၂ ပ့းတရူး
၁ ယၤ, စီၤၡံမိၣ်ပ့းတရူး လၢအမ့ၢ် ယ့ၣ်ၡူးခရံာ်အကုၢ် ဒီးအတၢ်မၢဖိတဂၤ ကွဲးလံာ်အံၤဆူ ပှၤလၢအအိၣ်ဒီး တၢ်စူၢ်တၢ်နာ်လၢ အလုၢ်ဒိၣ်ပှ့ၤဒိၣ် ပှဲၤသိးဒီး ပတၢ်စူၢ်တၢ်နာ်န့ၣ် အအိၣ်လီၤ. ဒီးပဝဲခဲလၢာ် ပအိၣ်ဒီးတၢ်စူၢ်တၢ်နာ်အံၤ ခီဖျိလၢ ပကစၢ်ယွၤ ဒီးတၢ်အုၣ်က့ၤခီၣ်က့ၤကစၢ် ယ့ၣ်ၡူးခရံာ် မ့ၢ်ပှၤတီပှၤလိၤအဃိလီၤ.
၂ မ်သုဒိးန့ၢ်အါထီၣ် တၢ်သးကညီၤ ဒိၣ်ဒိၣ်မုၢ်မုၢ် ဒီးတၢ်ဃူတၢ်ဖိး ခီဖျိလၢ သုသ့ၣ်ညါကစၢ်ယွၤ ဒီးပကစၢ်ယ့ၣ်ၡူးခရံာ် လီၤတံၢ်လီၤဆဲး အဃိန့ၣ်တက့ၢ်.+ ၃ ခီဖျိကစၢ်ယွၤ အစိကမီၤအဃိ ပဒိးန့ၢ်ဘၣ် တၢ်လၢပလိၣ်ဘၣ်ခဲလၢာ် ဒ်သိးပကအိၣ်မူ ဒီးပကတီဒီးကစၢ်ယွၤအဂီၢ်လီၤ. ပဒိးန့ၢ်ဘၣ် တၢ်သ့ၣ်တဖၣ်န့ၣ် ခီဖျိလၢ ပသ့ၣ်ညါကစၢ်ယွၤ လီၤတံၢ်လီၤဆဲးအဃိလီၤ. အဝဲကိးန့ၢ်ပှၤ+ မ့ၢ်လၢအအိၣ်ဒီး တၢ်လၤကပီၤ ဒီးတၢ်ဂ့ၤတၢ်ဝါအဃိလီၤ. ၄ လၢတၢ်န့ၣ်အဃိ အဝဲဟ့ၣ်လီၤပှၤ တၢ်စံးပာ်တဖၣ်လၢ အဒိၣ်အမုၢ်+ ဒီးအလုၢ်ဒိၣ်ပှ့ၤဒိၣ်လီၤ. ဒီးပကဒိးန့ၢ်ဃုာ် ကစၢ်ယွၤ အလၤကပီၤ ဒ်ပှၤနီၢ်သးဖိတဖၣ်အသိး+ ခီဖျိလၢ တၢ်စံးပာ်တဖၣ်အံၤ အဃိလီၤ. ဒီးအဝဲဟ့ၣ်လီၤပှၤ တၢ်စံးပာ်တဖၣ်အံၤ မ့ၢ်လၢ ပထူၣ်ဖျဲးထီၣ်ကွံာ်လၢ ဟီၣ်ခိၣ် အလုၢ်လၢ်သကဲာ်ပဝးလၢ အအၢအသီလၢ အဟဲအိၣ်ထီၣ်ခီဖျိလၢ တၢ်သူၣ်လီသးကွံလၢ အကမၣ်အဃိလီၤ.
