၁ ကရံၣ်သူး
၁၁ ကွၢ်လိယၤ ဒ်ယကွၢ်လိ ခရံာ်အသိးတက့ၢ်.+
၂ သုသ့ၣ်နီၣ်ထီၣ်ယၤလၢ တၢ်ခဲလၢာ်အပူၤ ဒီးသုမၤတၢ်ဒ် ယသိၣ်လိနဲၣ်လိသု အသိးအဃိ ယပတြၢၤသုလီၤ. ၃ ဘၣ်ဆၣ် ယအဲၣ်ဒိးလၢ သုကသ့ၣ်ညါလၢ ပိာ်ခွါကိးဂၤဒဲးအခိၣ် မ့ၢ်ခရံာ်,+ ပိာ်မုၣ်အခိၣ် မ့ၢ်ပိာ်ခွါ+ ဒီးခရံာ်အခိၣ်မ့ၢ် ကစၢ်ယွၤလီၤ.+ ၄ ပိာ်ခွါတဂၤဂ့ၤ တဂၤဂ့ၤန့ၣ် ဖဲအဃ့ထုကဖၣ်တၢ် မ့တမ့ၢ် တဲတၢ်ဒ် ဝံအသိးအခါ အဝဲမ့ၢ်ဖၢၣ်အခိၣ်န့ၣ် မ့ၢ်အမၤဟးဂီၤ အခိၣ်အလၤကပီၤလီၤ. ၅ ဘၣ်ဆၣ် ပိာ်မုၣ်တဂၤဂ့ၤ တဂၤဂ့ၤန့ၣ် ဖဲအဃ့ဘါထုကဖၣ်တၢ် မ့တမ့ၢ် တဲတၢ်ဒ် ဝံအသိးအခါ+ အဝဲမ့ၢ်တဖၢၣ် အခိၣ်ဘၣ်န့ၣ် မ့ၢ်အမၤဟးဂီၤ အခိၣ်အလၤကပီၤ, မ့ၢ်လၢအကလီၤဂာ် ဒ်သိးဒီး ပိာ်မုၣ်တဂၤလၢ အလူၤကွံာ် အခိၣ်ဆူၣ်လီၤ. ၆ ပိာ်မုၣ်တဂၤ မ့ၢ်တဖၢၣ် အခိၣ်ဘၣ်န့ၣ် ကြၢးလၢအဝဲတံာ်ကွံာ် အခိၣ်ဆူၣ် ဖုၣ်ဖုၣ်လီၤ. ဘၣ်ဆၣ် ပိာ်မုၣ်တဂၤ မ့ၢ်တံာ်အခိၣ်ဆူၣ် ဖုၣ်ဖုၣ်မ့ၢ်ဂ့ၤ, လူၤအခိၣ်မ့ၢ်ဂ့ၤ အကကဲထီၣ် တၢ်မဲာ်ဆှးလၢအဂီၢ် အဃိ အဝဲကြၢးဖၢၣ်အခိၣ်လီၤ.
၇ ပိာ်ခွါန့ၣ် မ့ၢ်ဝဲကစၢ်ယွၤ အက့ၢ်အဂီၤ+ ဒီးအလၤကပီၤအဃိ အဝဲတကြၢးဖၢၣ် အခိၣ်ဘၣ်. မ့မ့ၢ် ပိာ်မုၣ်န့ၣ် မ့ၢ်ဝဲပိာ်ခွါ အလၤကပီၤလီၤ. ၈ ပိာ်ခွါန့ၣ် တဟဲအိၣ်ထီၣ်ဝဲ ခီဖျိလၢပိာ်မုၣ်ဘၣ်. မ့မ့ၢ်ပိာ်မုၣ်န့ၣ် ဟဲအိၣ်ထီၣ်ဝဲ ခီဖျိလၢပိာ်ခွါလီၤ.+ ၉ တကးဒံးဘၣ် ပိာ်ခွါန့ၣ် ကစၢ်ယွၤတတ့လီၤအီၤလၢ ပိာ်မုၣ်အဂီၢ်ဘၣ်. မ့မ့ၢ်ပိာ်မုၣ်န့ၣ် ကစၢ်ယွၤတ့လီၤအီၤလၢ ပိာ်ခွါအဂီၢ်လီၤ.+ ၁၀ လၢတၢ်ဂ့ၢ်အံၤ ဒီးလၢမူခိၣ်ကလူးတဖၣ်အဃိ+ ပိာ်မုၣ်ကြၢးအိၣ်ဒီး တၢ်ပနီၣ်တမံၤမံၤ လၢအခိၣ်လိၤ ဒ်သိးကပာ်ဖျါထီၣ်ဝဲလၢ အဒိးပၢအသးလၢ တၢ်စိတၢ်ကမီၤ အဖီလာ်လီၤ.
