၁ ၡမူၤအ့လး
၁၈ ဖဲစီၤဒၤဝံး တဲတၢ်ဒီး စီၤစီလူးဝံၤဒီး စီၤယိနၤသၣ်+ အသးစဲဘူးဒီး စီၤဒၤဝံးလီၤ. အဝဲသ့ၣ် ကဲထီၣ်တံၤသကိး ဘူးဘူးတံၢ်တံၢ် ဒီးစီၤယိနၤသၣ် အဲၣ်အီၤဒ် အအဲၣ်လီၤ အနီၢ်ကစၢ်အသးလီၤ.+ ၂ စးထီၣ်ဖဲ တၢ်တနံၤန့ၣ် စီၤစီလူး မၢစီၤဒၤဝံးအိၣ်တ့ၢ်ဒီးအီၤ ဒီးအဝဲတပျဲက့ၤ စီၤဒၤဝံးလၢ အပၢ်အဟံၣ်လၢၤဘၣ်.+ ၃ ဒီးမ့ၢ်လၢ စီၤယိနၤသၣ် အဲၣ်စီၤဒၤဝံး ဒ်အအဲၣ်လီၤ အနီၢ်ကစၢ်အသးအဃိ+ အဝဲသ့ၣ် မၤဝဲတၢ်အၢၣ်လီၤအီလီၤလီၤ.+ ၄ စီၤယိနၤသၣ် ဘ့ၣ်လီၤ အဆ့ကၤလၢ အစုဒုၣ်တအိၣ်ဘၣ်တဘ့ၣ် ဒီးဟ့ၣ်လီၤဝဲ စီၤဒၤဝံး ဃုာ်ဒီး အဆ့ကၤသုး, အနး, အချံၣ် ဒီးအယီၢ်တကိးလီၤ. ၅ စီၤဒၤဝံး စးထီၣ်ဟးဒုးတၢ်လီၤ. ဒီးဖဲစီၤစီလူး ဆှၢလီၤ စီၤဒၤဝံးတပူၤဂ့ၤ တပူၤဂ့ၤန့ၣ် တၢ်လၢ စီၤဒၤဝံးမၤဝဲန့ၣ် ကဲထီၣ်လိၣ်ထီၣ်လီၤ.+ အဃိ စီၤစီလူး ပာ်ထီၣ်အီၤလၢ အသုးဖိအခိၣ်+ ဒီးပှၤအံၣ်စရ့လးဖိ ဃုာ်ဒီး စီၤစီလူး အခ့အပှၤခဲလၢာ် ဘၣ်သူၣ်ဘၣ်သးဝဲလီၤ.
၆ ဖဲစီၤဒၤဝံး ဒီးသုးဖိလၢ အအိၣ်ဒီးအီၤတဖၣ် မၤသံပှၤဖလ့ၡသးဖိ ဝံၤဒီးဟဲက့ၤဝဲအခါ ပိာ်မုၣ်တဖၣ်လၢ အအိၣ်လၢ အံၣ်စရ့လးအဝ့ၢ်ခဲလၢာ်အပူၤ ဟဲထီၣ်စိာ်ဃုာ်ဒီး တၢ်ခြ့ခြ့တဖၣ်+ ဒ်သိးအကသဂၢၢ် စီၤပၤစီလူးအဂီၢ် ဒီးအဝဲသ့ၣ် ဂဲၤကလံၣ် ဒီးသးဝံၣ်တၢ်လီၤ.+ ဒီးအဝဲသ့ၣ် ပှဲၤဒီးတၢ်သးခု ဒီးဒ့ဝဲတနၢ်တဖၣ်လီၤ. ၇ ပိာ်မုၣ်လၢ အမၤတၢ်သူၣ်ဖှံသးညီတဖၣ် သးဝံၣ်ဝဲလၢ
“စီၤစီလူး မၤသံ ပှၤလၢအကထိတဖၣ်,
မ့မ့ၢ် စီၤဒၤဝံးန့ၣ် မၤသံ ပှၤလၢ အကလးတဖၣ်လီၤ.”+
၈ အဃိ စီၤစီလူး သးပှံၢ်ထီၣ်တၢ်ဒိၣ်မး+ ဒီးတဘၣ်သူၣ်ဘၣ်သးဝဲ တၢ်သးဝံၣ်တဖျၢၣ်န့ၣ်ဘၣ်. ဒီးအဝဲတဲဝဲလၢ “အဝဲသ့ၣ် တဲဝဲလၢ စီၤဒၤဝံး အမၤသံ ပှၤလၢအကလးတဖၣ်, မ့မ့ၢ်ယၤန့ၣ် အဝဲသ့ၣ် တဲဝဲ ထဲအကထိတဖၣ်လီၤ. လၢခံ အဝဲသ့ၣ် ကဘၣ်သး ဒုးကဲထီၣ်အီၤလၢ စီၤပၤလီၤ.”+ ၉ စးထီၣ်ဖဲ တၢ်တနံၤန့ၣ် စီၤစီလူး တနာ်န့ၢ် စီၤဒၤဝံးလၢၤဘၣ်.