၅ လၢတၢ်ဂ့ၢ်အံၤအဃိ ဂုာ်ကျဲးစၢးလၢ အဂ့ၤကတၢၢ်+ ဒ်သိးသုကအိၣ်ဒီးတၢ်နာ် ဒီးမၤဂ့ၤတၢ်တက့ၢ်.+ ဂုာ်ကျဲးစၢးလၢ အဂ့ၤကတၢၢ် ဒ်သိးသုကအိၣ်ဒီး တၢ်သ့ၣ်ညါ+ ၆ ဒီးတၢ်ပၢၤသူၣ်ပၢၤသးတက့ၢ်.+ ဂုာ်ကျဲးစၢးလၢ အဂ့ၤကတၢၢ် ဒ်သိးသုကအိၣ်ဒီး တၢ်တူၢ်န့ၢ်ခီၣ်ကဲ ဒီးတၢ်သးတီဒီးကစၢ်ယွၤတက့ၢ်.+ ၇ ဒီးဂုာ်ကျဲးစၢးလၢ အဂ့ၤကတၢၢ် ဒ်သိးသုကအိၣ်ဒီး တၢ်အဲၣ်ဒီပုၢ်ဝဲၢ်+ ဒီးတၢ်အဲၣ်ပှၤခဲလၢာ်တက့ၢ်. ၈ တၢ်ဂ့ၤတၢ်ဝါတဖၣ်အံၤ မ့ၢ်အိၣ်လၢသုပူၤဒီး မ့ၢ်အိၣ်ဝဲ အါအါဂီၢ်ဂီၢ်န့ၣ် သုကသၣ်ထီၣ် ဘၣ်ဃး တၢ်သ့ၣ်ညါ ပကစၢ်ယ့ၣ်ၡူးခရံာ် လီၤတံၢ်လီၤဆဲး ဒီးတမ့ၢ်လၢ သုကကဲထီၣ် ပှၤလၢအဆ့ၣ်နီၤအိၣ် ခီလီလီဘၣ်.+
၉ ဒီးပှၤလၢအတအိၣ်ဒီး တၢ်ဂ့ၤတၢ်ဝါတဖၣ်အံၤဘၣ်န့ၣ် မ့ၢ်ပှၤလၢ အမဲာ်တထံၣ်တၢ်ဘၣ် ဒီးဘံၣ်ဃာ်အမဲာ်ဒ်သိး အသုတထံၣ် တၢ်ကပီၤတဂ့ၤ* အဂီၢ်လီၤ.+ ဒီးအဝဲသးပ့ၤနီၣ်ကွံာ်ဝဲလၢ အဘၣ် တၢ်မၤကဆှီထီၣ်ကွံာ်အီၤလၢ အတၢ်ဒဲးဘးလၢ+ အမၤတ့ၢ်ဝဲလၢ အပူၤကွံာ်လီၤ. ၁၀ လၢတၢ်န့ၣ်အဃိ ဒီပုၢ်ဝဲၢ်သ့ၣ်ဧၢ, ဒ်သုမ့ၢ်ပှၤလၢ အဘၣ်တၢ်ကိးန့ၢ်အီၤ+ ဒီးဃုထၢထီၣ်အီၤ တဖၣ်အသိး ဂုာ်ကျဲးစၢးလၢ အဂ့ၤကတၢၢ် ဒ်သိးသုကဆဲး အိၣ်ဒီးတၢ်သးတီ အဂီၢ်တက့ၢ်. သုမ့ၢ်ဆဲးပာ်ဖျါထီၣ် တၢ်ဂ့ၤတၢ်ဝါတဖၣ်အံၤန့ၣ် သုတပာ်တ့ၢ်ကွံာ်တၢ်နာ် နီတဘျီဘၣ်.+ ၁၁ ဒီးသုမ့ၢ်မၤဒ်န့ၣ်န့ၣ် သုကဒိးန့ၢ်ဘၣ် တၢ်ဆိၣ်ဂ့ၤထူးထူးတီၤတီၤ လၢအမ့ၢ် တၢ်ခွဲးတၢ်ယာ်လၢ သုကလဲၤနုာ်လီၤဘၣ်လၢ ပတၢ်အုၣ်က့ၤခီၣ်က့ၤကစၢ် ယ့ၣ်ၡူးခရံာ်+ အဘီမုၢ်အထူအယိာ် အပူၤလီၤ.+
၁၂ လၢတၢ်ဂ့ၢ်အံၤအဃိ သုမ့ၢ်သ့ၣ်ညါ တၢ်ဂ့ၢ်တဖၣ်အံၤလံ ဒီးတၢ်မ့ၢ်တၢ်တီလၢ သုမၤလိဘၣ်တဖၣ်န့ၣ် အမ့ၢ်အိၣ်သူၣ်လီၤအသးလၢ သုပူၤကျၢၤကျၢၤလံ သနာ်က့ ယအဲၣ်ဒိးဒုးသ့ၣ်နီၣ်ထီၣ်သုလၢ တၢ်သ့ၣ်တဖၣ်အံၤ ထီဘိလီၤ. ၁၃ ယဆိကမိၣ်လၢ ဖဲယအိၣ်မူဒံးလၢ ဒဲအံၤ*+ အခါန့ၣ် ယကြၢးထိၣ်ဟူးထိၣ်ဂဲၤထီၣ်သု ခီဖျိလၢ တၢ်ဒုးသ့ၣ်နီၣ်တဖၣ်လီၤ.+ ၁၄ ယသ့ၣ်ညါလၢ တယံာ်လၢၤဘၣ်န့ၣ် ယကဟးထီၣ်ကွံာ်လၢ ယဒဲအံၤအပူၤ ဒ်ပကစၢ်ယ့ၣ်ၡူးခရံာ် ပာ်ဖျါထီၣ်တ့ၢ်န့ၢ်ယၤ အသိးလီၤ.+ ၁၅ အဃိ ယကဂုာ်ကျဲးစၢးလၢ အဂ့ၤကတၢၢ်ထီဘိ ဒ်သိးဖဲယလဲၤပူၤကွံာ် ဝံၤအလီၢ်ခံ သုကသ့ၣ်နီၣ်ထီၣ်က့ၤ တၢ်ဂ့ၢ်တဖၣ်အံၤလၢ သုနီၢ်ကစၢ်လီၤ.