၁၁ တကးဒံးဘၣ် လၢကစၢ် အတၢ်ရဲၣ်တၢ်ကျဲၤအပူၤန့ၣ် ပိာ်ခွါမ့ၢ်တအိၣ်ဘၣ်န့ၣ် ပိာ်မုၣ်တအိၣ်စ့ၢ်ကီးဘၣ်. ဒီးပိာ်မုၣ် မ့ၢ်တအိၣ်ဘၣ်န့ၣ် ပိာ်ခွါ တအိၣ်စ့ၢ်ကီးဘၣ်. ၁၂ ပိာ်မုၣ်န့ၣ် ဟဲအိၣ်ထီၣ်လၢ ပိာ်ခွါလီၤ.+ ဒီးပိာ်ခွါစ့ၢ်ကီး ဟဲအိၣ်ထီၣ်ဝဲခီဖျိလၢ ပိာ်မုၣ်လီၤ. ဘၣ်ဆၣ် တၢ်ခဲလၢာ်န့ၣ် ဟဲအိၣ်ထီၣ်ဝဲခီဖျိလၢ ကစၢ်ယွၤလီၤ.+ ၁၃ ပိာ်မုၣ်တဂၤ ဖဲအဃ့ထုကဖၣ်တၢ်လၢ ကစၢ်ယွၤ အအိၣ်အခါ အဝဲမ့ၢ်တဖၢၣ် အခိၣ်ဘၣ်န့ၣ် မ့ၢ်အကြၢးဧါ. ဆၢတဲာ်လၢ သုနီၢ်ကစၢ်သၢၤ. ၁၄ န့ဆၢၣ်ဒၣ်လဲာ် သိၣ်လိသုလၢ ပိာ်ခွါခိၣ်ဆူၣ်မ့ၢ်ထီန့ၣ် မ့ၢ်တၢ်မဲာ်ဆှးလၢအဂီၢ် တမ့ၢ်ဘၣ်ဧါ. ၁၅ ဘၣ်ဆၣ် ပိာ်မုၣ်တဂၤ အခိၣ်ဆူၣ်မ့ၢ်ထီန့ၣ် မ့ၢ်ဝဲတၢ်လၤကပီၤလၢအဂီၢ် တမ့ၢ်ဘၣ်ဧါ. အခိၣ်ဆူၣ်န့ၣ် တၢ်ဟ့ၣ်လီၤအီၤ လၢတၢ်ဖၢၣ်ခိၣ် အလီၢ်လီၤ. ၁၆ ဘၣ်ဆၣ် ပှၤတဂၤဂၤ မ့ၢ်အဲၣ်ဒိးတဲအါတၢ်ခီဖျိလၢ အဘၣ်သူၣ်ဘၣ်သးဝဲ လုၢ်လၢ်လၢ အဂၤတခါခါအဃိ သနာ်က့ ပဝဲမ့ၢ်ဂ့ၤ, ကစၢ်ယွၤ အတၢ်အိၣ်ဖှိၣ်တဖၣ်မ့ၢ်ဂ့ၤ တအိၣ်ဒီးလုၢ်လၢ်လၢအဂၤဘၣ်.
