ယၤကိာ်
၅ ကနၣ်လၢအံၤ ပှၤထူးပှၤတီၤသ့ၣ်ဧၢ, ဟီၣ်တၢ်ယၢၤတၢ်လၢ တၢ်နးတၢ်ဖှီၣ်တဖၣ်လၢ အကဟဲဘၣ်သု အဃိတက့ၢ်.+ ၂ သုတၢ်ထူးတၢ်တီၤတဖၣ်န့ၣ် အုၣ်သံကျၣ်သံကွံာ်လံ ဒီးသုတၢ်ကူတၢ်သိးတဖၣ်န့ၣ် တၢ်ဃၢ်အီၣ်ကွံာ်အီၤလံ.+ ၃ သုထူဒီးသုစ့တဖၣ် ထီၣ်အ့ၣ်လၢာ်လံ. ဒီးတၢ်ထီၣ်အ့ၣ်အံၤ ကဲထီၣ်တၢ်အုၣ်အသးလၢ အထီဒါသု ဒီးကအီၣ်ကွံာ်သုလီၤ. တၢ်လၢသုပာ်ဖှိၣ်အီၤတဖၣ်န့ၣ် ကမၤအသးဒ်မ့ၣ်အူ လၢမုၢ်နံၤခံကတၢၢ်တဖၣ် အပူၤလီၤ.+ ၄ ကနၣ်မီၤ, ပှၤမၤတၢ်ဖိလၢ အကူးတၢ်လၢ သုစံာ်ပျီပူၤတဖၣ်လၢ သုတဟ့ၣ်လီၤအီၤ အဘူးအလဲဘၣ်န့ၣ် ဆဲးကိးပသူထီၣ်ဒံးလီၤ. ဒီးပှၤကူးတၢ်ဖိတဖၣ် အတၢ်ကိးပသူထီၣ်လၢ တၢ်မၤစၢၤအဂီၢ်န့ၣ် ဟူသီၣ်တုၤလၢ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ* အနၢ်ပူၤလံ.+ ၅ သုအိၣ်ဘၣ် ဘီၣ်ဘီၣ်ညီညီ ဒီးသုလူၤတၢ်မုာ်တၢ်ပၠီၣ် လၢဟီၣ်ခိၣ်ချၢအံၤလီၤ. သုမၤဘီၣ်ထီၣ်သိထီၣ်သုသး ဒ်ဆၣ်ဖိကီၢ်ဖိလၢ အဘီၣ်ထီၣ်ဝဲတုၤလၢ ပှၤကဒိသံလီၤအီၤ အမုၢ်နံၤအသိးလီၤ.+ ၆ သုစံၣ်ညီၣ် ဒီးသုမၤသံ ပှၤလၢအတီအလိၤတဂၤန့ၣ်လီၤ. အဃိအဝဲထီဒါသုလီၤ.