၁၀ လၢခံတသီ ကစၢ်ယွၤ ပျဲဝဲလၢ စီၤစီလူး အတၢ်ပာ်သူၣ်ပာ်သး ကအၢထီၣ်*+ ဒီးဖဲစီၤဒၤဝံး ဒ့တနၢ်+ ဒ်အမၤညီနုၢ်ဝဲအသိးအခါ စီၤစီလူး မၤထီၣ်အသး ဒ်ပှၤပျုၢ်တဂၤအသိး* လၢဟံၣ်ပူၤလီၤ. ဒီးစီၤစီလူး အိၣ်ဒီးဘီတဘ့ၣ် လၢအစုပူၤလီၤ.+ ၁၁ ဒီးစီၤစီလူး တဲလီၤအသးလၢ ‘ယကကွံာ်ဆဲး စီၤဒၤဝံးဒီးဘီ လၢတၢ်ဒူၣ်ကပၤလီၤ.’ ဒီးအဝဲကွံာ်ဆဲးစီၤဒၤဝံး လၢဘီ+ ဘၣ်ဆၣ် စီၤဒၤဝံး ပလဲၤအသး* လၢအီၤ ခံဘျီလီၤ. ၁၂ ဒီးမ့ၢ်လၢ ယဟိဝၤယွၤ အိၣ်ဒီးစီၤဒၤဝံး+ ဒီးအတအိၣ်ဒီး စီၤစီလူး လၢၤဘၣ်အဃိ+ စီၤစီလူး ပျံၤဝဲစီၤဒၤဝံးလီၤ. ၁၃ အဃိ စီၤစီလူး တပျဲစီၤဒၤဝံး မၤတၢ်လၢ အမဲာ်ညါလၢၤဘၣ် ဒီးအပာ်ထီၣ်အီၤလၢ သုးဖိတကထိအခိၣ်လီၤ. ဒီးစီၤဒၤဝံး တီခိၣ်ရိၤမဲဝဲ သုးမုၢ်လၢ တၢ်ဒုးပျီပူၤလီၤ.+ ၁၄ တၢ်လၢ စီၤဒၤဝံးမၤဝဲ ခဲလၢာ်န့ၣ် ကဲထီၣ်လိၣ်ထီၣ်ဝဲ+ ဒီးယဟိဝၤယွၤ အိၣ်ဒီးအီၤလီၤ.+ ၁၅ ဖဲစီၤစီလူး ထံၣ်ဘၣ်ဝဲလၢ စီၤဒၤဝံးမၤတၢ် ကဲထီၣ်လိၣ်ထီၣ်ဝဲဒိၣ်မးအခါ စီၤစီလူး ပျံၤအီၤ ဒိၣ်ထီၣ်လီၤ. ၁၆ မ့မ့ၢ် ပှၤလၢယူဒၤအဒူၣ်ကျါ ဒီးပှၤအံၣ်စရ့လးဖိအဂၤခဲလၢာ်န့ၣ် အဲၣ်ဝဲ စီၤဒၤဝံး, မ့ၢ်လၢ အတီခိၣ်ရိၤမဲ အဝဲသ့ၣ် လၢတၢ်ဒုးပျီပူၤအဃိလီၤ.