၁၇ ဖဲယဟ့ၣ်လီၤသု တၢ်ဟံးစုနဲၣ်ကျဲတဖၣ်အံၤအခါ ယတစံးပတြၢၤသုဘၣ်, မ့ၢ်လၢ သုမၤတၢ်အိၣ်ဖှိၣ်န့ၣ် တကဲဘျုးလၢသုဂီၢ်ဘၣ်. တကးဒံးဘၣ် ကဲထီၣ်တၢ်ဘၣ်ဒိဘၣ်ထံး လၢသုဂီၢ်လီၤ. ၁၈ အဆိကတၢၢ်န့ၣ် ယနၢ်ဟူဘၣ်လၢ ဖဲသုအိၣ်ဖှိၣ်လၢ တၢ်အိၣ်ဖှိၣ်ပူၤအခါ တၢ်လီၤမုၢ်လီၤဖး အိၣ်ဝဲလၢ သုကျါလီၤ. ဒီးယနာ်စ့ၢ်ကီးအီၤ ဖဲအကြၢးလီၤ. ၁၉ ဒီးဒ်သိးပှၤလၢသုကျါ လၢကစၢ်ယွၤ ဘၣ်သးဝဲတဖၣ် ကဖျါထီၣ်အဂီၢ် တၢ်လီၤမုၢ်လီၤဖး ကအိၣ်ဝဲလၢသုကျါ သပှၢ်ကတၢၢ်လီၤ.+
၂၀ ဖဲသုဟဲအိၣ်ဖှိၣ်သကိးလၢ တၢ်လီၢ်တပူၤဃီအခါ နီၢ်ကီၢ်န့ၣ် တမ့ၢ်လၢသုကအီၣ် ကစၢ်ဟါတၢ်အီၣ်အဂီၢ်ဘၣ်.+ ၂၁ ဖဲသုအီၣ် ကစၢ်ဟါတၢ်အီၣ်အခါ မ့ၢ်လၢသုဝဲတနီၤ အီၣ်ဆိပာ်စၢၤ ဟါတၢ်အီၣ်အဃိ တဂၤန့ၣ် မူၤဝဲ ဒီးအဝဲတဂၤန့ၣ် လီၤဘဲ* အီၣ်တၢ်လီၤ. ၂၂ လၢသုကအီၣ်တၢ် အီတၢ်အဂီၢ်န့ၣ် သုဟံၣ်တအိၣ်ဧီၤ. မ့ၢ်သုတပာ်ကဲ ကစၢ်ယွၤ အတၢ်အိၣ်ဖှိၣ်ဘၣ်ဧါ. မ့ၢ်သုမၤမဲာ်ဆှး ပှၤလၢအတၢ်တအိၣ် နီတမံၤဘၣ်တဖၣ်န့ၣ်ဧါ. မ့ၢ်ယကဘၣ်တဲသု ဒ်လဲၣ်. မ့ၢ်ယကြၢး ပတြၢၤသုဧါ. လၢတၢ်ဂ့ၢ်အံၤအဃိ ယတပတြၢၤသုဘၣ်.
၂၃ တၢ်လၢ ယဒိးန့ၢ်ဘၣ်လၢ ကစၢ်အအိၣ်န့ၣ် ယဟ့ၣ်လီၤသုလီၤ. ဖဲနၤတနၤလၢ ကစၢ်ယ့ၣ်ၡူး ကဘၣ် တၢ်ဟ့ၣ်လီၤကွံာ်အီၤန့ၣ်+ အဝဲဟံးန့ၢ်ကိၣ်, ၂၄ စံးဘျုးကစၢ်ယွၤဝံၤဒီး ဘိးကၢ်ဝဲ ဒီးတဲဝဲလၢ “ကိၣ်အံၤ ဒိလီၤဝဲယနီၢ်ခိ+ လၢအဘၣ် တၢ်ဟ့ၣ်လီၤကွံာ်အီၤလၢ သုဂီၢ်လီၤ. ဆဲးမၤဒ်အံၤလၢ တၢ်သ့ၣ်နီၣ်ထီၣ်က့ၤယၤ အဂီၢ်တက့ၢ်.”+ ၂၅ ဖဲအဝဲသ့ၣ်အီၣ်ဟါတၢ်အီၣ် ဝံၤအခါ အဟံးန့ၢ် စပံးထံတခွးဒီး+ မၤဝဲဒ်န့ၣ်စ့ၢ်ကီးလီၤ. အတဲဝဲလၢ “စပံးထံတခွးအံၤ ဒိလီၤဝဲ တၢ်အၢၣ်လီၤအီလီၤအသီလၢ+ အကဘၣ်တၢ်ပာ်ဂၢၢ်ပာ်ကျၢၤအီၤ ခီဖျိယသွံၣ်လီၤ.+ ဖဲသုအီအီၤ တဘျီဂ့ၤတဘျီဂ့ၤန့ၣ် ဆဲးမၤဒ်အံၤလၢ တၢ်သ့ၣ်နီၣ်ထီၣ်က့ၤယၤ အဂီၢ်တက့ၢ်.”+ ၂၆ ဖဲသုအီၣ်ကိၣ်အံၤ ဒီးအီစပံးထံတခွးအံၤ တဘျီဂ့ၤတဘျီဂ့ၤန့ၣ် မ့ၢ်ဒၣ်သုစံၣ်တဲၤတဲလီၤ ကစၢ်အတၢ်သံအဂ့ၢ် တုၤအဝဲဟဲတုၤ တစုလီၤ.