၇ အဃိ ဒီပုၢ်ဝဲၢ်သ့ၣ်ဧၢ, အိၣ်ဒီးတၢ်ဝံသးစူၤ တုၤလၢ ကစၢ်ဟဲက့ၤ အိၣ်ဒီးပှၤ အဆၢကတီၢ်န့ၣ်တက့ၢ်.+ ပှၤမၤစံာ်ဖိတဂၤ ခိးကွၢ်လၢ်လၢ ဟီၣ်ခိၣ်ကဒုးမဲထီၣ် တၤသၣ်လၢ အလုၢ်ဒိၣ်ပှ့ၤဒိၣ်တဖၣ်လီၤ. ဒီးအဝဲအိၣ်ခိးဝဲလၢ တၢ်ဝံသးစူၤအပူၤ တုၤလၢ တၢ်စူၤလီၤ အဆိကတၢၢ်တတီၤ ဒီးတၢ်စူၤလီၤလၢခံတတီၤန့ၣ် ဟဲတုၤဝဲတစုလီၤ.+ ၈ သုဝဲစ့ၢ်ကီး သုကဘၣ်အိၣ်ဒီး တၢ်ဝံသးစူၤ+ ဒီးမၤဂၢၢ်ကျၢၤထီၣ်သုသး မ့ၢ်လၢ ကစၢ်အတၢ်ဟဲက့ၤအိၣ်ဒီးပှၤ အဆၢကတီၢ်ဘူးထီၣ်လံ.+
၉ ဒီပုၢ်ဝဲၢ်သ့ၣ်ဧၢ, ဒ်သိးသုတဘၣ် တၢ်စံၣ်ညီၣ်တဂ့ၤအဂီၢ်+ ကဒူးကဒ့ၣ်လိာ်သုသးတဂ့ၤ. ကွၢ်မီၤ, ပှၤစံၣ်ညီၣ်ကွီၢ်တဂၤ ဆၢထၢၣ်လၢ တြဲၤအခီၣ်ထံးလံ. ၁၀ ဒီပုၢ်ဝဲၢ်သ့ၣ်ဧၢ, ဝံတဖၣ်လၢအတဲတၢ်လၢ ယဟိဝၤယွၤ အမံၤအပူၤ+ လၢအဘၣ်တၢ်မၤအၢမၤနးအဝဲသ့ၣ်+ ဒီးအအိၣ်ဒီးတၢ်ဝံသးစူၤန့ၣ်+ မၤထွဲဒ်အဝဲသ့ၣ် အဒိအတဲာ်အသိးတက့ၢ်. ၁၁ ပှၤလၢ အတူၢ်ဘၣ်ခီၣ်ဘၣ်တ့ၢ်တၢ်တဖၣ်န့ၣ် ပပာ်ပနီၣ် အဝဲသ့ၣ်လၢ ပှၤလၢအသးခုလီၤ.+ သုနၢ်ဟူဘၣ် စီၤယိၤဘး အတၢ်တူၢ်န့ၢ်ခီၣ်ကဲအဂ့ၢ်+ ဒီးလၢခံကတၢၢ် ယဟိဝၤယွၤ ဆိၣ်ဂ့ၤအီၤန့ၣ် သုသ့ၣ်ညါလီၤ.+ အဃိ သုထံၣ်ဘၣ်လၢ ယဟိဝၤယွၤန့ၣ် ပှဲၤဝဲဒီးတၢ်အဲၣ် တၢ်ကဟုကယာ် ဒီးတၢ်သးကညီၤလီၤ.+
၁၂ ယဒီပုၢ်ဝဲၢ်သ့ၣ်ဧၢ, အရ့ဒိၣ်လၢ သုတဘၣ် အၢၣ်လီၤတၢ်လၢ မူခိၣ်အမဲာ်ညါမ့ၢ်ဂ့ၤ, ဟီၣ်ခိၣ်အမဲာ်ညါမ့ၢ်ဂ့ၤ လၢၤဘၣ်. ဒီးသုတဘၣ်မၤ တၢ်အၢၣ်လီၤအဂၤ တမံၤမံၤလၢၤဘၣ်. ဒ်သိးသုတဘၣ် တၢ်စံၣ်ညီၣ်တဂ့ၤအဂီၢ် သုမ့ၢ်တဲလၢ “အမ့ၢ်” န့ၣ် မၤလၢပှဲၤ သုတၢ်ကတိၤတက့ၢ်. ဒီးသုမ့ၢ်တဲလၢ “တမ့ၢ်ဘၣ်”+ န့ၣ် မၤအီၤဒ်သုတဲအသိးတက့ၢ်.