၁၆ ဖဲပဒုးသ့ၣ်ညါသု ဘၣ်ဃးဒီး ပကစၢ်ယ့ၣ်ၡူးခရံာ် အစိကမီၤ ဒီးအကဟဲက့ၤအိၣ်ဒီးပှၤ အဂ့ၢ်အခါ တမ့ၢ်လၢ အဒိးသန့ၤထီၣ်အသးလၢ ပူလၢအကမၣ်တဖၣ်လၢ ပှၤဟီၣ်ခိၣ်ဖိ ထုးထီၣ်ဝဲလၢ အနီၢ်ကစၢ် အတၢ်ကူၣ်သ့အပူၤဘၣ်. လၢတၢ်န့ၣ်အလီၢ် ပမ့ၢ်ပှၤလၢအထံၣ်ဘၣ် ယ့ၣ်ၡူးအလၤကပီၤလၢ ပနီၢ်ကစၢ်အမဲာ်လီၤ.+ ၁၇ ဒီးအဝဲဒိးန့ၢ်ဘၣ် တၢ်ကဟုကညီၢ် ဒီးတၢ်လၤကပီၤလၢ ပၢ်ကစၢ်ယွၤ အအိၣ်လီၤ. တၢ်ကဲထီၣ်အသးဒ်အံၤ ဖဲကစၢ်ယွၤလၢ အလၤကပီၤဒိၣ်တဂၤအံၤ တဲဘၣ်အီၤ တၢ်ကတိၤတဖၣ် လၢအမ့ၢ် “အဝဲ မ့ၢ်ယဖိခွါလၢယအဲၣ် ဒီးယဘၣ်သူၣ်ဘၣ်သးအီၤလီၤ.”+ ၁၈ မ့ၢ်လီၤ, ဖဲပအိၣ်ဒီးအီၤလၢ ကစၢၢ်စီဆှံအလိၤအခါ ပနၢ်ဟူ တၢ်ကတိၤတဖၣ်အံၤ သီၣ်ထီၣ်လၢ မူခိၣ်လီၤ.
၁၉ လၢတၢ်န့ၣ်အဃိ ဝံအတၢ်ကတိၤတဖၣ်န့ၣ် ပနာ်န့ၢ်အီၤ ဒိၣ်ထီၣ်လီၤ. သုကြၢးသးစၢၢ်ဆၢ ဝံအတၢ်ကတိၤတဖၣ်အံၤလီၤ. ဒီးဝံအတၢ်ကတိၤတဖၣ်အံၤ ကဘၣ်လီၤဂာ်ဒ် မ့ၣ်အူဒၢလၢ+ အကပီၤထီၣ်လၢ တၢ်ခံးအလီၢ် လၢအမ့ၢ် သုသးပူၤန့ၣ် တုၤလီၤလၢ မုၢ်ဝါထီၣ် ဒီးဆၣ်တူၢ်ဂီၤ+ ဟဲထီၣ်ဝဲတစုလီၤ. ၂၀ ဒ်သုသ့ၣ်ညါအသိး ဝံအတၢ်စံးပာ်လၢ တၢ်ကွဲးအသးအပူၤန့ၣ် တဟဲအိၣ်ထီၣ် ခီဖျိလၢ ပှၤဟီၣ်ခိၣ်ဖိ အတၢ်ဆိကမိၣ်အဃိ နီတခါဘၣ်. ၂၁ ဒီးဝံအတၢ်စံးပာ် တဟဲအိၣ်ထီၣ် ဖဲဒၣ်ပှၤဟီၣ်ခိၣ်ဖိအသး နီတဘျီဘၣ်.+ ဘၣ်ဆၣ် ပှၤဟီၣ်ခိၣ်ဖိတဖၣ် တဲတၢ်လၢအဟဲလၢ ကစၢ်ယွၤအအိၣ် ဒ်သးစီဆှံ ထိၣ်ဟူးထိၣ်ဂဲၤထီၣ် အဝဲသ့ၣ် အသးအသိးလီၤ.+