၂၇ အဃိ ပှၤလၢအတကြၢးအီၣ်ကိၣ် ဒီးအီကစၢ်အခွးဘၣ်တဖၣ် အဝဲသ့ၣ် မ့ၢ်အီၣ်ဒီးအီဝဲန့ၣ် မ့ၢ်ဝဲအမၤကမၣ်ဘၣ် ကစၢ်အနီၢ်ခိ ဒီးအသွံၣ်လီၤ. ၂၈ အဆိကတၢၢ် ပှၤတဂၤ မ့ၢ်အအီၣ်ဝဲအီဝဲ ကြၢးဧါ တကြၢးဧါန့ၣ် မ်အဆိကမိၣ်ထံလီၤ အနီၢ်ကစၢ်အသး လီၤတံၢ်လီၤဆဲးတက့ၢ်.+ အမၤဝဲဒ်န့ၣ် မ့ၢ်ဝံၤမး မ်အအီၣ်ကိၣ် ဒီးအီတၢ်လၢ အအိၣ်လၢ ခွးပူၤန့ၣ်တက့ၢ်. ၂၉ ဒီးပှၤလၢ အအီၣ်ဝဲဒီးအီဝဲ ဘၣ်ဆၣ် မ့ၢ်တသ့ၣ်ညါနၢ်ပၢၢ်ဝဲ ကစၢ်အနီၢ်ခိ အခီပညီဘၣ်န့ၣ် မ့ၢ်အအီၣ်ဝဲဒီးအီဝဲလၢ အနီၢ်ကစၢ် အတၢ်စံၣ်ညီၣ်အဂီၢ်လီၤ. ၃၀ အဃိ ပှၤလၢသုကျါအါဂၤန့ၣ် အဂံၢ်စၢ်ဘါစၢ် ဒီးဆူးဝဲဆါဝဲ ဒီးတနီၤန့ၣ် သံလံ.*+ ၃၁ ပမ့ၢ် ဆိကမိၣ်ထံလီၤပသးလၢ ပမ့ၢ်ပှၤဒ်လဲၣ် တဂၤလဲၣ်န့ၣ် တမ့ၢ်လၢပကဘၣ် တၢ်စံၣ်ညီၣ်ဘၣ်. ၃၂ ဘၣ်ဆၣ် ဖဲပဘၣ်တၢ်စံၣ်ညီၣ်အခါ မ့ၢ်ဝဲ ယဟိဝၤယွၤ* သိၣ်ပှၤ+ ဒ်သိးပသုတဘၣ် တၢ်စံၣ်ညီၣ်ဃုာ်ဒီး ဟီၣ်ခိၣ်တဂ့ၤအဂီၢ်လီၤ.+ ၃၃ အဃိ ယဒီပုၢ်ဝဲၢ်သ့ၣ်ဧၢ, ဖဲသုဟဲအိၣ်ဖှိၣ်သကိး ဒ်သိးသုကအီၣ်ကစၢ်ဟါတၢ်အီၣ်အခါ အိၣ်ခိးလိာ်သး တဂၤဒီးတဂၤတက့ၢ်. ၃၄ ပှၤမ့ၢ်လီၤဘဲ တဂၤဂၤန့ၣ် မ်အအီၣ်ဆိပာ်စၢၤတၢ်လၢ အဟံၣ်တက့ၢ်. သုမ့ၢ်မၤဒ်န့ၣ်န့ၣ် ဖဲသုအိၣ်ဖှိၣ်သကိးအခါ တမ့ၢ်လၢ တၢ်စံၣ်ညီၣ်အဂီၢ်ဘၣ်.+ မ့မ့ၢ် ဘၣ်ဃးဒီး တၢ်ဂ့ၢ်တၢ်ကျိၤ အဂၤတဖၣ်န့ၣ် ယကမၤဘၣ်ဂီၢ်က့ၤအီၤ ဖဲယလဲၤတုၤဖဲန့ၣ် အခါလီၤ.