၁၃ လၢသုကျါန့ၣ် ပှၤဘၣ်ကီဘၣ်ခဲအိၣ် တဂၤဂၤဧါ. မ်အဝဲဆဲး ဃ့ထုကဖၣ်တၢ်တက့ၢ်.+ လၢသုကျါန့ၣ် ပှၤလၢအသူၣ်ဖှံသးညီ အိၣ်တဂၤဂၤဧါ. မ်အသးဝံၣ် ထါစံးထီၣ်ပတြၢၤတဖၣ်တက့ၢ်.+ ၁၄ လၢသုကျါန့ၣ် ပှၤလၢ အဘၣ်ဆူးဘၣ်ဆါ* အိၣ်တဂၤဂၤဧါ. မ်အကိး တၢ်အိၣ်ဖှိၣ်သးပှၢ်တဖၣ်တက့ၢ်.+ မ်အဝဲသ့ၣ် ဃ့ထုကဖၣ်န့ၢ်တၢ်လၢအဂီၢ် ဒီးဖှူအီၤလၢသိ*+ လၢယဟိဝၤယွၤ အမံၤအပူၤတက့ၢ်. ၁၅ ဒီးတၢ်ဃ့ထုကဖၣ်လၢ တၢ်နာ်အပူၤအံၤ ကမၤဘျါက့ၤ ပှၤဆူးပှၤဆါတဂၤ ဒီးယဟိဝၤယွၤ ကဒုးအိၣ်ဆူၣ်အိၣ်ချ့ထီၣ်အီၤလီၤ. ဒီးတၢ်ဒဲးဘးလၢ အမၤတ့ၢ်ဝဲတဖၣ်မ့ၢ်အိၣ်န့ၣ် ကစၢ်ယွၤကပျၢ်ကွံာ်ဝဲလီၤ.
၁၆ အဃိ ဒ်သိးသုကဘျါက့ၤအဂီၢ် အၢၣ်လီၤသုတၢ်ကမၣ်+ တဂၤဒီးတဂၤပျီပျီ ဒီးဃ့ထုကဖၣ်န့ၢ်တၢ်လၢ တဂၤဒီးတဂၤအဂီၢ်တက့ၢ်. ပှၤတီပှၤလိၤတဂၤ အတၢ်ဃ့ကညးန့ၣ် အိၣ်ဒီးအစိအကမီၤလၢ အကမၤစၢၤတၢ်အဂီၢ်လီၤ.+ ၁၇ ဝံအ့ၤလံယၤ မ့ၢ်ပှၤတဂၤလၢ အအိၣ်ဒီးတၢ်တူၢ်ဘၣ် ဒ်ပှၤအသိးလီၤ. ဒီးဖဲအဝဲဃ့ထုကဖၣ်တၢ် လၢတၢ်သူၣ်ဆူၣ်သးဆူၣ်အပူၤ ဒ်သိးတၢ်သုတစူၤတဂ့ၤ အဂီၢ်အခါန့ၣ် တၢ်တဟဲစူၤလီၤလၢ ဟီၣ်ခိၣ်ဘၣ် အိၣ်ဝဲ သၢနံၣ်ဒီးဃုလါညါလီၤ.+ ၁၈ အဝဲဃ့ထုကဖၣ်တၢ် လၢအသီတဘျီ ဝံၤဒီး မူခိၣ်စူၤလီၤ ဒီးဟီၣ်ခိၣ်န့ၣ် ဒုးမဲထီၣ်တၤသူတၤသၣ်လီၤ.+
၁၉ ယဒီပုၢ်ဝဲၢ်သ့ၣ်ဧၢ, ပှၤလၢအအိၣ်လၢ တၢ်မ့ၢ်တၢ်တီအပူၤတဂၤ မ့ၢ်ဘၣ်တၢ်ဆှၢကမၣ်အီၤ ဒီးပှၤတဂၤဂၤ မ့ၢ်ဃၣ်လိၤက့ၤအီၤန့ၣ် ၂၀ သုကဘၣ်သ့ၣ်ညါလၢ ပှၤလၢအဃၣ်လိၤက့ၤ ပှၤတၢ်ဒဲးဘးဖိလၢ အကျဲကမၣ်န့ၣ်+ ကမၤပူၤဖျဲးအီၤလၢတၢ်သံ ဒီးကစၢ်ယွၤကပျၢ်ကွံာ် အတၢ်ဒဲးဘးလၢ အအိၣ်ဝဲ အါအါဂီၢ်ဂီၢ်လီၤ.+