၁၇ လၢခံ စီၤစီလူး တဲစီၤဒၤဝံးလၢ “အဝဲအံၤ မ့ၢ်ယဖိမုၣ်အဒိၣ်ကတၢၢ် နီၢ်မ့ရ့ာ်+ ဒီးယကဟ့ၣ်လီၤနၤ ဒ်သိးအကကဲထီၣ် နမါအဂီၢ်လီၤ.+ ဘၣ်ဆၣ် နကဘၣ် ဆဲးပာ်ဖျါထီၣ် တၢ်သးဒူလၢယဂီၢ် ဒီးဒုးတၢ်လၢ ယဟိဝၤယွၤ အတၢ်ဒုးတဖၣ် အပူၤလီၤ.”+ ဘၣ်ဆၣ် အနီၢ်ကီၢ်န့ၣ် စီၤစီလူး တဲလီၤအသးလၢ ‘ယမးတလိၣ်မၤသံ စီၤဒၤဝံးဘၣ်. ပှၤဖလ့ၡသးဖိ ကမၤသံအီၤဒၣ်ခီ.’+ ၁၈ ဖဲန့ၣ်ဒီး စီၤဒၤဝံး တဲဘၣ် စီၤစီလူးလၢ “ယကဲထီၣ် စီၤပၤအမာ် ကသ့ဒ်လဲၣ်. လၢအံၣ်စရ့လးအပူၤ ယၤမ့ၢ်ဂ့ၤ ယပၢ်အဒူၣ်ဖိထၢဖိမ့ၢ်ဂ့ၤ တမ့ၢ်ပှၤလၢအရ့ဒိၣ်ဘၣ်.”+ ၁၉ ဘၣ်ဆၣ် ဖဲဆၢကတီၢ် ဘၣ်လၢ စီၤစီလူး ကဟ့ၣ်လီၤအဖိမုၣ် နီၢ်မ့ရ့ာ် ဒ်သိးအကကဲထီၣ် စီၤဒၤဝံးအမါ အဂီၢ်အခါ အဟ့ၣ်လီၤပာ်စၢၤအီၤလၢ ပှၤမဃိလးဖိ စီၤဧ့ဒြၤအ့လး+ ဒ်သိးအကကဲထီၣ် အမါအဂီၢ်လီၤ.
၂၀ စီၤစီလူး အဖိမုၣ် နီၢ်မံကၤလးန့ၣ်+ အဲၣ်ဘၣ်ဝဲ စီၤဒၤဝံးလီၤ. ဒီးပှၤတဲဘၣ် စီၤစီလူး ဒီးစီၤစီလူး ဘၣ်သူၣ်ဘၣ်သးဝဲလီၤ. ၂၁ ဒီးစီၤစီလူး တဲလီၤအသးလၢ “ယကဟ့ၣ်လီၤအီၤလၢ စီၤဒၤဝံး ဒ်သိးအကကဲထီၣ် ပျံၤသကွီၤလၢအဂီၢ် ဒီးပှၤဖလ့ၡသးဖိ မၤသံအီၤ ကန့ၢ်ဝဲလီၤ.”+ ဝံၤဒီးစီၤစီလူး တဲစီၤဒၤဝံးတဘျီကဒီးလၢ “ခဲအံၤ နကကဲထီၣ်ယမာ်လီၤ.” ၂၂ တကးဒံးဘၣ် စီၤစီလူး မၤလိာ် အခ့အပှၤတဖၣ်လၢ “လဲၤတဲခူသူၣ် စီၤဒၤဝံးလၢ ‘စီၤပၤ ဘၣ်သူၣ်ဘၣ်သးနၤ ဒီးအခ့အပှၤခဲလၢာ် အဲၣ်နၤလီၤ. အဃိခဲအံၤ ကဲထီၣ် စီၤပၤအမာ်မီၤ.’” ၂၃ ဖဲစီၤစီလူး အခ့အပှၤတဖၣ် တဲဘၣ် စီၤဒၤဝံး တၢ်ဂ့ၢ်တဖၣ်အံၤအခါ စီၤဒၤဝံးတဲဝဲလၢ “ယမ့ၢ်ပှၤဖှီၣ်ဖိယာ်ဖိ ဒီးပှၤလၢ အတလီၤပာ်ကဲဘၣ် တဂၤအဃိ ယကကဲထီၣ် စီၤပၤအမာ်န့ၣ် သုဆိကမိၣ်လၢ အမ့ၢ်တၢ်ညီညီဖိလီၤဧါ.”+ ၂၄ ဒီးစီၤစီလူး အခ့အပှၤ က့ၤတဲဘၣ်အီၤလၢ စီၤဒၤဝံး အတၢ်ကတိၤတဖၣ်န့ၣ်လီၤ.
