဂီၢ် ဒီးအစိအကမီၤဒိၣ်ထီၣ်ဝဲလီၤ.
၁၆ ဘၣ်ဆၣ် ဖဲအစိအကမီၤ ဟဲဒိၣ်ထီၣ်ဝဲအခါ အဝဲပာ်ထီၣ်ထီအသး ဒီးအတၢ်ပာ်ထီၣ်ထီသးန့ၣ် ဆှၢအီၤလၢ တၢ်ဟးဂီၤလီၤ. အဝဲမၤကမၣ် အကစၢ်ယဟိဝၤယွၤ ခီဖျိ အလဲၤနုာ်လီၤလၢ ယဟိဝၤယွၤ အတၢ်လုၢ်ဟံၣ်ပူၤ ဒ်သိးကဒွဲၣ်အူထီၣ် တၢ်နၢမူလၢ တၢ်လုၢ်လီၢ်လၢ တၢ်ဒွဲၣ်ထီၣ် တၢ်နၢမူအလီၢ်န့ၣ်လီၤ.+ ၁၇ တဘျီဃီန့ၣ် ယဟိဝၤယွၤ အပှၤလုၢ်တၢ်ဒိၣ် စီၤဧစၤရယၤ ဒီးပှၤလုၢ်တၢ်ဒိၣ်လၢ အအိၣ်ဒီး တၢ်သူၣ်ဒူသးဒူ အဂၤ ၈၀ န့ၣ်လဲၤလူၤအီၤလီၤ. ၁၈ အဝဲသ့ၣ် လဲၤတြီ စီၤဧူးစံယါ ဒီးတဲအီၤလၢ “စီၤဧူးစံယါဧၢ, နတကြၢး ဒွဲၣ်ထီၣ်တၢ်နၢမူလၢ ယဟိဝၤယွၤအအိၣ်ဘၣ်.+ ထဲဒၣ် ပှၤလုၢ်တၢ်ဒိၣ်တဖၣ် ကြၢးဒွဲၣ်ထီၣ် တၢ်နၢမူ မ့ၢ်လၢအဝဲသ့ၣ် မ့ၢ်စီၤအၤဟရိၣ် အစၢၤအသွဲၣ်+ ဒီးကစၢ်ယွၤ ပာ်စီဆှံ အဝဲသ့ၣ် အဃိလီၤ. ဟးထီၣ်ကွံာ်လၢ တၢ်စီဆှံအလီၢ်သၢၤ. နမၤကမၣ်တၢ်လံ ဒီးနမၤတၢ်ဒ်အံၤန့ၣ် တမ့ၢ်လၢ နကန့ၢ်ဘၣ် တၢ်လၤကပီၤလၢ ယဟိဝၤယွၤအအိၣ်ဘၣ်.”
၁၉ ဘၣ်ဆၣ် စီၤဧူးစံယါလၢ အစိာ်ဝဲတၢ်ဒွဲၣ်ထီၣ် တၢ်နၢမူအဒၢ ဒ်သိးအကဒွဲၣ်တၢ်နၢမူအဂီၢ်န့ၣ် သးပှံၢ်ထီၣ်တၢ်လီၤ.+ ဒီးဖဲအသးပှံၢ်ထီၣ် ပှၤလုၢ်တၢ်ဒိၣ်တဖၣ်အခါ တၢ်ဆါအၢ+ ဟဲအိၣ်ထီၣ်လၢ အမဲာ်တူၢ်ခိၣ်အလိၤလီၤ. တၢ်ကဲထီၣ်အသးဒ်အံၤလၢ ပှၤလုၢ်တၢ်ဒိၣ်တဖၣ် အမဲာ်ညါလၢ ယဟိဝၤယွၤအဟံၣ်ပူၤ ဘူးဒီးတၢ်လုၢ်လီၢ်လၢ တၢ်ဒွဲၣ်ထီၣ် တၢ်နၢမူအဂီၢ်လီၤ. ၂၀ ဖဲပှၤလုၢ်တၢ်ဒိၣ်အခိၣ် စီၤဧစၤရယၤ ဒီးပှၤလုၢ်တၢ်ဒိၣ်အဂၤတဖၣ် ကွၢ်ဃီၤစီၤဧူးစံယါအခါ အဝဲသ့ၣ် ထံၣ်ဝဲလၢ တၢ်ဆါအၢ အိၣ်ထီၣ်လၢ အမဲာ်တူၢ်ခိၣ်အလိၤလီၤ. အဃိ အဝဲသ့ၣ် ကရီဒုးဟးထီၣ်ကွံာ်အီၤ ဒီးအဝဲစ့ၢ်ကီး ကရီဟးထီၣ်ဝဲ မ့ၢ်လၢ ယဟိဝၤယွၤ တီၢ်အီၤအဃိလီၤ.
၂၁ စီၤဧူးစံယါ ကဲဝဲ ပှၤဘၣ်တၢ်ဆါအၢ တုၤလၢ အသံတစုလီၤ. ဒ်အမ့ၢ် ပှၤဘၣ်တၢ်ဆါအၢအသိး+ တၢ်တဟ့ၣ်အခွဲးလၢ အဝဲကလဲၤလၢ ယဟိဝၤယွၤ အဟံၣ်ဘၣ်. အဃိ အဝဲအိၣ်လၢ ဟံၣ်လီၤလီၤဆီဆီ တဖျၢၣ်အပူၤလီၤ. ဒီးအဖိခွါ စီၤယိၤသၣ် တီခိၣ်ရိၤမဲတၢ်လၢ စီၤပၤအနီပူၤ ဒီးစံၣ်ညီၣ်န့ၢ်တၢ်လၢ ပှၤအိၣ်လၢ ကီၢ်ပူၤတဖၣ်အဂီၢ်လီၤ.+
၂၂ မ့မ့ၢ် စီၤဧူးစံယါ အဂ့ၢ်လၢအဂၤတဖၣ် စးထီၣ်လၢအခီၣ်ထံး တုၤလၢအကတၢၢ်န့ၣ် ဘၣ်တၢ်ကွဲးလီၤအီၤလၢ စီၤအၤမိး အဖိခွါ ဝံယၡါယၤ အတၢ်ကွဲးနီၣ်ကွဲးဃါအပူၤလီၤ.+ ၂၃ ဒီးစီၤဧူးစံယါ သံဝဲဒ် အမိၢ်ပၢ်ဖံဖု လၢပျၢၤတဖၣ်အသိးလီၤ. ဒီးမ့ၢ်လၢပှၤတဲဝဲလၢ “အဝဲမ့ၢ်ပှၤဘၣ်တၢ်ဆါအၢ” အဃိ ပှၤခူၣ်လီၤကွံာ်အီၤလၢ တၢ်ပျီတဘ့ၣ် လၢအဘူးဒီး အမိၢ်ပၢ်ဖံဖု လၢပျၢၤတဖၣ် အတၢ်သွၣ်ခိၣ် လၢအမ့ၢ်စီၤပၤတဖၣ် အတၢ်လီၢ်န့ၣ်လီၤ. ဒီးအဖိခွါ စီၤယိၤသၣ်+ ကဲထီၣ်စီၤပၤ လၢအလီၢ်လီၤ.