၂၅ ဒီးစီၤစီလူး တဲဝဲလၢ “သုကဘၣ် တဲစီၤဒၤဝံးဒ်အံၤ, ‘ဒ်သိးစီၤပၤ ကဟ့ၣ်ကၣ်က့ၤ အဒုၣ်အဒါတဖၣ်အဂီၢ် စီၤပၤ လီကီထဲဒၣ် ပှၤဖလ့ၡသးဖိ အဂၤ ၁၀၀ အတၢ်အခိၣ်ဖံးလီၤ.+ စီၤပၤ တလီကီ တလးမူးပိာ်မုၣ်အပှ့ၤ+ လၢအဂၤ နီတမံၤဘၣ်.’” ဘၣ်ဆၣ် အနီၢ်ကီၢ်န့ၣ် မ့ၢ်ဒၣ် စီၤစီလူး ကူၣ်ထီၣ်ဖးလီၤဝဲ ဒ်သိး ပှၤဖလ့ၡသးဖိ ကမၤသံစီၤဒၤဝံး အဂီၢ်လီၤ. ၂၆ ဒီးစီၤစီလူး အခ့အပှၤတဖၣ် လဲၤတဲဘၣ် စီၤဒၤဝံး တၢ်ကတိၤတဖၣ်န့ၣ် ဒီးစီၤဒၤဝံး ဘၣ်သူၣ်ဘၣ်သးလၢ အကကဲထီၣ် စီၤပၤအမာ်လီၤ.+ တချုးလၢ တၢ်ဆၢကတီၢ်လၢ တၢ်ပာ်ပနီၣ်အီၤ ဘၣ်ဒံးဘၣ်န့ၣ် ၂၇ စီၤဒၤဝံး ဒီးအပှၤတဖၣ် မၤသံဝဲ ပှၤဖလ့ၡသးဖိ အဂၤ ၂၀၀ ဒီးဒ်သိး စီၤဒၤဝံး ကကဲထီၣ်ဘၣ် စီၤပၤအမာ်အဂီၢ် အဝဲဟဲက့ၤစိာ်န့ၢ် စီၤပၤလၢ ပှၤဖလ့ၡသးဖိ အဂၤ ၂၀၀ အတၢ်အခိၣ်ဖံးလီၤ. အဃိ စီၤစီလူး ဟ့ၣ်စီၤဒၤဝံးလၢ အဖိမုၣ် နီၢ်မံကၤလး ဒ်သိးအကကဲထီၣ် အမါအဂီၢ်လီၤ.+ ၂၈ စီၤစီလူး သ့ၣ်ညါဘၣ်ဝဲလၢ ယဟိဝၤယွၤ အိၣ်ဒီး စီၤဒၤဝံး+ ဒီးအဖိမုၣ် နီၢ်မံကၤလး အဲၣ်စီၤဒၤဝံးလီၤ.+ ၂၉ အဃိ စီၤစီလူး ပျံၤစီၤဒၤဝံး ဒိၣ်န့ၢ်အလီၢ် ဒီးစးထီၣ်ဖဲန့ၣ် စီၤစီလူး ကဲထီၣ်ဝဲ စီၤဒၤဝံး အဒုၣ်အဒါ လၢအတၢ်အိၣ်မူ ဒီတစိၤညါလီၤ.+
၃၀ ပှၤဖလ့ၡသးဖိ အခိၣ်အနၢ်တဖၣ် လဲၤထီၣ်ဒုးတၢ် ဘၣ်ဆၣ် ဖဲအဝဲသ့ၣ်လဲၤဒုးတၢ် တဘျီဂ့ၤ တဘျီဂ့ၤအခါ စီၤဒၤဝံး မၤနၢၤအဝဲသ့ၣ် အါန့ၢ်ဒံး စီၤစီလူး အခ့အပှၤတဖၣ် မၤနၢၤအဝဲသ့ၣ်လီၤ.+ ဒီးပှၤပာ်ကဲ စီၤဒၤဝံး ဒိၣ်မးလီၤ.+